დისკრედიტაცია

ირაკლი კობახიძე დამოკიდებული მედიების “TV პირველის” და “ფორმულას” დისკრედიტაციას ცდილობს

2025 წლის 8 ივლისს “ქართული ოცნების” მთავრობის პრემიერ-მინისტრმა ირაკლი კობახიძემ დამოუკიდებელი მაუწყებლების “TV პირველის” და “ფორმულას” დისკრედიტაცია სცადა. მან აჭარის მთავრობის ყოფილი თავმჯდომარის, თორნიკე რიჟვაძის, გამოძიების ოფიციალური ვერსიით თვითმკვლელობის მცდელობაზე, მედიასთან კომენტარი გააკეთა, მისი განცხადებით მომხდარს „ზოგადად“ უკავშირებს ოპოზიციური ტელევიზიებს და კრიტიკული ტელევიზიები, „ცილისწამებასა“ და „ზიზღის დათესვაში“ დაადანაშაულა.

კითხვაზე, მისი ინფორმაციით, ვინ აბრალებდა თორნიკე რიჟვაძეს „კორუფციას“ და „ბარიგების მფარველობას“, – როგორც გავრცელებულ წერილში წერია, – კობახიძემ თქვა: „მე არ ვიცი, კონკრეტული ტელევიზიებიც იყვნენ, რომლებიც ამას აკეთებდნენ. ზოგადად, სტრესულია იმ ადამიანის ცხოვრება, რომელიც პოლიტიკით არის დაკავებული. მათ შორის იმ დროსაც, როცა აღარ უკავია თანამდებობა. უამრავი ტყუილი ვრცელდება, არის უამრავი შეურაცხყოფა, უამრავი ცილისწამება. კონკრეტული ტელევიზიები შემიძლია დაგისახელოთ… მაგალითად, „ტვ პირველი“, „ფორმულა“ – განაცხადა ირაკლი კობახიძემ.

მოგვიანებით კი, მან უარყო განცხადება და აღნიშნა, რომ “არა, ეს მე არ მითქვამს. ეს მე არ მითქვამს, რა თქმა უნდა. მე ერთ-ერთი მაგალითი მოვიყვანე. დანარჩენი უნდა დაადგინოს გამოძიებამ“- თქვა კობახიძემ.

მედიაპლატფორმა Chai Khana დეზინფორმაციული თავდასხმის სამიზნე გახდა

2025 წლის 10 ივლისს, “ქართული ოცნების” მხარდამჭერი მაუწყებლის „იმედის“ ეთერში დეზინფორმაცია გავრცელდა მედია პლატფორმა Chai Khana-ს მიმართ. კერძოდ, საუბარი იყო Chai Khana-ს მიერ, ევროკომისიისგან 532 117 ევროს მიიღებაზე. მედია პლატფორმა Chai Khana-მ გაავრცელა განცხადება, რომ “იმედის” ეთერში გასული სიუჟეტი სიმართლეს არ შეესაბამება.

“სიუჟეტში დასახელებული თანხა, 532 117 ევრო, არის 6 ბენეფიციარ ქვეყანაზე გათვალისწინებული თანხა… შესაბამისად, ტელეკომპანია „იმედის“ მიერ დასახელებული თანხის, 532 117 ევროს, 94% არ წარმოადგენს Chai Khana-ს ბიუჯეტს, დასახელებული თანხა რეალურად ევროკავშირის ქვეყნებში მოქმედი ორგანიზაციების ბიუჯეტია. Chai Khana-ს ინფორმაციით, მეტიც, პროექტის ფარგლებში, Chai Khana-მ ვერ მიიღო მისთვის თავდაპირველად გათვალისწინებული 31 947 ევრო, რადგან „რუსული კანონის“ მიღების გამო, კონტრაქტი დროზე ადრე შეწყდა. შესაბამისად, Chai Khana-ს მიღებული თანხის რეალური ოდენობა შეადგენს მხოლოდ 5 581 ევროს და არა 31 947 ევროს, როგორც ამას ტელეკომპანია „იმედი“ ამტკიცებს” – წერია განცხადებაში.

ჟურნალისტების მუშაობაში ხელშეშლა მარნეულის საარჩევნო უბნებზე

2024 26 ოქტომბერს, საპარლამენტო არჩევნების დღეს, ჟურნალისტების მუშაობაში ხელშეშლის არაერთი შემთხვევა დაფიქსირდა ქვემო ქართლში, მარნეულის და მიმდებარე სოფლების საარჩევნო უბნებზე.

რადიო “მარნეულის” ჟურნალისტებს ვლადიმერ ჩხიტუნიძესა და თიკო დავაძეს მარნეულის მე-7 საარჩევნო უბანზე დამკვირვებელმა, რომელიც მათი ინფორმაციით, “ქართული ოცნების” მხარდამჭერია, სიტყვიერი შეურაცხყოფა მიაყენა, “აგენტები” და “ქვეყნის გამყიდველები” უწოდა და ანგარიშსწორებით დაემუქრა. დამატებით, უბნის თავმჯდომარემ ჟურნალისტებს ვიდეოგადაღება შეუზღუდა.
ასევე თიკო დავაძესა და ვლადიმერ ჩხიტუნიძეს, მარნეულის სოფელ სადახლოს 71-ე უბანზე, უბნის თავმჯდომარე არ უშვებდა უბანზე გადაღების მიზნით. “…მეუბნებოდა, რომ შემეძლო შევსულიყავი, მაგრამ არაფერი გადამეღო…” – ჰყვება ჟურნალისტი. საოლქო კომისიაში დარეკვის შემდეგ თავმჯდომარეს მოუწია ჟურნალისტის დაშვება უბანზე.
ტელეკომპანია „ფორმულამ“ გაავრცელა ვიდეომასალა, სადაც ჩანს, რომ მარნეულში, სადახლოს 69-ე უბანზე ჟურნალისტ თიკო ერაძეს და ოპერატორს, შალვა ჯოხაძეს პროფესიულ საქმიანობაში ხელს უშლიდნენ. ერაძეს საარჩევნო უბანზე ყოფნას უზღუდავდა საარჩევნო კომისიის თავმჯდომარე, გუმბატ ნაზაროვიც.
მარნეულის მე-4 საარჩევნო უბანთან „TV პირველის“ გადამღებ ჯგუფს, ჟურნალისტ ნინო ელიკაშვილს და მის ოპერატორს, ირაკლი მურმანიშვილს პროფესიულ საქმიანობაში ხელი შეუშალეს და უბანთან მობილიზებულმა პირებმა სიტყვიერი და ფიზიკური შეურაცხყოფა მიაყენეს. ჟურნალისტებს უბნის დატოვებისკენ მოუწოდებდა „ქართული ოცნების“ საარჩევნო შტაბის უფროსი, ამირან გიორგაძე.
მარნეულის მე-4 საარჩევნო უბანზე სტუდია “მონიტორის” ჟურნალისტებმა თეო ქავთარაძემ და ქეთი თუთბერიძემ გადაიღეს, როგორ ცდილობდა ამომრჩეველი, სავარაუდოდ პასპორტში ჩაკრული სხვისი პირადი ნომრით ხმის მიცემას. ამ პროცესის გადაღებისას კი, უცნობი პირი ჟურნალისტებთან მივიდა და ტელეფონის წართმევა სცადა.
„Aliq Media-ს“ 4 წარმომადგენელს მუშაობაში ხელი შეეშალა ხოჟორნის საარჩევნო უბანზე. რედაქციის ინფორმაციით, „Aliq Media“ რეპუტაციის შელახვის მიზნით, ადგილზე მობილიზებული პირები იქვე მყოფ ამომრჩევლებს, ჟურნალისტებსა და დამკვირვებლებს ეუბნებოდნენ, რომ „Aliq Media“ დეზინფორმაციის გამავრცელებელი მედია იყო და „კანონს არღვევდა“.

“ქართული ოცნების” პარლამენტის თავმჯდომარე ამჯერად გამოცემა “ტაბულას” დისკრედიტაციას ცდილობს

2025 წლის 11 ივნისსს, “ქართული ოცნების” პარლამენტის თავმჯდომარე შალვა პაპუაშვილი, ონლაინ გამოცემა “ტაბულას” “ექსტრემისტულ გამოცემას” და “პარტიულ კედლის გაზეთს” უწოდებს. პაპუაშვილის ეს განცხადებები მოჰყვა ბრიტანეთის საელჩოს განცხადებას, რომლის თანახმადაც, საელჩომ, “ქართული ოცნების” მიერ გრანტებთან დაკავშირებული პროცედურების გაჭიანურების გამო, საარჩევნო მონიტორინგისთვის განკუთვნილი გრანტები გააუქმა. ამ საგრანტო კონკურსის ერთ-ერთი გამარჯვებული იყო “ტაბულა”, რომელსაც უნდა მიეღო 50 000 ფუნტი ამომრჩეველთა ინფორმირებისათვის.

“ბრიტანეთის საელჩომ საკუთარი თავი ამხილა ექსტრემიზმის დაფინანსებაში… თქვენ ნახეთ, მათ შორის თავის თავი დაასახელა “ტაბულამ”, რო მას უნდა მიეღო დაახლოებით 200 000 ლარი საარჩევნო საკითხებისთვის და ასევე, გასაჯაროვდა ის ორგანიზაციები, ვის დაფინანსებასაც აპირებდა. დიდი ხანი სულ ვფიქრობდი, სხვათა შორის, ვინ აფინანსებს “ტაბულას”. ტაბულა ეს არის ჩვეულებრივი პარტიული, პროპაგანდისტული კედლის გაზეთი, ეს არის ერთი კონკრეტული პარტიის პროპაგანდისტული კედლის გაზეთი, თავისი შინაარსით, ამას დიდი მონიტორინგი და დაკვირვებაც არ სჭირდება, უბრალოდ რომ გადაავლოთ თვალი, ნახავთ, რომელი პარტიის პროპაგანდას ეწევა ეს მედია პლატფორმა. ანუ, ბრიტანეთის საელჩო აღიარებს, რომ ის აპირებდა პროპაგანდა დაეფინანსებინა წინასაარჩევნოდ”, – განაცხადა პაპუაშვილმა “რუსთავი 2-ის” ეთერში.

პაპუაშვილი მეორე დღესაც გამოეხმაურა ამ საკითხს სოციალურ ქსელში. მან გამოცემა “ექსტრემიზმის პროპაგანდაში” დაადანაშაულა და ბრიტანეთის საელჩოს მხრიდან “ტაბულას” დაფინანსების გამოცდილებით დაინტერესდა.

შალვა პაპუაშვილს გამოცემის რედაქტორმა სარედაქციო წერილით უპასუხა. წერილში ხაზგასმულია გამოცემის მიუკერძოებელი სარედაქციო პოლიტიკა და ნათქვამია, რომ “რეჟიმის თავდასხმებს” “ტაბულა” მიზანმიმართული დისკრედიტაციის მცდელობად განიხილავს.

ეს არ არის პირველი შემთხვევა, როდესაც შალვა პაპუაშვილი დამოუკიდებელ მედიას თავს ესხმის დისკრედიტაციისა და დაშინების მიზნით. 2025 წლის 19 მაისს, “ქართული ოცნების” პარლამენტის თავმჯდომარემ, შალვა პაპუაშვილმა, გამოცემები “პუბლიკა” და “On.ge” პროპაგანდისტულ მედიებად მოიხსენია და კოორდინირებულ ქმედებასა და ფაქტის მიჩქმალვაში დაადანაშაულა.

განახლება: 2025 წლის 25 ივლისს შალვა პაპუაშვილმა “ტაბულა” კიდევ ერთხელ ახსენა:

“მასპინძელი ხელისუფლების პარტიად მოხსენიებას და ქართველი ხალხის მიმართ მსგავს შეუფერებელ ლაზღანდარობას, უმჯობესი იქნებოდა, თუ ბრიტანეთის ელჩი საკუთარ ქცევაზე გასცემდა ქართველი ხალხის ლეგიტიმურ კითხვას პასუხს: რატომ აპირებდა ექსტრემისტული დღის წესრიგის მქონე ევრონაცების “ტაბულას” და ნაცების “გია ჯაფარიძის” დაფინანსებას, რომელთა გაცხადებული მიზანი თვითმმართველობის არჩევნების ჩაშლაა, ანუ მისივე სიტყვებით რომ ვთქვათ, რომელთა მიზანია “საქართველოს სუვერენიტეტის შესუსტება, შუღლის დათესვა და ქართველი ხალხის ყოველდღიური ცხოვრების შეფერხება”, –დაწერა პაპუაშვილმა სოციალურ ქსელში

“ქართული ოცნების” პარლამენტის თავმჯდომარის სიტყვიერი თავდასხმა გამოცემებზე – “პუბლიკა” და On.ge

2025 წლის 19 მაისს, “ქართული ოცნების” პარლამენტის თავმჯდომარემ, შალვა პაპუაშვილმა, დამოუკიდებელი ონლაინ გამოცემები “პუბლიკა” და “On.ge” პროპაგანდისტულ მედიებად მოიხსენია და კოორდინირებულ ქმედებასა და ფაქტის მიჩქმალვაში დაადანაშაულა.

შალვა პაპუაშვილის თავდასხმა მოჰყვა გამოცემების მიერ გავრცელებულ ინფორმაციას იმის შესახებ, რომ “ქართული ოცნების” ერთ-ერთი წევრის, დეპუტატ მარიამ ლაშხის, მისამართით აქტივისტები საჯარო სივრცეში ამბობდნენ – “თავისუფლება რეჟიმის ტყვეებს, არა რუსულ რეჟმს, არა რუსეთის მონებს”, ლაშხმა კი აქტივისტებს სასამართლოში უჩივლა.

“მნიშვნელოვანია, რომ აშშ-ის ახალი ადმინისტრაციის მსგავსად, ბრიუსელმაც უარი თქვას პროპაგანდისტული მედიების დაფინანსების მავნე პრაქტიკაზე”, ნათქვამია პაპუაშვილის პოსტში.

აღსანიშნავია, რომ ეს არ არის შალვა პაპუაშვილის მხრიდან დამოუკიდებელი გამოცემების დისკრედიტაციის პირველი შემთხვევა. 2025 წლის 1 თებერვალს, მან ასევე “პუბლიკა” სისხლის სამართლის დანაშაულის ჩადენის მოწოდების რეკლამირებაში დაადანაშაულა მხოლოდ იმის გამო, რომ გამოცემას დაგეგმილი აქციის შესახებ ჰქონდა გავრცელებული პოსტერი. უფრო ადრე, 2024 წლის 20 თებერვალს მან “მთის ამბების” რედაქტორი, გელა მთივლიშვილი, დაადანაშაულა დეზინფორმაციის გავრცელებაში და საჯაროდ მოითხოვა განმარტება საქართველოში ევროკავშირის წარმომადგენლობისგან, თუ რატომ მოხვდა მთივლიშვილის საგამოძიებო სტატია ჟურნალისტური კონკურსის – “ევროკავშირის პრიზის”, ფინალისტებში.

“ქართული ოცნების” მხარდამჭერი “ტვ იმედი” საზოგადოებრივი მაუწყებლის დამოუკიდებელ ჟურნალისტების – ნინო ზაუტაშვილის და ვასილ ივანოვ-ჩიქოვანის, დისკრედიტაციას ახორციელებს

2025 წლის 27 მარტს, პროპაგანდისტულმა ტელეკომპანია „იმედმა“ დეზინფორმაცია გაავრცელა საზოგადოებრივი მაუწყებლის კრიტიკულად განწყობილი ჟურნალისტების – ნინო ზაუტაშვილისა და ვასილ-ივანოვ ჩიქოვანის – წინააღმდეგ და ისინი „უკანონო შემოსავლების“ მიღებაში დაადანაშაულა.

ტელეკომპანია „იმედმა“ ასევე „უკანონო შემოსავლების“ მიღებაში დაადანაშაულა საზოგადოებრივი მაუწყებლის კრიტიკულად განწყობილი ჟურნალისტებიც – გურანდა გოგინაშვილი, ტუხა კვინიკაძე და თამარ მშვენიერაძე. ისინი გადაცემა „რეალური სივრცის“ თანამშრომლები არიან, რომლის წამყვანი ნინო ზაუტაშვილია.

ტელეკომპანია „იმედის“ მიერ თავდაპირველად გავრცელებულ ინფორმაციაში ეწერა, რომ ვასილ-ივანოვ ჩიქოვანის მეუღლეს სარეკლამო კომპანია ჰქონდა. ჩიქოვანი დეზინფორმაციას სოციალურ ქსელში გამოეხმაურა და ტელეკომპანია სიცრუეში ამხილა.

ტელეკომპანია „იმედმა“ მოგვიანებით ვასილ-ივანოვ ჩიქოვანის შესახებ გავრცელებული ინფორმაცია წაშალა და აღიარა, რომ ჟურნალისტის მეუღლე სხვა პირში აერიათ. თუმცა, ნინო ზაუტაშვილის წინააღმდეგ გაჟღერებული ბრალდებები კვლავ ხელმისაწვდომია.

აღსანიშნავია, რომ საზოგადოებრივი მაუწყებლის კრიტიკულად განწყობილი ჟურნალსიტების დადანაშაულება “უკანონო შემოსავლების” მიღებაში დროში ემთხვევა, საზოგადოებრივი მაუწყებლის სამეურვო საბჭოს მიერ, ამავე ჟურნალისტების წინაღმდეგ პროკურატურით მუქარას. კერძოდ,

2025 წლის 21 მარტს, საზოგადოებრივი მაუწყებლის “ქართულ ოცნებასთან” დაკავშირებულმა სამეურვეო საბჭოს წევრებმა საბჭოს სხდომაზე პროკურატურისგან გამოძიების დაწყება მოითხოვეს არხის სარედაქციო პოლიტიკის მიმართ კრიტიკულად განწყობილი ჟურნალისტების ვასილ ივანოვ-ჩიქოვანის და ნინო ზაუტაშვილის წინააღმდეგ.

“ქართული ოცნების” ერთ-ერთი ლიდერი, მამუკა მდინარაძე, “პალიტრანიუსს” ქარდზე გამოქვეყნებულ ფოტოს უწუნებს

2025 წლის 17 მარტს ფეისბუქზე გამოქვეყნებულ სტატუსში “ქართული ოცნების” ლიდერმა მამუკა მდინარაძემ “პალიტრანიუსის” გვერდზე გამოქვეყნებულ ქარდი გააზიარა შემდეგი ტექსტით: “როგორი ადეკვატური ფოტოა “ნიუსთან”

აქამდე მხოლოდ “ტაბულა” და ერთი-ორი ნაცური გვერდი კადრულობდა ასეთი მდაბიო მეთოდებით ბრძოლას პოლიტიკური ოპონენტების წინააღმდეგ ზოგადად კი, ნაცებზე კიდევ უფრო ქვემოთ განაცებულები აღმოჩნდებიან-ხოლმე…”.

მამუკა მდინარაძე ობიექტური მედიის მიმართ დისკრიმინაციული და სიძულვილის ენის განცხადებებით არის ცნობილი.

“აჭარა თაიმსის” და “ბათუმელების” ჟურნალისტებს მუშაობაში ხელი შეუშალეს

2025 წლის 15 თებერვალს, ქალაქ ბათუმში ახალი უბნის, “ოცნების ქალაქის” სამშენებლო ტერიტორიაზე ტრაგედია მოხდა, ადგილობრივმა მოსახლეობამ წლით სავსე თხრილში ჩავარდნილი ორი მცირეწლოვანი ბავშვი იპოვა, რომლებსაც რამდენიმე საათი ეძებდნენ. არასრულწლოვანთა გადარჩენა სამწუხაროდ ვერ მოხერხდა.

ტრაგედიის ადგილზე მოსახლეობამ მოიყარა თავი და სამშენებლო ტერიტორიაზე უსაფრთხოების ნორმებთან დაკავშირებით კითხვებს, მათ შორის აჭარის ავტონომიური რესპუბლიკის, ფინანსთა მინისტრს ჯაბა ფუტკარაძეს, უსვამდა. მიმდინარე მოვლენებს მედიის წარმომადგენლებიც ესწრებოდნენ. ინტერვიუს ჩაწერის დროს, ჯაბა ფუტკარაძემ ჟურნალისტებს ტრაგედიით სპეკულირებაში დასდო ბრალი. შემთხვევის ადგილზე მისული მოსახლეობის ნაწილიც, რომელიც სავარაუდოდ “ქართული ოცნების” მიერ იყო კოორდინირებული, აგრესიულად გამოირჩეოდა “აჭარა თაიმსის” და “ბათუმელების” ჟურნალისტების მიმართ, მათ ალყაში მოაქციეს ფინანსთა მინისტრი და მედიის წარმომადგენლებს მასთან კითხვების დასასმელად მიახლოების შესაძლებლობას არ აძლევდნენ და პროფესიული მოვალეობის განხორციელებაში უკანონოდ უშლიდნენ ხელს.

პარლამენტის თავმჯდომარის მუქარა დამოუკიდებელ ონლაინ გამოცემა “პუბლიკას”

2025 წლის 1 თებერვალს, პარტია “ქართული ოცნების” ლიდერმა, პარლამენტის თავმჯდომარე შალვა პაპუაშვილმა, ონლაინ გამოცემა “პუბლიკა” სისხლის სამართლის დანაშაულის ჩადენის მოწოდების რეკლამირებაში დაადანაშაულა.

აღნიშნული განცხადება პაპუაშვილმა ონლაინ გამოცემა “პუბლიკის” მიერ გამოქვეყნებულ ფეისბუკ პოსტს მიუძღვნა, რომელიც 2 თებერვალს “თბილისი მოლთან” დაგეგმილ აქციას ეხებოდა. აღნიშნული საპროტესტო აქცია იმართება “რეჟიმის ტყვეების დაუყოვნებლივ გათავისუფლებისა” და “ახალი არჩევნების” მოთხოვნით.

“ქართული ოცნების” ლიდერის მიერ, მედიის დამნაშავედ გამოცხადებას გამოეხმაურა საქართველოს ჟურნალისტური ეთიკის ქარტია – „ქართული ოცნების“ რეპრესიული პოლიტიკა დამოუკიდებელი მედიის მიმართ 1 თებერვალს ახალ საფეხურზე გადავიდა, როდესაც შალვა პაპუაშვილმა მედიის მიერ საკუთარი პროფესიული მოვალეობის შესრულება მანიპულაციურად დააკავშირა 31 იანვარს სახელდახელოდ მიღებულ, შეკრების უფლების შემზღუდავ შესწორებასთან მთავრობის #361 დადგენილებაში და სისხლის სამართლებრივ პასუხისმგებლობაზე ალაპარაკდა” – ვკითხულობთ გაცხადებაში.

“პუბლიკას” მხარდაჭერა გამოუცხადა მედიის ადვოკატირების კოალიციამაც:

“ქართული ოცნება განსაკუთრებით თავს ესხმის დამოუკიდებელ გამოცემებს, რომლებიც მაღალი პროფესიული სტანდარტების დაცვითა გამოირჩევიან ქართულ მედიასივრცეში. ჩვენი მხარდაჭერა პუბლიკას!” – წერია განცხადებაში.

“ქართულ ოცნებასთან” დაკავშირებული პირები ჟურნალისტ გიგა ბენიას დისკრედიტაციას ცდილობენ და ემუქრებიან

2025 წლის 23 იანვარს “BM.ge”-ის ჟურნალისტმა გიგა ბენიამ “ქართულ ოცნებასთან” დაკავშირებული პირების ლაშა ბასლანძის და გია აბაშიძის პოსტები გამოაქვეყნა, სადაც მას საჯაროდ, არაეთიკური შინაარსის ლექსიკით შეურაცხყოფენ და ემუქრებიან.

გიგა ბენია თავის სტატუსში საქართველოს შინაგან საქმეთა სამინისტროს და სახალხო დამცველს რეაგირებისკენ მოუწოდებს. “ღია მუქარაზე გადმოვიდნენ” – წერს ბენია.

აღნიშნულ ფაქტს საქართველოს ჟურნალისტური ეთიკის ქარტიაც გამოეხმაურა და ორივე უწყებას დაუყონლებლივ რეაგირებისკენ მოუწოდა.