სამოქალაქო აქტივისტ თორნიკე რაზმაძეს ჯარიმა ან ადმინისტრაციული პატიმრობა ემუქრება სოციალურ ქსელ Facebook-ში რუსი პროპაგანდისტის მარგარიტა სიმონიანის შესახებ დაწერილი, გინების შემცველი კომენტარის გამო. „საქართველოს შინაგან საქმეთა სამინისტრო მედავება რუს პროპაგანდისტებს, მარგარიტა სიმონიანისა და ვლადიმირ სოლოვიოვს რატომ მიაყენე შეურაცხყოფა და რატომ აგინეო“, – განაცხადა აქტივისტმა 10 სექტემბრის ვიდეომიმართვაში.

აქტივისტის წინააღმდეგ საქმის წარმოება “სიძულვილის ენის მონიტორინგის სამართველოს” ოქმის საფუძველზე დაიწყო. საქმის წარმოება დაწყებულია ადმინისტრაციულ სამართალდარღვევათა კოდექსის 166, პრიმა მუხლით, რაც „წვრილმან ხულიგნობას“ გულისხმობს და 500-დან 3000 ლარამდე ჯარიმით ან 20 დღემდე ადმინისტრაციული პატიმრობით ისჯება.

როგორც ირკვევა, შინაგან საქმეთა სამინისტროს “სიძულვილის ენის მონიტორინგის  სამმართველომ” საქმის წარმოება დაიწყო სოციალურ ქსელში თავად თორნიკე რაზმაძის მიერ ატვირთული ვიდეოს ქვეშ დაწერილი კომენტარის გამო.  ვიდეორგოლში გეორგიევსკის ტრაქტატთან დაკავშირებით რუსი პროპაგანდისტის მარგარიტა სიმონიანისა და „ქართული ოცნების“ პრემიერ-მინისტრის ირაკლი კობახიძის განცხადებებია შედარებული. კომენტარში კი, რაზმაძე უცენზურო ლექსიკას იყენებს ვიდეოს რესპონდენტების მისამართით.