2025 წლის 6 აპრილს გამოცემა “ინდიგოს” ჟურნალისტი საბა სორდია დააკავეს რუსთაველის მეტროს მიმდებარე ტერიტორიაზე. ჟურნალისტი დიღმის იზოლატორშია მოთავსებული.
“ინდიგოს ჟურნალისტი საბა სორდია უკანონოდაა დაკავებული. ის დაემორჩილა პოლიციის მოთხოვნას და გახსნა ჩანთა, მიაწოდა პირადობა. როდესაც ჩანთის უკანა ჯიბის გახსნა სცადეს, საბამ უთხრათ, რომ თავად გახსნიდა. ეს ჩათვალეს დაუმორჩილებლობად და გადაიყვანეს განყოფილებაში და მალევე – იზოლატორში. მას თან ჰქონდა კამერა, რომელიც ახლა დალუქულია. გაიგეს რომ იყო ჟურნალისტი. მიუხედავად ამისა, ტოვებენ იზოლატორში. ” – დაწერა “ინდიგოს” აღმასრულებელმა დირექტორმა ნატა ძველიშვილმა.
“ინდიგოს” მიერ გავრცელებული ინფორმაციით, საბა სორდიას გაუგრძელდა იზოლატორში ყოფნის ვადა. ასევე, უცნობია როდის გაიმართება დაკავებული ჟურნალისტის სასამართლო პროცესი.
ჟურნალისტის დაკავებას გამოეხმაურა მედიის ადვოკატირების კოალიაცია – “საბა სორდიას დაკავება არის კიდევ ერთი შემთხვევა მედიის სისტემური რეპრესიული პოლიტიკისა, რომლის მასშტაბი დღითი დღე იზრდება. ჟურნალისტების დაკავება ისეთი მოსახერხებელი საბაბით, როგორიცაა “პოლიციისადმი დაუმორჩილებლობა”, სამართალდამცავი ორგანოების უფლებამოსილების ბოროტად გამოყენებაა.“
2025 წლის 27 მარტს, პროპაგანდისტულმა ტელეკომპანია „იმედმა“ დეზინფორმაცია გაავრცელა საზოგადოებრივი მაუწყებლის კრიტიკულად განწყობილი ჟურნალისტების – ნინო ზაუტაშვილისა და ვასილ-ივანოვ ჩიქოვანის – წინააღმდეგ და ისინი „უკანონო შემოსავლების“ მიღებაში დაადანაშაულა.
ტელეკომპანია „იმედმა“ ასევე „უკანონო შემოსავლების“ მიღებაში დაადანაშაულა საზოგადოებრივი მაუწყებლის კრიტიკულად განწყობილი ჟურნალისტებიც – გურანდა გოგინაშვილი, ტუხა კვინიკაძე და თამარ მშვენიერაძე. ისინი გადაცემა „რეალური სივრცის“ თანამშრომლები არიან, რომლის წამყვანი ნინო ზაუტაშვილია.
ტელეკომპანია „იმედის“ მიერ თავდაპირველად გავრცელებულ ინფორმაციაში ეწერა, რომ ვასილ-ივანოვ ჩიქოვანის მეუღლეს სარეკლამო კომპანია ჰქონდა. ჩიქოვანი დეზინფორმაციას სოციალურ ქსელში გამოეხმაურა და ტელეკომპანია სიცრუეში ამხილა.
ტელეკომპანია „იმედმა“ მოგვიანებით ვასილ-ივანოვ ჩიქოვანის შესახებ გავრცელებული ინფორმაცია წაშალა და აღიარა, რომ ჟურნალისტის მეუღლე სხვა პირში აერიათ. თუმცა, ნინო ზაუტაშვილის წინააღმდეგ გაჟღერებული ბრალდებები კვლავ ხელმისაწვდომია.
აღსანიშნავია, რომ საზოგადოებრივი მაუწყებლის კრიტიკულად განწყობილი ჟურნალსიტების დადანაშაულება “უკანონო შემოსავლების” მიღებაში დროში ემთხვევა, საზოგადოებრივი მაუწყებლის სამეურვო საბჭოს მიერ, ამავე ჟურნალისტების წინაღმდეგ პროკურატურით მუქარას. კერძოდ,
2025 წლის 21 მარტს, საზოგადოებრივი მაუწყებლის “ქართულ ოცნებასთან” დაკავშირებულმა სამეურვეო საბჭოს წევრებმა საბჭოს სხდომაზე პროკურატურისგან გამოძიების დაწყება მოითხოვეს არხის სარედაქციო პოლიტიკის მიმართ კრიტიკულად განწყობილი ჟურნალისტების ვასილ ივანოვ-ჩიქოვანის და ნინო ზაუტაშვილის წინააღმდეგ.
2025 წლის 28 მარტს, პარლამენტთან მიმდინარე საპროტესტო აქციაზე ონლაინ მედია “აპრილის” ჟურნალისტს პოლიციელებმა ხელი შეუშალეს პროფესიული მოვალეობის შესრულებაში.
ონლაინ მედია “აპრილის” ჟურნალისტი ნატა ურიდია საპროტესტო აქციას მობილური ტელეფონით იღებდა, რა დროსაც მას, პოლიციელებმა ხელი ჰკრეს. ვიდეოში რომელიც მედია “აპრილმა” გაავრცელა ჩანს, რომ პოლიციელი ჟურნალისტს ეუბნება “გადადი გვერდზე”, შემდეგ კი ხელს ჰკრავს.
საპროტესტო აქციების დაწყებიდან – 2024 წლის 28 ნოემბრიდან 28 მარტამდე პერიოდში აქციებზე მედიის წარმომადგენლების უფლებების დარღვევის 154 შემთხვევა დაფიქსირდა.
2025 წლის 24 მარტს “TV პირველის” ჟურნალისტს ნატა ქაჯაიას საქართველოს პარლამენტმა აკრედიტაცია ექვსი თვით შეუჩერა.
აკრედიტაციის შეჩერება უკავშირდება პროევროპული აქციების დროს დაკავებული პატიმრების საქმეზე მომზადებულ სიუჟეტს. ნატა ქაჯაიამ გამოკითხა პარლამენტის თანამშრომლები. ინტერვიუზე უარის შემდეგ, ქაჯაია ცდილობდა საჯარო მოხელეებისგან პასუხის მიღებას.
“ოცნების რეაქცია აჩვენებს რომ შაბათს გასული სიუჟეტი მათთვის არ იყო სასიამოვნო, რადგან ჩვენ მაყურებელს მოვუყევით როგორ სიყალბეზეა დაფუძნებული დევნა – სისხლის სამართლის საქმეში, სინდისის პატიმრების საქმეში. მე მივედი ინტერვიუს ასაღებად პარლამენტის თანამშრომელთან, კაცთან ვისი ჩვენებაც დევს სინდისის პატიმრების საქმეში” – ამბობს ნატა ქაჯაია “TV პირველთან” ინტერვიუში.
შემთხვევას გამოეხმაურა “მედიის ადვოკატირების კოალიცია” – “რეჟიმი სისტემურად ძალადობას დამოუკიდებელ მედიაზე, ჟურნალისტებს უკანონოდ ეშლებათ ხელი პროფესიული მოვალეობის შესრულებაში, ადგილი აქვს პერმანენტული თავდასხმის, დაშინების, შეურაცხყოფისა და დეზინფორმაციის ფაქტებს. დღემდე არ დამდგარა პასუხისმგებლობა არც ერთი იმ პირისთვის, ვინც აღნიშნული სისტემური დანაშაულის ბრძანება გასცა თუ აღასრულა”.
საკანონმდებლო ორგანოში ჟურნალისტების აკრედიტაციის წესს პარლამენტის თავმჯდომარის 2023 წლის 6 თებერვლის დადგენილება განსაზღვრავს.
2025 წლის 23 მარტს ცნობილი გახდა, რომ საზოგადოებრივი მაუწყებლის ჟურნალისტი, დილის გადაცემის თანამშრომელი ანი ჯობავა, რომელიც 7 წელია ტელეარხზე მუშაობს, ეთერს ჩამოაშორეს. ამის შესახებ ჟურნალისტმა სოციალურ ქსელში დაწერა.
ჟურნალისტი ამ გადაწყვეტილებას არხისადმი მის კრიტიკულ სარედაქციო პოლიტიკას უკავშირებს.
“სალამი, მე ანი ვარ ჯობავა, პირველი არხის დილის გადაცემის ჟურნალისტი, რომელსაც არ დაუძახეს… ჯერ თათბირებს ჩამომაშორეს, მერე კომუნიკაციას და ასე ვიყავი თვენახევარზე მეტი”, – წერს ჯობავა სოციალურ ქსელში.
ანა ჯობავა ერთ-ერთი იმ ჟურნალისტთაგანია, ვინც ხელი მოაწერა თანამშრომლების ნაწილის განცხადებას, რომელშიც გმობენ და აპროტესტებენ ძალადობას თანამოქალაქეებისა და კოლეგების მიმართ და მოითხოვენ, მათი ტელევიზიის ეთერები დაეთმოს საზოგადოებრივი აზრის გახმიანებას და საჯარო დისკუსიებს.
ანა ჯობავას მსგავსად, საზოგადოებრივი მაუწყებლის ხელმძღვანელობამ, ეთერიდან ჩახსნა საინფორმაციო გამოშვების წამყვანი ვასილ-ივანოვ ჩიქოვანიც, რომელიც ასევე აკრიტიკებს მაუწყებლის სარედაქციო პოლიტიკას.
2025 წლის 21 მარტს, საზოგადოებრივი მაუწყებლის სამეურვეო საბჭოს წევრებმა, საბჭოს სხდომაზე, პროკურატურას მიმართრეს დაინტერესდეს არხის სარედაქციო პოლიტიკის მიმართ კრიტიკულად განწყობილი თანამშრომლების – ვასილ ივანოვ-ჩიქოვანის, ნინო ზაუტაშვილისა და კახა მელიქიძის საქმიანობით,
საზოგადოებრივი მაუწყებლის სამეურვეო საბჭოს წევრები პროკურატურისგან ითხოვენ, გამოიძიონ არხის მიმართ კრიტიკულად განწყობილი თანამშრომლების მიერ მაუწყებლის „უსაფუძვლოდ დადანაშაულების“ ფაქტები..
„მიზანშეწონილი მგონია, რომ პროკურატურამ შეისწავლოს ეს საკითხი, რატომ მოუნდათ ამ ადამიანებს და რატომ არის ეს ამბები ერთმანეთთან გადაბმული. ეს თუ ჩვენ ასე არ გავაკეთეთ, განუწყვეტელი პროვოკაციები იქნება. ეს ასე არ უნდა დარჩეს და სერიოზულად უნდა იქნას გამოძიებული. ეს არის სახელმწიფო რესურსების პირადი, პოლიტიკური და შეიძლება ფინანსური გამოყენება, ვიღაცამ ფული აიღო თუ პოლიტიკური სურვილები გამოხატა, ეს უნდა იქნას გამოძიებული“,- განაცხადა სამეურვეო საბჭოს თავმჯდომარემ ვასილ მაღლაფერიძემ.
მედიის ადვოკატირების კოალიცია გამოეხმაურა აღნიშნულ ფაქტს – “ეს არის უპრეცედენტო ზეწოლა მედიის თავისუფლებაზე და პირდაპირი მუქარა იმ ჟურნალისტების მიმართ, რომლებიც საკუთარ პროფესიულ მოვალეობას ასრულებენ და საზოგადოებრივი მაუწყებლის ხელმძღვანელობას და ივანიშვილის რეჟიმს პროპაგანდასა და ძალადობაში ამხელენ”.
უწყვეტი პროევროპული აქციების პარალელურად საზოგადოებრივი მაუწყებლის შენობის წინ ტარდება საპროტესტო აქცია არხის მიკერძოებული სარედაქციო პოლიტიკის წინააღმდეგ. აქციის მონაწილეები და თავად საზოგადოებრივი მაუწყებლის თანამშრომლების ნაწილი, მიმდინარე პროტესტის სათანადოდ გაშუქების გამო ეთერს ითხოვენ. არხის ხელმძღვანელობა კრიტკულად განწყობილმა მოქმედმა და ყოფილმა თანამშრომლებმა “ქართული ოცნების” სასარგებლოდ პროპაგანდაში არაერთელ ამხილეს.
2025 წლის 19 მარტს, თბილისის საქალაქო სასამართლოს მოსამართლე თამარ მახარობლიძემ, სხდომათა დარბაზი დაატოვებინა “TV პირველის” ჟურნალისტებს მარიამ გაფრინდაშვილსა და ნანუკა ქაჯაიას.
მოსამართლემ გადაწყვეტილება მას შემდეგ მიიღო, რაც ჟურნალისტები დაინტერესდნენ, რატომ არ მიეცათ პროცესზე ფოტოგადაღების უფლება. მათ ეს კანონის დაცვით, ოფიციალური განცხადებით ჰქონდათ მოთხოვნილი.
“მოსამართლემ ჟურნალისტებს სიტყვა არ დაასრულებინა, უთხრა, რომ პროცესის მხარეს არ წარმოადგენენ და არ აქვთ უფლება ისაუბრონ. მან ჯერ შენიშვნა მისცა ჟურნალისტებს, შემდეგ კი დარბაზიდან გააძევა” – ნათქვამია “რადიო თავისუფლების” მასალაში.
სასამართლო მიმდინარე წლის 15 მარტს ილია ჭავჭავაძის გამზირზე მომხდარ განზრახ მკვლელობას იხილავდა.
მზია ამაღლობელი დააჯარიმეს
2025 წლის 18 მარტს ბათუმის საქალაქო სასამართლოს მოსამართლე სალიხ შაინიძემ, გამოცემების “ნეტგაზეთისა” და “ბათუმელების” თანადამფუძნებელი და დირექტორი, მზია ამაღლობელი, პოლიციის შენობაზე სტიკერის გაკვრისთვის სამართალდამრღვევად სცნო და ორი ათასი ლარით დააჯარიმა.
მზია ამაღლობელი ორჯერ დააკავეს 2025 წლის 11-12 იანვრის ღამეს. თავდაპირველად იგი დააკავეს პოლიციის შენობაზე სტიკერის გაკვრისთვის, რომელზეც ეწერა – “იფიცება საქართველო”. დაკავებიდან რამდენიმე საათში იგი გაათავისუფლეს ხელწერილის საფუძველზე. მაგრამ, გათავისუფლებიდან მალევე კვლავ დააკავეს პოლიციის უფროს ირაკლი დგებუაძისთვის სილის გაწვნის ფაქტზე, უკვე სისხლის სამართლის წესით.
სისხლის სამართლის საქმეზე მედიამენეჯერი ამ დრომდე პატიმრობაშია. მისი პატიმრობის პროცესს, გარდა ადგილობრივი არასამთავრობო ორგანიზაციებისა, ავტორიტეტული საერთაშორისო ორგანიზაციებიც აკვირდებიან.
მზია ამაღლობელი დააჯარიმეს
2025 წლის 17 მარტს ფეისბუქზე გამოქვეყნებულ სტატუსში “ქართული ოცნების” ლიდერმა მამუკა მდინარაძემ “პალიტრანიუსის” გვერდზე გამოქვეყნებულ ქარდი გააზიარა შემდეგი ტექსტით: “როგორი ადეკვატური ფოტოა “ნიუსთან” 
აქამდე მხოლოდ “ტაბულა” და ერთი-ორი ნაცური გვერდი კადრულობდა ასეთი მდაბიო მეთოდებით ბრძოლას პოლიტიკური ოპონენტების წინააღმდეგ 
ზოგადად კი, ნაცებზე კიდევ უფრო ქვემოთ განაცებულები აღმოჩნდებიან-ხოლმე…
”.
მამუკა მდინარაძე ობიექტური მედიის მიმართ დისკრიმინაციული და სიძულვილის ენის განცხადებებით არის ცნობილი.
ტელეკომპანია “ფორმულას” ჟურნალისტი ნანო ჩაკვეტაძე 5 000 ლარით დააჯარიმეს. მას ედავებიან „გზის ხელოვნურად გადაკეტვას“ 2025 წლის 13 მარტს. დაჯარიმების მომენტში იგი რუსთაველის გამზირზე პროფესიულ მოვალეობას ასრულებდა და პირდაპირ ჩართვაზე მუშაობდა. კერძოდ, “ფორმულას” მაყურებელს აწვდიდა ინფორმაციას აქციაზე დაჯარიმებული მოქალაქეების შესახებ. ჟურნალისტმა ჯარიმა გაასაჩივრა, თუმცა გაუუქმეს თუ არა სანქცია, მისთვის ამ დრომდე უცნობია.
ქართულმა ოცნებამ“ პროევროპული პროტესტების კონტექსტში გაზარდა ჯარიმების ოდენობა, რომლებიც 28 ნოემბრის შემდეგ დაიწყო. საქართველოს ადმინისტრაციულ სამართალდარღვევათა კოდექსში შეტანილი ცვლილებების მიხედვით, გზის უკანონო გადაკეტვისთვის ჯარიმა ათჯერ გაიზარდა – 500 ლარიდან 5 000 ლარამდე.
