გორში 26 სექტემბერს დაგეგმილი მუსიკოს ალექსანდრე კორძაიას, Kordz-ის კონცერტი გადაიდო. კონცერტი „კამარა ფესტივალის“ ფარგლებში უნდა გამართულიყო, რომლის ორგანიზატორი დანიის კულტურის ინსტიტუტი იყო. ორგანიზატორის განცხადებით, ფესტივალი დაგეგმილი ფორმით უსაფრთხოების მიზნებიდან გამომდინარე ვერ ჩატარდება.

მუსიკოსის განცხადებით, გორში დაგეგმილი კონცერტი „სერიოზული საფრთხის ქვეშ იყო“. კორძაია მიზეზად ადგილობრივი ხელისუფლების, „ქართული ოცნების“ წევრებისა და პროსამთავრობო მედიის მხრიდან შეტევასა და მუქარას ასახელებს და წერს, რომ ადგილზე უსაფრთხოების გარანტია არ არსებობდა. 

კონცერტის ჩაშლას წინ უძღოდა სახელისუფლებო აქტორებისა და მედიის კამპანია და შეკითხვები ევროკავშირის ელჩის მიმართ, „იზიარებს თუ არა ევროკავშირი პასუხისმგებლობას მილიონზე მეტი ქართველის შეურაცხყოფაზე“. Kordz-ის კონცერტი „ქართული ოცნების“ დეპუტატები მხრიდან „რადიკალიზმის წახალისებად“ და „საზოგადოებაში პოლარიზაციის გაღვივების ხელშეწყობად“ შეფასდა. 

ფესტივალის გადადებას გამოეხმაურა ევროკავშირის საელჩოც. საელჩომ სინანული გამოთქვა, რომ ევროკავშირის მიერ დაფინანსებული „კრეატიული კომპასი საქართველოს“ პროექტის ფარგლებში დაგეგმილი ფესტივალი ორგანიზატორებმა უსაფრთხოებასთან დაკავშირებული მოსაზრებების გამო გადადეს. 

ევროკავშირის საელჩოს განცხადებას პარლამენტის თავმჯდომარე შალვა პაპუაშვილი გამოეხმაურა და საელჩო „სიძულვილის ენის“ წაქეზებაში დაადანაშაულა. პაპუაშვილმა Kordz-ს „საქართველოს მოსახლეობის უმრავლესობის მაგინებელი“ უწოდა და განაცხადა, რომ ევროკავშირის საელჩო „ფაშიზმის, რადიკალიზმისა და გინების“ წახალისებით არის დაკავებული.

ალექსანდრე კორძაია ერთ-ერთია იმ მუსიკოსებს შორის, რომლებიც პროევროპული საპროტესტო აქციების მხარდამჭერებად არიან ცნობილი. 2026 წლის ივლისში მას თბილისში თავს დაესხნენ.