ჟურნალისტი და ტელეწამყვანი ვახო სანაია ერთი თვით დაკავებულია

19 ოქტომბერს პოლიციამ  ტელეკომპანია „ფორმულას“ მთავარი საინფორმაციო გამოშვების წამყვანი, ჟურნალისტი ვახო სანაია საკუთარ სახლთან დააკავა. თბილისის საქალაქო სასამართლოს მოსამართლის გადაწყვეტილებით, ჟურნალისტს 30 დღიანი ადმინისტრაციული პატიმრობა შეეფარდა.

შინაგან საქმეთა სამინისტრო ვახო სანაიას სოციალურ ქსელში გამოქვეყნებული სამი სტატუსის გამო „პოლიტიკური თანამდებობის პირების შეურაცხყოფას“ (შალვა პაპუაშვილისა და ლადო ბოჟაძის მისამართით) ედავებოდა. 

დაკავების წინ მედიასთან საუბრისას სანაიამ განაცხადა, რომ ხელისუფლების მიზანი კონკრეტული სიტყვების აკრძალვა კი არა, ქვეყანაში კრიტიკული აზრის ჩახშობა და მოქალაქეების დაშინებაა:

„რამდენი პატიმრობაც არ უნდა იყოს, რა ჯარიმაც არ უნდა იყოს, იქამდე გავაგრძელებ მე ჩემი აზრების გადმოცემას, ზეპირსიტყვიერად იქნება ეს თუ წერილობით, საერთოდ არა აქვს მნიშვნელობა, რას დაწერენ, რას დაარქმევენ გადაწყვეტილებას… აქ მთავარია, რომ კრიტიკული აზრი არ უნდა გამოითქვას, ადამიანები შეშინდნენ, არ დაწერონ, არ თქვან. შესაბამისად, ჩემი პასუხი ამაზე ყოველთვის იქნება, რომ დავწერ, რასაკვირველია, რამდენჯერაც მინდა, იმდენჯერ დავწერ“.

ეს უკვე მესამე ადმინისტრაციული საქმეა, რომელიც 2026 წელს შინაგან საქმეთა სამინისტრომ ვახო სანაიას წინააღმდეგ სოციალურ ქსელში გამოქვეყნებული კრიტიკული პოსტების გამო აღძრა. ხელისუფლება აქტიურად იყენებს ადმინისტრაციულ მექანიზმებს დამოუკიდებელი ჟურნალისტების დასასჯელად:

  •  სოციალურ ქსელში გამოქვეყნებული სტატუსების გამო, მიმდინარე წელს სანაიას უკვე შეფარდებული ჰქონდა 14-დღიანი ადმინისტრაციული პატიმრობა და 6 000-ლარიანი ჯარიმა.
  • 2025 წლის ივლისში ჟურნალისტი „ქართული ოცნების“ დეპუტატების  თეა წულუკიანის, შალვა პაპუაშვილისა და ირაკლი ზარქუას  „შეურაცხყოფისთვის“ 4 000 ლარით დააჯარიმეს. იმავე წლის 19 ოქტომბერს კი რუსთაველის გამზირზე საპროტესტო აქციის დროს გზის გადაკეტვის ბრალდებით დააკავეს და 6-დღიანი პატიმრობა შეუფარდეს.

ვახო სანაიას პატიმრობას კრიტიკულად გამოეხმაურნენ ადგილობრივი და საერთაშორისო ორგანიზაციის წარმომადგენლები.

პროსამთავრობო ტელეკომპანია “იმედი” გამოცემა “პუბლიკის” დისკრედიტაციას ახდენს

რუსული დეზინფორმაციისთვის ბრიტანეთის მიერ დასანქცირებული, პროსამთავრობო ტელეკომპანია “იმედი” ონლაინ გამოცემა “პუბლიკის” დისკრედიტაციას ახდენს და გამოცემას “ნაცმოძრაობის” პროპაგანდის ინსტრუმენტად მოიხსენიებს. 

“პუბლიკა” თავდასხმის სამიზნე გახდა ერთ-ერთი პატიმრის მშობლების მიერ,  რუსთავის #6 სასჯელაღსრულების დაწესებულებასთან გამართული აქციის გაშუქებისთვის.  2 ოქტომბერს რუსთავის ციხესთან საპროტესტო აქცია გამართეს პატიმარ გიორგი დავითაძის მშობლებმა, რომლებიც პენიტენციურ სისტემას შვილის მიმართ არაადამიანურ მოპყრობაში ადანაშაულებენ. “პუბლიკა” ამ აქციას აშუქებდა და სოციალურ ქსელში ათავსებდა ფოტოებს აქციიდან.

“იმედს” აღებული აქვს “პუბლიკის” ფოტორეპორტაჟი, გვერდით მის მიერ გადაღებული ისეთი ფოტო აქვს განთავსებული,სადაც აქციაზე ცოტა ადამიანი ჩანს და წერს: “როგორ აშუქებს ნაცმოძრაობის პროპაგანდის ინსტრუმენტი “პუბლიკა” აქციას”  და “რა ხდება სინამდვილეში”. 

ეს არ არის პირველი შემთხვევა როდესაც სამთავრობო მედია “ქართული ოცნების” თანამდებობის პირების მხადამხარ დამოუკიდებელი მედიის დისკრედიტაციას ეწევა.

გამოცემა “საქართველოს ამბები” კიბერთავდასხმის სამიზნე გახდა

გამოცემა “საქართველოს ამბების” დამფუძნებელი, ჟურნალისტი გელა მთივლიშვილი სოციალურ ქსელში წერს, რომ გამოცემის საიტი – sakartvelosambebi.ge  კიბერთავდასხმის სამიზნე გახდა. 

მთივლიშვილი სოციალურ ქსელში ვრცელ პოსტს აქვეყნებს და ამბობს, რომ ეს პირველი შემთხვევა არაა, რაც მათი ვებგვერდები გატეხეს. “ვვარაუდობთ, ასე მარტივად იმიტომ გვერევიან, რომ საიტები ძველ ძრავებზეა აწყობილი. მინიმალური რესურსების გამო შესაბამისი პროგრამული განახლებები ვერ უზრუნველვყავით, რამაც თავდამსხმელებს საქმე გაუადვილა. ძალიან ამოგვიჩემეს და გვარიანადაც გვაზიანებენ”, – წერს მთივლიშვილი. 

შეგახსენებთ, ბოლო პერიოდში დამოუკიდებელ კრიტიკულ გამოცემებსა და მათ პლატფორმებზე შეტევამ აქტიური სახე მიიღო.  საგამოძიებო მედია “მონიტორი”, ბოლო პერიოდში არაერთხელ გახდა ასეთი კიბერთავდასხმის სამიზნე.

“მაუწყებლობის შესახებ კანონის” დარღვევის მოტივით, კომუნიკაციების კომისიამ ტელეკომპანია “ფორმულა” მესამედ დააჯარიმა

2026 წლის 1 ოქტომბერს, “მაუწყებლობის შესახებ კანონის” დარღვევის მოტივით, კომუნიკაციების კომისიამ მესამედ დააჯარიმა ტელეკომპანია “ფორმულა”, ამჯერად, 10 000 ლარით.  

კომუნიკაციების კომისიის განცხადებით, საუბარია 14-16 სექტემბრის მონიტორინგის შედეგად გამოვლენილ “დარღვევებზე”. უწყება არხს შინაარსობრივი რეგულირების დარღვევაში უთვლის პირდაპირ ეთერებსა და სიუჟეტებში შეფასებითი ტერმინების გამოყენებას. რა ტერმინებზეა საუბარი, ამჯერად, კომუნიკაციების კომისიას ოფიციალურ განცხადებაში არ დაუსახელებია. თუმცა, წინა ორ შემთხვევაში არხი ჯარიმდებოდა ისეთი სიტყვების გამოყენებისთვის, როგორიცაა: “„ოცნების ხელისუფლება“, „ქართული ოცნების პრეზიდენტი“, „ოცნების პროკურატურა“, „ოცნების პრემიერი“, „ოცნების საგარეო საქმეთა სამინისტრო“, „რეპრესიული კანონები“ და „ოცნების რეჟიმის რეპრესიები“.  

ბოლო ერთი წლის განმავლობაში, მას შემდეგ, რაც კომუნიკაციების კომისიამ მაუწყებლების შინაარსის მონიტორინგი დაიწყო, “ფორმულას” წინააღმდეგ ოთხჯერ დაიწყო მოკვლევა.  პირველ შემთხვევაში არხს წერილობითი გაფრთხილება მისცეს, მეორე შემთხვევაში არხი 2 500 ლარით დაჯარიმდა, მესამე წარმოება 5 000 ლარიანი ჯარიმით დასრულდა. ვინაიდან ეს მეოთხე შემთხვევა იყო, “მაუწყებლობის შესახებ” საქართველოს კანონის თანახმად, არხს უნდა დაკისრებოდა ჯარიმა არაუმეტეს მისი წლიური შემოსავლის 3%-ისა, ან არანაკლებ 10,000 ლარის ოდენობისა. შესაბამისად, მესამე ჯარიმა 10 000 ლარით განისაზღვრა.

ჟურნალისტ ვახო სანაიას განმეორებით დაპატიმრება ემუქრება სოციალურ ქსელში გამოქვეყნებული სტატუსების გამო

ტელეკომპანია “ფორმულას” ტელეწამყვანს, ვახო სანაიას მეორედ ემუქრება ადმინისტრაციული პატიმრობა სოციალურ ქსელში გამოქვეყნებული სტატუსების გამო.  საუბარია Facebook-ში გამოქვეყნებულ ორ  სარკასტულ პოსტსა და ერთ ვიდეოზე, რომლებიც პარლამენტის თავმჯდომარეს შალვა პაპუაშვილს ეხება. ერთი პოსტი დაპატიმრებამდე რამდენიმე წუთით ადრეა დაწერილი (22 ივლისს), მეორე კი ციხიდან გამოსვლის შემდეგ (5 აგვისტოს).

ჟურნალისტის წინააღმდეგ ადმინისტრაციული წარმოება შსს-ს “სიძულვილის ენის მონიტორინგის სამმართველომ” დაიწყო. ეს სამმართველო ერთ-ერთი ბერკეტია ხელისუფლების ხელში,  გამოხატვის თავისუფლების წინააღმდეგ და მას პროაქტიულად იყენებს კრიტიკულად განწყობილი ადამიანების დასასჯელად.  ახალი სამმართველო შსს-ში 1 ივნისიდან ფუნქციონირებს. ოფიციალური განცხადების მიხედვით, სამმართველოს ამოცანაა საჯარო სივრცეში გავრცელებული ადამიანის ღირსების შემლახველი, შეურაცხმყოფელი ან სიძულვილის ენის შემცველი განცხადებების მონიტორინგი და პროაქტიული გამოვლენა, თუ ისინი ადმინისტრაციული სამართალდარღვევის ნიშნებს შეიცავს. 

შალვა პაპუაშვილის შესახებ სტატუსების გამო, ვახო სანაია ერთხელ უკვე იყო ადმინისტრაციულ პატიმრობაში – 22 ივლისს მოსამართლე ზვიად ცეკვავამ მას 14 დღიანი პატიმრობა შეუფარდა. აღნიშნულმა სამმართველომ, კრიტიკული პოსტების გამო, არაერთი სამოქალაქო აქტივისტი დაასანქცირა ან შეუფარდა ადმინისტრაციული პატიმრობა.

ბერა ივანიშვილი რამდენიმე მედიასაშუალების და ჟურნალისტის მიმართ სარჩელის შეტანას გეგმავს

30 სექტემბერს ბერა ივანიშვილმა საკუთარ ფეისბუკ გვერდზე გამოაქვეყნა განცხადება, რომლის თანახმადაც ის მედიასაშუალებების წინააღმდეგ სასამართლოში სარჩელის შეტანას გეგმავს ცილისწამების მოტივით. 

“სოციალურ ქსელებსა და მედიასივრცეში მიმდინარე გამუდმებული უსაფუძვლო თავდასხმები, რომლებიც კარგად დაგეგმილი, კოორდინირებული კამპანიის ნაწილია, ჩემი მხრიდან რეაგირების გარეშე ვეღარ დარჩება… “ჩემ მიმართ გაჟღერებულ თითოეულ ბინძურ ცილისმწამებლურ ბრალდებასთან დაკავშირებით სამართლებრივ პასუხს მოვითხოვ” – წერს  ბერა ივანიშვილი. 

ბერა ივანიშვილი ამბობს, რომ უჩივლებს იმ მედიასაშუალებებს, რომლებიც ქოლცენტრების მფარველობაში ადანაშაულებენ მას. 

“ქართული ოცნების” საპატიო თავმჯდომარისა და დამფუძნებლის, ბიძინა ივანიშვილის, შვილმა ადვოკატს უკვე მიმართა. ადვოკატმა დავით ასათიანმა კი, ტელეკომპანია “იმედთან” გაკეთებულ კომენტარში განაცხადა: “…ჩვენი სარჩელის ადრესატები იქნებიან რამდენიმე მედიასაშუალება, კონკრეტული პირები, რომლებიც ავრცელებენ ამ ცილისწამებას და მტკიცებით ფორმაში ფაქტებს, რომლებსაც რეალურად არანაირი საფუძველი არ გააჩნია”.

„მონიტორის“ დისკრედიტაციის მორიგი მცდელობა „ქართული ოცნების“ წევრებისა და პროსამთავრობო მედიის მხრიდან

საგამოძიებო მედია „მონიტორის“ მიერ გამოქვეყნებულ  ჟურნალისტურ გამოძიებას ხელისუფლებასთან დაახლოებული ბიზნესმენის – ვანო ჩხარტიშვილის მხრიდან მადისკრედიტებელი განცხადებები მოჰყვა, რაც პროსახელისუფლებო მედიამ კამპანიურად გაავრცელა. 

საქმე ეხება 25 სექტემბერს “მონიტორის” მიერ მომზადებულ მასალას ესტონელ ბიზნესმენზე, რომლის წინააღმდეგაც საქართველოში მიმდინარეობდა გამოძიება და სასამართლო პროცესები. მისი შინდისში არსებული ქონება მანამდე იყო დაყადაღებული, სანამ მიწის დიდ ნაწილს ხელისუფლებასთან დაახლოებული ბიზნესმენი ვანო ჩხარტიშვილი იყიდდა. ამავე გამოძიებაში საუბარია, შინდისში მიმდინარე მშენებლობაზე, რომელიც ბიძინა ივანიშვილის ოჯახს ეკუთვნის.

ჟურნალისტური გამოძიების გამოქვეყნების შემდეგ, ბიზნესმენმა ვანო ჩხარტიშვილმა გაავრცელა წერილი, სადაც „დაკვეთილ სიუჟეტსა“ და მისი დისკრედიტაციის მცდელობაზე საუბრობს. მისივე თქმით, სიუჟეტი “კონსპირაციებზეა” აგებული.

„იმედი მაქვს, აღნიშნული საკითხით დაინტერესდება ობიექტური მედია, დასვამს ობიექტურ კითხვებს, გააკეთებს ობიექტურ ანალიზს და საზოგადოება არ დარჩება სტუდია „მონიტორის“ მიერ მომზადებული მიკერძოებული და დეზინფორმაციული ინფორმაციის პირისპირ“, – განაცხადა ვანო ჩხარტიშვილმა.

ვანო ჩხარტიშვილის განცხადება ტელეკომპანიებმა: „იმედმა“, „რუსთავი 2“-მა და „პოსტვ-იმ“ ჯამში 9-ჯერ გაავრცელეს. აქედან, წერილი 5-ჯერ გამოქვეყნდა ტელეკომპანია „იმედის“ ფეისბუკგვერდზე, 2-ჯერ  „რუსთავი 2“-ის და 2-ჯერ  „პოსტვ-ის“ მიერ.

განცხადების გამოქვეყნებით არ დასრულებულა “მონიტორის” წინაღმდეგ კამპანიური შეტევა. 

“იმედმა” და “პოსტვ”-იმ ვრცელი სიუჟეტები მიუძღვნეს “მონიტორის” მიერ გამოქვეყნებულ გამოძიებას. ხოლო, მოგვიანებით ამ სიუჟეტიდან ამოჭრილი ნაწყვეტები სოციალურ ქსელებში გაავრცელეს. მონიტორინგის შედეგად დგინდება, რომ “იმედმა” “პოსტივიმ” და “რუსთავი 2-მა” საგამოძიებო მედიის წინააღმდეგ სამ დღეში 14 მასალა გაავრცელა.

“იმედი” “სტუდია „მონიტორს” უცხოურ გრანტებზე დამოკიდებული ორგანიზაციას” უწოდებს.

სიუჟეტებში კომენტარს აკეთებს ირაკლი კობახიძე და “მონიტორს” “უცხოურ აგენტურაში” ადანაშაულებს. 

შალვა პაპუაშვილმა კი, თქვა რომ “სტუდია მონიტორი იმ ჯგუფის წევრია, რომელიც ზოგადად საქართველოს წინააღმდეგ მოქმედებს”.

“სიკეთეზე წერა მათ არ შეუძლიათ, ბინძური დაკვეთების კეთება ურჩევნიათ”  ასე აღწერს პოსტვ “მონიტორის” საგამოძიებო საქმიანობას და “მონიტორის” სიუჟეტს “მორიგ Fake-ს უწოდებს”.

ეს არ არის პირველი შემთხვევა, როდესაც დამოუკიდებელი საგამოძიებო გუნდი “მონიტორი” “ქართული ოცნების” მაღალი თანამდებობის პირებისა თუ მათთან დაახლოებული მედიის მხრიდან კოორდინირებული დისკრედიტაციის კამპანიის სამიზნე ხდება. 

პარლამენტის თავმჯდომარე, შალვა პაპუაშვილი, მზია ამაღლობელის შესახებ დეზინფორმაციას ავრცელებს

2026 წლის 9 სექტემბერს, საქართველოს პარლამენტის თავმჯდომარემ, შალვა პაპუაშვილმა, კვლავ დეზინფორმაცია გაავრცელა გამოცემების “ბათუმელებისა” და “ნეტგაზეთის” დამფუძნებლის, ჟურნალისტ მზია ამაღლობელის შესახებ. ასევე, იგი კვლავ მოძალადედ მოიხსენია და “უსინდისობის პატიმარი” უწოდა. 

პაპუაშვილმა, პარლამენტში გამართულ სპეციალურ ბრიფინგზე,  „ძალადობრივი თავდასხმა“ უწოდა პოლიციელისთვის სილის გაწვნას და თქვა, რომ მას „ყველაზე მცირე სასჯელი“ შეეფარდა. „რაც შეეხება სასჯელს, მზია ამაღლობელი არის ოპოზიციის და ბრიუსელის უსინდისობის პატიმარი. მზია ამაღლობელს შეეფარდა ყველაზე მცირე სასჯელი, რაც კი შეიძლებოდა შეფარდებოდა სასამართლოს მხრიდან.  ამაზე ნაკლები სასჯელი საპროცესო კოდექსით შესაძლებელია მხოლოდ საპროცესო შეთანხმების შემთხვევაში – ეს არის კანონიც და პრაქტიკაც”, – განაცხადა პაპუაშვილმა.

სინამდვილეში, სისხლის სამართლის კოდექსის 353-ე მუხლის პირველი ნაწილი, მზია ამაღლობელი გაასამართლეს, საპატიმრო სასჯელის გარდა, ითვალისწინებს ჯარიმას ან შინაპატიმრობასაც. თუმცა, მოსამართლე ნინო სახელაშვილმა მზია ამაღლობელს 2-წლიანი პატიმრობა მიუსაჯა.

ეს არ არის პირველი შემთხვევა, როდესაც მზია ამაღლობელი “ქართული ოცნების” მაღალჩინოსნების მხრიდან ვერბალური თავდასხმებისა და დისკრედიტაციის სამიზნეა. მზია ამაღლობელი, დაკავებისთანავე გახდა პარტია “ქართული ოცნების” პროპაგანდისტული და დეზინფორმაციული თავდასხმის სამიზნე.

“ქართულ ოცნებასთან” დაახლოებული პირი, გიორგი გამსახურდია,“ნეტგაზეთისა” და”ბათუმელების” დამფუძნებლების მისამართით ჰომოფობიურ დეზინფორმაციას ავრცელებს

“ქართულ ოცნებასთან” დაახლოებული პირი, გიორგი გამსახურდია, რომელიც, პოლონეთში პოლიციის ატაშეა, გამოცემების “ბათუმელებისა” და “ნეტგაზეთის” დამფუძნებლების, ეთერ თურაძისა და მზია ამაღლობელის მისამართით, ჰომოფობიური შინაარსის დეზინფორმაციულ განცხადებას ავრცელებს და ამით, გამოცემის დისკრედიტაციას ცდილობს. 

მისი დეზინფორმაციული განცხადება მოჰყვა ”ბათუმელების” სტატიას, რომელშიც გამოცემა სვამს კითხვას, იმ ფონზე, როდესაც, “ქართული ოცნების” მიერ შექმნილი, სიძულვილის ენის მონიტორინგის სააგენტო აჯარიმებს და ასამარღთლებს ასობით აქტივისტს, რატომ არ რეაგირებს ის გიორგი გამსახურდიას შემთხვევაში. გიორგი გამსახურდია სოციალურ ქსელში გამოირჩევა უხამსი ლექსიკის გამოყენებით. ის გამუდმებით აგინებს და ლანძღავს ოპონენტებს. 

ამ დეზინფორმაციული პოსტის შემდეგაც, გიორგი გამსახურდიას, არაერთი შერაცხმყოფელი სტატუსი აქვს გამოქვეყნებული Facebook-ის პირად გვერდზე, სადაც გამუდმებით ნიშნავს გამოცემა “ნეტგაზეთს”.

“ქართულ ოცნებასთან” აფილირებული პირი, გია აბაშიძე, “ნეტაზეთის” დისკრედიტაციას ეწევა

“ქართულ ოცნებასთან” აფილირებული პირი, გია აბაშიძე, რომელიც პოზიციონირებს, როგორც ექსპერტი,  ონლაინ გამოცემა “ნეტაზეთს” მოიხსენიებს როგორც – “ევროდაფინანსებულ” კედლის გაზეთს” და ნაციონალური მოძრაობის პროპაგანდისტს – “ნაცბაბლის” და “ნაცსექტის” მედიას.

ექსპერტად წოდებული პირი გამოცემას თავს ესმის მასალის გამო, რომელშიც, ევროკავშირში გაწევრების შესახებ ისლანდიის რეფერენდუმის შედეგებია გაანალიზებული. “ვის უფრო დავუჯეროთ ისლანდიელთა გადაწყვეტილების მიზეზებზე – კრიმინალი მზია ამაღლობელის ევროდაფინანსებულ კედლის გაზეთს, „ნეტგაზეთს“, რომლის „უძვირფასესი“ რესპონდენტები ექსპერტული პაროდიის წარმომადგენლები არიან, თუ ირის ერლინგსდოტირს – გამოცდილ ისლანდიელ ჟურნალისტსა და რედაქტორს?”- წერს აბაშიძე და შემდეგ ავითარებს მმართველი პარტიის ანტიდასავლურ მესიჯბოქსს, რომ ისლანდიამ “ევროკავშირს სუვერენიტეტი არჩია” – “ყველაზე სასაცილო სწორედ ეს არის: ისლანდიელებმა საკუთარი ქვეყნის მომავალზე გადაწყვეტილება თავად მიიღეს, ხოლო „ნაცქაჯებმა” მათ მაგივრად მისი ახსნაც ითავეს”. 

ეს არ არის პირველი შემთხვევა, როდესაც “ნეტგაზეთი” ქართული ოცნების” წევრებისა თუ მათთან დაკავშირებული პირების დისკრედიტაციის სამიზნე გახდა. ამგვარი თავდასხმები, გამოცემის მიმართ, განსაკუთრებით გახშირდა მას შემდეგ, რაც უკანონოდ დააპატიმრეს გამოცემების დამფუძნებელი მზია ამაღობელი.