2025 წლის 17 აპრილს, ტელეკომპანია “თრიალეთის” გადამღებ ჯგუფს, ჟურნალისტს, შორენა ბიჭიკაშვილს და ოპერატორს, სოსო მჭედლიშვილს საოკუპაციო ხაზთან მდებარე სოფელ აძვში, ერთ-ერთი ადგილობრივი თავს დაესხა და სიტყვიერი და ფიზიკური შეურაცხყოფა მიაყენა. გადამღები ჯგუფი შემთხვევის დროს პროფესიულ მოვალეობას ასრულებდა.
როგორც ჟურნალისტი აღწერს, ადგილობრივმა გადამღები ჯგუფის წევრებს სიტყვიერი შეურაცხყოფა მიაყენა და ოპერატორს აპარატურის დამტვრევით დაემუქრა. ჟურნალისტმა ინციდენტის ტელეფონით გადაღება სცადა, რა დროსაც პირმა მისთვის ტელეფონის წართმევა სცადა და ხელი დაარტყა. გადამღებმა ჯგუფმა საპატრულო პოლიცია გამოიძახა. ისინი სპეციალურმა საგამოძიებო სამსახურმა გამოკითხვაზე დაიბარა.
“საქართველოს ჟურნალისტური ეთიკის ქარტია” გმობს ტელეკომპანია გადამღებ ჯგუფზე თავდასხმას და სპეციალურ საგამოძიებო სამსახურს ინციდენტის სწრაფად გამოძიებისკენ მოუწოდებს.
სპეციალურმა საგამოძიებო სამსახურმა ისინი დაზარალებულად ცნო.
2025 წლის 28 მარტს, პარლამენტთან მიმდინარე საპროტესტო აქციაზე ონლაინ მედია “აპრილის” ჟურნალისტს პოლიციელებმა ხელი შეუშალეს პროფესიული მოვალეობის შესრულებაში.
ონლაინ მედია “აპრილის” ჟურნალისტი ნატა ურიდია საპროტესტო აქციას მობილური ტელეფონით იღებდა, რა დროსაც მას, პოლიციელებმა ხელი ჰკრეს. ვიდეოში რომელიც მედია “აპრილმა” გაავრცელა ჩანს, რომ პოლიციელი ჟურნალისტს ეუბნება “გადადი გვერდზე”, შემდეგ კი ხელს ჰკრავს.
საპროტესტო აქციების დაწყებიდან – 2024 წლის 28 ნოემბრიდან 28 მარტამდე პერიოდში აქციებზე მედიის წარმომადგენლების უფლებების დარღვევის 154 შემთხვევა დაფიქსირდა.
2025 წლის 20 მარტს, ქალაქ ბათუმში “აჭარა თაიმსის” დირექტორს – სულხან მესხიძეს და საზოგადოებრივი მაუწყებლის გადაცემა „გამომძიებელი რეპორტიორის“ ჟურნალისტს, ლია ტოკლიკიშვილს, რომლებიც სამშენებლო უსაფრთხოების საკითხების გაშუქებას ცდილობდნენ, “ქართული ოცნების” აქტივისტები დაუპირისპირდნენ.
„ოცნების ქალაქში“ ვიყავი გადაღებაზე, საზოგადოებრივი მაუწყებლის საგამოძიებო ჯგუფთან ერთად. ჩვენი ადგილზე მისვლის შემდგომ, რამდენიმე პირი მოვიდა, რომლებმაც გადაღების შეწყვეტა ითხოვეს, დაიწყეს ჩვენი ხელშეშლა. ეს გამოიხატებოდა იმაში, რომ სიტყვიერად გვიპირისპირდებოდნენ, მათ შორის ხელითაც იწეოდნენ. ხელის კვრით ცდილობდნენ ადგილიდან ჩვენს გაძევებას. გვიშლიდნენ, რომ კადრები არ გადაგვეღო” – განაცხადა სულხან მესხიძემ “ბათუმელებთან” საუბრისას.
შემთხვევას გამოეხმაურა “მედიის ადვოკატირების კოალიცია” “მედიაზე განხორციელებული ეს თავდასხმები არის “ქართული ოცნების” მიერ გატარებული პოლიტიკის ნაწილი, რომელიც მიზნად ისახავს კრიტიკული აზრის ჩახშობას და ინფორმაციის თავისუფალი გავრცელების შეზღუდვას. რეჟიმის მიერ მედიის წინააღმდეგ მიმართული მტრული რიტორიკა და სამართალდამცავი ორგანოების უმოქმედობა ქმნის გარემოს, სადაც ჟურნალისტებზე ძალადობა დაუსჯელი რჩება” – ნათქვამია კოალიციის განცხადებაში.
ეს არ არის პირველი შემთხვევა, როდესაც ბათუმში “ოცნების ქალაქში” მედიის წარმომადგენლებს პროფესიული მოვალეობის განხორციელებაში “ქართული ოცნების” აქტივისტები და მათთან დაახლოებული პირების უკანონოდ ხელს უშლიან.
2025 წლის 15 მარტს “მთის ამბების” დამფუძნებელმა და რედაქტორმა გელა მთივლიშვილმა სოციალურ ქსელში დაწერა, რომ მას და მის თანხმლებ პირს პოლიციელიები თავს დაესხნენ.
„თბილისში ვბრუნდებოდით, რა დროსაც უკან თეთრი ფერის პიკაპი აგვედევნა სახელმწიფო ნომრით BJ-573-BB. რადგან საავარიო სიტუაციას გვიქმნიდა, მანქანა გავაჩერეთ. პიკაპიდან შსს-ს შეიარაღებული თანამშრომელი და მისი თანმხლები პირი გადმოხტნენ. შეიარაღებული თანამშრომელი ყვიროდა, რატომ არ გავატარე, იგინებოდა და მემუქრებოდა. როდესაც ინციდენტის გადაღება ვცადე, ის თავს დამესხა, სამჯერ დამარტყა და ტელეფონის წართმევას ცდილობდა. თავდასხმის ამსახველი ვიდეო თვითმხილველებმა გადაიღეს. შეიარაღებული პირი ვიდეოს წაშლას მათგანაც ითხოვდა“ – აცხადებს გელა მთივლიშვილი.
სამწუხაროდ, ეს არ არის პირველი შემთხვევა, როდესაც გელა მთივლიშვილი “ქართული ოცნების” მხრიდან თავდასხმის სამიზნე ხდება.
2025 წლის 16 თებერვალს, ქალაქ ბათუმში, “ოცნების ქალაქში”, პროფესიული მოვალეობის განხორციელებაში ხელი შეუშალეს “აჭარა თაიმსის” დამფუძნებელს და რედაქტორს სულხან მესხიძეს.
აგრესიულობით გამორჩეულმა პირმა სულხან მესხიძისთვის ტექნიკის დაზიანებაც სცადა, მას მიკროფონი დარტმის შედეგად დააგდებინა. აღნიშნული ინციდენტი პირდაპირ ეთერში გადაიცემოდა, რა დროსაც კადრებში ჩანს, რომ ინციდენტს ქალაქ ბათუმის საკრებულოს წევრებიც შეესწრნენ, თუმცა ტერიტორია რეაგირების გარეშე დატოვეს.
ამ ფაქტს საფუძვლად, ამავე ტერიტორიაზე ორი მცირეწლოვანი ბავშვის დაღუპვა უძღოდა წინ. სულხან მესხიძე 15 თებერვალს მომხდარ უბედურ შემთხვევას აშუქებდა და მას მუშაობაში ხელი, სავარაუდოდ “ქართულ ოცნებასთან” დაკავშირებულმა პირებმა შეუშალეს.
პოლიცია ფიზიკურად გაუსწორდა ჟურნალისტებს
2025 წლის 4 თებერვალს, თბილისში, საქართველოს პარლამენტის შენობასთან გამართულ საპროტესტო აქციაზე, პოლიციამ უკანონოდ შეუშალა ხელი მედიის წარმომადგენლებს პროფესიული მოვალეობის შესრულებაში, მათ შორის, ფიზიკურად გაუსწორდა 3 ჟურნალისტს:
- პროფესიული მოვალეობის შესრულების დროს პოლიციელმა თავში ძლიერი დარტყმით ასფალტზე დააგდო NEWS.On.ge-ს მთავარი რედაქტორი ვანცენტ ხაბეიშვილი.
- “პუბლიკას” ინფორმაციით, პოლიციამ პარლამენტთან სამსახურებრივი მოვალეობის შესრულების დროს მათ ჟურნალისტზე, ნათია ლევერაშვილზე იძალადა – პოლიციელებმა მას ხელი დაარტყეს და თმაზე მოქაჩეს.
- ნიღბიანმა პოლიციელმა სცადა ტელეფონის წართმევა OC Media-ს ჟურნალისტისთვის, გივი ავალიანისთვის, რომელიც პროფესიული მოვალეობას ასრულებდა . „პარლამენტთან, ჟურნალისტებზე ძალადობისას, ადამიანის დაკავებას ვიღებდი, როცა ერთ-ერთი ნიღბიანი პოლიციელი ჩემს ტელეფონს სწვდა და წართმევა სცადა“ – წერს ავალიანი.
პარლამენტთან აქცია “ბათუმელების” დამფუძნებლისა და რედაქტორის მზია ამაღლობელის მხარდასაჭერად გაიმართა. ჟურნალისტი 24 დღეა პროტესტის ნიშნად შიმშლობს.
პოლიცია პარლამენტთან ფიზიკურად გაუსწორდა ჟურნალისტებს
2025 წლის 1 თებერვალს გავრცელებული ინფორმაციით, დმანისში, “TV პირველის” ჟურნალისტს, თამთა დოლენჯაშვილს და ოპერატორს გიორგი მოსიაშვილს მუშაობაში ხელი შეუშალეს და ფიზიკურად დაუპირისპირდნენ დმანისის საკრებულოს თანამშრომლები.
“TV პირველის” მიერ გავრცელებულ ვიდეოში ჩანს, მედიის წარმომადგენლებს როგორ ემუქრებიან – “გადი ახლა, მოშორდი აქედან. მერე მიგამტვრევენ ცხვირ-პირს და დაიწყებთ წუწუნს” რის შემდეგაც ხელით ეხებიან ოპერატორს და აგრძელებენ აგრესიულად მიმართვას და ყვირილს.
“TV პირველის” ინფორმაციით მედიის წინააღმდეგ აგრესიით გამოირჩეოდა მმართველი პარტიის აქტიური მხარდამჭერი ზურაბ ოკმელაშვილი. მასთან ერთად იმყოფებოდნენ დმანისის საკრებულოს თანამშრომლები, დმანისის საკრებულოს თავმჯდომარის თანაშემწე, დმანისის სპორტ-სკოლის მწვრთნელი და დმანისის საკრებულოს თავმჯდომარის მძღოლი.
“ნოდარ მელაძის შაბათში” სიუჟეტი ეხებოდა RMG GOLD-ის ყოფილი ხელმძღვანელის კობა მენაბდიშვილის და მასთან ერთად დაკავებული ზურაბ ოკმელაშვილის შეწყალებით პატიმრობიდან გათავისუფლებას.
“TV პირველის” ინფორმაციით, ისინი დმანისის ყოფილი მერის მკვლელობის მცდელობისთვის იყვნენ დაკავებული. განაჩენის გამოცხადებიდან რამდენიმე დღეში კი, “ქართული ოცნების” მიერ დანიშნულმა პრეზიდენტმა მიხეილ ყაველაშვილმა ისინი სხვებთან ერთად შეიწყალა.
2025 წლის 2 თებერვალს „თბილისი მოლთან“ გამართულ მშვიდობიან საპროტესტო აქციაზე სამართალდამცავებმა მედიის 11 წარმომადგენელს პროფესიული მოვალეობის შესრულებაში უკანონოდ შეუშალეს ხელი.
ჟურნალისტების ნაწილი ფიზიკურად დაშავდა.
- აქციაზე დაშავდა TV პირველის ოპერატორი ნიკო კოკაია. ის პოლიციის მიერ აქციის ერთ-ერთი მონაწილის დაკავების კადრებს იღებდა, როდესაც ფიზიკურად დაზიანდა. შედეგად, მას კლინიკაში გადაყვანა დასჭირდა. კვლევებით დადგინდა, რომ ნიკო კოკაიამ აქციაზე მიღებული დაზიანების შედეგად ტვინის შერყევა მიიღო.
- მედია „აპრილის“ მიერ გავრცელებულ ვიდეოში ჩანს, რომ პოლიციელმა ხელი ჰკრა და პროფესიული საქმიანობის განხორციელებაში ხელი შეუშალა მათ თანამშრომელს, ნატა ურიდიას. ვიდეოში ისმის ჟურნალისტის ხმა, რომელიც ნიღბიან პოლიციელს ეუბნება, რომ ჟურნალისტია.
- აქციის მონაწილეების დაკავების დროს პოლიციამ პროფესიული მოვალეობის შესრულებაში ხელი შეუშალა მედია „აპრილის“ კიდევ ერთ წარმომადგენელს, ვახო ქარელს. მას და ნატა ურიდიას პოლიციელებმა ტერიტორიის დატოვება მოსთხოვეს. ამ ეპიზოდშიც პოლიციელმა ნატა ურიდიას ხელი ჰკრა.
- პოლიციელი „რადიო თავისუფლების“ ჟურნალისტ გელა ბოჩიკაშვილს დაემუქრა. მედიამ გამოაქვეყნა ვიდეო, სადაც ისმის, როგორ ეუბნება ნიღბიანი პოლიციელი ჟურნალისტს: „გაწიე ახლა ეგ კამერა, თორემ გაგიტეხავ თავს.“
- „მთავარი არხის“ ჟურნალისტმა, დეა მამისეიშვილმა, გამოაქვეყნა ვიდეო, სადაც ჩანს, როგორ აყენებს პოლიციელი მას სიტყვიერ და ფიზიკურ შეურაცხყოფას.
- „რადიო მარნეულის“ ჟურნალისტი ვლადიმერ ჩხიტუნიძე ოპოზიციონერი პოლიტიკოსის დაკავებას იღებდა, როცა ის გდდ-ის თანამშრომლებმა შეაჩერეს და ძალის გამოყენებით ტროტუარზე გადაიყვანეს.
- პოლიციელებმა შეურაცხყოფა მიაყენეს და ფიზიკურად დაუპირისპირდნენ TV პირველის გადამღებ ჯგუფს. ტელეკომპანიის გავრცელებული ინფორმაციით, მათ სამაუწყებლო ტექნიკაც დაუზიანეს.
- TV პირველის ინფორმაციით, მათ ჟურნალისტს, ხატია სამხარაძეს, თავს დაესხა განსაკუთრებულ დავალებათა დეპარტამენტის (გდდ) უფროსის მოადგილე, მირზა კეზევაძე. მედიის ცნობით, მირზა კეზევაძემ ჟურნალისტს ტელეფონი წაართვა და დაუზიანა.
- TV პირველის ცნობით, გდდ-ის წევრები ცდილობდნენ „ფორმულას“ ჟურნალისტ გიორგი კვიჟინაძისთვის მიკროფონის წართმევას და პროფესიულ მოვალეობაში ხელის შეშლას.
- TV პირველის ინფორმაციით, პოლიციელებმა სიტყვიერი შეურაცხყოფა მიაყენეს და მუშაობაში ხელი შეუშალეს “TV პირველის” ჟურნალისტს დიანა ჩირგაძესა და მის ოპერატორს.
- ნიღბიანმა პოლიციელმა პროფესიული მოვალეობის შესრულებაში ხელი შეუშალა „გურია ნიუსის“ წარმომადგენელს აკაკი სიხარულიძეს. გავრცელებულ ვიდეოში ჩანს, როგორ ჰკრავს ნიღბიანი პოლიციელი კამერას ხელს.
- პოლიცია გადაღებაში ხელს უშლიდა “მედიაჩეკერის” ჟურნალისტ ნინია კაკაბაძესაც. მას პოლიციელებმა ხელიც ჰკრეს.
“თბილისი მოლის” მიმდებარედ მშვიდობიანი საპროტესტო აქციის გაშუქების დროს, მედიის წარმომადგენლების დაშავებას გამოეხმაურა მედიის ადვოკატირების კოალიცია.
2024 წლის 24 დეკემბერს, “TV პირველის” ჟურნალისტს ნანუკა ქაჯაიას თბილისის მერიის ორგანიზებულ საშობაო სოფელში, გადაღების დროს, ჟურნალისტურ საქმიანობაში ხელი შეუშალეს, სიტყვიერი და ფიზიკური შეურაცხყოფა მიაყენეს. ჟურნალისტის მიმართ აგრესიულად განწყობილი პირი “ქართულ ოცნებასთან” დაკავშირებული ნიკოლოზ მელიქიშვილი აღმოჩნდა.
ნანუკა ქაჯაიასთვის ჟურნალისტურ საქმიანობაში ხელის შეშლა, ფიზიკურად, იმავე ღონისძიებაზე მყოფმა სხვა დაუდგენელმა პირებმაც სცადეს.
2024 წლის 24 დეკემბერს ფოტორეპორტიორს გიორგი მოსიაშვილს, უცნობი პირი ქუჩაში დახვდა და ფიზიკური შეურაცხყოფის მიყენება სცადა.
გიორგი მოსიაშვილი სოციალურ ქსელში წერს, რომ მას უცნობი ნიღბიანი დახვდა და მას შემდეგ რაც მისი ვინაობა გადაამოწმა, დაემუქრა და შეეცადა თავს დასხმოდა.
