2025 წლის 12 აპრილს, “გზის უკანონოდ” გადაკეტვის გამო საინფორმაციო სააგენტო “ტაბულას” ჟურნალისტი – ლუკა კაციტაძე 5 000 ლარის ოდენობის ჯარიმა დააკისრეს.
ონლაინ გამოცემა წერს, რომ ლუკა კაციტაძე 12 აპრილს შოთა რუსთაველის გამზირზე პროფესიულ მოვალეობას ასრულებდა. გამოცემა ასევე აღნიშნავს, რომ ეს პირველი შემთხვევა არ არის, როცა ჟურნალისტებს უსაფუძვლოდ აჯარიმებენ.
“მედიის, ინფორმაციის და სოციალური კვლევების ცენტრს” ათეულობით ასეთი შემთხვევა აქვს აღწერილი.
2025 წლის 24 აპრილს ონლაინ გამოცემა “პუბლიკას” რეპორტიორი მინდია გაბაძეს სასამართლოს სხდომა დაატოვებინეს.
მოსამართლე დავით თეთრაულმა ჟურნალისტს სასამართლო სხდომიდან კითხვის დასმის გამო გააძევა. მინდია გაბაძე ბიზნესმენ გიორგი ჩხეიძის სასამართლო პროცესს აშუქებდა.
ეს არ არის პირველი შემთხვევა როდესაც მინდია გაბაძეს პროფესიული მოვალეობის დროს საქმიანობაში ხელი შეუშალეს, მეტიც მას დაუდგენელი პირები რუსთაველის გამზირზე ფიზიკურად გაუსწორდნენ, იქვე მდგომ პოლიციას კი რეგირება არ მოუხდენია.
ასევე, ტენდენციური ხასიათი აქვს სასამართლო პროცესებიდან ჟურნალისტების ყოველგვარი დასაბუთების გარეშე გაძევებას.
2025 წლის 26 აპრილს, “TV პირველის” ეთერში მაკა ანდრონიკაშვილის ჟურნალისტური გამოძიება გავიდა ლევან ალექსიძის ქუჩაზე სავარაუდოდ, კორუფციული გზით მოპოვებული სამშენებლო ნებართვის შესახებ.
გადაღებაზე მისულ ჯგუფს – მაკა ანდრონიკაშვილს და მის ოპერატორს, საქმის მთავარი ფიგურანტი თამაზ ხარაიძემსიტყვიერი შეურაცხყოფა მიაყენა და ფიზიკური ანგარიშსწორებით დაემუქრა.
2025 წლის 17 აპრილს, საზოგადოებრივი მაუწყებლის პირველი არხის მენეჯმენტმა, დისციპლინური სანქციები დააკისრა მაუწყებლის კიდევ სამ თანამშრომელს, რომლებიც აკრიტიკებენ არხის ხელისუფლებისადმი მიკერძოებულ სარედაქციო პოლიტიკას. ეს თანამშრომლები არიან: გადაცემა”რეალური სივრცის” რედაქტორი ტუხა კვინიკაძე, “შაბათ-კვირის შოუს” აღმასრულებელი პროდიუსერი თამარ ჭინჭარაული და “შაბათ-კვირის შოუს” კორესპონდენტი ანა აბაკელია. ბრძანებებს, რომელიც არხის თანამშრომლებმა მიიღეს, მაუწყებლის დირექტორი, თინათინ ბერძენიშვილი აწერს ხელს.
არხის მენეჯმენტმა თანამშრომლებს დარღვევად ჩაუთვალა “საჯარო სივრცეში გავრცელებული განცხადებებით მაუწყებლის სარედაქციო დამოუკიდებლობისა და მიუკერძოებლობის ეჭვქვეშ დაყენება და ამის შედეგად, დამსაქმებლისთვის რეპუტაციული ზიანის მიყენება”. ბრძანებაში აღნიშნულია, რომ მისი მოქმედების ვადა ერთი წელია. თუ ამ დროის განმავლობაში თანამშრომლები არხის კრიტიკას გააგრძელებნ, მათ სამსახურიდან გათავისუფლება ემუქრებათ.
მსგავსი სანქცია საზოგადოებრივ მაუწყებელში უკვე 7 ჟურნალისტს გამოუცხადეს. 11 აპრილს საყვედური მიიღეს რეალური სივრცის“ ჟურნალისტმა თამარ მშვენიერაძემ და წამყვანმა იოსებ კაციტაძემ. ასევე, არხის პულტის რეჟისორმა და შეთავსებით სპორტული გადაცემის რეჟისორმა კახაბერ მელიქიძემ და ბრენდინგისა და პრომოციის ჯგუფის რეჟისორმა ირმა ჩუბინიძემ. ამავე დღეს, არხის ორი წამყვანი სახე, ჟურნალისტები ნინო ზაუტაშვილი და ვასილ ივანოვ-ჩიქოვანი კი სამსახურიდან გაათავისუფლეს.
2025 წლის 17 აპრილს, გამოცემა “ინდიგოს” ჟურნალისტი საბა სორდია, თბილისის საქალაქო სასამართლოს მოსამართლე ზვიად ცეკვავამ, 2500 ლარით დააჯარიმა. ჟურნალისტს პოლიციისადმი დაუმორჩილებლობას ედავებოდნენ.
ჟურნალისტი 6 აპრილს, თბილისში, მარჯანიშვილის მეტროს მიმდებარედ დააკავეს. დაკავების მომენტში საბა სორდია ჟურნალისტურ მოვალეობას არ ასრულებდა. მისი იურისტის, მარიამ ყაველაშვილის განმარტებით, ჟურნალისტი მას შემდეგ დააკავეს, რაც “ზედაპირული დათვალიერების” ფარგლებში გაჩერებულს, პირადობის მოწმობის წარდგენის შემდეგ ჩანთის შიგთავსის სრულად ნახვა მოსთხოვეს. ჟურნალისტმა უთხრა, რომ ის თვითონ გახსნიდა ჩანთის ჯიბეებს. ეს ჩაუთვალეს მას დაუმორჩილებლობაში. ამ დროს პოლიციამ უკვე იცოდა, რომ საბა სორდია პროფესიით ჟურნალისტი იყო.
დაკავების შემდეგ საბა სორდიამ 48 საათი გაატარა წინასწარი დაკავების იზოლატორში. მან თქვა, რომ საპატრულო პოლიციის მანქანაში, საყურის გამო, მისი დამცირება სცადეს. ჟურნალისტს ჩამოართვეს სამსახურის კუთვნილი კამერა GoPro-ც. საბა სორდიას საქმეზე პირველი სასამართლო სხდომა 8 აპრილს გაიმართა. განაჩენი კი 17 აპრილს გამოაცხადეს.
“მედიის ადვოკატირების კოალიცია” მიიჩნევს, რომ ეს არის მედიის წინააღმდეგ მიმართული რეპრესიული პოლიტიკის კიდევ ერთი შემთხვევა.
2025 წლის 30 მარტს საქართველოში შემოსვლაზე უარი უთხრეს იტალიური მედიის NurPhoto-ს ფოტოჟურნალისტს ჟერომ შაბოს.
ეს არ არის პირველი შემთხვევა, როცა ჟურნალისტებს საქართველოში შემოსვლას უკრძალავენ:
საქართველოში ჟურნალისტების შესვლის უფლების აკრძალვას გამოეხმაურა პრესის თავისუფლების დამცველი საერთაშორისო ორგანიზაცია “რეპორტიორები საზღვრებს გარეშე”. ორგანიზაციამ გააკრიტიკა ეს გადაწყვეტილებები და აღნიშნა, რომ ჟურნალსიტები საპროტესტო აქციების გაშუქების გამო ისჯებიან.
“საქართველოს მთავრობამ უნდა შეწყვიტოს ჟურნალისტების ამგვარი შევიწროება” – ნათქვამია განცხადებაში.
საზოგადოებრივი მაუწყებლის პირველი არხის მენეჯმენტმა, დისციპლინური სანქციები დააკისრა მაუწყებლის ოთხ თანამშრომელს, რომლებიც აკრიტიკებენ არხის ხელისუფლებისადმი მიკერძოებულ სარედაქციო პოლიტიკას.
ეს თანამშრომლები არიან: გადაცემა „რეალური სივრცის“ ჟურნალისტი თამარ მშვენიერაძე და წამყვანი იოსებ კაციტაძე. პულტის რეჟისორი და შეთავსებით სპორტული არხის რეჟისორი, კახაბერ მელიქიძე და ბრენდინგისა და პრომოციის ჯგუფის რეჟისორი, ირმა ჩუბინიძე.
დოკუმენტი, რომელშიც სანქციაზეა საუბარი, იოსებ კაციტაძემ სოციალურ ქსელში გამოაქვეყნა. ამ დოკუმენტიდან ირკვევა, რომ მას ედავებიან „საჯარო სივრცეში გავრცელებული განცხადებებით მაუწყებლის სარედაქციო დამოუკიდებლობის და მიუკერძოებლობის ეჭვქვეშ დაყენებას და ამის შედეგად დამსაქმებელისთვის რეპუტაზიული ზიანის მიყენებას”. თუ კაციტაძე მომდევნო 12 თვის განმავლობაში მსგავსს კიდევ ჩაიდენს, მას სამსახურიდან გაათავისუფლებენ. სავარაუდოა, რომ სამსახურიდან გათავისუფლება, კრიტიკის გაგრძელების შემთხვევაში, ელის დანარჩენ სამ თანამშრომელსაც.
იოსებ კაციტაძე, თამარ მშვენიერაძე და ირმა ჩუბინიძე არიან მოძრაობა “საზოგადოებრივი მაუწყებლის მცველების” წევრები და ბოლო თვეებია საუბრობენ არხზე არსებულ პოლიტიკურ გავლენებზე. კახაბერ მელიქიძემ 2025 წლის 3 თებერვალს სამეურვეო საბჭოს სხდომაზე საჯაროდ განაცხადა, რომ არხის მენეჯმენტი მის სარედაქციო საქმიანობაში ერეოდა და მატჩების მიმდინარეობისას თანამდებობის პირების ეთერში არაერთხელ ჩვენებას სთხოვდა.
დღეს, 11 აპრილს, ცნობილი გახდა, რომ საზოგადოებრივმა მაუწყებელმა სამსახურიდან გაათავისუფლა არხის წამყვანი სახეები, ნინო ზაუტაშვილი და ვასილ ივანოვ-ჩიქოვანი, რომლებიც ასევე აკრიტიკებდნენ არხის სარედაქციო პოლიტიკას.
2025 წლის 11 აპრილს, საქართველოს საზოგადოებრივი მაუწყებლის პირველი არხიდან გაათავისუფლეს წამყვანი სახეები, ჟურნალისტები: ვასილ ივანოვ-ჩიქოვანი და ნინო ზაუტაშვილი. გათავისუფლების საფუძვლად ჟურნალისტებს დისციპლინური მოკვლევა დაუსახელეს.
“მოკვლევის დოკუმენტის მიხედვით, დღეს დირექტორთა საბჭომ იმსჯელა და მიღო გადაწყვეტილება, რომ მე გავეთავისუფლებინე სამასახურიდან”, – ამბობს ივანოვ-ჩიქოვანი.
“დისციპლინური მოკვლევა ახსენეს, რის საფუძველზეც გამიშვეს სამსახურიდან, ოღონდ დისციპლინური მოკვლევის შედეგები ჩემთვის არავის არ გაუცნია”, – ამბობს ნინო ზაუტაშვილი.
ორივე ჟურნალისტი ბოლო რამდენიმე თვეა აკრიტიკებს არხის “ქართული ოცნების” მიმართ მიკერძოებულ სარედაქციო პოლიტიკას. ასევე, ორივე მათგანი ჩართულია მოძრაობაში “საზოგადოებრივი მაუწყებლის მცველები”, რომელიც აკრიტიკებს მაუწყებლის მენეჯმენტის გადაწყვეტილებებსა და სარედაქციო პოლიტიკას და საუბრობს პოლიტიკურ გავლენებზე მაუწყებელში.
გათავისუფლებული ჟურნალისტები აკრიტიკებდნენ არხის სამეურვეო საბჭოსაც, რომლის ერთ-ერთ ბოლო სხდომაზე თავმჯდომარემ თქვა, რომ პროკურატურა მათი საქმიანობით უნდა დაინტერესდეს. პარალელურად “ქართული ოცნების” მიმართ ლოიალურმა მედიებმა ჟურნალისტების მადისკრედიტირებელი ინფორმაცია გაავრცელეს, თითქოს ისინი “უკანონო შემოსავლების” მიღებაში არიან შემჩნეული.
ვასილ ივანოვ-ჩიქოვანი საინფორმაციო გამოშვება “მოამბის” წამყვანი იყო. ნინო ზაუტაშვილს კი ჰქონდა საავტორო გადაცემა “რეალური სივრცე”. 2025 წლის 4 თებერვლიდან, ვასილ ივანოვ-ჩიქოვანს 18:00 საათიანი “მოამბე” აღარ მიჰყავდა. ამ გადაწყვეტილების მიზეზად მას უთხრეს, რომ პროდუსერს აღარ სურდა მასთან მუშაობა. რაც შეეხება ნინო ზაუტაშვილის გადაცემას “რეალური სივრცე”, რომელიც ფოკუსირებული იყო სოციალურ თემებზე და გამოირჩეოდა “ქართული ოცნების” მიმართ კრიტიკული პოზიციით, ბოლო პერიოდში ის მხოლოდ რადიოეთერით გადიოდა, მიზეზად ჟურნალისტს ტელევიზიის ახალ შენობაში გადასვლის სამუშაოებსა და შესაბამისი სტუდიის არარსებობას უსახელებდნენ.
2025 წლის 10 აპრილს, ფრანგმა ჟურნალისტმა, კლემენ ჟირარდომ გამოაქვეყნა პოსტი სოციალურ ქსელში, რომლის მიხედვითაც გაირკვა, რომ ჟურნალისტი საქართველოს საზღვარზე არ შემოუშვეს 2025 წლის 12 თებერვალს. კლემენ ჟირარდო თანამშრომლობს ისეთ საერთაშორისო მედიაგამოცემებთან, როგორებიცაა Le Monde, Society და Al Jazeera. ბოლო თვეების განმავლობაში იგი ხშირად აქვეყნებდა სტატიებს საქართველოში მიმდინარე საპროტესტო აქციებსა და მათ ძალადობრივად ჩახშობასთან დაკავშირებით.
“მიუნხენიდან ღამით დაგვიანებული და დამღლელი ფრენის შემდეგ, როცა პასპორტის კონტროლის რიგში ერთ საათზე მეტხანს ველოდე, საქართველოს ტერიტორიიდან გამაძევეს. პოლიციელმა მომცა ფურცელი, სადაც ეწერა, რომ ქვეყანაში შემოსვლა „სხვა მიზეზით“ ამიკრძალეს და მითხრეს, რომ შესაძლოა მომავალში შევძლო დაბრუნება” – დაწერა ჟურნალსიტმა.
კლემენ ჟირარდო ფიქრობს, რომ საზღვარზე შესვლის აკრძალვა მის ჟურნალისტურ საქმიანობას უკავშირდება.
“გავიგე, რომ ჩემი სახელი და გვარი შინაგან საქმეთა სამინისტროს „წითელ სიაში“ იყო და ეს აკრძალვა დროებითი არ ყოფილა. ზუსტი მიზეზი დღემდე უცნობია და შესაძლოა ვერც ვერასდროს გავიგოთ, თუმცა ეს გადაწყვეტილება უდავოდ უკავშირდება ჩემს საქმიანობას, როგორც ჟურნალისტს” – განაცხადა კლემენ ჟირარდომ.
ეს არ არის პირველი შემთხვევა, როცა ჟურნალისტებს საქართველოში შემოსვლას უკრძალავენ:
საქართველოში ჟურნალისტების შესვლის უფლების აკრძალვას გამოეხმაურა პრესის თავისუფლების დამცველი საერთაშორისო ორგანიზაცია “რეპორტიორები საზღვრებს გარეშე”. ორგანიზაციამ გააკრიტიკა ეს გადაწყვეტილებები და აღნიშნა, რომ ჟურნალსიტები საპროტესტო აქციების გაშუქების გამო ისჯებიან.
“საქართველოს მთავრობამ უნდა შეწყვიტოს ჟურნალისტების ამგვარი შევიწროება” – ნათქვამია განცხადებაში.
2025 წლის 8 აპრილს, დაჯარიმების შესახებ აცნობეს “მაუწყებლის” ჟურნალისტს თოზუ გულმამედოვას. შსს მას ამავე წლის 16 თებერვალს “გზის ხელოვნურად გადაკეტვას” ედავება.
ონლაინ მედია “მაუწყებლის” ინფორმაციით, თოზუ გულმამედოვა ამ დღეს აქციაზე პროფესიულ მოვალეობას ასრულებდა.
