„ქართული ოცნების“ დეპუტატმა ლევან მაჭავარიანმა სოციალურ ქსელში ოპოზიციური პარტიების, არასამთავრობო ორგანიზაციებისა და აქტივისტების წინააღმდეგ დისკრედიტაციული განცხადება გაავრცელა. მაჭავარიანი მათ „აგენტურულ ოპოზიციურ პარტიებად“, „მდიდარ NGO-ებად“ და „ულტრამემარცხენე, ფსევდოლიბერალ აქტივისტებად“ მოიხსენიებს. მისი თქმით, ისინი „უცხოელ პატრონებს“ და „ქვეყნის შიგნით რამდენიმე ელჩს“ ემსახურებიან, მათი დღის წესრიგი კი „საქართველოს მუდმივი რყევა“, „საბოტაჟი“, „დესტაბილიზაცია“ და „მავნებლობაა“.

განცხადებაში დეპუტატი ოპოზიციურ პარტიებს, არასამთავრობო ორგანიზაციებსა და აქტივისტებს ბოლო წლებში „რევოლუციის მოწყობის“ მცდელობაში, ქვეყნის წინააღმდეგ მოქმედებაში, ეკლესიისა და სამღვდელოების დისკრედიტაციაში, ასევე „LGBT პროპაგანდის“ მხარდაჭერაში ადანაშაულებს. მაჭავარიანი მათ „უსამშობლოებსაც“ უწოდებს და აცხადებს, რომ საზოგადოებისთვის „ბოდიში აქვთ მოსახდელი“.

„ქართული ოცნების“ წარმომადგენლის მხრიდან მსგავსი რიტორიკა სამოქალაქო საზოგადოების, ოპოზიციური პარტიებისა და კრიტიკული აქტივისტების წინააღმდეგ მიმდინარე დისკრედიტაციული კამპანიის გაგრძელებად შეიძლება შეფასდეს. „აგენტურის“, „უცხოელი პატრონების“, „უსამშობლოებისა“ და „მავნებლობის“ შესახებ ფორმულირებები მიზნად ისახავს კრიტიკული ჯგუფების ლეგიტიმაციის დაკნინებას, მათი საქმიანობის ანტისახელმწიფოებრივად წარმოჩენას და მათ მიმართ მტრული გარემოს გაძლიერებას.