სამართლებრივი დევნა

რეპრესიული კანონების აღსრულების მიზნით, ანტიკორუფციული ბიურო მედიებისგან ინფორმაციას ითხოვს

2025 წლის მაისიდან, მას შემდეგ, რაც რეპრესიული კანონები ამოქმედდა, ანტიკორუფციულმა ბიურომ 60-ზე მეტ არასამთავრობო ორგანიზაციას დიდი რაოდენობით ინფორმაციის გაგზავნა მოსთხოვა, მათ შორის რამდენიმე მედიასაშუალებასაც. აღნიშნული მოთხოვნის საფუძველი გრანტების შესახებ კანონია. გრანტების შესახებ” კანონში ცვლილება “ქართულმა ოცნებამ” 2025 წლის 16 აპრილს მიიღო. ცვლილებების თანახმად გრანტის გამცემმა (დონორმა) გრანტის გაცემაზე თანხმობის მისაღებად უნდა მიმართოს საქართველოს მთავრობას; გრანტის მიმღები, თანხმობის გარეშე გრანტის მიღების შემთხვევაში დაჯარიმდება გრანტის ორმაგი ოდენობით.

29 სექტემბერს, რაჟდენ კუპრაშვილის ბიურომ დამოუკიდებელი გამომძიებელი ჟურნალსიტების გაერთიანებას iFact-ს და GMC-ის მიმართა და გრანტების, დონორების, ფინანსური ოპერაციებისა და ხელშეკრულებების შესახებ ინფორმაცია მოითხოვა.

მანამდე, 26 სექტემბერს, კუპრაშვილის ბიურომ წერილი გაუგზავნა გამოცემა “მთის ამბებსაც”.

“ძალიან გეჩქარებათ ჩვენი მოგუდვა. აგერაა პასუხი! გავაგრძელებთ მუშაობას! საგამოძიებო ფილმების შექმნას ხელისუფლების კანონდარღვევებზე, კორუფციაზე, გარემოს განადგურებაზე, ადამიანის ფუნდამენტური უფლებების დარღვევებზე” – დაწერა “მთის ამბების” დამფუძნებელმა და მთავარმა რედაქტორმა გელა მთივლიშვილმა.

28 სექტემბერს ანტიკორუფციული ბიუროსგან წერილი მიიღო იმავე მოთხოვნებით “მთის თემმა”. ამის შესახებ, ფეისბუკზე დაწერა ორგანიზაციის დირექტორმა ნუგზარ სუარიძემ.

ანტიკორუფციული ბიუროსგან წერილი აგრეთვე მიიღო პროექტმა 64. “ჩვენ ამ დონის კრიზისის წინაშე არასდროს აღმოვჩენილვართ და ეს არ არის მხოლოდ ფინანსური კრიზისი” – განაცხადა გიორგი გოგუამ პროექტ 64-ის რედაქტორმა.

ანტიკორუფციულმა ბიურომ წერილით მიმართა საქართველოს ჟურნალისტური ეთიკის ქარტიასაც.

“ანტიკორუფციული ბიუროს მიერ დაწყებული წარმოება პირველი პრაქტიკული ნაბიჯია ახალი კანონმდებლობის გამოყენებით ძალიან ბევრი კარგი ჟურნალისტის დიდი ძალისხმევით შექმნილი მაღალი რეპუტაციის მქონე ორგანიზაციის გასანადგურებლად” – წერია ჟურნალისტური ეთიკის ქარტიის განცხადებაში.

არასამთავრობო ორგანიზაციების ხელმძღვანელები გამოკითხვაზე დაიბარეს

წამყვანი ქართული არასამთავრობო ორგანიზაციების ხელმძღვანელები, რომელთა შორის არიან მედიის საკითხებზე მომუშავე “მედიის ადვოკატირების კოალიციის” წევრი ორგანიზაციებიც, პროკურატურაში გამოკითხვაზე დაიბარეს. გამოკითხვა უკავშირდება ე.წ. “პირბადეების საქმეს”, რომელზეც პროკურატურამ 2025 წლის თებერვალში დაიწყო გამოძიება “საბოტაჟის, დამამძიმებელ გარემოებაში საბოტაჟის მცდელობის და სხვა მსგავსი დანაშაულების ირგვლივ”. ორგანიზაციების შეფასებით, ეს გამოძიება უსაფუძვლოა და მიზნად ისახავს სამოქალაქო სექტორის დევნას, შევიწროებასა და განადგურებას.

საჯაროდ გავრცელებულ ინფორმაციაზე დაყრდნობით, გამოკითხვაზე დაბარებულთა შორის არიან: „სოციალური სამართლიანობის ცენტრის” ხელმძღვანელი – თამთა მიქელაძე, „სამართლიანი არჩევნებისა და დემოკრატიის საერთაშორისო საზოგადოების“ (ISFED) ყოფილი და მოქმედი დირექტორები, ნინო დოლიძე და ლევან ნატროშვილი, „დემოკრატიის მცველების“ ხელმძღვანელი – გიორგი მშვენიერაძე, ორგანიზაცია “საფარის” დირექტორი ბაია პატარაია და “ადამიანის უფლებათა ცენტრის” ხელმძღვანელი ალეკო ცქიტიშვილი. მათ სოციალურ ქსელში დაწერეს, რომ გამოკითხვას მხოლოდ მაგისტრი მოსამართლის წინაშე დათანხმდებიან. ყველა მათგანი უკვე გამოიკითხა სასამართლოში.

შეგახსენებთ, ამავე საქმის ფარგლებში, პროკურატურის მოთხოვნის საფუძველზე, 2025 წლის 27 აგვისტოს ყადაღა დაედო შვიდი ორგანიზაციის ანგარიშს: “მედია ადვოკატირების კოალიციის” წევრებს – “სამოქალაქო საზოგადოების ფონდი“, ISFED, IDFI, GDI, ასევე, ადამიანის უფლებებსა და კორუფციაზე მომუშავე ორგანიზაციებს – „დემოკრატიის მცველები“, „საფარი“ და „სოციალური სამართლიანობის ცენტრი“.

“მედიის ადვოკატირების კოალიციის” წევრ ორგანიზაციებს ანგარიშები დაუყადაღეს

არასამთავრობო ორგანიზაციების წინააღმდეგ, რომელთა შორის არიან “მედიის ადვოკატირების კოალიციის” წევრი ორგანიზაციებიც, საქართველოს პროკურატურამ გამოძიება დაიწყო “საბოტაჟის, დამამძიმებელ გარემოებაში საბოტაჟის მცდელობის, უცხოეთის ორგანიზაციისათვის და უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარების და საქართველოს კონსტიტუციური წყობილების და ეროვნული უშიშროების საფუძვლების წინააღმდეგ მიმართული საქმიანობისთვის ფინანსების მობილიზების“ ბრალდებით.

2025 წლის 27 აგვისტოს, თბილისის საქალაქო სასამართლომ დააკმაყოფილა პროკურატურის მოთხოვნა და ამ ორგანიზაციების საბანკო ანგარიშები დააყადაღა.

პროკურატურის მიერ განცხადების გავრცელებიდან რამდენიმე წუთში პროსამთავრობო ტელეკომპანია “იმედმა” გამოძიების მხარდაჭერი სიუჟეტი გაავრცელა, კერძოდ სამოქალაქო სექტორის წარმომადგენლების კომენტარები პროევროპული აქციებიდან. პროკურატურის ბრალდება ორგანიზაციებს ედავება პრო-ევროპული აქციების მონაწილეებისთვის სპეციალური ეკიპირების (როგორიცაა სპეციალური აირწინაღები, ჩაფხუტები, სახის დასაფარი ნიღბები, პირბადეები, დამცავი სათვალეები) შესაძენად თანხების მობილიზებას.

50-ზე მეტმა სამოქალაქო და მედია ორგანიზაციამ სოლიდარობა გამოუცხადა ყადაღადადებულ ორგანიზციებს.

“ქართული არასამთავრობო ორგანიზაციების წინააღმდეგ, რუსეთის ხელისუფლების მსგავსი, სადამსჯელო ნაბიჯების გადადგმა ადასტურებს, რომ ივანიშვილის მთავრობის ინტერესი, საქართველოში განსხვავებული აზრისა და პროევროპული ჯგუფების სრულად განადგურებაა” – ნათქვამია განცხადებაში.

პროკურატურის მოთხოვნის საფუძველზე 27 აგვისტოს, შვიდი ორგანიზაციის ანგარიში დააყადაღეს, ესენია: „სამოქალაქო საზოგადოების ფონდი“, „სამართლიანი არჩევნებისა და დემოკრატიის საერთაშორისო საზოგადოება“ (ISFED), „ინფორმაციის თავისუფლების განვითარების ინსტიტუტი“ (IDFI), „დემოკრატიის მცველები“, „საქართველოს დემოკრატიულ ინიციატივა“ (GDI), „საფარი“ და „სოციალური სამართლიანობის ცენტრი“. აქედან, „სამოქალაქო საზოგადოების ფონდი“, ISFED, IDFI და GDI “მედიის ადვოკატირების კოალიციის” წევრები არიან.

ანტიკორუფციული ბიურო “მედიის ადვოკატირების კოალიციის” წევრ ორგანიზაციებს გრანტების შესახებ ინფორმაციას სთხოვს

2025 წლის 11 აგვისტოს, არასამთავრობო ორგანიზაციებმა, რომელთაგან ოთხი “მედიის ადვოკატირების კოალიციის” წევრია, ანტიკორუფციული ბიუროსგან მორიგი წერილი მიიღეს, რომელშიც “FARA”-ს დარღვევას ედავებიან. აღნიშნული ორგანიზაციებია: სამოქალაქო საზოგადოების ფონდი”, “საერთაშორისო გამჭვირვალობა – საქართველო”, “მედიის განვითარების ფონდი” და “სამართლიანი არჩევნებისა და დემოკრატიის საერთაშორისო საზოგადოება [ISFED]”.

„გვემუქრებიან სისხლისსამართლებრივი პასუხისმგებლობით და გვთხოვენ განმარტებებს, თუ რატომ არ დავრეგისტრირდით აგენტებად,” – აღნიშნეს ორგანიზაციებმა ერთობლივ განცხადებაში.

კოალიციის წევრების განცხადებით “FARA” მათ არ ეხებათ და “რუსული კანონების” შესრულებას არ აპირებენ.

„ჩვენი მისია არჩევნების დაკვირვება, კორუფციისა და დეზინფორმაციის მხილება, დემოკრატიის დაცვა და ქართველი ხალხის დახმარებაა“- ნათქვამია ორგანიზაციების განცხადებაში.

პირველი წერილი ანტიკორუფციული ბიუროსგან არასამთავრობო ორგანიზაციებმა 2025 წლის ივნისში მიიღეს.

ფაქტების გადამოწმების საერთაშორისო ქსელმა (IFCN), რომლის წევრიც არის “მედიის განვითარების ფონდი”, დაგმო საქართველოში ფაქტების გადამმოწმებლებისა და სამოქალაქო საზოგადოების შევიწროება.
“გამოძიებები, რომლებიც ანტიკორუფციულმა ბიურომ დაიწყო, ასევე ე.წ. უცხოური აგენტების კანონის საფუძველზე სისხლისსამართლებრივი პასუხისმგებლობის მუქარა, საგანგაშო ესკალაციაა იმ ორგანიზაციების წინააღმდეგ, რომლებიც საზოგადოებას სანდო ინფორმაციას აწვდიან,” – წერია IFCN-ის მიერ გავრცელებულ განცხადებაში.

ანტიკორუფციული ბიურო “მედიის განვითარების ფონდისგან” გრანტების შესახებ ინფორმაციას ითხოვს

2025 წლის 19 ივნისს, ორგანიზაცია “მედიის განვითარების ფონდს” (MDF) ჩაბარდა სასამართლოს განჩინება, რომლის თანახმად, ანტიკორუფციულმა ბიურომ ორგანიზაციის საქმიანობის შესწავლა დაიწყო. ბიურო ორგანიზაციას დიდი მოცულობის ინფორმაციის მიწოდებას სთხოვს, მათ შორის ბენეფიციარებისა და პარტნიორების პერსონალურ მონაცემებს.

დოკუმენტებით ირკვევა, რომ სასამართლოსადმი მიმართვის ერთ-ერთი საფუძველია არასამთავრობო ორგანიზაციების მიერ მედიის თავისუფლების მდგომარეობისა და მედიის წარმომადგენლებზე ზეწოლის შესახებ ერთობლივი განცხადებების გამოქვეყნება. MDF-მა სასამართლოს მიერ მიღებული გადაწყვეტილება სასამართლოში გაასაჩივრა .

MDF ფაქტების გადამოწმების ევროპული სტანდარტების ქსელის (EFCSN) წევრი ორგანიზაციაა. EFCSN-მა გაავრცელა საჯარო განცხადება, რომლითაც ის სოლიდარობას აცხადებს საქართველოში ფაქტების გადამოწმების პლატფორმებს. EFCSN-ის განცხადებაში ნათქვამია, რომ მითების დეტექტორი (MDF-ის პროექტი) გამჭვირვალობისა და ჟურნალისტური მეთოდოლოგიის კუთხით მაღალი სტანდარტებით ხელმძღვანელობს.

MDF-ის გარდა, ანტიკორუფციულმა ბიურომ საქმის წარმოება დაიწყო, “მედიის ადვოკატირების კოალიციის” წევრი კიდევ სამი ორგანიზაციის “საერთაშორისო გამჭვირვალობა საქართველოს”, “სამოქალაქო საზოგადოების ფონდისა” და “სამართლიანი არჩევნების” მისამართით. ჯამში, სასამართლო უწყება უკვე 7 სამოქალაქო ორგანიზაციას მიუვიდა.
“მედიის ადვოკატირების კოალიცია” “რუსული კანონების” ამოქმედებას აფასებს როგორც “სამოქალაქო ორგანიზაციების წინააღმდეგ კოორდინირებულ შეტევას”. მედია ადვოკატირების კოალიცია მიმართავს საქართველოს ყველა დემოკრატიულ ძალას, მედია ორგანიზაციას, სამოქალაქო საზოგადოების წარმომადგენელს და თითოეულ მოქალაქეს – გააერთიანონ ძალები მედიისა და სამოქალაქო საზოგადოების მხარდასაჭერად. “მედიის თავისუფლებისა და სამოქალაქო საზოგადოების დაცვა არის დემოკრატიის თავისუფლების საფუძველი”, – ნათქვამია განცხადებაში

საჯარო რეესტრი ტელეკომპანია “ფორმულას” საკადრო ცვლილებების რეგისტრაციას უჭიანურებს

ტელეკომპანია “ფორმულას” ინფორმაციით, საჯარო რეესტრი აჭიანურებს ტელევიზიის აღმასრულებელ რგოლში განხორციელებული საკადრო ცვლილებების რეგისტრაციას.

როგორც „ფორმულა“ წერს, ტელეკომპანიამ საჯარო რეესტრს 2025 წლის 1 ივნისს მიმართა დირექტორისა და სამეთვალყურეო საბჭოს ცვლილებების დასარეგისტრირებლად. რეესტრის მოთხოვნის შესაბამისად, რეგისტრაცია დროებით შეჩერდა. 10 ივნისს, კომპანიამ რეესტრს წარუდგინა ყველა დამატებით მოთხოვნილი დოკუმენტაცია. გადაწყვეტილება მომდევნო სამუშაო დღეს უნდა ასახულიყო, თუმცა, მიუხედავად კანონით განსაზღვრული ვადის გასვლისა, საჯარო რეესტრის ეროვნულ სააგენტოს პროცესი დღემდე არ დაუსრულებია.

“ფორმულაში” აცხადებენ, რომ ეს გაჭიანურება ორგანიზაციის საქმიანობას აფერხებს.

ტელეკომპანიის ინფორმაციით, 2025 წლის 14 მაისს, “ფორმულას“ საერთო კრებამ ზურაბ გუმბარიძის დირექტორის თანამდებობიდან გათავისუფლების მოთხოვნა დააკმაყოფილა და ტელევიზიის ახალ დირექტორად ტელეკომპანიის 38.25%-იანი წილის მფლობელი მიხეილ მშვილდაძე განისაზღვრა. არხის ყოფილი დირექტორი, ზურაბ გუმბარიძე კი „ფორმულას“ სამეთვალყურეო საბჭოს თავმჯდომარედ აირჩიეს. საჯარო რეესტრისგან ტელეკომპნია ამ ცვლილებების რეგისტრაციას ელოდება.

პოლიტიკოსების მიმართ სოციალურ ქსელში გამოთქმული კრიტიკული მოსაზრებების გამო ჟურნალისტები სასამართლოში დაიბარეს

2025 წლის 12 ივნისს, სოციალურ ქსელში, “პოლიტიკოსების “ქართული ოცნების” დეპუტატების მიმართ გამოთქმული კრიტიკული მოსაზრებებისთვის, ექვსი ჟურნალისტი: ეკა მიშველაძე (TV პირველი), ვიკა ბუკია (TV პირველი), მიშა მშვილდაძე (TV ფორმულა), დეა მამისეიშვილი (მთავარი არხი), ვახო სანაია (TV ფორმულა) და ნანუკა ჟორჟოლიანი (დამოუკიდებელი ჟურნალისტი) თბილისის საქალაქო სასამართლოში დაიბარეს. მათ აცნობეს, რომ ედავებიან “ქართული ოცნების’ პოლიტიკოსებისთვის ფეისბუქზე შეურაცხყოფის მიყენებას.

ექვსიდან სამი – ეკა მიშველაძე, მიშა მშვილდაძე და დეა მამისეიშვილი, სასამართლომ სამართალდამრღვევად ცნო და ჯარიმები დააკისრა. მიშა მშვილდაძეს და ეკა მიშველაძეს 4-4 ათასი ლარი, დეა მამისეიშვილს კი 3 ათასი ლარი.

მიშა მშვილდაძე დააჯარიმეს “ქართული ოცნების” პარლამენტის თავმჯდომარის, შალვა პაპუაშვილის შესახებ 8 თებერვალს დაწერილი პოსტის გამო. დეა მამისეიშვილს ჯარიმა დაეკისრა 2025 წლის 25 თებერვლის პოსტის გამო, რომელშიც ის “ქართული ოცნების” აღმასრულებელ მდივანს, მამუკა მდინარაძეს ახსენებს. ეკა მიშველაძის დაჯარიმება კი გამოიწვია 31 მაისს დეპუტატ მარიამ ლაშხის შესახებ დაწერილმა სტატუსმა.

ნანუკა ჟორჟოლიანს “ქართული ოცნების” წარმომადგენლების, დეპუტატების თეა წულუკიანისა და მარიამ ლაშხის “შეურაცხყოფას” ედავებიან. მის საქმეზე გადაწყვეტილება 17 ივნისს გამოცხადდება. ასევემ მარიამ ლაშხის შეურაცხყოფისთვის უჩივლეს ვიკა ბუკიას. მისი საქმე 18 ივნისამდე გადაიდო. ასევე 18 ივნისამდე გადაიდო ვახო სანაიას საქმე, რომელსაც ედავებიან “ქართული ოცნების” პარლამენტის თავმჯდომარის შალვა პაპუაშვილის და დეპუტეტების: თეა წულუკიანისა და ირაკლი ზარქუას შეურაცხყოფას.

ექვსივე ჟურნალისტის შემთხვევაში, საჩივრების სამართლებრივი საფუძველი გახდა ადმინისტრაციულ სამართალდარღვევათა კოდექსის ახლად ამოქმედებული 173^16_ე მუხლი, რომელიც პასუხისმგებლობას ითვალისწინებს ისეთი ქმედებებისთვის როგორიცაა:სახელმწიფო-პოლიტიკური თანამდებობის პირის, პოლიტიკური თანამდებობის პირის, სახელმწიფო მოსამსახურის/ მასთან გათანაბრებული პირის ან/და საჯარო მოსამსახურის სიტყვიერი შეურაცხყოფა, ლანძღვა-გინება, შეურაცხმყოფელი გადაკიდება ან/და სხვაგვარი შეურაცხმყოფელი ქმედების განხორციელება სამსახურებრივი მოვალეობის შესრულების დროს ან სამსახურებრივი მოვალეობის შესრულებასთან/საქმიანობასთან დაკავშირებით. ამ ქმედებისთვის განსაზღვრულია 1 500-დან 4 000-მდე ლარი ჯარიმა ან 45 დღემდე პატიმრობა

საქართველოს ახალგაზრდა იურისტთა ასოციაციის შეფასებით, სოციალურ ქსელში გამოქვეყნებული პოსტები, თუ ისინი არ შეიცავენ რეალური რისკის შემცველ მუქარას, და მიმართულია პოლიტიკოსების მიმართ, რომელთაც აქვთ თმენის მაღალი ვალდებულება, დაცულია გამოხატვის თავისუფლებით. “ამ სტანდარტის საწინააღმდეგოდ გაკეთებული ნებისმიერი სასამართლო განმარტება იქნება მასობრივი ცენზურის პრეცედენტი, – ნათქვამია ორგანიზაციის განცხადებაში.

ბათუმის საქალაქო სასამართლოში მზია ამაღლობელის წინააღმდეგ სტიკერის გაკვრის ფაქტზე ახალი სამართალდარღვევის საქმე განიხილება

9 ივნისს, ბათუმის საქალაქო სასამართლო, მზია ამაღლობელის წინააღმდეგ კიდევ ერთ სამართალდარღვევის საქმეს განიხილავს. როგორც 7 მაისს მზია ამაღლობელის წარმომადგენლისა და ახალგაზრდა იურისტთა ასოციაციის ხელმძღვანელის ნონა ქურდოვანიძის მიერ გავრცელებული ინფორმაციით გახდა ცნობილი, ჟურნალისტს შსს კიდევ ერთ სამართალდარღვევას ედავება. ამჯერად, მას შენობის იერსახის დამახინჯებას ედავებიან – 11 იანვრის აქციაზე, იმ საპროტესტო პლაკატის გაკვრისთვის, რომელიც გაკვრისთანავე ააძვრეს.

შეგახსენებთ, რომ ამ ქმედების გამო მზია ამაღლობელი მაშინვე დააკავეს ადმინისტრაციული წესით. თუმცა, როგორც მოგვიანებით გაირკვა, პლაკატის გაკვრა არ წარმოადგენს დაკავების სამართლებრივ საფუძველს, რის გამოც იგი დაახლოებით ერთ საათში გაათავისუფლეს. მოგვიანებით კი შსს-მ დაკავების გასამართლებლად სამართალდარღვევათა ოქმში პოლიციის მოთხოვნისადმი დაუმორჩილებლობა მიუთითა. ამ საქმეზე ორი ინსტანციის სასამართლომ მზია ამაღლობელი უკვე ცნო სამართალდამრღვევად და 2000 ლარით დააჯარიმა.

მიუხედავად იმისა, რომ ფაქტობრივად იგივე ქმედებაზე უკვე დადგენილია სამართალდარღვევა, ბათუმის საქალაქო სასამართლო ახლა განიხილავს იმავე საქმის ახალ სამართლებრივ კვალიფიკაციას. საქმეს მოსამართლე მარიანა ფომაევა განიხილავს, რომელიც თანამდებობაზე გამოსაცდელი ვადით 2024 წლის დეკემბერში დაინიშნა.

შსს-მ მზია ამაღლობელის წინააღმდეგ მორიგი ადმინისტრაციული საქმე დაიწყო

შინაგან საქმეთა სამინისტრომ დამოუკიდებელი გამოცემების, „ბათუმელებისა“ და „ნეტგაზეთის“ დამფუძნებლის, მზია ამაღლობელის წინააღმდეგ კიდევ ერთი ახალი ადმინისტრაციული საქმე დაიწყო.

ამჯერად, შსს-ს ჟურნალისტს 2025 წლის 11 იანვარს – მისი დაკავების საღამოს – ბათუმის პოლიციის დეპარტამენტის წინ, დამხმარე ნაგებობაზე სტიკერის გაკვრას და იერსახის დამახინჯებას ედავება.

4 თვეზე მეტი გავიდა მზია ამაღლობელის დაკავებიდან. ამაღლობელი 11 იანვარს ჯერ ადმინისტრაციული წესით დააკავეს, შემდეგ კი გამოუშვეს და რამდენიმე საათში, – უკვე 12 იანვარს, – ხელახლა დააკავეს, ამჯერად სისხლის სამართლის წესით. უკანონო პატიმრობაში მყოფი ჟურნალისტი დაკავებიდან 38 დღის განმავლობაში შიმშილობდა. საერთაშორისო და ადგილობრივი ორგანიზაციები ჟურნალისტის დაუყოვნებლივ გათავისუფლებას მოითხოვენ.

“პუბლიკის” ფოტორეპორტიორის წინააღმდეგ, რომელიც აქციის გაშუქებისას სამართალდამცველებმა სასტიკად სცემეს, პოლიციამ სასამართლოს მიმართა

2025 წლის 12 თებერვალს, ონლაინგამოცემა “პუბლიკის” ჟურნალისტისა და ფოტორეპორტიორის, ალექსანდრე ქეშელაშვილის წინააღმდეგ შინაგან საქმეთა სამინისტრომ სასამართლოს მიმართა. უწყება ფოტორეპორტიორს ადმინისტრაციული სამართალდარღვევის კოდექსის 166-ე და 173-ე მუხლების დარღვევას ედავება, რაც წვრილმან ხულიგნობასა და პოლიციისადმი დაუმორჩილებლობას გულისხმობს. სასამართლოში პროცესი 25 თებერვალს,16:00 საათზეა ჩანიშნული.

2024 წლის 19 ნოემბერს, იმ დღეს, როდესაც ფოტორეპორტიორს სამართალდარღვევის ჩადენას ედავებიან, რეპორტიორი თავად გახდა სამართალდამცველების სამიზნე; ის თბილისში მიმდინარე პროევროპული აქციის გაშუქებისას დააკავეს და სასტიკად სცემეს: „თავიდანვე ვუმეორებდი, რომ ჟურნალისტი ვარ, მაგრამ, მგონი, მაგან პირიქით იმოქმედა – ისეც მაგინებდნენ და მერე ჟურნალისტობის გამოც დამიმატეს. ერთგვარ „დერეფანში“ გამატარეს, სადაც მირტყამდნენ ხელებს და ფეხებს, ძირითადად – სახეში“, – ამბობს ქეშელაშვილი.

მას სამედიცინო დახმარება და ცხვირზე ქირურგიული ოპერაცია დასჭირდა. ძალადობის საქმეზე გამოძიება დაიწყო სპეციალურმა საგამოძიებო სამსახურმა, თუმცა, ამ დრომდე არ დასჯილა ძალოვანი უწყების არცერთი წარმომადგენელი.