ფინანსური პრობლემების გამო ტელეკომპანია “ფორმულა” ცვლის საეთერო ბადეს და არხზე თანამშრომლებს ამცირებს. ამის შესახებ 5 ივლისის საღამოს, კვირის შემაჯამებელ გადაცემაში, არხის დირექტორმა, მიშა მშვილდაძემ განაცხადა. მან თქვა, რომ ოპტიმიზაცია საჭიროა იმისათვის, რომ არხმა ფინანსურ კრიზისში გადარჩენა და მაუწყებლობის გაგრძელება შეძლოს:  “ეს იქნება პასუხი იმაზე, რის წინაშეც “ფორმულა” ხელისუფლების დიდი მონდომების შედეგად აღმოჩნდა. ეს ძალიან მძიმე ამბავია, განსაკუთრებით ტელევიზიისთვის, ყველა ჩვენი თანამშრომელი ფრონტის მეგობარივით არის უკვე. ეს არ იყო ჩვეულებრივი გზა, რაც ამ მედიამ გაიარა – ეს იყო ჩვეულებრივი ბრძოლა”.

6 ივლისს ადრიანი დილის გადაცემა ეთერში უკვე აღარ გავიდა. მაუწყებლობა 12:00 საათზე დაიწყო, შეცვლილი გადაცემით “გამარჯობა საქართველო”. ამ გადაცემის წამყვანმა ირაკლი კიკნაველიძემ განაცხადა, რომ მრავალი თვეა “ფორმულას” თანამშრომლები უხელფასოდ მუშაობენ: “რა ხანია, „ფორმულას“ თანამშრომლებმა არ ვიცით, რა არის დროულად და სრულად ანაზღაურების აღება, მაგრამ მაინც ვახერხებთ ამ საქმის კეთებას ისე, რომ ეს ჩვენს რეიტინგს არ დატყობია, უფრო – პირიქით. „ფორმულა“ უნდა გადარჩეს! ეს ეთერი არ უნდა ჩაქრეს! ესაა ჩვენი მიზანი და ამ მიზნიდან გამომდინარე, მზად ვართ მივიღოთ ნებისმიერი მტკივნეული გადაწყვეტილება”.