სინდისის პატიმრის, საბა სხვიტარიძის დედას, ელენე ახობაძეს, ანგარიშები დაუყადაღეს. ინფორმაცია სოციალურ ქსელში თავად ელენე ახობაძემ გაავრცელა. “გუშინ, ხარების დღესასწაულზე, აღდგომის კვირეულში, ამ „მორწმუნე“ ხელისუფლებამ სრულიად გაუფრთხილებლად დამადო ყადაღა არარსებულ ჯარიმაზე. არც შეტყობინება და არც ჯარიმა არ მომსვლია”, - დაწერა მან.

სამოქალაქო აქტივისტი ანა ინგოროყვა სოციალურ ქსელში წერს, რომ აქტივისტ დათა ჩაჩუას მიმართ დაიწყო აღსრულების პროცედურები და მას ყადაღა დაედო ისე, რომ ჯარიმის შესახებ წინასწარ ინფორმაცია არ მიუღია. მისივე ინფორმაციით, დეტალების დაზუსტების მიზნით განხორციელებული კომუნიკაციისას განემარტა, რომ დათა ჩაჩუა 2025 წლის მარტში ადმინისტრაციულად იყო დაჯარიმებული გზის გადაკეტვის საფუძვლით. დაკისრებული ჯარიმის ოდენობა შეადგენს 5,350 ლარს.