აქტივისტების საჯარო დისკრედიტაცია ან სტიგმატიზაცია

ჯგუფი “გამოუვალი მდგომარეობა” და ევროკავშირის წარმომადგენლობა საქართველოში, კოორდინირებული დისკრედიტაციის კამპანიის სამიზნეები გახდნენ

ჯგუფი “გამოუვალი მდგომარეობა” კოორდინირებული დისკრედიტაციის კამპანიის სამიზნე გახდა მას შემდეგ, რაც მონაწილეობა მიიღო ევროპის დღის აღნიშვნაში, რომელიც საქართველოში ევროკავშირის წარმომადგენლობის ორგანიზებით გაიმართა. დისკრედიტაციული გზავნილები ვრცელდებოდა თავად საქართველოში ევროკავშირის წარმომადგენლობისა და ევროკავშირის ელჩის მისამართითაც. მთავარი წყარო პროსამთავრობო მედია და ასევე, ‘ქართულ ოცნებასთან” დაკავშირებული პირები იყვნენ.

ევროპის დღე წელს 10 ოქტომბერს, კახეთში, მეღვინეობა “მოსმიერში” აღინიშნა. ღონისძიებას ესწრებოდნენ ევროკავშირის წევრი ქვეყნების ელჩები, დიპლომატიური მისიების თანამშრომლები, ევროკავშირის მიერ დაფინანსებული პროექტების წარმომადგენლები და ადგილობრივი მოსახლეობა. საქართველოს ხელისუფლების წარმომადგენლები ღონისძიებას არ დასწრებიან. ევროპის დღე მრვალფეროვან ღონისძიებებს მოიცავდა და ჯგუფ “გამოუვალი მდგომარეობის” კონცერტით დასრულდა.

10-12 ოქტომბერს, ამ ღონისძიებას, დისკრედიტაციის კოორდინირებული კამპანია მოჰყვა “ქართული ოცნების”, პროსამთავრობო მედიისა და მათთან დაკავშირებული პირების მხრიდან. ამ კამპანიით, ჯგუფი “გამოუვალი მდგომარეობა” დაადანაშაულეს ხელისუფლების მხარდამჭერების შეურაცხყოფაში, პაველ ჰერჩინსკი კი დიპლომატიური ნეიტრალიტეტის დარღვევაში. ასევე, ევროპის დღის ღონისძიება ხელისუფლების წინააღმდეგ მიმართულ პოლიტიკურ აქციად შეაფასეს.

“ღმერთმა შეარგოს ცეკვა და მოლხენა. მადლობას არ ვითხოვთ. უბრალოდ გაიაზროს, რომ მისთვის რომ დაგვეჯერებინა, ალბათ, ევროკავშირის ელჩიც არ იქნებოდა საქართველოში, ევაკუირებული იქნებოდა, – განაცხადა საქართველოს პარლამენტის თავმჯდომარემ შალვა პაპუაშვილმა.

„ზედიზედ მეორედ მიიწვიეს ისეთი შემსრულებელი, რომელიც გამოირჩევა ჩვენი მხარდამჭერების მიმართ შეურაცხმყოფელი განცხადებებით, რაც ძალიან სამწუხაროა, – ეს განცხადება პრემიერ-მინისტრს, ირაკლი კობახიძეს ეკუთვნის. (“ოლე – ოლა” საპროტესტო სიმღერაა და ის “ქართულ ოცნებას” განსაკუთრებით აღიზიანებს”.
“ყველაფერი ვიცით, ვინ რას წარმოადგენს და საიდან იმართებიან, – ასე უპასუხა თბილისის მერმა, კახა კალაძემ სამტავრობო მედიის ჟურნალისტის მხრიდან „ევროპის დღე 2026“-ზე ჯგუფ „გამოუვალი მდგომარეობის“ მონაწილეობასთან დაკავშირებით დასმულ შეკითხვას.
“როცა საზოგადოების მაგინებელ მომღერლებს ფულს უხდი და ახალისებ, მიდიხარ და ეუბნები, რომ თურმე მილიონობით ადამიანის გინება – თუნდაც სიმღერით – მაღალი ხელოვნებაა… ამხელა რანგის ადამიანი, პირდაპირი გაგებით, ტინგიცობ ამ მაგინებელი ადამიანების კონცერტზე – რა თქმა უნდა, ამას არ გაატარებს ქართული საზოგადოება”, – ეს განცხადება ფსევდო ოპოზიციის, “ხალხის ძალის” დეპუტატს, გურამ მაჭარაშვილს ეკუთვნის.
“სიმბოლურია ამ ჯგუფის მიწვევა, რადგან „მდგომარეობა, რომელშიც ჰერჩინსკი და მისი უფროსები არიან, ნამდვილად გამოუვალია“ – ეს კი პარტიის „ერთიანი ნეიტრალური საქართველო“ს აღმასრულებელი მდივნის, ვატო შაქარიშვილის პოსტია სოციალურ ქსელში. ეს გზავნილი რამდენჯერმე განმეორდა “ქართულ ოცნებასთან” დაკავშირებული პირების პოსტებში.
“ევროკავშირის წარმომადგენლობამ თავის ღონისძიებაზე მაინცდამაინც “გამოუვალი მდგომარეობა” რომ მიიწვია, ეს ხომ უბრალო მუსიკალური არჩევანი არ არის?.. მართლაც რომ გამოუვალ მდგომარეობაში არიან”, – დაწერა სოციალურ ქსელში პროპაგანდისტული მედია POSTV-ის თანამშრომელმა ლიზა გეგეჭკორმა.

ეს განცხადებები, ორი დღის განმავლობაში ვრცელდებოდა პროსამთავრობო მედიებში.

ეს არ არის პირველი შემთხვევა, როდესაც მმართველ პარტიასტან დაკავშირებული აქტორები პროტესტში ჩართული ხელოვანების, ასევე, დასავლური ინსტიტუტების დისკრედიტაციას ცდილობენ. ცოტა ხნის წინ, ამგვარი კოორდინირებული თავდასხმის სამიზნე იყო მუსიკოსი ალექსანდრე კორძაია, რომელიც, იძულებლი გახდა ჩაეშალა დაგეგმილი კონცერტი.

პარლამენტის თავმჯდომარე, შალვა პაპუაშვილი, არასამთავრობო სექტორის წარმომადგენლების დისკრედიტაციას ეწევა

საქართველოს პარლამენტის თავმჯდომარემ შალვა პაპუაშვილმა არასამთავრობო სექტორი საქართველოს მტრად მოიხსენია, პროევროპული საპროტესტო აქციები კი ანტიქართულ აქციად.

“მიაკვლიეთ, ვინ დააფინანსა ეს კონკრეტული ანტიქართული აქცია, ვინ მისცა ფული საია-ს და ბაია პატარაიას – როგორც კი ფულის წყაროს ნახავთ, ნახავთ თუ ვინ მტრობს საქართველოს! – ამ განცხადებით გამოეხმაურა პარლამენტის თავმჯდომარე შალვა პაპუაშვილი ვარშავაში გამართულ ეუთოს კონფერენციას, რომელსაც ქართული არასამთავრობო ორგანიზაციის „ახალგაზრდა იურისტთა ასოციაციის“ ხელმძღვანელი თამარ ონიანი და „საფარის“ ხელმძღვანელი ბაია პატარაია ესწრებოდნენ. ბაია პატარაია ამ შეხვედრას საპროტესტო ბანერით ესწრებოდა.

ამ ამბავს ეუთოს წევრი ქვეყნები გამოეხმაურნენ. მათ შალვა პაპუაშვილს შეახსენეს, წევრი ქვეყნების ქცევის კოდექსი. “შეშფოთებული ვართ ქართველი სამოქალაქო საზოგადოების წარმომადგენლების მიმართ ამ კონფერენციაში მათ მონაწილეობასთან დაკავშირებით გამოთქმული კომენტარებით, აგრეთვე, ვარშავის ადამიანური განზომილების კონფერენციის მონაწილე სხვადასხვა უფლებადამცველისგან მიღებული ცნობებით. კიდევ ერთხელ ხაზგასმით აღვნიშნავთ, რამდენად მნიშვნელოვანია ეუთოს ღონისძიებებში უსაფრთხო მონაწილეობა, ყოველგვარი საპასუხო ზომების გარეშე“, – განაცხადა ეუთოს თავმჯდომარე ქვეყნის, შვეიცარიის წარმომადგენელმა.

პროსამთავრობო მედიამ სამოქალაქო ორგანიზაციების წარმომადგენლების სტრასბურგში ვიზიტი დისკრედიტაციულად გააშუქა

პროსამთავრობო მედია, ტელეკომპანია “იმედი”, ნინო დოლიძის, გიორგი ბურჯანაძისა და გიორგი ონიანის სტრასბურგში ვიზიტს გამოეხმაურა. გავრცელებული ინფორმაციით, ისინი ევროპის საბჭოს გენერალურ მდივანს, ალენ ბერსეს შეხვდნენ.

„ქრონიკის“ მასალაში ვიზიტი დისკრედიტაციულ კონტექსტში გაშუქდა და შეფასდა როგორც „ნაცნობი სცენარი“ და „საკუთარი ქვეყნის წინააღმდეგ“ მოქმედება. სიუჟეტში ითქვა, რომ ალენ ბერსესთან შეხვედრის თემა, მათივე „მისაღებ მედიაში“ გაკეთებული განცხადებების მიხედვით, კვლავ „სანქციები და სადამსჯელო მექანიზმები“ იყო.

ანალოგიური ნარატივი გაავრცელეს სხვა პროსამთავრობო მედიებმაც, მათ შორის POSTV-მ. აღნიშნულ მასალებში სამოქალაქო ორგანიზაციების წარმომადგენლების ვიზიტი და საერთაშორისო შეხვედრები კვლავ ქვეყნის წინააღმდეგ მიმართულ ქმედებად და სანქციების მხარდაჭერის მცდელობად იყო წარმოჩენილი.

ამგვარი გაშუქება სამოქალაქო ორგანიზაციების წარმომადგენლების საერთაშორისო ადვოკატირებას ქვეყნის წინააღმდეგ მიმართულ ქმედებად წარმოაჩენს. მასალა იმეორებს ნარატივს, რომლის მიხედვითაც კრიტიკული სამოქალაქო აქტორების საქმიანობა არა დემოკრატიული პროცესებისა და ადამიანის უფლებების დაცვისკენ, არამედ სახელმწიფოს დაზიანებისკენ არის მიმართული.

სამოქალაქო საზოგადოებისა და პროტესტის მონაწილეების წინააღმდეგ დისკრედიტაციული რიტორიკა გრძელდება

პრემიერ-მინისტრმა ირაკლი კობახიძემ და პარლამენტის თავმჯდომარე შალვა პაპუაშვილმა „საერთაშორისო გამჭვირვალობა – საქართველოს“ აღმასრულებელი დირექტორის, ეკა გიგაურის შესახებ დისკრედიტაციული განცხადებები გააკეთეს. აღნიშნული განცხადებები მოგვიანებით პროსამთავრობო არხის ტელეკომპანია “იმედის” Facebook-გვერდზე ქარდების სახით გავრცელდა.

შალვა პაპუაშვილის განცხადებით, ეკა გიგაურს „არავინ არაფერს ეკითხება“ და ის „ასრულებს დავალებას, რომელსაც გარედან აძლევენ“. პაპუაშვილი ასევე ამბობს: „თუ გაიგებთ, ვინ აფინანსებს ამ ადამიანს, გაიგებთ, ვინ მტრობს საქართველოს“.

ირაკლი კობახიძემ ეკა გიგაურის ორგანიზაციას „პარტიული დანამატი“ უწოდა და განაცხადა, რომ ის „არასდროს არ იყო არც არასამთავრობო, არც NGO“.

ამასთან, კობახიძის კიდევ ერთი განცხადება მიმდინარე პროტესტის დისკრედიტაციას უკავშირდება. მან პროტესტს „რადიკალების აგენტურის ე.წ. პროტესტი“ უწოდა, ხოლო მისი გაგრძელება „სექტანტობად“ შეაფასა.

მაღალი თანამდებობის პირების მხრიდან მსგავსი განცხადებები და მათი ქარდების სახით გავრცელება იმეორებს ნარატივს, რომელიც კრიტიკულ სამოქალაქო ორგანიზაციებსა და პროტესტის მონაწილეებს არა დამოუკიდებელ სამოქალაქო აქტორებად, არამედ გარე გავლენებით ან პარტიული ინტერესებით მოქმედ ჯგუფებად წარმოაჩენს. მსგავსი გზავნილები ეკა გიგაურის, „საერთაშორისო გამჭვირვალობა – საქართველოსა“ და პროევროპული პროტესტის მონაწილეების წინააღმდეგ მიმდინარე დისკრედიტაციული კამპანიის ნაწილად შეიძლება შეფასდეს.

„იმედის“ ეთერში პროევროპული პროტესტის მონაწილეთა დისკრედიტაციისკენ მიმართული განცხადება გავრცელდა

პროსამთავრობო ტელეკომპანია „იმედის“ გადაცემა „ღია ეთერში“ GIPA-ს ყოფილმა სტუდენტმა განაცხადა, რომ უნივერსიტეტი დატოვა, რადგან, მისი თქმით, ლექტორები სტუდენტებს აქციებზე სიარულს აიძულებდნენ და ამის სანაცვლოდ ქულებს უწერდნენ.

გადაცემის ეს მონაკვეთი „იმედმა“ სოციალურ ქსელშიც გაავრცელა შემდეგი ტექსტით: „ჯიპას“ ყოფილი სტუდენტი: „ჯიპას“ ლექტორები გვაიძულებდნენ, აქციებზე წავსულიყავით და ამაში გვეწერებოდა ქულები“.

ამ შინაარსის განცხადების გავრცელება პროევროპული პროტესტის მონაწილეთა და აქტივისტების წინააღმდეგ მიმდინარე დისკრედიტაციული კამპანიის ნაწილად უნდა შეფასდეს, რადგან ქმნის შთაბეჭდილებას, თითქოს სტუდენტების მონაწილეობა აქციებში არა დამოუკიდებელი სამოქალაქო პოზიციით, არამედ პირადი სარგებლის ან გარე ზეწოლის შედეგად იყო განპირობებული.

ბახმაროში გამართული საგანმანათლებლო სემინარი პროსამთავრობო მედიების და ხელისუფლების წარმომადგენლების კრიტიკის და დისკრედიტაციის სამიზნე გახდა

ბახმაროში თბილისის პოლიტიკური სწავლების სკოლის მიერ ორგანიზებული საგანმანათლებლო სემინარი გაიმართა. გავრცელებული ინფორმაციით, სემინარი ევროპის საბჭოს მხარდაჭერით ჩატარდა და მას დიპლომატიური კორპუსის წარმომადგენლებიც ესწრებოდნენ, მათ შორის ევროკავშირის ელჩი პაველ ჰერჩინსკი.

პროსამთავრობო მედიამ, ტელეკომპანია „იმედმა“, სემინარი „გრანტების შესახებ“ კანონის კონტექსტში გააშუქა და ყურადღება გაამახვილა საკითხზე, ჰქონდა თუ არა სემინარის ორგანიზებასა და დაფინანსებას სახელმწიფოს თანხმობა.

თბილისის პოლიტიკური სწავლების სკოლა, როგორც არასამთავრობო ორგანიზაცია, 1999 წელს დაარსდა. სკოლა ევროპის საბჭოს ეგიდით ფუნქციონირებს და მას პოლიტიკოსი არმაზ ახვლედიანი ხელმძღვანელობს.

საკითხს გამოეხმაურნენ მაღალი თანამდებობის პირებიც. პარლამენტის თავმჯდომარე შალვა პაპუაშვილმა სემინარს „პოლიტიკური პროექტი“ უწოდა და განაცხადა, რომ თუ პროექტს ევროპის საბჭო აფინანსებს, უნდა გაირკვეს, ჰქონდა თუ არა მას მთავრობის თანხმობა. პაპუაშვილმა სემინარი არმაზ ახვლედიანის პოლიტიკურ საქმიანობასაც დაუკავშირა და აღნიშნა, რომ ევროპის საბჭოს წარმომადგენლობას ამ საკითხზე პასუხი აქვს გასაცემი.

სემინართან დაკავშირებით კომენტარი გააკეთა პრემიერ-მინისტრმა ირაკლი კობახიძემაც. მისი განცხადებით, „ყველამ უნდა სცეს პატივი საქართველოს კანონმდებლობას, მათ შორის გამჭვირვალობის შესახებ კანონმდებლობას“. კობახიძის თქმით, ხელისუფლება დაინტერესდება საკითხით და, შესაბამისი გარემოებების დადგენის შემთხვევაში, სამართლებრივი რეაგირება მოჰყვება.

21 სექტემბერს პარლამენტის თავმჯდომარე შალვა პაპუაშვილმა პარლამენტში გამართულ ბრიფინგზე კვლავ ისაუბრა თბილისის პოლიტიკური სწავლების სკოლის მიერ ორგანიზებულ სემინართან დაკავშირებით. პაპუაშვილმა არმაზ ახვლედიანს „რადიკალი ოპოზიციონერი“ უწოდა და ევროპის საბჭოს საქართველოს ოფისის მიმართაც გააჟღერა ბრალდებები. მისი თქმით, შესაძლოა საქმე ეხებოდეს კანონის გვერდის ავლას, რასაც აუდიტის სამსახური შეისწავლის.

იმავე დღეს სახელმწიფო აუდიტის სამსახურმა გაავრცელა ინფორმაცია, რომ ფინანსების გამჭვირვალობის დეპარტამენტში დაიწყო მონიტორინგი ა(ა)იპ „კავშირი თბილისის პოლიტიკური სწავლების სკოლის“ მიერ, სავარაუდოდ, საქართველოს მთავრობის თანხმობის გარეშე გრანტის მიღების ფაქტზე.

უწყების განცხადებით, საკითხის შესწავლისას ის კანონმდებლობით, მათ შორის „გრანტების შესახებ“ საქართველოს კანონით გათვალისწინებული უფლებამოსილების ფარგლებში იმოქმედებს. აუდიტის სამსახურში აცხადებენ, რომ მონიტორინგის ფარგლებში ეტაპობრივად განახორციელებენ ყველა საჭირო მოქმედებას, მათ შორის გამოკითხავენ საკითხთან დაკავშირებით ინფორმაციის მქონე პირებს და შეისწავლიან შესაბამის დოკუმენტაციას.

„გრანტების შესახებ“ კანონში ცვლილებები „ქართულმა ოცნებამ“ 2025 წლის 16 აპრილს მიიღო. ცვლილებების თანახმად, გრანტის გამცემმა გრანტის გაცემაზე თანხმობის მისაღებად საქართველოს მთავრობას უნდა მიმართოს, ხოლო თანხმობის გარეშე გრანტის მიღების შემთხვევაში გრანტის მიმღები გრანტის ორმაგი ოდენობით დაჯარიმდება. ცვლილებებით ანტიკორუფციულ ბიუროს დამატებითი უფლებამოსილებებიც მიენიჭა, მათ შორის ფინანსური ანგარიშის მოთხოვნის, ფიზიკური პირის გამოკითხვისა და განსაკუთრებული კატეგორიის პერსონალური მონაცემების გამოთხოვის უფლება. სამოქალაქო სექტორმა აღნიშნული ცვლილებები გააკრიტიკეს და განაცხადეს, რომ კანონი „მოქალაქეების მმართველი პარტიის სადამსჯელო სისტემის პირისპირ დატოვებას“ და საერთაშორისო მხარდაჭერის შეზღუდვას ისახავს მიზნად.

პარლამენტის თავმჯდომარე, შალვა პაპუაშვილი, პროევროპული პროტესტის დროს დაკავებულების დისკრედიტაციას ეწევა

საქართველოს პარლამენტის თავმჯდომარემ, შალვა პაპუაშვილმა, 2024–2025 წლების აქციებზე დაკავებულ და პატიმრობაში მყოფ 72 პირს „უსინდისობის პატიმრები“ უწოდა.

შესაბამისი განცხადება, პარლამენტის თავმჯდომარემ, სოციალურ ქსელში გამოაქვეყნა. პარლამენტის თავმჯდომარე აღნიშნავს, რომ დაკავებულები არიან იმ პოლიტიკოსებისა და ორგანიზატორების მსხვერპლნი, რომლებმაც მათ რადიკალური ქმედებებისკენ უბიძგეს, ხოლო შექმნილ ვითარებაზე პასუხისმგებლობა არ აიღეს. მიატოვეს.

პაპუაშვილი განცხადებით ამ ადამიანებს ყველაზე ზუსტად შეესაბამებათ ტერმინი „უსინდისობის პატიმრები“.

„ქართული ოცნების“ დეპუტატმა ოპოზიციური პარტიებისა და NGO-ების წინააღმდეგ დისკრედიტაციული განცხადება გაავრცელა

„ქართული ოცნების“ დეპუტატმა ლევან მაჭავარიანმა სოციალურ ქსელში ოპოზიციური პარტიების, არასამთავრობო ორგანიზაციებისა და აქტივისტების წინააღმდეგ დისკრედიტაციული განცხადება გაავრცელა. მაჭავარიანი მათ „აგენტურულ ოპოზიციურ პარტიებად“, „მდიდარ NGO-ებად“ და „ულტრამემარცხენე, ფსევდოლიბერალ აქტივისტებად“ მოიხსენიებს. მისი თქმით, ისინი „უცხოელ პატრონებს“ და „ქვეყნის შიგნით რამდენიმე ელჩს“ ემსახურებიან, მათი დღის წესრიგი კი „საქართველოს მუდმივი რყევა“, „საბოტაჟი“, „დესტაბილიზაცია“ და „მავნებლობაა“.

განცხადებაში დეპუტატი ოპოზიციურ პარტიებს, არასამთავრობო ორგანიზაციებსა და აქტივისტებს ბოლო წლებში „რევოლუციის მოწყობის“ მცდელობაში, ქვეყნის წინააღმდეგ მოქმედებაში, ეკლესიისა და სამღვდელოების დისკრედიტაციაში, ასევე „LGBT პროპაგანდის“ მხარდაჭერაში ადანაშაულებს. მაჭავარიანი მათ „უსამშობლოებსაც“ უწოდებს და აცხადებს, რომ საზოგადოებისთვის „ბოდიში აქვთ მოსახდელი“.

„ქართული ოცნების“ წარმომადგენლის მხრიდან მსგავსი რიტორიკა სამოქალაქო საზოგადოების, ოპოზიციური პარტიებისა და კრიტიკული აქტივისტების წინააღმდეგ მიმდინარე დისკრედიტაციული კამპანიის გაგრძელებად შეიძლება შეფასდეს. „აგენტურის“, „უცხოელი პატრონების“, „უსამშობლოებისა“ და „მავნებლობის“ შესახებ ფორმულირებები მიზნად ისახავს კრიტიკული ჯგუფების ლეგიტიმაციის დაკნინებას, მათი საქმიანობის ანტისახელმწიფოებრივად წარმოჩენას და მათ მიმართ მტრული გარემოს გაძლიერებას.

„ქართულ ოცნებასთან“ აფილირებულ Facebook-გვერდზე არასამთავრობო ორგანიზაციების წინააღმდეგ მორიგი დისკრედიტაციული ქარდი გავრცელდა

„ქართულ ოცნებასთან“ აფილირებულ Facebook-გვერდზე გავრცელდა ქარდი, რომელშიც არასამთავრობო ორგანიზაციები კვლავ „უცხოეთიდან დაფინანსებულ NGO-ებად“ არიან მოხსენიებული. ქარდში გამოყენებულია ამირან სალუქვაძის განცხადება, სადაც ის ორგანიზაციების წარმომადგენლებს „დაქირავებულ პატრიოტებად“ მოიხსენიებს და მოქალაქეებს მის Telegram-არხზე შეერთებისკენ მოუწოდებს.

გავრცელებული ქარდი იმეორებს პროსამთავრობო ნარატივს, რომელიც სამოქალაქო საზოგადოების ორგანიზაციებს არა დამოუკიდებელ საზოგადოებრივ აქტორებად, არამედ „უცხოეთიდან დაფინანსებულ“ და “პოლიტიკური ინტერესებით” მოქმედ ჯგუფებად წარმოაჩენს. მსგავსი ფორმულირებები არასამთავრობო ორგანიზაციების წინააღმდეგ მიმდინარე დისკრედიტაციული კამპანიის გაგრძელებად შეიძლება შეფასდეს.

პროსამთავრობო მედიებმა NGO-ების წინააღმდეგ ერთი და იმავე შინაარსის დისკრედიტაციული ქარდები გაავრცელეს

21 აგვისტოს პროსამთავრობო მედიასაშუალებებმა, მათ შორის POSTV-მ, „რუსთავი 2“-მა და „იმედმა“, არასამთავრობო ორგანიზაციებისა და მათი წარმომადგენლების წინააღმდეგ ერთი და იმავე შინაარსის ქარდები გაავრცელეს.

ქარდებში დისკრედიტაციულ კონტექსტში იყო წარმოჩენილი NGO-ების განცხადებები, რომლებიც ხელისუფლების რიტორიკას აკრიტიკებდნენ და მას „ანტისახელმწიფოებრივ, კრემლისტურ ნარატივებად“ აფასებდნენ. ერთობლივ განცხადებაში ორგანიზაციები მოქალაქეებს მოუწოდებდნენ, არ აჰყოლოდნენ რუსული პროპაგანდის მიერ გავრცელებულ დეზინფორმაციასა და შუღლს, ასევე საუბრობდნენ პოლიტპატიმრების გათავისუფლების, თავისუფალი და სამართლიანი არჩევნების, დემოკრატიული მმართველობისა და ადამიანის უფლებების დაცვის აუცილებლობაზ

მსგავსი შინაარსის ქარდების კოორდინირებულად გავრცელება სამოქალაქო საზოგადოებისა და მედიის წინააღმდეგ მიმდინარე დისკრედიტაციული კამპანიის გაგრძელებად შეიძლება შეფასდეს. „აგენტურისა“ და „უცხოეთიდან დაფინანსებული NGO-ების“ ფორმულირებები მიზნად ისახავს არასამთავრობო ორგანიზაციების ლეგიტიმაციის დაკნინებას, მათი საზოგადოებრივი საქმიანობის ეჭვქვეშ დაყენებას და სამოქალაქო აქტივიზმის მიმართ მტრული გარემოს გაძლიერებას.

გარდა ამისა, „საერთაშორისო გამჭვირვალობა-საქართველოს“ აღმასრულებელი დირექტორის, ეკა გიგაურის დისკრედიტაციისკენ მიმართული ვიდეო გავრცელდა „ქართულ ოცნებასთან“ აფილირებულ Facebook-გვერდზეც. ვიდეოში გამოყენებულია გიგაურის განცხადების ფრაგმენტი, სადაც ის საუბრობს ადამიანებზე, რომლებიც ფულის სანაცვლოდ ქვეყნისთვის საზიანო ქმედებებს სჩადიან. თანდართული წარწერა კი გიგაურს ისე წარმოაჩენს, თითქოს ამ შეფასებას საკუთარ თავზე აკეთებს.