2026 წლის 6 მარტს, ქალაქ თბილისის მერმა კახა კალაძემ, “TV პირველის” ჟურნალისტს ლიკა ჯანყარაშვილს შეურაცხმყოფელად მიმართა. “მოემზადეთ, ნუ მოხვალთ ეგეთი მოუმზადებელი, ორიანს გიწერთ”, – ასე უპასუხა კახა კალაძემ ჟურნალისტს, რომელიც ცდილობდა მიეღო პასუხი შეკითხვაზე, რა გააკეთა  “ქართულმა ოცნებამ” ამერიკის შეერთებულ შტატებთან ურთიერთობის გასაუმჯობესებლად.

ეს არ არის პირველი შემთხვევა, როდესაც თბილისის მერი კრიტიკულ კითხვაზე პასუხის გაცემის ნაცვლად, ჟურნალისტებს  ესხმის თავს და შეურაცხმყოფელად მიმართავს. მაგალითად, 2026 წლის 12 იანვარს, კახა კალაძემ სიტყვიერი შეურაცხყოფა მიაყენა ასევე “TV პირველის” ჟურნალისტს, რომელიც ე.წ. „ჩრდილოვანი ფლოტის“ ნაწილად მონიშნული გემის ყულევის პორტში ყოფნასა და ქვეყნისათვის მეორადი სანქციების დაწესების საფრთხეს უკავშირდებოდა. 2025 წლის 4 ოქტომბერს, ადგილობრივი თვითმმართველობის არჩევნების დღეს, მან ჟურნალისტებს უზრდელები უწოდა. უფრო ადრე, 21 სექტემბერს ჟურნალისტებს მოძალადეები დაუძახა ასევე კრიტიკული შეკითხვის გამო.