სააპელაციო სასამართლომ „საზოგადოებრივი მაუწყებლიდან“ გათავისუფლებული ნინო ზაუტაშვილის საჩივარი არ დააკმაყოფილა

თბილისის სააპელაციო სასამართლომ „საზოგადოებრივი მაუწყებლიდან“ გათავისუფლებული გადაცემა „რეალური სივრცის“ წამყვანის, ნინო ზაუტაშვილის სააპელაციო საჩივარი არ დააკმაყოფილა და თბილისის საქალაქო სასამართლოს გადაწყვეტილება უცვლელი დატოვა.

ზაუტაშვილი სამსახურიდან გათავისუფლების შესახებ ბრძანების ბათილად ცნობას და შესაბამის პოზიციაზე აღდგენას მოითხოვდა. იმ შემთხვევაში, თუ სამსახურში აღდგენა ან ტოლფასი სამუშაოთი უზრუნველყოფა შეუძლებელი იქნებოდა, მისი მოთხოვნა განაცდურის ანაზღაურებასაც ითვალისწინებდა.

„საზოგადოებრივმა მაუწყებელმა“ ნინო ზაუტაშვილი და „მოამბის“ წამყვანი ვასილ ივანოვ-ჩიქოვანი სამსახურიდან 2025 წლის 11 აპრილს გაათავისუფლა. ივანოვ-ჩიქოვანმაც სამსახურიდან გათავისუფლების შესახებ ბრძანება სასამართლოში გაასაჩივრა, თუმცა მისი მოთხოვნა ორი ინსტანციის სასამართლომ არ დააკმაყოფილა.

„ფორმულას“ ჟურნალისტ ნინუცა კეკელიას პარლამენტში აკრედიტაცია ერთი თვით შეუჩერეს

ტელეკომპანია „ფორმულას“ გადაცემა „შაბათის ფორმულას“ ჟურნალისტ ნინუცა კეკელიას საქართველოს პარლამენტში აკრედიტაცია ერთი თვით შეუჩერეს. ტელეკომპანიის მიერ გავრცელებული ინფორმაციით, შესაბამისი გადაწყვეტილება პარლამენტის აპარატის უფროსმა კახა ოქროჯანაშვილმა მიიღო. აკრედიტაციის შეჩერების კონკრეტული საფუძველი ამ დროისთვის გავრცელებულ ინფორმაციაში მითითებული არ არის.

აღნიშნული გადაწყვეტილება პარლამენტში დამოუკიდებელი მედიის წარმომადგენლებისთვის აკრედიტაციის შეჩერების მორიგი შემთხვევაა. 11 ნოემბერს აკრედიტაცია ერთი თვით შეუჩერეს „TV პირველის“ ჟურნალისტ ხატია სამხარაძესაც. მანამდე სხვადასხვა ვადით აკრედიტაცია შეუჩერეს „ფორმულას“, „TV პირველისა“ და სხვა დამოუკიდებელი მედიასაშუალებების წარმომადგენლებს. ონლაინ “პუბლიკას” და საგამოძიებო “სტუდია მონიტორის” არცერთ ჟურნალისტს აკრედიტაციის შეზღუდვის სხვადასხვა ნორმის გამოყენების შედეგად ამჯერად საპარლამენტო აკრედიტაცია არ გააჩნიათ.  

„საქართველოს ჟურნალისტური ეთიკის ქარტიის“ შეფასებით, პარლამენტი აკრედიტაციის მოქმედ წესს სისტემატურად იყენებს კრიტიკულად განწყობილი ჟურნალისტების პროფესიული საქმიანობის შესაზღუდად. ორგანიზაცია აღნიშნავს, რომ მსგავსი შეზღუდვები ხელს უშლის მედიის მუშაობას და უარყოფითად აისახება საკანონმდებლო ორგანოს გამჭვირვალობასა და ანგარიშვალდებულებაზე.

პროსამთავრობო ტელეკომპანია „იმედი“ სამოქალაქო სექტორის დისკრედიტაციას აგრძელებს

15 ნოემბერს ტელეკომპანია „იმედის“ გადაცემა „იმედის კვირაში“ გავიდა სიუჟეტი, რომელშიც დამოუკიდებელი არასამთავრობო ორგანიზაციები „ნაციონალურ მოძრაობასთან“ დაკავშირებულ, უცხოური პოლიტიკური ინტერესების გამტარებელ ქსელად არიან წარმოჩენილი. სიუჟეტში ორგანიზაციებს წინა ხელისუფლების დროს ადამიანის უფლებების დარღვევებზე დუმილში, პოლიტიკურ მიკერძოებასა და ყოფილი ხელისუფლების ინტერესების მომსახურებაში ადანაშაულებენ. სიუჟეტის ცალკეული მონაკვეთები ტელეკომპანია „იმედის“ სოციალურ ქსელებშიც გავრცელდა, დამოუკიდებელი მოკლე ვიდეოკლიპების სახით.

გადაცემაში განსაკუთრებული ყურადღება ეთმობა 2007 წლის 7 ნოემბრის მოვლენებს. პარლამენტის ვიცე-სპიკერი სოზარ სუბარი აცხადებს, რომ არასამთავრობო ორგანიზაციების წარმომადგენლებმა ტელეკომპანია „იმედში“ სპეცრაზმის მოსალოდნელი შეჭრის წინააღმდეგ პროტესტში მონაწილეობაზე უარი თქვეს. ამავე კონტექსტში, „საერთაშორისო გამჭვირვალობა-საქართველოს“ აღმასრულებელი დირექტორის, ეკა გიგაურის მიმართ კვლავ გაჟღერდა დაუსაბუთებელი ბრალდება, რომელიც 2007 წლის 7 ნოემბრის მოვლენების შემდეგ მისთვის კაპიტნის წოდების მინიჭების გარემოებებს უკავშირდება.სიუჟეტში არასამთავრობო ორგანიზაციების საქმიანობა სასამართლო სისტემის კონტროლის მცდელობადაც არის წარმოდგენილი. “ქართული ოცნების” წარმომადგენელი სოზარ სუბარი ამტკიცებს, რომ ე.წ. ვეტინგის მოთხოვნა ორგანიზაციებმა მას შემდეგ წამოაყენეს, რაც სასამართლო მათ ინტერესებს არ დაექვემდებარა. ამასთან, ე.წ. „კასრების საქმეზე“ საუბრისას სუბარი ვარაუდობს, რომ წინა ხელისუფლების დროს უკანონოდ მოპოვებული პირადი ცხოვრების ამსახველი მასალების ნაწილი შესაძლოა კვლავ „ნაციონალური მოძრაობის“ ხელში იყოს და მათ სხვადასხვა პირის შანტაჟისთვის დღემდე იყენებდნენ. 

სიუჟეტის საერთო გზავნილი არასამთავრობო ორგანიზაციების დამოუკიდებლობისა და სანდოობის ეჭვქვეშ დაყენებას ემსახურება. მათი საქმიანობა, მათ შორის ადამიანის უფლებების დაცვა და სასამართლო რეფორმის ადვოკატირება, წარმოჩენილია არა საზოგადოებრივი ინტერესების დაცვად, არამედ ყოფილი ხელისუფლებისა და უცხოური ძალების პოლიტიკური მიზნების განხორციელების საშუალებად.

აღსანიშნავია, რომ ეს არ არის არასამთავრობო ორგანიზაციების დისკრედიტაციის პირველი შემთხვევა. მსგავსი შინაარსის განცხადებები და მასალები არაერთხელ გავრცელებულა როგორც პროსამთავრობო მედიასაშუალებების და „ქართულ ოცნებასთან“ აფილირებული სოციალური ქსელის გვერდების, ისე მმართველი პარტიის დეპუტატებისა და პარლამენტის თავმჯდომარის მხრიდან.

“ფორმულას” შენობაში მომხდარ ხანძარს, ტელეკომპანიის მიმართ დისკრედიტაციული კამპანია მოჰყვა

2026 წლის 4 ნოემბერს, ტელეკომპანია „ფორმულას“ ოფისში ხანძარის გაჩენისა და მაუწყებლობის დროებით შეჩერების შემდეგ, სოციალურ ქსელ Facebook-ზე ტელეკომპანიის მიმართ დისკრედიტაციული და დამცინავი შინაარსის პოსტები გავრცელდა.

გამოქვეყნებული პუბლიკაციები, პოსტები, ასევე ხელოვნური ინტელექტით გენერირებულ ფოტოილუსტრაციები კამპანიური ხასიათი ჰქონდა და დამცინავი და ირონიული შინაარსის იყო და ტელეკომპანიის თანამშრომლების დისკრედიტაციას ახდენდა.  ასევე, გავრცელდა რამდენიმე ისეთი გზავნილიც, რომელიც ტელეკომპანიის მისამართით “შურისძიების შინაარსს” მოიცავდა და ხაზს უსვამდა, რომ თანამშროლებმა ეს განსაცდელი “დაიმსახურეს”. აქტორებს შორის, ვინც ამ ტიპის ინფორმაციასა და ფოტოილუსტრაციებს ავრცელებდა, იყო როგორც პროსამთავრობო მედია, ასევე, “ქართულ ოცნებასთან” დაახლოებული პირები და აფილირებული გვერდები სოციალურ ქსელში. 

“ფორმულას” ოფისი განთავსებულია მრავალსართულიან შენობაში, სადაც სხვა არაერთ ორგანიზაციას ოფისი აქვს და ხანძარი, სავარაუდოდ, ელექტროსადენებმა ერთ-ერთ სართულზე გამოიწვია. რამდენიმე საათის განმავლობაში, არხის 20-ზე მეტი თანამშრომელი, ძლიერი დაკვამლიანების გამო, ვერ ახერხებდა შენობის დატოვებას და საფრთხის შემცველ სივრცეში იმყოფებოდა. მოგვიანებით, ყველა თანამშრომლის ევაკუაცია მოხერხდა. ინციდენტის შედეგად არავინ დაშავებულა. ტელეკომპანიამ ტექნიკური ზარალი მიიღო და მაუწყებლობის აღსადგენად 24 საათზე მეტი დრო დასჭირდა.

ჟურნალისტი გურამ როგავა მასზე თავდასხმის საქმის გამოძიებასა და სასამართლო განხილვის მიმართ უნდობლობას გამოხატავს

ჟურნალისტი გურამ როგავა მასზე თავდასხმის საქმის გამოძიებისა და სასამართლო განხილვის მიმართ უნდობლობას გამოხატავს და აცხადებს, რომ გამოძიებასთან დაკავშირებით არაერთი პასუხგაუცემელი კითხვა აქვს. მისი თქმით, მიუხედავად დაზარალებულის სტატუსისა, სასამართლოს მისი პოზიცია არ მოუსმენია, ხოლო პროკურატურას განაჩენის გამოტანამდე მასთან კომუნიკაცია არ ჰქონია.

12 ნოემბერს თბილისის საქალაქო სასამართლოს მოსამართლე თამარ მახარობლიძემ როგავაზე თავდასხმის საქმეზე სპეცრაზმელ გურამ (გოგა) კირკიტაძეს 5 წლით თავისუფლების აღკვეთა და 3 წლით საქმიანობის უფლების შეზღუდვა შეუფარდა. როგავას განცხადებით, გადაწყვეტილების შესახებ მას ტელეფონით საქმის ახალმა პროკურორმა, ლაშა გამყრელიძემ აცნობა. პროკურორის განმარტებით, სასამართლომ და დაცვის მხარემ ბრალდების ფაქტობრივი გარემოებები უდავოდ მიიჩნიეს, რის გამოც დაზარალებულის გამოკითხვა საჭიროდ არ ჩაითვალა.

როგავა ეჭვქვეშ აყენებს საქმის მასალების სანდოობას და აცხადებს, რომ გამოძიების მიერ წარმოდგენილი მტკიცებულებები არადამაჯერებელია. მისი შეფასებით, საქმის დახურულ რეჟიმში განხილვამ საზოგადოებას მნიშვნელოვანი გარემოებების გაცნობის შესაძლებლობა შეუზღუდა. ჟურნალისტი ასევე ეჭვქვეშ აყენებს მსჯავრდებული პირის მიერ თავდასხმის განხორციელებას და აცხადებს, რომ რეალური თავდამსხმელი კვლავ თავისუფალია. აღნიშნული ეჭვები მას გამოძიების ადრეულ ეტაპზეც ჰქონდა გამოთქმული.

საქმის სასამართლო განხილვის დასკვნით ეტაპზე შეიცვალა პროკურორიც – გიორგი ნადირაძე, რომელმაც პროკურატურიდან წასვლის შესახებ განაცხადა, ლაშა გამყრელიძემ ჩაანაცვლა.

გურამ როგავას 2024 წლის ნოემბერში საპროტესტო აქციის გაშუქებისას, პირდაპირ ეთერში, სპეცრაზმელი ფიზიკურად გაუსწორდა. თავდასხმის შედეგად ჟურნალისტს სახის ძვლები გაუტყდა და კისრის მალები დაუზიანდა.

აღსანიშნავია, რომ 2026 წლის მაისში ტელეკომპანია „ფორმულამ“ ჟურნალისტური გამოძიება გამოაქვეყნა, რომლის მიხედვითაც, სხვადასხვა წყაროზე დაყრდნობით, სავარაუდოდ დადგინდა როგავაზე თავდამსხმელი სპეცრაზმელის ვინაობა. ტელეკომპანია სავარაუდო თავდამსხმელს ინიციალებით – ი.შ. – მოიხსენიებდა. აღნიშნული პირი თავდასხმაში მონაწილეობას უარყოფდა, ხოლო განსაკუთრებულ დავალებათა დეპარტამენტის ყოფილი უფროსი ზვიად ხარაზიშვილი აცხადებდა, რომ მას არ იცნობდა. ტელეკომპანიის ინფორმაციით, სახელმწიფო უწყებები თავდაპირველად არ აკონკრეტებდნენ, გამოიკითხა თუ არა აღნიშნული პირი. მოგვიანებით პროკურატურამ განაცხადა, რომ ჟურნალისტურ გამოძიებაში დასახელებული პირის კავშირი როგავაზე თავდასხმასთან არ დასტურდებოდა. 

სამოქალაქო აქტივისტი, ისაკო დევიძე,  ძლიერი ტკივილების გამო ციხის საავადმყოფოში გადაყვანას ითხოვს  

სამოქალაქო აქტივისტმა, სასამართლოს შეურაცხყოფის ბრალდებით მსჯავრდებულმა  ისაკო დევიძემ, ციხის საავადმყოფოში გადაყვანის მოთხოვნით, შიმშილობა დაიწყო. 

ინფორმაციას მისი და ავრცელებს. იგი აღწერს, რომ იგივე მოთხოვნით ისაკო დევიძე გასულ კვირაშიც შიმშილობდა. შემდეგ იგი გამოკვლევებზე გადაიყვანეს და ჩატარებული ანალიზებისა და პირველადი დათვალიერების შემდეგ კუჭის ქრონიკული გასტრიტის დიაგნოზი დაუსვეს. მოგვიანებით, პასუხების მიხედვით, სარქველთან დაკავშირებული პრობლემებიც გამოიკვეთა. მისი და წერს, რომ პატიმარს მედიკამენტები დაუნიშნეს.  მიუხედავად ამისა, როგორც აქტივისტის და წერს, ბოლო საუბრისას ისაკო კვლავ შეუძლოდ იყო და ისევ საავადმყოფოში გადაყვანას ითხოვდა. რადგან მისი მოთხოვნა არ დაკმაყოფილდა, იძულებული გახდა შიმშილობა დაეწყო. “დღევანდელი ინფორმაციით, ისაკო კვლავ აგრძელებს შიმშილობას!!!“ –  წერს მარი დევიძე.

ისაკო დევიძე პროევროპულ საპროტესტო მოძრაობაში დაწყების დღიდან არის ჩართული. არაერთხელ იყო ადმინისტრაციული წესით დაპატიმრებულიც. პატიმრობაში ყოფნისას, სხვადასხვა მიზეზით, აქამდეც არაერთხელ მიუმართავს პროტესტის ამ უკიდურესი ფორმისთვის და გამოუცხადებია შიმშილობა.

ამჯერად ისაკო დევიძე სისხლის სამართლის წესით არის მსჯავრდებული. პროკურატურა მას სასამართლოს შეურაცხყოფას ედავება. 2025 წლის დეკემბერში ისაკო დევიძემ სასამართლოს სხდომათა დარბაზში მოსამართლე ზვიად ცეკვავას კომპიუტერს ხელი დაარტყა და დააზიანა. (ზვიად ცეკვავა მაშინ დევიძის ადმინისტრაციულ საქმეს განიხილავდა. იმ საქმეზე აქტივისტს 30-დღიანი პატიმრობა შეუფარდეს).  ისაკო დევიძემ ბრალი აღიარა, პროკურატურასთან საპროცესო შეთანხმება გააფორმა და მას 1-წლიანი პატიმრობა შეუფარდეს. დდევიძე ციხეს 2027 წლის იანვარში დატოვებს.

განახლება: 14 ნოემბრის ინფორმაციით, ადმინისტრაცია პატიმარს ციხის საავადმყოფოში მომავლ კვირაში გადაიყვანს.

“ოლე ოლას” სიმღერის გამო სტუდენტი 3000 ლარით დააჯარიმეს 

თბილისის საქალაქო სასამართლოს მოსამართლე დავით მაკარაძემ სტუდენტი სანდრო სეხნიაშვილი 3000 ლარით დააჯარიმა. შინაგან საქმეთა სამინისტრო ახალგაზრდას საპროტესტო აქციაზე სიმღერა „ოლე-ოლას“ შესრულებას ედავებოდა. ეს საპროტესტო შინაარსის სიმღერაა და “ქართული ოცნების” წევრები მას შეურაცხმყოფელად აღიქვამენ. სტუდენტის მიმართ, შსს-მ საქმის წარმოება  ადმინისტრაციულ სამართალდარღვევათა კოდექსის 166-ე მუხლით დაიწყო, რაც წვრილმან ხულიგნობას გულისხმობს. 

სტუდენტის ადვოკატის, დათა ქაშიაშვილის განცხადებით, სასამართლოს გადაწყვეტილება “აბსურდულია”, რადგან მოსამართლემ გადაწყვეტილება ისეთ ვიდეომტკიცებულებებზე დაყრდნობით მიიღო, რომლებშიც ხმა საერთოდ არ ისმის.  სასამართლო პროცესზე პოლიციის წარმომადგენელი კი აცხადებდა, რომ მათ მიერ წარდგენილ ვიდეომტკიცებულებაში, ვიზუალურად ნათლად ჩანდა, რომ სეხნიაშვილი სიმღერას ტუჩებს აყოლებდა, ანუ მღეროდა. 

166-ე მუხლი, რომლითაც სეხნიაშვილს ედავებოდნენ, ითვალისწინებს ჯარიმას 500-დან 3 000 ლარამდე, ან ადმინისტრაციულ პატიმრობას 20 დღემდე ვადით. აღნიშნული მუხლი წვრილმან ხულიგნობას ითვალისწინებს, რაც განიმარტება როგორც საჯარო სივრცეში ლანძღვა-გინება, მოქალაქეებზე შეურაცხმყოფელი გადაკიდება და საზოგადოებრივი წესრიგის ან/და მოქალაქეთა სიმშვიდის დამრღვევი სხვა ამგვარი მოქმედება. ბოლო პერიოდში, აღნიშნული მუხლის საფუძველზე, არაერთი აქტივისტი დააჯარიმეს. იგივე სიმღერის შესრულებისთვის საამართლოშია დაბარებული მომღერალი სოფო ბათილაშვილი.

„ოლე-ოლას” სიმღერის გამო, მომღერალი სოფო ბათილაშვილი სასამართლოში დაიბარეს და დააჯარიმეს 

მომღერალ სოფო ბათილაშვილს, საპროტესტო შინაარსის სიმღერაში – „ოლე ოლა” გამოყენებული სიტყვების გამო, სამართალდარღვევის ოქმი შეუდგინეს.  ოქმის შემდგენი შსს-ის სიძულვილის ენის წინააღმდეგ ბრძოლის სამმართველოა.  დოკუმენტი 22 ოქტომბრით თარიღდება. ოქმი ადმინისტრაციულ სამართალდარღვევათა კოდექსის 166-ე მუხლის პირველი ნაწილით არის შედგენილი, რაც წვრილმან ხულიგნობას გულისხმობს. 

სოფო ბათილაშვილმა 8 ოქტომბერს სოციალურ ქსელში „ოლე-ოლას” შესრულების ვიდეო გამოაქვეყნა. მომღერალი პოსტში წერს, რომ სიმღერის ვიდეო პროტესტისა და სოლიდარობის ნიშნად ჩაწერა, რაც მასში სიმღერის გამო ადამიანების სასამართლოში დაბარებამ გამოიწვია. ამავე პოსტში მან სოლიდარობა გამოუცხადა მომღერალ „კორძს”, რომელსაც „ოლე-ოლას” შესრულების გამო სამთავრობო პროპაგანდა დაუპირისპირდა.

12 ნოემბერს გამართულ პროცესზე, თბილისის საქალაქო სასამართლოს მოსამართლე კობა ჩაგუნავამ,   მომღერალი სამართალდამრღვევად ცნო და 3 000 ლარით დააჯარიმა. შსს-ს წარმომადგენელთა პოზიციით, სიმღერა „ოლე-ოლა”, როგორც უწმაწური სიტყვების შემცველი ნაწარმოები, შეურაცხმყოფელია როგორც ფართო საზოგადოებისთვის, ისე კონკრეტულად „ქართული ოცნების” მხარდამჭერებისთვის; შსს-მ სასამართლოს მოქალაქეთა მიმართვები წარუდგინა, სადაც მათი თქმით, ამ სიმღერის გამო მომხდარ უთანხმოებებზეა შეტყობინებები გაკეთებული. ადვოკატის კითხვაზე, კონკრეტულად რა ქმედებაა მომღერლის მხრიდან სამართალდარღვევად მიჩნეული, სიმღერის ჩაწერა, ვიდეოს გადაღება თუ მისი განთავსება სოციალურ ქსელში, სახელმწიფოს პოზიციაა „ვიდეოს ატვირთვა სოციალურ ქსელში”. 

საჯარო სივრცეში გამოთქმული მოსაზრებების გამო მოქალაქეების წინააღმდეგ ადმინისტრაციული დავები, შსს-ში შექმნილი “სიძულვილის ენის წინააღმდეგ ბრძოლის სამმართველოს” ოქმების საფუძველზე იწყება. სამმართველო შსს-ში 2026 წლის 1 ივნისიდან ფუნქციონირებს. სამმართველოს ამოცანაა საჯარო სივრცეში გავრცელებული ადამიანის ღირსების შემლახველი, შეურაცხმყოფელი ან სიძულვილის ენის შემცველი განცხადებების მონიტორინგი და პროაქტიული გამოვლენა, თუ ისინი ადმინისტრაციული სამართალდარღვევის ნიშნებს შეიცავს. ამ დრომდე ადმინისტრაციული საქმის წარმოება, ამ სამმართველოს ოქმის საფუძველზე, უკვე ასობით ადამიანის წინააღმდეგ დაიწყო. მათი უმეტესობა დააჯარიმეს.

„ტვ პირველის“ ჟურნალისტ ხატია სამხარაძეს პარლამენტში აკრედიტაცია ერთი თვით შეუჩერეს

ტელეკომპანია „პირველის“ საპარლამენტო ჟურნალისტს, ხატია სამხარაძეს საქართველოს პარლამენტში აკრედიტაცია ერთი თვით შეუჩერეს. შესაბამისი გადაწყვეტილება 11 ნოემბერს პარლამენტის აპარატის უფროსმა კახა ოქროჯანაშვილმა მიიღო.

პარლამენტის ოფიციალური წერილის თანახმად, ჟურნალისტმა 10 ნოემბერს ტელეკომპანია „პირველის“ ეთერში გასულ სიუჟეტში დაარღვია საპარლამენტო ჟურნალისტების აკრედიტაციის წესი, რომლის მიხედვითაც, პარლამენტის წევრის, აპარატის თანამშრომლის ან პარლამენტში სტუმრად მყოფი პირის მიერ ინტერვიუს ჩაწერაზე უარის თქმის შემთხვევაში ჟურნალისტი ვალდებულია შეწყვიტოს ინტერვიუ. აღნიშნულის საფუძველზე მას აკრედიტაცია 11 ნოემბრიდან ერთი თვით შეუჩერდა.

ტელეკომპანიის საინფორმაციო სამსახურის ხელმძღვანელი ნოდარ მელაძე  გადაწყვეტილებას ჟურნალისტის მიერ დასმული კითხვების გამო დაწესებულ ცენზურად აფასებს. მისი განცხადებით, აკრედიტაციის შეჩერება პარლამენტის ერთ-ერთი დეპუტატის მოთხოვნას უკავშირდება, თუმცა ოფიციალურ წერილში არ არის მითითებული, კონკრეტულად ვის მიმართა ჟურნალისტმა და ვისი მოთხოვნის საფუძველზე იქნა მიღებული გადაწყვეტილება. მელაძე აღნიშნავს, რომ ხატია სამხარაძე პარლამენტის საქმიანობას შვიდი წელია აშუქებს, ხოლო აკრედიტაციის შეჩერების შედეგად მას ერთი თვის განმავლობაში პარლამენტის შენობაში შესვლა და პროფესიული საქმიანობის განხორციელება შეეზღუდება.

„საქართველოს ჟურნალისტური ეთიკის ქარტია“ ხატია სამხარაძისთვის საპარლამენტო აკრედიტაციის ერთი თვით შეჩერებას ეხმაურება და პარლამენტს აკრედიტაციის მოქმედი წესის შეცვლისკენ მოუწოდებს. ქარტიის შეფასებით, პარლამენტი 2023 წელს მიღებულ წესს სისტემატურად იყენებს ხელისუფლების მიმართ კრიტიკულად განწყობილი ჟურნალისტებისთვის პროფესიული საქმიანობის შესაზღუდად. ორგანიზაცია აღნიშნავს, რომ რეგულაცია დისკრიმინაციული გამოყენების შესაძლებლობას ქმნის, ხელს უშლის მედიის შეუფერხებელ მუშაობას და ზღუდავს საზოგადოების წვდომას საკანონმდებლო ორგანოს საქმიანობის შესახებ მნიშვნელოვან ინფორმაციაზე. ქარტია ხაზს უსვამს, რომ მსგავსი შეზღუდვები უარყოფითად აისახება პარლამენტის გამჭვირვალობასა და ანგარიშვალდებულებაზე და მოითხოვს აკრედიტაციის წესის საერთაშორისო სტანდარტებთან შესაბამისობაში მოყვანას.

ბერა ივანიშვილმა „TV პირველსა“ და „ფორმულას“ სასამართლოში უჩივლა

3 ნოემბერს ცნობილი გახდა, რომ პარტია “ქართული ოცნების” დამფუძნებლისა და საპატიო თავმჯდომარის, ბიძინა ივანიშვილის ვაჟმა, ბერა ივანიშვილმა თბილისის საქალაქო სასამართლოში სარჩელი შეიტანა ტელეკომპანიების „TV პირველისა“ და „ფორმულას“ წინააღმდეგ. საუბარია ტელეკომპანიების შაბათის ეთერებში, სექტემბრის ბოლოს გასულ ორ სიუჟეტზე, რომლებიც ეხებოდა კრიმინალურ გარჩევებთან ბერა ივანიშვილის კავშირსა და მონაწილეობას. ეს სიუჟეტები ეხებოდა ძმები ფეიქრიშვილების დაკავების საქმეს, რომლებიცფულის გამოძალვის ბრალდებით არიან დაკავებული. 

ივანიშვილის ადვოკატის დავით ასათიანის განმარტებით, ტელეკომპანიების სიუჟეტებში გაჟღერებული ინფორმაცია ბერა ივანიშვილთან დაკავშირებით, სიცრუეზეა დაფუძნებული. შესაბამისად მოსარჩელე ითხოვს, აღნიშნული ფაქტების შესაბამისი ფორმით უარყოფას და მის ცილისწამებად გამოცხადებას.

მედიის ადვოკატირების კოალიციის შეფასებით, აღნიშნული სამართლებრივი ნაბიჯები ბიძინა ივანიშვილის და „ქართული ოცნების“ მხრიდან დამოუკიდებელი მედიის წინააღმდეგ მიმართული სისტემური ზეწოლის პოლიტიკის გაგრძელებაა. “ეს საჩივრები თავისი არსით აშკარად ატარებს სამოქალაქო ჩართულობის წინააღმდეგ სტრატეგიული სარჩელების (SLAPP) ხასიათს და მათი გამოყენება არ ემსახურება რეპუტაციის დაცვის ლეგიტიმურ მიზნებს, პირიქით, ეს არის ბიძინა ივანიშვილის ოჯახის მიერ სახელმწიფო უწყებებზე, მათ შორის სასამართლოზე, საკუთარი ზეგავლენის გამოყენება დამოუკიდებელი მედიის გასაჩუმებლად”, – ნათქვამია კოალიციის განცხადებაში.

შეგახსენებთ, ბერა ივანიშვლმა 30 სექტემბერს განაცხადა, რომ ის მედიის წინააღმდეგ სასამართლოსთვის მიმართვას აპირებდა ცილისწამების გამო.