სასამართლო

“რადიო თავისუფლების” პროდიუსერს, ბექა ბერაძეს, რომელიც პროევროპულ აქციებზე დაზარალდა, სასამართლომ სიტყვიერი გაფრთხილება მისცა

2025 წლის 12 მარტს გამართულ სასამართლო სხდომაზე “რადიო თავისუფლების” პროდიუსერს ბექა ბერაძეს სასამართლომ პოლიციელისთვის დაუმორჩილებლობის გამო სიტყვიერი გაფრთხილება მისცა.

ბექა ბერაძე 2024 წლის 1 დეკემბერს თბილისში მიმდინარე პროევროპული აქციის დროს, ღამის საათებში, ინგოროყვას ქუჩაზე თანხმხლებ პირებთან ერთად დააკავეს, ის საგარეჯოს დროებითი დაკავების იზოლატორში გადაიყვანეს და 48 საათის გასვლის შემდეგ ადმინისტრაციული სახდელის დაკისრების გარეშე გაათავისუფლეს. ბერაძეს სახეზე დაზიანებები ეტყობოდა, რაც როგორც “რადიო თავისუფლების” მასალიდან ირკვევა სპეცრაზმის წევრების მხრიდან განხორციელებული ძალადობის შედეგია.

2025 წლის 12 მარტს ბექა ბერაძეს დაუკავშირდნენ პოლიციიდან და აცნობეს რომ ერთ საათში მისი სასამართლო სხდომა იყო ჩანიშნული, სამართალდამცავები მას პოლიციის მოთხოვნის დაუმორჩილებლობას ედავებოდნენ. ბერაძის განცხადებით, მას და მის ადვოკატს მხოლოდ ერთი საათი მიეცა დრო საქმის მასალების გასაცნობად.

“ნეტგაზეთი”/”ბათუმელების” თანადამფუძნებელი და დირექტორი პატიმრობაში დატოვეს

გამოცემების – “ნეტგაზეთისა” და “ბათუმელების” დამფუძნებელი და დირექტორი, მზია ამაღლობელი პატიმრობაში დატოვეს. გადაწყვეტილება, 2025 წლის 4 მარტს, ბათუმის საქალაქო სასამართლოს მოსამართლემ, ვასილ მეტრეველმა მიიღო. ამ დღეს, ბათუმის საქალაქო სასამართლომ მედიამენეჯერის საქმის არსებითი განხილვა დაიწყო და მისთვის აღკვეთის ღონისძიების გადასინჯვის შესახებაც იმსჯელა.

“ნეტგაზეთი”/”ბათუმლების” დამფუძნებლის წინააღმდეგ გამოძიება სისხლის სამართლის კოდექსის 353 პრიმა მუხლის პირველი ნაწილით მიმდინარეობს. აღნიშნული მუხლი გულისხმობს პოლიციელზე, სპეციალური პენიტენციური სამსახურის მოსამსახურეზე ან ხელისუფლების სხვა წარმომადგენელზე ანდა საჯარო დაწესებულებაზე თავდასხმას და ითვალისწინებს თავისუფლების აღკვეთას 4-დან 7 წლამდე ვადით.

მზია ამაღლობელი 11-12 იანვრის ღამეს, ორჯერ დააკავეს. თავდაპირველად იგი დააკავეს პოლიციის შენობაზე სტიკერის გაკვრისთვის, რომელზეც ეწერა – “იფიცება საქართველო”. დაკავებიდან რამდენიმე საათში იგი გაათავისუფლეს ხელწერილის საფუძველზე. მაგრამ, გათავისუფლებიდან მალევე კვლავ დააკავეს პოლიციის უფროსისთვის, ირაკლი დგებუაძისთვის სილის გაწვნის ფაქტზე. როგორც გამოცემა “ნეტგაზეთი” წერს, ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციულ ქმედებებს მოჰყვა.

საქართველოს ახალგაზრდა იურისტთა ასოციაცია, რომელიც მზია ამაღლობელის ინტერესებს იცავს, მიიჩნევს, რომ “მზია ამაღლობელი არა მხოლოდ რჩება უკანონო პატიმრობაში, არამედ მას ქართულმა მართლმსაჯულებამ დემონსტრაციულად ჩამოართვა უფლება დაიცვას თავი და ამტკიცოს საკუთარი უდანაშაულობა”.

“მთავარი არხის” ოპერატორი, რომელიც პოლიციამ მუშაობის დროს უკანონოდ დააკავა, თავად ცნეს სამართალდამრღვევად

2025 წლის 10 თებერვალს, თბილისის საქალაქო სასამართლომ სამართალდამრღვევად ცნო და სიტყვიერი გაფრთხილება მისცა “მთავარი არხის” ოპერატორს სერგი ბარამიძეს, რომელზეც პროფესიული მოვალეობის შესრულების დროს სამართალდამცველებმა თავად იძალადეს.

სერგი ბარამიძე, პროფესიული მოვალეობის შესრულების დროს, ძალის გამოყენებით გასული წლის 19 ნოემბერს დააკავეს. მოგვიანებით, იგი ხელწერილის საფუძველზე გაათავისუფლეს.

ამ ფაქტის შემდეგ, შინაგან საქმეთა სამინისტრომ ოპერატორს სამართალდარღვევის ოქმი შეუდგინა. ოქმში ჩაწერეს, რომ სერგი ბარამიძე 19 ნოემბერს, საზოგადოებრივ წესრიგს არღვევდა, იგინებოდა და უმისამართოდ ილანძღებოდა, პოლიციელებს პირის კანონიერ დაკავებაში ხელს უშლიდა და არაერთი მოწოდების მიუხედავად, აღნიშნული ქმედებები არ შეწყვიტა. მის წინააღმდეგ საქმე ადმინისტრაციული სამართალდარღვევის კოდექსის 166-ე (წვრილმანი ხულიგნობა) და 173-ე მუხლების პირველი ნაწილით (პოლიციის კანონიერი მოთხოვნის დაუმორჩილებლობა) აღძრეს.

10 თებერვალს გამართულ პროცესზე, მოსამართლემ ბარამიძის მიმართ წვრილმანი ხულიგნობის მუხლით (166-ე) დაწყებული საქმის წარმოება შეწყვიტა. თუმცა პოლიციისთვის ხელშეშლის ნაწილში (173-ე) სამართალდამრღვევად ცნო და სიტყვიერი შენიშვნა გამოუცხადა.

სააპელაციო სასამართლომ “ბათუმელების” დირექტორის სარჩელი დაუშვებლად ცნო

2025 წლის 21 იანვარს ქუთაისის სააპელაციო სასამართლომ წარმოებაში არ მიიღო ონლაინ მედიების “ბათუმელებისა” და “ნეტგაზეთის” დამფუძნებელსა და დირექტორის, მზია ამაღლობელის საქმეზე სარჩელი და ჟურნალისტი წინასწარ პატიმრობაში დატოვა. მზია ამაღლობელს 2025 წლის 14 იანვარს ბათუმის საქალაქო სასამართლომ აღკვეთის ღონისძიების სახით წინასწარი პატიმრობა შეუფარდა.

მედია მენეჯერის წინააღმდეგ გამოძიება მიმდინარეობს სისხლის სამართლის კოდექსის 353 პრიმა მუხლის პირველი ნაწილით. აღნიშნული მუხლი გულისხმობს პოლიციელზე, სპეციალური პენიტენციური სამსახურის მოსამსახურეზე ან ხელისუფლების სხვა წარმომადგენელზე ანდა საჯარო დაწესებულებაზე თავდასხმას, რაც ითვალისწინებს თავისუფლების აღკვეთას 4-დან 7 წლამდე ვადით.

როგორც გამოცემა “ნეტგაზეთი” წერს, ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციული ქმედებებს მოჰყვა.

მზია ამაღლობელის მიმართ პოლიციის მაღალჩინოსნის, ირაკლი დგებუაძის მხრიდან გამოვლენილია სისტემური ძალადობა – სიტყვიერი და ფიზიკური შეურაცხყოფის მცდელობა, მუქარა და დაშინება. ასევე ცნობილი ხდება, რომ ჟურნალისტმა შიმშილობა გამოაცხადა.

მზის ამაღლობელის საქმის გარშემო არსებული გარემოებების შესწავლის და შეფასების შემდეგ, “მედიის ადვოკატირების კოალიციამ” განაცხადა, რომ “მზია ამაღლობელის საქმე სცილდება ერთი ჟურნალისტის წინააღმდეგ მიმართულ რეპრესიას – ეს არის შეტევა დამოუკიდებელ მედიაზე, სამოქალაქო საზოგადოებასა და საქართველოს დემოკრატიულ მომავალზე. მისი დაპატიმრებით ქართული ოცნების რეჟიმი ცდილობს დააშინოს ყველა, ვინც ბედავს ხმის ამაღლებას უსამართლობის წინააღმდეგ.”

“ბათუმელების” ოპერატორს სასამართლომ 8-დღიანი პატიმრობა მიუსაჯა

2025 წლის 14 იანვარს, ონლაინ გამოცემა “ბათუმელების” ოპერატორსა და ფოტოგრაფს, გურამ მურვანიძეს, ბათუმის საქალაქო სასამართლოს მოსამართლემ 8-დღიანი პატიმრობა მიუსაჯა. იგი ადმინისტრაციული მუხლითაა დაკავებული და გამოძიება მას პოლიციელის კანონიერი მოთხოვნის დაუმორჩილებლობას ედავება.

გურამ მურვანიძე 12 იანვარს, ბათუმში, აჭარის მთავრობის სახლთან მიმდინარე საპროტესტო აქციის გაშუქების დროს დააკავეს, მაშინ, როდესაც ის პროფესიულ მოვალეობას ასრულებდა.

გამოცემა “ბათუმელები” წერს, რომ ოპერატორის მიერ გადაღებულ კადრებში ნათლად ჩანს, რომ დაკავების მომენტში მურვანიძე აქციის მონაწილეების დაკავების კადრებს იღებდა. მოგვიანებით, გურამ მურვანიძემ ადვოკატს განუცხადა, რომ დაკავების მომენტში მან პოლიციის უფროსს განუმარტა, რომ პროფესიულ მოვალეობას ასრულებდა, თუმცა, მიუხედავად ამისა, ის მაინც დააკავეს, პოლიციის უფროსის მითითებით.

“ბათუმელების” დირექტორს აღკვეთის ღონისძიების სახით პატიმრობა შეუფარდეს

2025 წლის 14 იანვარს, გამოცემა “ბათუმელებისა” და “ნეტგაზეთის” დამფუძნებელსა და დირექტორს, მზია ამაღლობელს, ბათუმის საქალაქო სასამართლომ აღკვეთის ღონისძიების სახით წინასწარი პატიმრობა შეუფარდა.

მზია ამაღლობელის წინააღმდეგ გამოძიება მიმდინარეობს სისხლის სამართლის კოდექსის 353 პრიმა მუხლის პირველი ნაწილით. აღნიშნული მუხლი გულისხმობს პოლიციელზე, სპეციალური პენიტენციური სამსახურის მოსამსახურეზე ან ხელისუფლების სხვა წარმომადგენელზე ანდა საჯარო დაწესებულებაზე თავდასხმას, რაც ითვალისწინებს თავისუფლების აღკვეთას 4-დან 7 წლამდე ვადით.

11-12 იანვრის ღამეს მზია ამაღლობელი ორჯერ დააკავეს. თავდაპირველად იგი დააკავეს პოლიციის შენობაზე სტიკერის გაკვრისთვის, რომელზეც ეწერა – “იფიცება საქართველო”. დაკავებიდან რამდენიმე საათში იგი გაათავისუფლეს ხელწერილის საფუძველზე. მაგრამ, გათავისუფლებიდან მალევე კვლავ დააკავეს პოლიციის უფროს ირაკლი დგებუაძისთვის სილის გაწვნის ფაქტზე. როგორც გამოცემა “ნეტგაზეთი” წერს, ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციული ქმედებებს მოჰყვა.

ტელეკომპანია “ფორმულა” სასამართლომ მეოთხედ დააჯარიმა

2024 წლის 13 ოქტომბერს, თბილისის საქალაქო სასამართლომ, ტელეკომპანია “ფორმულა” 5 ათასი ლარით დააჯარიმა ოპოზიციური პარტია „გახარია საქართველოსთვის“ კვალიფიციური საარჩევნო სუბიექტის სტატუსის მინიჭებისა და ეთერში პარტიის ვიდეორგოლის განთავსების გამო.

სასამართლომ ეს გადაწყვეტილება კომუნიკაციების კომისიის ოქმის საფუძველზე მიიღო. კომისიამ ტელეკომპანიას ოქმი 10 ოქტომბერს შეუდგინა.

“საქართველოს საარჩევნო კოდექსის“ თანახმად, მაუწყებელი უფლებამოსილია კვალიფიციურ საარჩევნო სუბიექტად აღიაროს ის პოლიტიკური პარტია, რომელიც არჩევნების წელს ჩატარებული კვლევების მიხედვით, ამომრჩეველთა არანაკლებ 4%-ის მხარდაჭერით სარგებლობს. ტელეკომპანია “ფორმულამ” Edison Research-ის კვლევით იხელმძღვანელა, სადაც პარტიას “გახარია საქართველოსთვის” 4%-ზე მეტი მხარდაჭერა ჰქონდა. მარეგულირებელმა კომისიამ ტელეკომპანიას კვლევის შედეგების შემოწმება მოსთხოვა.

“მარეგულირებელმა ფაქტობრივად დაგვავალა, რომ Edison Research-ის კვლევის აუდიტირება და მისი შემოწმება მოგვეხდინა. ჩვენ, ცხადია, ვენდობით Edison-ის მონაცემებს და ვერ ვხედავთ ვერანაირ საჭიროებას, რომ მათი მონაცემები გადამოწმდეს”, – ამბობს “რადიო თავისუფლებასთან” ტელეკომპანიის დირექტორი ზუკა გუმბარიძე.

როგორც კომისიის განცხადებიდან იკითხება, ტელეკომპანია სამართალდამრღვევად სწორედ ამ დოკუმენტაციის წარუდგენლობის გამო სცნეს.

ორგანიზაცია “მედიაომბუდსმენის” განცხადებით, Edison Research-ის კვლევის აუდიტს, რასაც კომუნიკაციების კომისია მოითხოვს მაუწყებლისგან, კანონი არ ითვალისწინებს. “კომუნიკაციების კომისიისა და თბილისის საქალაქო საამართლოს მიერ კრიტიკული მედიის უსაფუძვლოდ დასჯა მედიის რეგულირების პროცესში ხელისუფლების ინტერესის გატარების კიდევ ერთი მაგალიათია”, – ვკითხულობთ განცხადებაში.

“აღნიშნული გადაწყვეტილება მორიგი დასტურია სისტემური მიკერძოებისა, რომელიც საფრთხეს უქმნის პოლიტიკურ პლურალიზმს და წინასაარჩევნოდ მედიის დასჯის მცდელობას წარმოადგენს”, – წერს განცხადებაში “მედიის ადვოკატირების კოალიცია”

ბოლო ორ თვეში, ეს არის ტელეკომპანიის დაჯარიმების მეოთხე შემთხვევა. წინა სამ შემთხვევაში “ფორმულა” მმართველი პარტიის სარეკლამო რგოლის არგანთავსების გამო დააჯარიმეს.

სამი ტელევიზია, სასამართლომ, მმართველი პარტიის სადაო პოლიტიკური რეკლამის არგაშვების გამო, ორჯერ დააჯარიმა

2024 წლის სექტემბერში, მმართველი პარტიის საარჩევნო რეკლამის ეთერიდან ამოღების გამო, ტელევიზიები: “მთავარი არხი”, “TV პირველი” და “ფორმულა” სასამართლომ ორჯერ დააჯარიმა.

პირველი ჯარიმა, 5 000 ლარის ოდენობით, ტელეკომპანიებს “TV პირველსა” და “ფორმულას” 16 სექტემბერს დააკისრეს, “მთავარ არხს” კი 13 სექტემბერს. მეორედ, იგივე მიზეზით, სამივე ტელეკომპანია 19 სექტემბერს დაჯარიმდა, ასევე, 5 000 ლარით.

„ქართული ოცნების“ პოლიტიკურ რეკლამაში არასამთავრობო ორგანიზაციების წარმომადგენლები და სამოქალაქო აქტივისტები ჩანან და პარალელურად ისმის ფრაზა: „უთხარი არა საზოგადოების მორალურ გადაგვარებას და აირჩიე ტრადიციული ფასეულობები“. ტელევიზიებმა ვიდეო-რგოლი თავდაპირველად ეთერში განათავსეს, თუმცა, რამდენიმე დღეში კანონმდებლობის შესაძლო დარღვევის მიზეზით ბადიდან ამიღეს. ტელეკომპანიებს მიაჩნიათ, რომ ამ კონკრეტული რეკლამის განთავსება შესაძლოა „მაუწყებლობის შესახებ” საქართველოს კანონით გათვალისწინებულ სიძულვილის ენის გავრცელების აკრძალვას, ან „რეკლამის შესახებ“ კანონით გათვალისწინებულ წესებს ეწინააღმდეგებოდეს.

ორგანიზაცია “საერთაშორისო გამჭვირვალობა საქართველო” მიიჩნევს, რომ სასამართლომ მაუწყებლები უსამართლოდ დააჯარიმა. ეს ორგანიზაცია ერთ-ერთია, რომელიც ამ რეკლამაში არაეთიკურადაა წარმოჩენილი.

“საერთაშორისო გამჭვირვალობა” წერს, რომ “არასამთავრობო ორგანიზაციების წარმომადგენლების ქართული ოცნების საარჩევნო ვიდეოში გამოყენება მიზნად ისახავს ადგილობრივი სადამკვირვებლო ორგანიზაციების წინააღმდეგ მმართველი პარტიის მიერ კოორდინირებული და დაგეგმილი კამპანიის გაგრძელებას და სადამკვირვებლო ორგანიზაციების რეპუტაციის შელახვას. ხოლო “კომუნიკაციების კომისიისა და სასამართლოს გადაწყვეტილებები ფინანსურ დარტყმას აყენებს კრიტიკულ მედიას”.

თბილისში დაკავებულ აზერბაიჯანელ ჟურნალისტს სამთვიანი საექსტრადიციო პატიმრობა მიუსაჯეს

2024 წლის 4 აგვისტოს, თბილისის საქალაქო სასამართლომ, აზერბაიჯანული გამოცემის Azel.tv-ის მთავარ რედაქტორს, აფგან სადიგოვს, სამთვიანი საექსტრადიციო პატიმრობა მიუსაჯა.

აფგან სადიგოვი 3 აგვისტოს დააკავეს. მისი დაკავების შესახებ ვიდეოჩანაწერი სოციალურ ქსელში მისმა მეუღლემ სევინჩ სადიგოვამ გაავრცელა. ვიდეოში ჩანს, რომ სადიგოვის დაკავებას მისი არასრულწლოვანი შვილებიც ესწრებოდნენ.

“მიდის მიზანმიმართული დევნა, როგორც დამოუკიდებელ ჟურნალისტზე, რომელიც ამხელს იქ არსებულ პოლიტიკურ ვითარებას და იქ არსებულ მდგომარეობას”, – განაცხადა დაკავებულის ადვოკატმა დიმიტრი ნოზაძემ.

2024 წლის 17 ივლისს აფგან სადიგოვს ქართველმა სამართალდამცველებმა საქართველოს დატოვების უფლება არ მისცეს. საზღვრის კვეთის აკრძალვის შემდეგ, 23 ივლისს სადიგოვმა და მისმა მეუღლემ საქართველოში საფრანგეთის საელჩოში განაცხადი შეიტანეს და საფრანგეთში გადაყვანა მოითხოვეს.

„განცხადება შევიტანეთ, იქნებ დაგვეხმარონ მესამე ქვეყანაში გასვლაში. გამოვიდა ადამიანი საელჩოდან, ვუთხარით რატომ ვართ მოსული, მივეცით წერილი, რომელშიც წერია, რომ საქართველოში ყოფნა ჩვენთვის უსაფრთხო აღარაა და დაგვეხმარონ რომელიმე მესამე ქვეყანაში წასვლაში”, – ამბობდა სადიგოვი “რადიო თავისუფლებასთან” ინტერვიუში.

აფგან სადიგოვი საქართველოში საცხოვრებლად 2023 წლის დეკემბერში ჩამოვიდა, ცოლთან და ორ შვილთან ერთად. ის თავს ყოფილ პოლიტპატიმრად მიიჩნევს, რადგან აზერბაიჯანში ორჯერ იყო დაპატიმრებული, 2016 და 2020 წელს.

ჟურნალისტის დაკავებას გამოეხმაურა მედიის ადვოკატირების კოალიცია და ჟურნალისტური ეთიკის ქარტია.

“მედიის ადვოკატირების კოალიცია გმობს საქართველოს ხელისუფლების მიერ აზერბაიჯანის ხელისუფლების მიმართ კრიტიკულად განწყობილი აზერბაიჯანელი ჟურნალისტის აფგან სადიგოვის დაპატიმრებასა და აზერბაიჯანში მის მოსალოდნელ ექსტრადიციას”, – ნათქვამია განცხადებაში.

“TV პირველი” სასამართლო სხდომას ვერ დაესწრო

2024 წლის 22 ივლისს “TV პირველის” მთავარმა რედაქტორმა ნოდარ მელაძემ განაცხადა, რომ ტელეკომპანიის ჟურნალისტები ვერ ახერხებენ სასამართლო სხდომებზე დასწრებას. მელაძის განცხადებით, სასამართლო სისტემა ხელოვნურ ტექნიკურ ბარიერებს უქმნის კრიტიკული მედიის წარმომადგენლებს, რათა მათ ვერ მოახერხონ სასამართლო სხდომების გადაღება.

ტელეკომპანია პირველის საინფორმაციო სამსახურის უფროსმა, ნოდარ მელაძემ სოციალ ქსელ ფეისბუკში დაწერა, რომ ტელევიზიის განცხადებებს სასამართლო სხდომების გაშუქებასთან დაკავშირებით სისტემა არ იღებს და მედიის წარმომადგენლებს სხდომებზე არც მოსამართლე უშვებს.

მელაძის განცხადებით, ამ დრომდე, განმარტება არ გაკეთებულა და არც ალტერნატიული მექანიზმების შემოთავაზება მომხდარა განაცხადების მიღებასთან დაკავშირებით.

აღნიშნულ საკითხს, მედიის ადვოკატირების კოალიცია გამოეხმაურა.

“მმართველი პარტია “ქართული ოცნების” ხელისუფლების პირობებში, დამოუკიდებელ და კრიტიკულ მედიას რთულ პირობებში უწევს მუშაობა. სასამართლო სხდომების გაშუქების ხელშეშლა დამატებით პრობლემას უქმნის მედიას. შესაბამისად, მნიშვნელოვანია, რომ სასამართლო ხელისუფლების პასუხისმგებლებმა პირებმა დაუყოვნებლივ გამოასწორონ არსებული ხარვეზი, უზრუნველყონ მედიების სხდომებზე დასწრება და განმარტონ პრობლემების გამომწვევი მიზეზები,” – ნათქვამია კოალიციის განცხადებაში.