ადმინისტრაციული ორგანო

კომუნიკაციების კომისიამ ტელეკომპანია “ფორმულა” 2 500 ლარით დააჯარიმა

კომუნიკაციების ეროვნულმა კომისიამ, ტელეკომპანია “ფორმულას” „მაუწყებლობის შესახებ“ საქართველოს კანონის დარღვევა დაუდგინა და სანქციის სახით, 2 500-ლარიანი ჯარიმა დააკისრა.

საქმის წარმოება კომისიაში თავად უწყების მიერ ჩატარებული აპრილის თვის მედია მონიტორინგის საფუძველზე დაიწყო. კომუნიკაციების კომისიამ ჩათვალა, რომ „ფორმულამ“ მაუწყებლობის შესახებ კანონში ახლად შეტანილი ის მუხლები დაარღვია, რომლებიც შინაარსთან დაკავშირებულ საკითხებს არეგულირებს. კერძოდ, 54-ე მუხლის პირველი, მეოთხე და მეხუთე პუნქტები. კომუნიკაციების კომისიამ “ფორმულა” დააჯარიმა ახალი ამბების პროგრამებში გამოყენებული ისეთი სიტყვებისთვის, როგორიცაა „ქართული ოცნების მთავრობის მეთაური“, „ივანიშვილის რეჟიმი“, „რეჟიმის პროკურატურა“, „ოცნების პრემიერი“ და სხვა მსგავსი. ასევე, პრობლემურად მიიჩნია დიუშენის კუნთოვანი დისტროფიის მქონე ბავშვების შესახებ სიუჟეტის ეთერში გაშვება ჯანდაცვის სამინისტროს კომენტარის გარეშე და ეს ბალანსის დაცვის მოთხოვნის დარღვევად ჩათვალა.

“გამომდინარე იქიდან, რომ ტელეკომპანია „ფორმულას“ ბოლო ერთი წლის განმავლობაში მსგავსი ხასიათის დარღვევისთვის წერილობითი გაფრთხილება უკვე მიღებული ჰქონდა, კომუნიკაციების კომისიამ მაუწყებელს „მაუწყებლობის შესახებ“ საქართველოს კანონის შესაბამისად, მინიმალური – 2500 ლარის ოდენობის ჯარიმა დააკისრა”, – ვკითხულობთ კომუნიკაციების კომისიის განცხადებაში. წერილობითი გაფრთხილება “ფორმულამ”, სხვა ტელეკომპანიებთან ერთად, 8 აპრილს მიიღო. იმ შემთხვევაშიც, კომკომი, არხს იდენტურ საკითხებს ედავებოდა.

“თვალსაჩინოა ცენზურის ნორმალიზებისა და სარედაქციო საქმეებში ჩარევის მცდელობა”, – ასე აფასებს საქართველოს ჟურნალისტური ეთიკის ქარტია ამ ფაქტს და ღრმა შეშფოთებას გამოთქვამს ამ ტენდენციის გამო.

“სტუდია მონიტორსა” და “პუბლიკას” პარლამენტმა აკრედიტაცია ვადაზე ადრე გაუუქმა

ონლაინ გამოცემებს: „პუბლიკასა“ და „მონიტორს“, საქართველოს პარლამენტმა ვადამდე გაუუქმა აკრედიტაცია, რომელიც ერთი წლის ვადით იყო გაცემული. პარლამენტის აპარატის უფროსის, კახა ოქროჯანაშვილის 21 მაისის ბრძანებებში, რომლებიც მედიებმა მიიღეს, აკრედიტაციის გაუქმების საფუძვლად მითითებულია მიმდინარე სასესიო პერიოდში (05.02.2026 – 17.04.2026), ზედიზედ ათი კვირის განმავლობაში, აკრედიტებული მედიასაშუალების ჟურნალისტების არყოფნა პარლამენტში. „პუბლიკასაც“ და “მონიტორსაც” პარლამენტში აკრედიტებული ოთხ-ოთხი ჟურნალისტი ჰყავდათ.

პარლამენტის საზოგადოებასთან ურთიერთობის სამსახურში გამოცემა “პუბლიკას” განუცხადეს, რომ ეს არის პირველი შემთხვევა, როცა ამ მუხლის მითითებით პარლამენტში ჟურნალისტებს აკრედიტაცია ვადაზე ადრე გაუუქმდათ. აღნიშნული წესი 2023 წლიდანაა ძალაში. “მონიტორი”გეგმავს პარლამენტის გადაწყვეტილება სასამართლოში გაასაჩივროს.

შეგახსენებთ, სტუდია “მონიტორის” არააკრედიტირებულ ჟურნალისტს პარლამენტში პრობლემები შეუქმნეს ერთჯერადი საშვის მიღების დროსაც. „მონიტორის“ ჟურნალისტმა მარიკა დუდუნიამ 17 და 19 თებერვალს ორჯერ მიმართა საქართველოს პარლამენტს ერთჯერადი სპეციალური საშვის მოთხოვნით, თუმცა პარლამენტმა მოთხოვნა არ დააკმაყოფილა.

საქართველოს ჟურნალისტური ეთიკის ქარტია მომხდარს აფასებს, როგორც განზრახვას დამოუკიდებელ მედიასაშუალებაში მომუშავე ჟურნალისტებს შეეზღუდოთ წვდომა საჯარო ინფორმაციასა და საჯარო სივრცეებზე და შეეშალოთ ხელი პროფესიული მოვალეობის შესრულებაში. “ყოველივე ეს აზარალებს საქართველოს მოსახლეობას, ტოვებს რა მათ სანდო და გადამოწმებული ინფორმაციის გარეშე მათთვის სასიცოცხლოდ მნიშვნელოვან საკითხებზე”, – ნათქვამია ქარტიის განცხადებაში.

შსს-ში საჯარო კომუნიკაციის მონიტორინგისთვის ახალი სამმართველოს შექმნა იგეგმება

სამართალდამცავ სტრუქტურებს შორის კოორდინაციის საკითხებში სახელმწიფო მინისტრის, მამუკა მდინარაძის განცხადებით, შინაგან საქმეთა სამინისტროში ახალი სამმართველო შეიქმნება, რომლის ფუნქცია საჯარო სივრცეში სიძულვილის ენის, შეურაცხმყოფელი კამპანიებისა და აგრესიული კომუნიკაციის მონიტორინგი იქნება.

მდინარაძის თქმით, სამმართველო ნებისმიერი ტიპის საჯარო კომუნიკაციას დააკვირდება, მათ შორის ისეთ განცხადებებს, რომლებიც, ხელისუფლების შეფასებით, შეიცავს სიძულვილის ენას, შუღლის გაღვივებას, ღირსების შელახვას ან სხვა მსგავსი ხასიათის კომუნიკაციას.

მისივე განცხადებით, სამმართველო პროაქტიულ რეჟიმში იმოქმედებს და რეაგირება მხოლოდ მოქალაქის საჩივარზე არ იქნება დამოკიდებული. უწყება თავად განახორციელებს მონიტორინგს, სამართლებრივ შეფასებას და, საჭიროების შემთხვევაში, მასალებს სასამართლოში გადააგზავნის.

მდინარაძემ განაცხადა, რომ ახალი მექანიზმის მიზანი გამოხატვის თავისუფლების შეზღუდვა არ არის. მისი თქმით, „კრიტიკის გამო არავინ არავის დაადებს ადმინისტრაციულ სახდელს“, თუმცა იმ შემთხვევებში, როდესაც კომუნიკაცია შეურაცხმყოფელ ან შუღლის გამაღვივებელ ხასიათს მიიღებს, სასამართლომ შესაძლოა ადმინისტრაციული პატიმრობაც გამოიყენოს.

ახალი სამმართველოს შექმნის ინიციატივა განსაკუთრებით საყურადღებოა იმ ფონზე, როდესაც ბოლო პერიოდში საქართველოში საჯარო გამოხატვის, მათ შორის სოციალური ქსელებში გამოქვეყნებული პოსტების გამო, პირების ადმინისტრაციული პასუხისმგებლობის არაერთი შემთხვევა ფიქსირდება.მდინარაძის განცხადების საპასუხოდ, საქართველოს ახალგაზრდა იურისტთა ასოციაციის თავმჯდომარემ, თამარ ონიანმა განაცხადა, რომ დაანონსებული მექანიზმი „ერთგვარი ცენზურის მექანიზმად გვევლინება, და, მას არაფერი აქვს საერთო დემოკრატიულ საზოგადოებაში ინტერესთა ბალანსთან“.

ტელეკომპანია „თრიალეთი“ საჯარო რეესტრის გადაწყვეტილებას კომპანიის საქმიანობის შეფერხების რისკად აფასებს

ტელეკომპანია „თრიალეთი“ აცხადებს, რომ საჯარო რეესტრმა კომპანიის განახლებული წესდების რეგისტრაცია შეაჩერა, რაც, არხის შეფასებით, ერთ პარტნიორს კომპანიის საქმიანობის შეფერხების ბერკეტს აძლევს.

საქმე ეხება შპს „აქცეპტის“ მოთხოვნას, რომლის მიხედვითაც, მნიშვნელოვან საკითხებზე, მათ შორის წილის გასხვისებაზე, გადაწყვეტილება მხოლოდ ყველა პარტნიორის თანხმობით უნდა მიიღებოდეს და არა ხმათა უმრავლესობით.

„თრიალეთის“ წილები ამჟამად ასე ნაწილდება: ჯონდო ნანეტაშვილი – 50%, ნინო გაგნიძე – 40%, შპს „აქცეპტი“ – 10%. მოქმედი წესდებით, გარკვეული გადაწყვეტილებების მისაღებად საკმარისია ხმების 3/4, რასაც „აქცეპტი“ ეწინააღმდეგება.

არხის ინფორმაციით, 2026 წლის 7 მაისს პარტნიორთა კრებაზე განახლებული წესდების მიღება სცადეს, თუმცა „აქცეპტის“ წარმომადგენელმა ოქმს ხელი არ მოაწერა. მიუხედავად ამისა, მეორე დღეს წესდება საჯარო რეესტრს წარედგინა. რეესტრმა რეგისტრაცია შეაჩერა იმ არგუმენტით, რომ წესდებაში არ იყო ასახული პოზიცია, რომელსაც „აქცეპტიც“ იზიარებდა.„თრიალეთი“ აცხადებს, რომ საჯარო რეესტრმა კანონი არასწორად განმარტა და ამით ერთ პარტნიორს კომპანიის რეგისტრაციისა და საქმიანობის შეფერხების შესაძლებლობა მისცა. არხმა საკითხზე პროკურატურასაც მიმართა. დამატებით, „თრიალეთი“ მიუთითებს შპს „აქცეპტთან“ დაკავშირებულ გარემოებებზე. საერთაშორისო გამჭვირვალობა-საქართველოს 2015 წლის ანგარიშის თანახმად, კახა კობიაშვილი ბიძინა ივანიშვილის ნათესავია და რამდენიმე ოფშორული კომპანიის იურიდიულ წარმომადგენლად ფიგურირებდა.

ტელეკომპანია “ფორმულას” ჟურნალისტი ელისო ჯარიაშვილი პროკურატურაში გამოკითხვაზე დაიბარეს

პროკურატურამ გამოკითხვაზე დაიბარა ტელეკომპანია “ფორმულას” ჟურნალისტი და ტელეწამყვანი ელისო ჯარიაშვილი. როგორც ჟურნალისტი განმარტავს, საგამოძიებო უწყებაში მისი გამოკითხვა მოთხოვნილია, მისი “ფორმულას” ეთერში გასული სიუჟეტიდან გამომდინარე. კერძოდ, “ფორმულამ” საგამოძიებო რეპორტაჟი მოამზადა ჟურნალისტ გურამ როგავაზე თავდასხმის შესახებ, რომელიც 2024 წლის ნოემბრის მასობრივი აქციების დროს მოხდა. როგორც ცნობილია, ტელეკომპანია “ფორმულამ” სავარაუდოდ გაარკვია თავდამსხმელის ვინაობა. ტელეკომპანიაში აცხადებენ, რომ გურამ როგავაზე თავდამსხმელის ვინაობა განსაკუთრებულ დავალებათა დეპარტამენტ-ის თანამშრომელმა გაამხილა.

ელისო ჯარიაშვილის თქმით: “მიუხედავად იმისა, რომ ამის სამართლებრივი აუცილებლობა არ არის, რადგან გურამ როგავაზე შესაძლო თავდამსხმელის ვინაობა მათთვის უკვე ცნობილია და შესაბამისად, შეუძლიათ საგამოძიებო მოქმედების ჩატარება”, – მაინც მივა საგამოძიებო უწყებაში.

2024 წლის 29 ნოემბერს ნიღბიანმა სამართალდამცავმა ჟურნალისტ გურამ როგავაზე პირდაპირი ჩართვის დროს იძალადა. როგავა დაზარალებულად ცნეს 2024 წელს, თუმცა გამოძიებას თავდამსხმელი არ დაუდგენია.

“ფორმულას” სიუჟეტის ეთერში გასვლის შემდეგ, თბილისის საქალაქო სასამართლოს მოსამართლე ვალერიან ბუგიანიშვილმა აღკვეთის ღონისძიების სახით პატიმრობა შეუფარდა ჟურნალისტ გურამ როგავასა და მომიტინგე ზვიად მაისაშვილის მიმართ განხორციელებულ ფიზიკური ძალადობის ფაქტზე დაკავებულ, განსაკუთრებულ დავალებათა დეპარტამენტის ყოფილ სამ თანამშრომელს. მათგან ერთი-ერთი დაცვის პოლიციის მოქმედი თანამშრომელია. მათ როგავასა და მომიტინგე ზვიად მაისაშვილზე განხორციელებულ ფიზიკურ ძალადობას ედავებიან.

ჟურნალისტი გურამ როგავა პროკურატურაში გამოკითხვაზე დაიბარეს

6 მაისს, პროკურატურაში გამოკითხვაზე დაიბარეს ჟურნალისტი გურამ როგავა.

„ხვალ, თბილისის დროით 12:00 საათზე გამომკითხავენ“ – დაწერა გურამ როგავამ სოციალურ ქსელში.

პროკურატურამ გამოკითხვაზე დაიბარა ტელეკომპანია “ფორმულას” ჟურნალისტი და ტელეწამყვანი ელისო ჯარიაშვილიც. როგორც ჟურნალისტი განმარტავს, საგამოძიებო უწყებაში მისი გამოკითხვა მოთხოვნილია მისი “ფორმულას” ეთერში გასული სიუჟეტიდან გამომდინარე. კერძოდ, ჯარიაშვილმა საგამოძიებო რეპორტაჟი მოამზადა ჟურნალისტ გურამ როგავაზე თავდასხმის შესახებ, რომელიც 2024 წლის ნოემბრის მასობრივი აქციების დროს მოხდა. “ფორმულამ” სავარაუდოდ გაარკვია თავდამსხმელის ვინაობა. ტელეკომპანიაში აცხადებენ, რომ როგავაზე თავდამსხმელის ვინაობა განსაკუთრებულ დავალებათა დეპარტამენტის თანამშრომელმა გაამხილა.

2024 წლის 29 ნოემბერს, ნიღბიანმა სამართალდამცავმა გურამ როგავაზე მაშინ იძალადა, როდესაც იგი აქციას პირდაპირ ეთერში აშუქებდა.

გურამ როგავა დაზარალებულად მალევე ცნეს, თუმცა გამოძიებას თავდამსხმელი არ დაუდგენია.

“ფორმულას” ეთერში სიუჟეტის გასვლის შემდეგ თბილისის საქალაქო სასამართლოს მოსამართლე ვალერიან ბუგიანიშვილმა აღკვეთის ღონისძიების სახით პატიმრობა შეუფარდა განსაკუთრებულ დავალებათა დეპარტამენტის ყოფილ სამ თანამშრომელს – მათგან ერთი ერთი დაცვის პოლიციის მოქმედი თანამშრომელია. მათ როგავასა და მომიტინგე ზვიად მაისაშვილზე განხორციელებულ ფიზიკურ ძალადობას ედავებიან.

“TV პირველი“ პროკურატურისა და „ქართული ოცნების“ დეპუტატების განცხადებებს შაბათის ეთერის ჟურნალისტებზე ზეწოლის მცდელობად აფასებს

„TV პირველის“ საგამოძიებო ტელეპროექტის, „შაბათის ეთერის“ 25 აპრილის სიუჟეტს ტელეკომპანიის წინააღმდეგ მიმართული განცხადებების სერია მოჰყვა. საქართველოს პროკურატურა ტელევიზიას დეზინფორმაციის გავრცელებაში ადანაშაულებს.

კერძოდ, გადაცემაში „ნოდარ მელაძის შაბათი“ მომზადდა ჟურნალისტური გამოძიება ბეჟან ბეჟუაშვილის შესახებ, რომელიც გახმაურებული საქმეების პროკურორის, თამარ ბეჟუაშვილის მამაა. თამარ ბეჟუაშვილი პაატა ბურჭულაძის, ირაკლი ნადირაძის, მურთაზ ზოდელავას, პაატა მანჯგალაძისა და ლაშა ბერიძის საქმეებს უძღვება. ჟურნალისტური გამოძიების თანახმად, პროკურორის მამამ ბიზნესპარტნიორები მოატყუა და ამ გზით მათ კუთვნილ წილებს, თანხებსა და უძრავ ქონებას დაეუფლა. სიუჟეტში ასევე საუბარია პროკურორის სავარაუდო გავლენებზე, რის გამოც, შესაძლოა, ბეჟან ბეჟუაშვილის წინააღმდეგ დაწყებული საქმის განხილვა ჭიანურდება.

საქართველოს პროკურატურამ აღნიშნულთან დაკავშირებით განცხადება გაავრცელა და „TV პირველის“ მასალას „მორიგი დეზინფორმაციული სიუჟეტი“ უწოდა. უწყების განმარტებით, ტელეკომპანია „მიზანმიმართულად უკვე მეორედ ამზადებს სიუჟეტს პროკურორის მამის ბიზნესსაქმიანობის შესახებ და სრულიად დაუსაბუთებლად აკავშირებს თამარ ბეჟუაშვილის პროფესიულ საქმიანობასთან“.

„საქართველოს პროკურატურა არ დაუშვებს გახმაურებული სისხლის სამართლის საქმეების პროკურორებზე მსგავს თავდასხმებს, რომელიც პროკურორის და უწყების დისკრედიტაციას ისახავს მიზნად და შესაბამისი რეაგირება ექნება“ – ნათქვამია პროკურატურის განცხადებაში.

მომხდარს გამოეხმაურა ჟურნალისტი ნოდარ მელაძეც, რომელმაც აღნიშნა, რომ „შაბათის ეთერის“ გუნდზე განხორციელებული შეტევა ჟურნალისტებზე ზეწოლას ისახავს მიზნად:

„TV პირველის’ საგამოძიებო ტელეპროექტი შაბათის ეთერი, ჩვენს გუნდზე განხორციელებულ კამპანიურ თავდასხმებს ჟურნალისტებზე ზეწოლად მივიჩნევთ. ამ ქმედებების მიზანია, მედიის წარმომადგენლებმა შეწყვიტონ პროფესიული საქმიანობა და უარი თქვან საგამოძიებო რეპორტაჟების მომზადებაზე. უკვე მეორე დღეა, საქართველოს პროკურატურისა და „ქართული ოცნების“ დეპუტატების მხრიდან მიმდინარეობს თავდასხმების სერია გადაცემა „შაბათის ეთერის“ გამომძიებელ ჟურნალისტებზე“.

ჟურნალისტებს ანგარიშები დაუყადაღეს, მიუხედავად იმისა, რომ ჯარიმების შესახებ ინფორმირებული არ ყოფილან

15 აპრილს, „TV პირველის“ ინფორმაციით, არხის შაბათის ეთერის ჟურნალისტს, მაკა ჩიხლაძეს საბანკო ანგარიშები დაუყადაღეს. სოციალურ ქსელში ონლაინ გამოცემა JamNews-ის საქართველოს რედაქტორი ირაკლი დათუნაშვილიც (სოციალური მედიაში სახელი: ლეო ნაფტა) წერს, რომ მას საბანკო ანგარიშები დაუყადაღეს. მისი ინფორმაციით, დაყადაღების საფუძვლად მითითებულია 15 ოქტომბრის ჯარიმა, რომლის არსებობის შესახებ ამ დრომდე ინფორმირებული არ ყოფილა.

საინფორმაციო სამსახურის უფროსის, ნოდარ მელაძის განცხადებით, მაკა ჩიხლაძე 2025 წლის 15 ოქტომბერს რუსთაველის გამზირზე პროფესიული მოვალეობის შესრულებისას აშუქებდა მიმდინარე მოვლენებს, რის საფუძველზეც მას „გზის ხელოვნურად გადაკეტვის“ ბრალდებით 5000-ლარიანი ჯარიმა დაეკისრა. მისი თქმით, ჟურნალისტს აღნიშნული ჯარიმის შესახებ არ შეატყობინეს და მოგვიანებით ანგარიშები დაუყადაღეს.

თავად მაკა ჩიხლაძე აცხადებს, რომ ჯარიმის არსებობის შესახებ ინფორმაცია მხოლოდ ანგარიშების დაყადაღების შემდეგ შეიტყო.

„ამხელა უწყებაში, შინაგან საქმეთა სამინისტროში, არ გამოინახა რესურსი, რომ ერთი SMS შეტყობინება გამოეგზავნათ ჩემთვის… უბრალოდ რომ შეეტყობინებინათ, რომ დაჯარიმებული ვარ, ამას გავარკვევდი და დავამტკიცებდი, რომ პროფესიულ მოვალეობას ვასრულებდი. ვიდრე ანგარიშები არ დამიყადაღეს, ამის შესახებ არ ვიცოდი“, – განაცხადა ჩიხლაძემ.

მისივე შეფასებით, საქმე შესაძლოა უკავშირდებოდეს მის ჟურნალისტურ საქმიანობას. „მე მგონია, რომ ეს არის შურისძიება და არ აქვს კავშირი არც შეკრებისა და მანიფესტაციის კანონთან და არც რაიმე დარღვევასთან“, – აღნიშნა მან. ჩიხლაძე ასევე მიუთითებს, რომ აღნიშნულ მოვლენაზე სხვა მედიის წარმომადგენლებიც მუშაობდნენ, თუმცა დაჯარიმება მხოლოდ მას შეეხო.

2024 წლის 7 დეკემბერს, თბილისში, ბესიკის ქუჩაზე, „TV პირველის“ ჟურნალისტ მაკა ჩიხლაძესა და ოპერატორ გიორგი შეწირულს პირდაპირ ეთერში მუშაობისას უცნობი ნიღბიანი პირები დაესხნენ თავს და ფიზიკურად გაუსწორდნენ. მომხდარზე დაწყებული გამოძიება ამ დრომდე არ არის დასრულებული.

კომუნიკაციების კომისიამ ოთხი ტელეკომპანია წერილობით გააფრთხილა

კომუნიკაციების კომისიამ ოთხი ტელეკომპანია, მათ შორის, ორი პროსამთავრობო არხიც, „მაუწყებლობის შესახებ“ საქართველოს კანონის დარღვევის გამო, წერილობით გააფრთხილა. საუბარია ხელისუფლებისადმი კრიტიკულ არხებზე – „ფორმულა“ და „TV პირველი“ და ასევე, პროსამთავრობო მაუწყებლებზე – POSTV და „იმედი“. კომუნიკაციების კომისიამ ტელევიზიები იმ მუხლების დარღვევის გამო გააფრთხილა, რომლებიც შინაარსობრივი რეგულირების საკითხებს შეეხება.

ComCom-ის ინფორმაციით, საკითხი დღის წესრიგი მის მიერ ჩატარებული მედიამონიტორინგის საფუძველზე დადგა. ტელევიზიებს ედავებოდნენ ისეთ საკითხებს, რაც ეხება – მიუკერძოებლობას, ბალანსს, პირადი დამოკიდებულების/მოსაზრების საფუძველზე გაშუქებას და ფაქტის ჯეროვან სიზუსტეს. მაგალითად, კომისიამ მიიჩნია, რომ ფრაზების: „ოცნების პროკურატურა“, „ოცნების პარლამენტი“, „ივანიშვილის პრემიერ-მინისტრი“, „რაჟდენ კუპრაშვილის უწყება“, „ოცნების მთავრობის წევრებთან“, „სასამართლო კლანი“, და სხვ. გამოყენებით „ფორმულამ“ ახალი ამბების პროგრამაში საკითხი მაუწყებლის პირადი დამოკიდებულების ან მოსაზრების საფუძველზე გააშუქა, რითაც კანონი დაარღვია.

ComCom-ის მედიამომსახურებების რეგულირების დეპარტამენტმა მონიტორინგის დროს ყველაზე მეტი შესაძლო დარღვევა სწორედ დამოუკიდებელ არხებს – „ფორმულას“ და ”TV პირველს” “აღმოუჩინა”, “ფორმულას” – 20, “TV პირველს” კი – 18, ყველაზე ცოტა კი, პროსამთავრობო, რუსული დეზინფორმაციის გავრცელებისთვის დასანქცირებულ “იმედსა” (4 დარღვევა) და “POSTV”-ს (7).

კომუნიკაციების კომისია ამჯერად მხოლოდ წერილობითი გაფრთხილებით იმ მოტივით შემოიფარგლა, რომ ბოლო ერთი წლის განმავლობაში, ამ ტელევიზიების მიმართ მსგავსი ხასიათის დარღვევისთვის სანქცია გამოყენებული არ ყოფილა.

შეგახსენებთ, მარტის დასაწყისში, პროსამთავრობო “იმედისა” და “POSTV”-ის დასანქცირების შემდეგ, ComCom-მა გაავრცელა მუქარის შემცველი განცხადება, რომ ის მარტიდან მაუწყებლების შინაარსის მონიტორინგს დაიწყებდა. „მაუწყებლობის შესახებ“ კანონში, გასულ წელს „ქართულმა ოცნებამ“ რეპრესიული ცვლილებები მიიღო. ეს ცვლილებები მაუწყებლების შინაარსის რეგულირებას უკავშირდება.

ტელეკომპანია “ფორმულას” ჟურნალისტს, ლიზა ციციშვილს, ანგარიშები დაუყადაღეს

ტელეკომპანია „ფორმულას“ ჟურნალისტს, ლიზა ციციშვილს საბანკო ანგარიშები დაუყადაღეს. ჟურნალისტის ცნობით, აღმოჩნდა, რომ 2025 წლის 10 სექტემბერს, რუსთაველის გამზირზე პროფესიული მოვალეობის შესრულებისას, იგი “გზის ხელოვნურად გადაკეტვის” საფუძვლით, 5 000 ლარით იყო დაჯარიმებული.

ჟურნალისტს ჯარიმის შესახებ შეტყობინება მიღებული არ ჰქონდა. მისივე თქმით, სექტმემბრის შემდეგ ის ერთხელ დააკავეს კიდეც, საზღვარიც გადაკვეთა, თუმცა, არცერთ შემთხვევაში მისთვის არ უთქვამთ, რომ დაჯარიმებული იყო.
საჯაროდ გავრცელებული ინფორმაციის თანახმად, 2024 წლის 26 ოქტომბრიდან დღემდე, ჯამში, ჟურნალისტების მიმართ 40-ზე მეტი ჯარიმა გამოიწერა “გზის ხელოვნურად გადაკეტვისთვის”.