პარლამენტის თავმჯდომარე, შალვა პაპუაშვილი, მზია ამაღლობელის შესახებ დეზინფორმაციას ავრცელებს

2026 წლის 9 სექტემბერს, საქართველოს პარლამენტის თავმჯდომარემ, შალვა პაპუაშვილმა, კვლავ დეზინფორმაცია გაავრცელა გამოცემების “ბათუმელებისა” და “ნეტგაზეთის” დამფუძნებლის, ჟურნალისტ მზია ამაღლობელის შესახებ. ასევე, იგი კვლავ მოძალადედ მოიხსენია და “უსინდისობის პატიმარი” უწოდა. 

პაპუაშვილმა, პარლამენტში გამართულ სპეციალურ ბრიფინგზე,  „ძალადობრივი თავდასხმა“ უწოდა პოლიციელისთვის სილის გაწვნას და თქვა, რომ მას „ყველაზე მცირე სასჯელი“ შეეფარდა. „რაც შეეხება სასჯელს, მზია ამაღლობელი არის ოპოზიციის და ბრიუსელის უსინდისობის პატიმარი. მზია ამაღლობელს შეეფარდა ყველაზე მცირე სასჯელი, რაც კი შეიძლებოდა შეფარდებოდა სასამართლოს მხრიდან.  ამაზე ნაკლები სასჯელი საპროცესო კოდექსით შესაძლებელია მხოლოდ საპროცესო შეთანხმების შემთხვევაში – ეს არის კანონიც და პრაქტიკაც”, – განაცხადა პაპუაშვილმა.

სინამდვილეში, სისხლის სამართლის კოდექსის 353-ე მუხლის პირველი ნაწილი, მზია ამაღლობელი გაასამართლეს, საპატიმრო სასჯელის გარდა, ითვალისწინებს ჯარიმას ან შინაპატიმრობასაც. თუმცა, მოსამართლე ნინო სახელაშვილმა მზია ამაღლობელს 2-წლიანი პატიმრობა მიუსაჯა.

ეს არ არის პირველი შემთხვევა, როდესაც მზია ამაღლობელი “ქართული ოცნების” მაღალჩინოსნების მხრიდან ვერბალური თავდასხმებისა და დისკრედიტაციის სამიზნეა. მზია ამაღლობელი, დაკავებისთანავე გახდა პარტია “ქართული ოცნების” პროპაგანდისტული და დეზინფორმაციული თავდასხმის სამიზნე.

“ქართულ ოცნებასთან” დაახლოებული პირი, გიორგი გამსახურდია,“ნეტგაზეთისა” და”ბათუმელების” დამფუძნებლების მისამართით ჰომოფობიურ დეზინფორმაციას ავრცელებს

“ქართულ ოცნებასთან” დაახლოებული პირი, გიორგი გამსახურდია, რომელიც, პოლონეთში პოლიციის ატაშეა, გამოცემების “ბათუმელებისა” და “ნეტგაზეთის” დამფუძნებლების, ეთერ თურაძისა და მზია ამაღლობელის მისამართით, ჰომოფობიური შინაარსის დეზინფორმაციულ განცხადებას ავრცელებს და ამით, გამოცემის დისკრედიტაციას ცდილობს. 

მისი დეზინფორმაციული განცხადება მოჰყვა ”ბათუმელების” სტატიას, რომელშიც გამოცემა სვამს კითხვას, იმ ფონზე, როდესაც, “ქართული ოცნების” მიერ შექმნილი, სიძულვილის ენის მონიტორინგის სააგენტო აჯარიმებს და ასამარღთლებს ასობით აქტივისტს, რატომ არ რეაგირებს ის გიორგი გამსახურდიას შემთხვევაში. გიორგი გამსახურდია სოციალურ ქსელში გამოირჩევა უხამსი ლექსიკის გამოყენებით. ის გამუდმებით აგინებს და ლანძღავს ოპონენტებს. 

ამ დეზინფორმაციული პოსტის შემდეგაც, გიორგი გამსახურდიას, არაერთი შერაცხმყოფელი სტატუსი აქვს გამოქვეყნებული Facebook-ის პირად გვერდზე, სადაც გამუდმებით ნიშნავს გამოცემა “ნეტგაზეთს”.

“ქართულ ოცნებასთან” აფილირებული პირი, გია აბაშიძე, “ნეტაზეთის” დისკრედიტაციას ეწევა

“ქართულ ოცნებასთან” აფილირებული პირი, გია აბაშიძე, რომელიც პოზიციონირებს, როგორც ექსპერტი,  ონლაინ გამოცემა “ნეტაზეთს” მოიხსენიებს როგორც – “ევროდაფინანსებულ” კედლის გაზეთს” და ნაციონალური მოძრაობის პროპაგანდისტს – “ნაცბაბლის” და “ნაცსექტის” მედიას.

ექსპერტად წოდებული პირი გამოცემას თავს ესმის მასალის გამო, რომელშიც, ევროკავშირში გაწევრების შესახებ ისლანდიის რეფერენდუმის შედეგებია გაანალიზებული. “ვის უფრო დავუჯეროთ ისლანდიელთა გადაწყვეტილების მიზეზებზე – კრიმინალი მზია ამაღლობელის ევროდაფინანსებულ კედლის გაზეთს, „ნეტგაზეთს“, რომლის „უძვირფასესი“ რესპონდენტები ექსპერტული პაროდიის წარმომადგენლები არიან, თუ ირის ერლინგსდოტირს – გამოცდილ ისლანდიელ ჟურნალისტსა და რედაქტორს?”- წერს აბაშიძე და შემდეგ ავითარებს მმართველი პარტიის ანტიდასავლურ მესიჯბოქსს, რომ ისლანდიამ “ევროკავშირს სუვერენიტეტი არჩია” – “ყველაზე სასაცილო სწორედ ეს არის: ისლანდიელებმა საკუთარი ქვეყნის მომავალზე გადაწყვეტილება თავად მიიღეს, ხოლო „ნაცქაჯებმა” მათ მაგივრად მისი ახსნაც ითავეს”. 

ეს არ არის პირველი შემთხვევა, როდესაც “ნეტგაზეთი” ქართული ოცნების” წევრებისა თუ მათთან დაკავშირებული პირების დისკრედიტაციის სამიზნე გახდა. ამგვარი თავდასხმები, გამოცემის მიმართ, განსაკუთრებით გახშირდა მას შემდეგ, რაც უკანონოდ დააპატიმრეს გამოცემების დამფუძნებელი მზია ამაღობელი.

პენიტენციურმა სამსახურმა პატიმრისთვის ლაშა ბუღაძის რომანის გადაცემა „გაურკვეველი შინაარსის ლიტერატურის“ მოტივით შეზღუდა

სპეციალურმა პენიტენციურმა სამსახურმა თავისუფლებააღკვეთილ ნანა სანდერს ლაშა ბუღაძის რომანი „დამკვირვებელი“ არ გადასცა. უწყებამ უარი წიგნის სათაურის „ბუნდოვანებითა“ და მისი შინაარსის „გაურკვევლობით“ ახსნა.

ორგანიზაცია „საფარისთვის“ გაგზავნილ წერილში პენიტენციური სამსახური მიუთითებს, რომ რომანის სათაური „არ იძლევა ერთმნიშვნელოვანი ინტერპრეტაციის შესაძლებლობას, განსაკუთრებით პენიტენციურ დაწესებულებასთან მიმართებით“. უწყების განმარტებით, „გაურკვეველი შინაარსის ლიტერატურა“, რომელიც შესაძლოა საფრთხეს უქმნიდეს პატიმრის უსაფრთხოებას ან დაწესებულების ნორმალურ ფუნქციონირებას, ციხეში ვერ იქნება შეგზავნილი. „საფარის“ ხელმძღვანელი ბაია პატარაია აცხადებს, რომ ნანა სანდერს ინფორმაციის მიღების უფლება შეეზღუდა. ლაშა ბუღაძე კი პენიტენციური სამსახურის განმარტებას დისკრიმინაციულად და ცენზურის მცდელობად აფასებს.

“საქართველოს ახალგაზრდა იურისტთა ასოციაციის” (საია) შეფასებით, წიგნის პენიტენციურ დაწესებულებაში შეტანაზე უარი უხეშად არღვევს თავისუფლებააღკვეთილი პირების უფლებებს და ცენზურის შემაშფოთებელ მაგალითს წარმოადგენს. საია მიუთითებს, რომ წიგნის სათაურზე აბსტრაქტული მითითება ვერ ამართლებს ინფორმაციის მიღების უფლების შეზღუდვას.

აღსანიშნავია, რომ „დამკვირვებელი“ დისტოპიური რომანია, რომელიც საქართველოში დესპოტის თითქმის ნახევარსაუკუნოვან მმართველობას შეეხება. აგვისტოში წიგნი, სხვა გამოცემებთან ერთად, „ბიბლუსის“ ერთ-ერთ ფილიალში ვანდალიზმის სამიზნეც გახდა.

რეჟისორ უტა ბერიას განცხადებით, კინოცენტრი ფილმის „ცრემლსადენი გაზი“ ჩვენების შეზღუდვას ცდილობს

რეჟისორ უტა ბერიას განცხადებით, საქართველოს ეროვნულმა კინოცენტრმა ფილმ „ცრემლსადენი გაზის“ მსოფლიო პრემიერამდე საპროდიუსერო კომპანიას გაფრთხილების წერილი გაუგზავნა, რომლის მიხედვითაც, ფილმის საჯაროდ ჩვენების შემთხვევაში კომპანიას ფულადი ჯარიმა დაეკისრებოდა. ბერიას თქმით, კინოცენტრმა მსგავსი შინაარსის წერილი ლოკარნოს საერთაშორისო კინოფესტივალსაც გაუგზავნა.

რეჟისორი აცხადებს, რომ პრობლემები ჯერ კიდევ ფილმის წარმოების ეტაპზე დაიწყო. მისი თქმით, 2022 წელს კონკურსში გამარჯვებით მოპოვებული დაფინანსების ნაწილი – 500,000 ლარის თითქმის ნახევარი – ეროვნულმა კინოცენტრმა გაურკვეველი მიზეზით არ ჩარიცხა. ბერიას შეფასებით, კინოცენტრი ჯერ ფილმის დასრულების შეფერხებას ცდილობდა, ახლა კი ცდილობს, ფილმი მაყურებლამდე არ მივიდეს.

ფილმი „ცრემლსადენი გაზი“ ნაწილობრივ თბილისში მიმდინარე საპროტესტო აქციების დროს არის გადაღებული. ლოკარნოს საერთაშორისო კინოფესტივალზე მიღებული ჯილდო ბერიამ 2024 წლის პროევროპული აქციების დროს დაკავებულ მათე დევიძეს მიუძღვნა, რომელსაც მან „საქართველოში ყველაზე ახალგაზრდა პოლიტიკური პატიმარი“ უწოდა.

კინოცენტრის განცხადებით, ფილმის წარმოებისთვის საპროდიუსერო კომპანიას ბიუჯეტიდან 279,625 ლარი აქვს მიღებული. უწყების განმარტებით, ვინაიდან საპროდიუსერო კომპანიამ ფილმის დასრულებული ვერსია ეროვნულ კინოცენტრს არ წარუდგინა „დადგენილი პროცედურების შესაბამისად“, ფილმის საჯარო ჩვენებაზე თანხმობის გაცემა შეუძლებელი გახდა. კინოცენტრის ცნობით, აღნიშნული გარემოებები ლოკარნოს კინოფესტივალსაც აცნობეს.

მიუხედავად ამისა, ლოკარნოს საერთაშორისო კინოფესტივალმა ფილმი კონკურსში დატოვა და მაყურებელს მისი ნახვის შესაძლებლობა მიეცა. ფილმმა ფესტივალზე დამოუკიდებელი ჟიურის პრიზი მიიღო.

რეჟისორი ბესო სოლომონაშვილი კინოცენტრის მოქმედებას ცენზურად აფასებს. მისი თქმით, ეს არის „ავტორიტარული რეჟიმის ცენზურა“ ფილმზე, რომელიც ხელისუფლებას არ აწყობს. სოლომონაშვილის შეფასებით, ხელისუფლება ცდილობს, გააჩუმოს რეჟისორები, მწერლები და ხელოვანები, რადგან „ღირსეული ხელოვნება არის სიმართლე, დიქტატორულ რეჟიმს კი სიმართლე არ სჭირდება“.

პრემიერ მინისტრი ირაკლი კობახიძე დამოუკიდებელი  მაუწყებლების დისკრედიტაციას ახორციელებს 

2026 წლის 12 აგვისტოს, სამთავრობო ბრფინგზე პრემიერ მინისტრმა ირაკლი კობახიძემ, კრიტიკული სარედაქციო პოლიტიკის მქონე ტელევიზიები: “ფორმულა” და “TV პირველი” არაერთხელ მოიხსენია პარტიულ ტელევიზიებად. ისინი რუსოფობიური განწყობების გაღვივებაში დაადანაშაულა, “TV პირველის” ჟურნალისტს რუსუდან დუმბაძეს კი არაერთხელ უწოდა “უცხოელი აგენტი” და “ერთიანი ნაციონალური მოძრაობის” პროპაგანდისტი. 

“TV პირველის” ჟურნალისტის კითხვაზე, რატომ უთმობს პრემიერი ამდენ დროს რუსოფობიაზე საუბარს, კობახიძემ არაერთხელ გაიმეორა, რომ ამ განწყობებს შეგნებულად აღვივებენ უცხოური აგენტები და შემდეგ ამას კამპანიურად აშუქებს პარტიული ტელევიზია, მათ შორის, “TV პირველი”. 

“ამაში ხართ ჩართული თქვენ, პარტიული ტელევიზიების წარმომადგენლები, ეს არის კოორდინირებული კამპანია და ეს ყველაფერი გარედან იმართება”, – უთხრა მან ჟურნალისტ რუსუდან დუმბაძეს და როდესაც მას მიმართავდა, გამუდმებით იმეორებდა ფრაზას “თქვენს პარტიაში”: “[რუსოფობიური] ბანერებით თქვენი პარტაქტივისტები ხომ დადიან პლიაჟზე? აგენტები არიან და თქვენ აშუქებთ ამას, რომ ხალხი აპროტესტებს რუს ტურისტებს საქართველოში” – უთხრა მან ჟურნალისტს. 

მესამე კიბერშეტევა “მონიტორზე” ბოლო ერთ თვეში – ამჯერად დაბლოკეს მედიის Facebook-ის გვერდი 

2026 წლის 3 აგვისტოს, დილით, საგამოძიებო მედია „მონიტორის“ ჟურნალისტებმა აღმოაჩინეს, რომ დაიბლოკა მათი Facebook-ის გვერდი.  „მონიტორმა“ Meta-სგან მიიღო შეტყობინება, თითქოს მათ საავტორო უფლებები დაარღვიეს. მედიამ „საავტორო უფლებების დარღვევა“ კატეგორიულად გამორიცხა. 

სტუდია „მონიტორის“ ხელმძღვანელი ნინო ზურიაშვილი გვერდის დაბლოკვას უკავშირებს ჟურნალისტურ გამოძიებას თაღლითური ქოლცენტრების შესახებ, რომელიც  დღეს უნდა გამოქვეყნდეს. მედიას ამის შესახებ ანონსი უკვე გამოქვეყნებული ჰქონდა. 

Meta-სთან კომუნიკაციის შედეგად, “მონიტორის” გვერდი იმავე დღეს, საღამოს აღდგა.  

ბოლო ერთი თვის განმავლობაში ეს უკვე მესამე შემთხვევაა, როდესაც “მონიტორის” პლატფორმები კიბერთავდასხმის სამიზნე ხდება. 25 ივლისს გაითიშა „სტუდია მონიტორის“ YouTube-არხი, რომელიც გასაჩივრების შემდეგ აღდგა.  1 ივლისს კი, Meta-მ წაშალა რამდენიმე მასალა “მონიტორის” Facebook-ზე,  Instagram-სა და YouTube-ზე. 

საგამოძიებო მედიის ონლაინ პლატფორმების დაბლოკვა, ყველა ჯერზე, გაურკვეველი ელექტრონული მისამართებიდან შესული საჩივრების გამო მოხდა. კიბერთავდასხმები დროში დაემთხვა მედიის მიერ გამოქვეყნებულ მწვავე საგამოძიებო ფილმებს. გასული ორი ტავდასხმისას, ერთ შემთხვევაში გამოძიების თემა იყო – ონლაინ კაზინოების თაღლითური ქსელისა და მათთან დაკავშირებული სამშენებლო კომპანიების რუსული კავშირები. მეორე შემთხვევაში თბილისის მერის კახა კალაძის ოჯახსთან და მერის კორუფციულ გარგებებთან დაკავშირებული გამოძიებები. 

ამ კიბერთავდასხმების შემდეგ, “მონიტორმა” გაარკვია, რომ ონლაინ პლატფორმების დაბლოკვა მარტივად არის შესაძლებელი და თანხა, რასაც ამ მომსახრებაში იხდის დამკვეთი, 3-დან 5 ათას დოლარამდეა. მაგალითად, ეს თანხა გადაუხადეს “მონიტორის” YouTube-ს დაბლოკვაში ვინმე ადიტია სინგჰს. მან “მონიტორს” დაუდასტურა, რომ მათი YouTube-ის დაბლოკვა მას დაუკვეთეს, თუმცა, არ გაუმჟღავნა ვინ იყო დამკვეთი, რადგან რეალური კლიენტი მას სხვა „შუამავლის“ მეშვეობით დაუკავშირდა

„სტუდია მონიტორი“ მწვავე ჟურნალისტური გამოძიებებით გამოირჩევა. ამის გამო, ბოლო პერიოდში, ის არაერთხელ გახდა “ქართული ოცნების” მაღალჩინოსნების მხრიდან სიტყვიერი თავდასხმის სამიზნეც. 

“მონიტორის” Facebook-ის დაბლოკვას მედიის დისკრედიტაციის კამპანია მოჰყვა

2026 წლის 3 აგვისტოს, საგამოძიებო მედია “მონიტორის” YouTube-ს დაბლოკვას, “ქართული ოცნებისა” წევრებისა და პროსამთავრობო მედიების  მხრიდან, მედიის დისკრედიტაციის კამპანია მოჰყვა. 

“Facebook-მა სტუდია მონიტორის პროპაგანდისტული გვერდი წაშალა” – ამ წარწერით გამოაქვეყნა ქარდი სოციალურ ქსელში პროსამთავრობო, რუსული დეზინფორმაციის გავრცელებისთვის ბრიტანეთის მიერ დასანქცირებულმა ტელეკომპანია “იმედმა”. 

“ქართული ოცნების” დეპუტატმა, ნინო წილოსანმა, “იმედის” ქარდი თავის გვერდზე გადააშიარა და “მონიტორის” დაბლოკვა ჩათვალა “სამართლიან ქცევად”: “სამწუხაროდ, წლებია, „სტუდია მონიტორი“ თავს დამოუკიდებელ მედიად ასაღებს, სინამდვილეში კი ძირითადად სიცრუისა და პოლიტიკური მანიპულაციის გამავრცელებელია… ვინც ფაქტების ნაცვლად სიცრუესა და მანიპულაციას ირჩევს, საზოგადოებას სწორედ ის აძლევს ყველაზე მეტ საფუძველს, მისი სანდოობის შესახებ კითხვები დასვას. ამჯერად ამ კითხვებზე პასუხი თავად ფეისბუქმა გასცა – „სტუდია მონიტორის“ გვერდი სოციალური ქსელიდან წაიშალა, – დაწერა ნინო წილოსანმა, რომლის შესახებ ასევე აქვს საგამოძიებო მასალა მომზადებული “მონიტორს”. 

ნინო წილოსანის ეს პოსტი უკანვე წაიღო და ახალ ამბად აქცია “იმედინიუსმა”, ასევე, იგივე სტატუსი, უცვლელად, ახალ ამბად გაავრცელეს “იმედთან” ერთად დასანქცირებულმა, პროსამთავრობო ტელეკომპანია“POSTV”-იმ და პროსამთავრობო  “რუსთავი 2”-მა.

რეგიონული მედია TOK TV კიბერშეტევის სამიზნე გახდა

რეგიონული მედია, TOK TV-ის ინფორმაციით, ბოლო ორი კვირის განმავლობაში მათ ოფიციალურ ვებგვერდზე უკვე მეორედ განხორციელდა კიბერშეტევა .

„ამ დროისთვის საიტი ხელმისაწვდომია ხარვეზებით, თუმცა ადმინისტრაციულ პანელში შესვლის მცდელობისას ჩნდება შეტყობინება, რომ სისტემა გატეხილია „CoupDeGrace“-ის მიერ. ამ ეტაპზე მიმდინარეობს ტექნიკური დეტალების შესწავლა და ინციდენტის სრული მასშტაბის შეფასება“, – წერს TOK2Region.

როგორც TOK TV-ში აცხადებენ, პრობლემა უკავშირდებოდა WordPress-ზე კიბერშეტევას და საიტის კომპრომეტირებას.

“სისტემაში აღმოჩნდა შეცვლილი WordPress Core ფაილები, მავნე PHP კოდი, უცნობი Administrator ანგარიშები და თვითნებურად დამატებული პლაგინები, რაც მიუთითებდა, რომ თავდამსხმელს საიტზე ჰქონდა persistent access / backdoor. პრობლემის აღმოსაფხვრელად ეტაპობრივად გაიწმინდა საეჭვო ფაილები და პლაგინები, წაიშალა უცნობი ადმინისტრატორები, შეიცვალა ადმინისტრატორების პაროლები და WordPress-ის უსაფრთხოების გასაღებები, განახლდა/ჩანაცვლდა Core ფაილები სუფთა ვერსიებით, ხოლო DISALLOW_FILE_MODS პარამეტრით შეიზღუდა WordPress-იდან ახალი პლაგინებისა და თემების თვითნებური დამატება”, –  აცხადებენ Tok TV-ში. 

ამ ეტაპისთვის პრობლემა ბოლომდე ჯერ არ არის აღმოფხვრილი. 

თბილისში მცხოვრები უნგრელი ჟურნალისტი, ლასლო რობერტ მეზეში, დეპორტაციის საფრთხის გამო, იძულებული გახდა საქართველო დაეტოვებინა

2026 წლის 6 აგვისტოს, თბილისში მცხოვრები უნგრელი ჟურნალისტი, ლასლო რობერტ მეზეში, იძულებული გახდა საქართველო დაეტოვებინა. ამ გადაწყვეტილებას წინ უძღოდა მისი დაკავება საემიგრაციო სამსახურის მიერ. ჟურნალისტი, რომელიც წლებია საქართველოში იმყოფება, 5 აგვისტოს დააკავეს. შინაგან საქმეთა სამინისტრომ განაცხადა, რომ იგი საქართველოში კანონიერი საფუძვლის გარეშე იმყოფებოდა და დარღვეული ჰქონდა ქვეყანაში ყოფნის ვადები. 

ლასლო მეზეშის ადვოკატმა თორნიკე ჯანელიძემ განმარტა, რომ  ჟურნალისტს, საქართველოში ლეგალურად ყოფნის ვადის გასვლის შემდეგ, ქვეყნის დატოვების ვალდებულების გადავადებაზე უარი ეთქვა, რაც სასამართლოში გაასაჩივრეს. ეს სარჩელი სასამართლომ წარმოებაში თებერვალში მიიღო და ახლა მას უნდა გადაეწყვიტა, ლასლო მეზეშის ქვეყნის დატოვების ვალდებულების გადავადების საკითხი.

“მედიაჩეკერთან” საუბარში ადვოკატი ამბობს, რომ მას ჰქონდა მოლოდინი, რომ დაკავების შემდეგ ჟურნალისტს შეამოწმებდნენ და გამოუშვებდნენ, რადგან, ისინი სასამართლო პროცესის მოლოდინში იყვნენ:  “შესაბამისად, მოლოდინი, რომ მისი გაძევების პროცესს დაიწყებდნენ, არ მქონია. პირიქით, მივყვებოდით სამართლებრივად ამ საქმეს. პოლიციელსაც ველაპარაკე, ავუხსენი, რომ ჩვენ სასამართლოში გვაქვს საქმე და იმ საქმის განხილვამდე მას აქვს უფლება ლეგალურად იმყოფებოდეს საქართველოში, თუმცა პოლიციელმა მიპასუხა, რომ მას მიუთითეს ლასლოს მიგრაციის სამსახურში გადაყვანა“, – უთხრა ჯანელიძემ „მედიაჩეკერს”.

ნებაყოფლობით საქართველოს დატოვების შემთხვევაში ჟურნალისტს მსუბუქი ჯარიმა და ქვეყანაში შემოსვლის აკრძალვა დაეკისრებოდა. დეპორტის შემთხვევაში კი უფრო მწვავე შედეგი დადგებოდა. ამიტომ, საბოლოოდ, ჟურნალისტმა საქართველოს დატოვება გადაწყვიტა. ბილეთის ფული მას მოქალაქეებმა შეუგროვეს, აეროპორტში ჟურნალისტი სამართალდამცავებმა მიიყვანეს. 

ლასლო მეზეში უნგრეთში იდევნებოდა ვიქტორ ორბანის ხელისუფლების მხრიდან და ის ბოლო პერიოდში ცხოვრობდა საქართველოში. ჟურნალისტი აქტიურად იყო ჩართული და აშუქებდა კიდეც საქართველოში მიმდინარე პროევეროპულ პროტესტს. აქტიურობის გამო, იგი თავდასხმის სამიზნეც გახდა –  2025 წლის სექტემბერში, მელიქიშვილის გამზირზე, კახა კალაძის საარჩევნო შტაბთან დაპირისპირებისას, მას ფიზიკურად გაუსწორდნენ.