სამართალდამცველი

2 დეკემბერს, საპროტესტო აქციის გაშუქებისას, დაშავდა და მუშაობაში შეეშალა ხელი მედიის 7 წარმომადგენელს

2024 წლის 2 დეკემბრის ღამეს, თბილისში, პარლამენტის შენობასთან მიმდინარე მშვიდობიანი საპროტესტო აქციის დაშლისას დაშავდა და მუშაობაში შეეშალა ხელი მედიის 7 წარმომადგენელს.

საზოგადოებრივი მაუწყებლის პირველი არხის ინფორმაციით, რუსთაველის გამზირზე აქციის დაშლისას, სამართალდამცველების მიერ გაზის კაფსულის გამოყენების შემდეგ დაშავდა ტელეკომპანიის გადამღები ჯგუფი – ჟურნალისტი თეონა ხუბულავა და ორი ოპერატორი – ლევან ქართველიშვილი და ბადრი გამრეკლაშვილი. მათ ადგილზე გაეწიათ სამედიცინო დახმარება.

“სტუდია მონიტორის” ჟურნალისტს, ნინო რამიშვილს, რომელიც აქციის ერთ-ერთი მონაწილის ცემის კადრებს იღებდა, სპეცრაზმელმა ტელეფონი წაართვა. ჟურნალისტის თქმით, მას ეკეთა პრესის საიდენტიფიკაციო ნიშანი და ასევე არერთხელ უთხრა, რომ წარმოადგენდა მედიას, თუმცა, ტელეფონი მას მაინც არ დაუბრუნეს.

“TV პირველის” მიერ გავრცელებული ინფორმაციით, აქციის დაშლის დროს დაზიანდა ტელეკომპანიის სამაუწყებლო აპარატურა, მათ შორის გამოსაყენებლად უვარგისია პირდაპირი ტრანსლაციის კამერა.

ნატალი ჩხარტიშვილს “ჩაიხანადან” მუშაობის პროცესში ხელიდან გააგდებინეს Handycam–ი, რომლითაც ის აქციის მონაწილეების დაკავების კადრებს იღებდა. ასევე, უყვიროდნენ, რომ გამოერთო კამერა.

“მთავარი არხის” ოპერატორი გივი მჭედლიშვილი მუშობის პროცესში შეუძლოდ გახდა. პირდაპირ ეთერში ისმის ამავე არხის ჟურნალისტის, დეა მამისეიშვილის ხმა, რომელიც აქციის მონაწილეებს სთხოვს ფიზიოლოგიური ხსნარს ოპერატორის დასახმარებლად.

JRC-ის ოპერატორს ბაქარ ყვავაძეს, „მედიაჩეკერისთვის“ მიწოდებული ინფორმაციით, გაზის კაფსულა წვივში მოხვდა.

საპროტესტო აქციებზე დაშავებულთა სრული სია იხილეთ აქ:

პირველი დეკემბრის საპროტესტო აქციის გაშუქებისას დააკავეს, დაშავდა და მუშაობაში შეეშალა ხელი მედიის 11 წარმომადგენელს

2024 წლის1 დეკემბერს, პარლამენტის შენობასთან მიმდინარე მშვიდობიანი საპროტესტო აქციის დაშლისას დაშავდა სხვადასხვა მედიის 11 წარმომადგენელი. სამი დღის განმავლობაში, ჯამში, 59 შემთხვევა იყო, როცა ჟურნალისტი, ოპერატორი და ფოტოგრაფი დაშავდა და ხელი შეეშალა პროფესიული საქმიანობის განხორციელებაში. რამდენიმე მათგანი დააკავეს.

საჯაროდ გავრცელებული ინფორმაციის თანახმად:

აქციის დაშლის დროს, მეტრო “რუსთაველში”, პოლიციამ დააკავა ონლაინგამოცემა „მაუწყებლის“ ჟურნალისტი გიორგი ჩაგელიშვილი. გავრცელებულ ვიდეოში ჩანს, რომ ჩაგელიშვილი პოლიციელებს ეუბნება, რომ ჟურნალისტია, თუმცა ამის მიუხედავად მაინც აკავებენ.

მეტრო „რუსთაველთან“ აქციის მონაწილეების დაკავებას იღებდა ონლაინგამოცემა „პუბლიკის“ ჟურნალისტი, რა დროსაც პოლიციელმა მას ხელი ჰკრა და ტელეფონი გააგდებინა, რომლითაც ის ვიდეოს იღებდა.

OC MEDIA-ს რედაქტორი მარიამ ნიკურაძე პოლიციელმა კედელს მიანარცხა, რა დროსაც დაზიანდა ჟურნალისტის კამერაც. მარიამ ნიკურაძე რამდენიმე დღის წინაც დაზარალდა საპროტესტო აქციის გაშუქებისას.

პარლამენტის მიმდებარე ტერიტორიაზე ფეხში დაიჭრა პრო-სამთავრობო ტელევიზიის „რუსთავი 2“-ის ჟურნალისტი თამთა ჩიტიშვილი. ტელეკომპანიის მიერ გავრცელებული ინფორმაციით, ჟურნალისტს, სავარაუდოდ, ქირურგიული ჩარევა სჭირდება.

პარლამენტის მიმდებარე ტერიტორიაზე დაშავდა „რუსთავი 2“-ის ოპერატორი გიორგი ნერგაძე. მას ადგილზე სასწრაფოს ექიმებმა აღმოუჩინეს დახმარება.

აქციაზე დაშავდა „TV პირველის“ ოპერატორი ნიკო კოკაია. ჟურნალისტის თქმით, მას, სავარაუდოდ, წიწაკის სპრეი შეასხეს. ოპერატორს ადგილზე სასწრაფო დახმარების ექიმებმა აღმოუჩინეს დახმარება. ასევე, „მედიაომბუდსმენის“ ინფორმაციით, კოკაიასთან ერთად, დაშავდა ჟურნალისტი მარიამ მაკასარაშვილიც.

ბესიკის ქუჩაზე, ერთ-ერთ ბიზნეს ცენტრში შესული მოქალაქეების დაკავებას იღებდა “TV პირველი“, როცა ოპერატორს სპეცრაზმის წარმომადგენლები დაემუქრნენ, უთხრეს, კადრები არ გადაეღო.

ონლაინმედია “აპრილის“ ინფორმაციით, მათ ჟურნალისტს გიორგი ბასხაჯაურს პროფესიული მოვალეობის შესრულებისას პოლიციელი თავს დაესხა. ბასხაჯაური აქციის მონაწილეების დაკავებას იღებდა, როცა ტელეფონის ჩამორთმევა სცადეს და დაედევნენ.

ასევე დაშავდა მირიან მელაძე, ფოტორეპორტიორი – მელაძემ ფეისბუკის პირად გვერდზე დაშავებული ფეხის ფოტო გამოაქვეყნა და დაწერა, რომ ეს ფაქტი სამი დღის წინ მოხდა.
ონლაინ მედია “პუბლიკის” ინფორმაციით, აქციაზე ცრემლსადენი გაზით დაშავდა პროპაგანდისტული პრო-სამთავრობო მედიის POST TV-ის თანამშრომელი გურანდა ბილიხოძე.

საპროტესტო აქციებზე 29, 30 ნოემბერს და 1 დეკემბერსაც დაშავდნენ მედიის წარმომადგენლები.

29 ნოემბრის საპროტესტო აქციის გაშუქებისას დააკავეს, დაშავდა და მუშაობაში შეეშალა ხელი მედიის 9 წარმომადგენელს

2024 წლის 29 ნოემბრის ღამეს, თბილისში, რუსთაველის გამზირზე, პარლამენტის შენობასთან მიმდინარე მშვიდობიანი საპროტესტო აქციის დაშლისას კიდევ 9 ჟურნალისტი და ოპერატორი დაშავდა და პროფესიულ საქმიანობაში შეეშალა ხელი.

საჯაროდ გავრცელებული ინფორმაციის თანახმად:

მძიმედ დაშავდა “TV პირველის” ჟურნალისტი მარიამ გაფრინდაშვილი. ტელეკომპანიის მიერ გავრცელებული ინფორმაციით, მარიამ გაფრინდაშვილმა რამდენჯერმე გონება დაკარგა. ვიდეოში ჩანს, რომ ჟურნალისტს შუბლიდან სისხლი სდის. ის სამედიცინო დაწესებულებაში გადაყვანეს.

აქციაზე ფიზიკურად გაუსწორდნენ “TV პირველის” ოპერატორს, პაპუნა ხაჩიძეს.

ონლაინგამოცემა „პუბლიკის“ ჟურნალისტს, ანა მსხალაძეს პროფესიული მოვალეობის შესრულების დროს სპეცრაზმმა ხელი დაარტყა და ტელეფონი წაართვა. ანა მსხალაძე ამბობს, რომ მოქალაქეების დაკავებას იღებდა, რა დროსაც სპეცრაზმელმა მას ტელეფონი დააგდებინა. მას შემდეგ, რაც ჟურნალისტმა სპეცრაზმელს უთხრა, რომ ის იყო ჟურნალისტი და ტელეფონის ასაღებად დაიხარა, მას თავში ჩაარტყეს, შემდეგ კი, სავარაუდოდ, მისი ტელეფონი აიღეს და გაიქცნენ. დაკარგულია მისი ტელეფონი.

პარლამენტთან მიმდინარე აქციის გაშუქების დროს პოლიციამ იძალადა RealPolitika-ს ჟურნალისტ აკა ზარქუაზეც. “10-მდე სპეცრაზმელმა წრეში მომაქცია და მირტყეს, სანამ არ მოჰბეზრდათ, სიტყვიერ შეურაცხყოფაზე არაფერს ვამბობ. რაღაც ეტაპზე მეთაური მოვიდა, რომელიც ცდილობდა ბეიჯი პირში ჩაეტენა. საბედნიეროდ ტელეფონი ვერ წამართვეს და ლაივი დევს RealPolitika-ს გვერდზე. ვიდეოში სამწუხაროდ ფიზიკური ანგარიშსწორების ერთი სერია ჩანს, მეორეს დროს ტელეფონი ჯიბეში მედო და ვერ გადაიღო. აირწინაღი წამართვეს. კიდევ კარგი ჩაფხუტი მეკეთა“, – წერს ჟურნალისტი.

ფიზიკურად გაუსწორდნენ ფოტოგრაფს, გიორგი გამგებელს. ის კლინიკაში გადაიყვანეს. ფოტოგრაფს წაართვეს და დაუმტვრიეს აპარატურაც. “ფეხი მომტეხეს, მირტყეს ყველა, აპარატი მომწყვიტეს და წამარათვეს, ხალხმა ძლივს მიმათრია სასწრაფომდე“, – წერს ფოტოგრაფი.

აქციაზე აგრეთვე დაშავდა პირველი არხის ოპერატორი დავით ბეჟანიშვილი.

ტელეკომპანია “ფორმულას” ინფორმაციით, სპეცრაზმელები თავს დაესხნენ ჟურნალისტს, ნუცა ბახუტაშვილსა და მის ოპერატორს, ირაკლი ბართავას. ტელეკომპანიის მიხედვით, ჟურნალისტმა მიიღო ტვინის შერყევა.

ფიოდორ ხუდოკორმოვი, რუსი ჟურნალისტი – Paper Kartuli-ის ინფორმაციით, ჭიჭინაძის ქუჩაზე, როცა სპეცრაზმი მომიტინგეებს აწვებოდა, ნიღბიანმა მამაკაცმა, სავარაუდოდ ძალოვანმა, მას ხელი ჰკრა.

“მედიაომბუდსმენმა” მიმართა შინაგან საქმეთა სამინისტროს შეწყვიტოს აქციის მონაწილეებსა და მედიაზე თავდასხმა. ასევე, თითოეულ ფაქტთან, დაკავშირებით მივმართა სპეციალური საგამოძიებო სამსახურს, დაუყოვნებლივ დაიწყოს გამოძიება; ასევე, მედიაომბუდსმენი ითხოვს საქმეებს მიენიჭოს ჟურნალისტურ საქმიანობაში ხელშეშლის (საქართველოს სისხლის სამართლის კოდექსის 154-ე მუხლი) და დევნის (საქართველოს სისხლის სამართლის კოდექსის 156-ე მუხლი) კვალიფიკაცია და ჟურნალისტების საქმეები არ გააერთიანოს სხვა დაზარალებულების საქმეებთან.

საპროტესტო აქციებზე 29 ნოემბერსაც დაშავდნენ მედიის წარმომადგენლები.

28 ნოემბრის საპროტესტო აქციის გაშუქებისას დააკავეს, დაშავდა და მუშაობაში შეეშალა ხელი მედიის 40 წარმომადგენელს

2024 წლის 28 ნოემბრის ღამეს, თბილისში, რუსთაველის გამზირზე, პარლამენტის შენობასთან მიმდინარე მშვიდობიანი საპროტესტო აქციის დაშლისას 35 ჟურნალისტი და ოპერატორი დაშავდა და პროფესიულ საქმიანობაში შეეშალა ხელი. აქციაზე მყოფი რეპორტიორების მონათხრობით, სპეცრაზმი მათ დამიზნებით უშენდა წიწაკის სპრეის და წყლის ჭავლს, ზოგ მათგანს კი ფიზიკურად უსწორდებოდა.

საჯაროდ გავრცელებული ინფორმაციის თანახმად:

მძიმედ დაშავდა ტელეკომპანია “ფორმულას” ჟურნალისტი გურამ როგავა. ჟურნალისტი პირდაპირ ეთერში მუშაობდა, რა დროსაც მას სპეცრაზმელმა დაარტყა, რის გამოც ჟურნალისტი დაეცა. მან დაზიანებები მიიღო თავის არეში. კადრებში ჩანს ძირს დაცემული ჟურნალისტი, რომელსაც სისხლი სდის. მოგვიანებით იგი სამედიცინო დაწესებულებაში გადაიყვანეს. იქამდე როგავას, ასევე პირდაპირ ეთერში მუშაობის დროს, პოლიციელებმა მუშაობაში შეუშალეს ხელი. კადრებში, რომელიც ამ დროს ეთერში გადიოდა, ჩანს, რომ პოლიციელებს ჟურნალისტი იძულებით გაჰყავთ ტერიტორიიდან, ამავე დროს, ხელს აფარებენ კამერას და ხელს უშლიან გადაღებაში ოპერატორსაც.
აქციაზე დაშავდა “ფორმულას“ ჟურნალისტი გიორგი კვიჟინაძე, ასევე ოპერატორი თედო ქვაჩახია. წიწაკის სპრეი შეასხეს ჟურნალისტ ხატია სამხარაძესაც.
ტექნიკა დაუზიანდა ტელეკომპანია “ფორმულას” გადამღებ ჯგუფს, რომელიც ბათუმში მიმდინარე აქციას აშუქებდა. ამის შესახებ თამარ თედიაშვილმა პირდაპირი ჩართვისას თქვა.
ონლაინგამოცემა “პუბლიკას” ჟურნალისტი ალექსანდრე ქეშელაშვილი, სამართალდამცველებმა პროფესიული მოვალეობის შესრულების დროს დააკავეს, კამერა წაართვეს და სცემეს. მოგვიანებით იგი ხელწერილის საფუძველზე გაათავისუფლეს და შესამოწმებლად სამედიცინო დაწესებულებაში გადაიყვანეს. “ვუმეორებდი, რომ ჟურნალისტი ვარ, მაგრამ მგონი მაგან პირიქით იმოქმედა, ისეც მაგინებდნენ და მერე ჟურნალისტობის გამოც დამიმატეს. ერთგვარ კორიდორში გამატარეს, სადაც მირტყამდნენ ხელებს და ფეხებს, ძირითადად, სახეში. წამართვეს კამერები, ბეიჯი, აირწინაღი. ასე ხელიდან ხელში გადავყავდი და ყველა სათითაოდ მირტყამდა, სანამ ჭიჭინაძის ქუჩიდან პარლამენტის უკანა ტერიტორიის გავლით, 9 აპრილის ქუჩამდე არ ამიყვანეს, იქ გამიკეთეს ბორკილები”, – დაწერა ჟურნალისტმა სოციალურ ქსელში. ,
პუბლიკას” კიდევ ერთ ჟურნალისტს, ნათია ამირანაშვილს, პოლიციამ გადაღებაში ხელი შეუშალა და მისი ტელეფონის დალეწვა სცადეს.
“პუბლიკას” ფოტორეპორტიორი მინდია გაბაძე სამართალდამცველებმა პროფესიული მოვალეობის შესრულებისას დააზიანეს.
მუშაობაში არაერთხელ შეუშალეს ხელი “პუბლიკას” ჟურნალისტ ბასტი მგალობლიშვილსაც. გამოცემის ინფორმაციით, მას რამდენჯერმე დაარტყეს.
“TV პირველის” ოპერატორს, ნიკო კოკაიას, ტელეკომპანიის ინფორმაციით, სპეცრაზმმა დამიზნებით სახეში წიწაკის სპრეი შეასხა.
TV პირველის” ოპერატორს, გიორგი შეწირულს, სპეცრაზმის წევრი ფიზიკურად გაუსწორდა. ჟურნალისტის ინფორმაციით, რომელიც შეწირულთან ერთად მუშაობდა, ოპერატორს უკნიდან მიეპარა სპეცრაზმელი და დაარტყა.
აქციაზე დაშავდნენ “TV პირველის” ჟურნალისტი ნანუკა ქაჯაია და ოპერატორი დავით ბიჭიკაშვილი. გადამღებ ჯგუფს და მათ რესპონდენტს სპეცრაზმმა პირდაპირ ეთერში დაუშინა დიდი რაოდენობით წყლის ჭავლი. ოპერატორს სამედიცინო დახმარება დასჭირდა.
ასევე, გაურკვეველი ნივთიერება შეასხეს სახეში “TV პირველის” ჟურნალისტ ანა მდივანს. მას სამედიცინო დახმარება დასჭირდა.
აქციის დაშლისას გამოყენებული ცრემლსადენი გაზით შეუძლოდ გახდნენ “მთავარი არხის” წარმომადგენლებიც. მათ შორის, ჟურნალისტი დეა მამისეიშვილი და ოპერატორი გიორგი გოგინაშვილი.
“მთავარი არხის” ჟურნალისტ ქეთა ციცქიშვილს პოლიციელებმა სიტყვიერი შეურაცხყოფა მიაყენეს და პროფესიულ საქმიანობაში ხელი შეუშალეს. პოლიციელებმა პროფესიულ საქმიანობაში ხელი შეუშალეს ამავე არხის ჟურნალისტს დავით კობიძესა და ოპერატორს, ლუკა ბაჩილავას.
“რადიო თავისუფლების” ცნობით, აქციაზე ფიზიკურად იძალადეს ჟურნალისტებზე დავით ქორიძესა და სალომე ჩადუნელზე. ასევე ოპერატორ ზუკა ხიდაშელზე.
“რადიო თავისუფლების” კიდევ ერთ ჟურნალისტს, დავით ცაგარელს გამთენიისას, დემონსტრაციის დარჩენილი ნაწილის დარბევის დროს, სპეცრაზმელმა მუცელში მუშტი ჩაარტყა, მიწაზე დაგდების შემდეგ კი წიხლი.
აქციის გაშუქებისას შეუძლოდ გახდა და გონება დაკარგა “აჭარის ტელევიზიის” ჟურნალისტმა ნინო ლორჩოშვილმა. არხის ინფორმაციით, ის სავარაუდოდ სპეცრაზმის მხრიდან წიწაკის სპრეის გამოყენების შედეგად გახდა ცუდად.
წიწაკის სპრეი შეასხეს სახეში სამართალდამცავებმა ონლაინგამოცემა “ნეტგაზეთის” ჟურნალისტს გივი ავალიანს.
გამოცემა OC Media-ს დამფუძნებელს, ფოტოგრაფ მარიამ ნიკურაძეს წყლის ჭავლი მოხვდა. როგორც ნიკურაძე წერს, ის დავარდა, მისი კამერა კი დაზიანდა. ფოტოგრაფს სამედიცინო დახმარება დასჭირდა. მოგვიანებით, მან სოციალურ ქსელში დაწერა, რომ სამართალდამცველები მუშაობას უკრძალავდნენ: “ორჯერ დამიგდო სპეცრაზმმა ტელეფონი ძალით, გვიკრძალავენ გადაღებას, გვაგინებენ ჟურნალისტებს”, – წერს მარიამ ნიკურაძე.
JAMnews-ის რეპორტიორს იულია კალაბანს, რომელიც ცდილობდა გადაეღო კადრი, როგორ იღებდა სპეცრაზმი რუსთაველის გამზირზე მოწყობილი ბარიკადებს, სამართალდამცველმა ხელი ჰკრა და ფეხში დაარტყა. რეპორტიორს პირველადი სამედიცინო დახმარების ჯგუფის დახმარება დასჭირდა.
აქციის გაშუქებაში ხელი შეუშალეს „სტუდია მონიტორის“ ჟურნალისტებს — ნინო წვერავასა და ნინო შუბითიძეს, ასევე ოპერატორს გიორგი ბარამიძეს. პოლიციის მხრიდან ძალის გადამეტების ამსახველი ვიდეო ჟურნალისტმა ნინო წვერავამ სოციალურ ქსელ „X“-ზე გამოაქვეყნა.
სპეცრაზმი ფიზიკურად გაუსწორდა “პროექტ 64-ის” რედაქტორს გიორგი გოგუას. მას ფეხები ურტყეს.
წყლის ჭავლით დაშავდა „რუსთავი 2“-ის ჟურნალისტი.
სპეცრაზმელმა წიხლი ჩაარტყა „ექსპრესნიუსის“ ჟურნალისტს ირაკლი მანაგაძეს.
დაშავდა მედია “აპრილის” ფოტოგრაფი ტბელ აბუსერიძეც.
TOK TV-ს ჟურნალისტი ფილიპე წერეთელი დაზარალდა გაზის კაფსულის სროლის შედეგად. ჟურნალისტი ჰყვება, რომ ცრემლსადენი ხელყუმბარები მიზანმიმართულად ისროლეს: ,,გამოუშვეს დაახლოებით 5 კაფსულა. ბესიკის ქუჩაზე, სადაც ჩვენ ვიყავით, მხოლოდ ჟურნალისტები იყვნენ, დაახლოებით 5-7 კაცი. იმ დროს იქ აქციის მონაწილეები არ იყვნენ.
საზოგადოებრივი მაუწყებლის პირველი არხის ჩართვის ოპერატორი დავით ბეჟანიშვილი, ასევე დაშავდა აქციაზე.
„რადიო თავისუფლების“ რუსულენოვანი ტელევიზიის – Current Time ოპერატორს გიორგი ჭუმბურიძეს პროფესიულ საქმიანობაში შეუშალეს ხელი.
“რადიო თავისუფლების” ოპერატორებს, ილია რატიანსა და ზუკა ხიდაშელს – ხელი შეუშალეს პროფესიულ საქმიანობაში.

“საქართველოს ჟურნალისტური ეთიკის ქარტია” მედიის წარმომადგენლების მიმართ მიზანმიმართულ ძალადობაზე, პროფესიულ საქმიანობაში უკანონოდ ხელის შეშლის ათობით დოკუმენტირებულ ფაქტზე, პირად პასუხისმგებლობას შინაგან საქმეთა მინისტრს ვახტანგ გომელაურს აკისრებს და მას კანონის ფარგლებში დაბრუნებისკენ მოუწოდებს. ქარტია პროკურატურისა და სპეციალური საგამოძიებო სამსახურისგან სისხლის სამართლის დანაშაულის შემცველი მრავალი ფაქტის სწრაფ და მიუკერძოებელ გამოძიებას, საპოლიციო ძალების მოძალადე თანამშრომლების, ასევე, მათი ხელმძღვანელების კანონის მთელი სიმკაცრით დასჯას ითხოვს.

30 ნოემბრის საპროტესტო აქციის გაშუქებისას დააკავეს, დაშავდა და მუშაობაში შეეშალა ხელი მედიის 9 წარმომადგენელს

2024 წლის 30 ნოემბერს, პარლამენტის შენობასთან მიმდინარე მშვიდობიანი საპროტესტო აქციის დაშლისას დაშავდა სხვადასხვა მედიის 9 წარმომადგენელი. სამი დღის განმავლობაში, ჯამში, 52 ჟურნალისტი, ოპერატორი და ფოტოგრაფი დაშავდა და ხელი შეეშალა საქმიანობაში.

საჯაროდ გავრცელებული ინფორმაციის თანახმად:

აქციაზე დაშავდა პირველი არხის ფოტორეპორტიორი ირაკლი გედენიძე. საზოგადოებრივი მაუწყებლის მიერ გავრცელებული ინფორმაციით, ფოტოგრაფი “თბილისი მარიოტის“ მიმდებარე ტერიტორიაზე მუშაობდა, რა დროსაც დაზიანება მიიღო. არხის ინფორმაციით, მას, სავარაუდოდ, პიროტექნიკა მოხვდა ფეხის არეში.

“მთავარი არხის” მიერ გავრცელებულ ვიდეოში კი ჩანს, რომ ერთ-ერთი სამართალდამცველი აგრესიული და შეურაცხმყოფელი სიტყვებით მიმართავს ჟურნალისტ ქეთა ციცქიშვილს.

პირდაპირ ეთერში მუშაობისას დაშავდა “TV პირველის” ოპერატორი გიორგი შეწირული. ტელეკომპანიის ცნობით, ოპერატორს მძიმე დაზიანება აქვს ფეხის არეში. შეწირული სასწრაფო დახმარების ჯგუფმა ალადაშვილის სახელობის კლინიკაში გადაიყვანა.

ტელეკომპანია “ფორმულას” გავრცელებულ ვიდეოში ჩანს, რომ მათი გადამღები ჯგუფი მოჰყვა წყლის ჭავლში, რომელიც აქციის დასაშლელად იყო გამოყენებული.

აქციაზე დაშავდა ტელეკომპანია “ფორმულას” ოპერატორიც. ის, სავარაუდოდ, აქციის დასაშლელად გამოყენებული გაზის გაშვების შედეგად გახდა შეუძლოდ.

სპეცრაზმმა დააკავა „რადიო თავისუფლების“ პროდიუსერი ბექა ბერაძე. მედიის ცნობით, პროდიუსერი ნაცემია. ბექა ბერაძე საგარეჯოს დროებითი მოთავსების იზოლატორში გადაიყვანეს. იგი აქციის სიახლოვეს იმყოფებოდა, როდესაც პოლიციელების ალყაში აღმოჩნდა. ბექა ბერაძემ ადვოკატს განუცხადა, რომ სამართალდამცველებს უთხრა, ჟურნალისტი ვარო, თუმცა მაინც დააკავეს.

ონლაინგამოცემა On.ge-ს ინფორმაციით, აქციაზე დააკავეს ფოტოგრაფი ნიკოლოზ თაბუკაშვილი.

რუსთაველის გამზირზე სავარაუდოდ რეზინის ტყვიით დაშავდა საზოგადოებრივი მაუწყებლის ფოტოგრაფი მირიან მელაძე.

საპროტესტო აქციებზე 29 და 30 ნოემბერსაც დაშავდნენ მედიის წარმომადგენლები.

მშვიდობიანი აქციის ძალადობრივი დაშლისას სამართალდამცავებმა მედიის წარმომადგენლებს უკანონოდ ხელი შეუშალეს და ფიზიკურად გაუსწორდნენ

2024 წლის 19 ნოემბერს, თბილისში ილია ჭავჭავაძის გამზირზე მიმდინარე მშვიდობიანი აქციის დარბევის დროს პოლიციამ ფიზიკურად იძალადა და პროფესიული საქმიანობის განხორციელებაში უკანონოდ ხელი შეუშალა მედიის წარმომადგენლებს.

საჯაროდ გავრცელებული წყაროდან დგინდება, რომ:

პოლიციამ აშკარა, არაპროპორციული ძალის გამოყენებით, პროფესიული მოვალეობის შესრულებაში ხელი შეუშალა, ფიზიკურად გაუსწორდა და დააკავა “მთავარი არხის” ოპერატორი სერგი ბარამიძე. დაზიანებული ტელევიზიის ტექნიკაც.

ჟურნალისტურ საქმიანობაში ხელი შეუშალა OC Media-ს ჟურნალისტს მარიამ ნიკურაძეს, რომელიც სოციალურ ქსელში წერს: “აქტივისტებისგან გაწმენდის დროს ვიღებდი ვიდეოს. ერთმა მეორეს ანიშნა ჩემზე. მოვიდა, შემატრიალა, წამართვა ტელეფონი ცოტა ხნით, მითხრა რომ “შენიანები” იქით გარბიანო, ვეჩხუბე, ტელეფონი დამიბრუნა, ვიდეო დაპაუზდა და არ ჩაიწერა ამ ჯაჯგურში”.

ასევე, გადაღების საშუალება არ მისცა პოლიციამ “ნეტგაზეთის” კორესპონდენტს გივი ავალიანს, “პუბლიკის“ ჟურნალისტს მინდია გაბაძეს კი ფიზიკური შეურაცხყოფა მიაყენეს.

ტელეკომპანია “ფორმულას” ჟურნალისტმა გიორგი კვიჟინაძემ თქვა, რომ პოლიციელები მას და მის ოპერატორსაც უშლიდნენ ხელს გადაღებაში.

“ჟურნალისტური ეთიკის ქარტიამ” და “მედიაომბუდსმენმა” სამართალდამცველების მხრიდან ჟურნალისტებისთვის პროფესიული საქმიანობაში ხელის შეშლის შესახებ განცხადებები გაავრცელეს.

“აპრილის“ ჟურნალისტს ვახო ქარელს პოლიციამ ჟურნალისტურ საქმიანობაში ხელი შეუშალა

2024 წლის 13 ნოემბერს თბილისში მშვიდობიანი აქციის დროს, პოლიციამ მომიტინგეებს გზის გადაკეტვის საშუალება არ მისცა, რა დროსაც ძალა გამოიყენა. აქცია ცენტრალური საარჩევნო კომისიის მიმდებარედ მიმდინარეობდა და მსვლელობით გაგრძელდა. აღნიშნული აქციის გაშუქების დროს საინფორმაცი სააგენტო “აპრილის” ჟურნალისტს ვახო ქარელს, პოლიციამ ჟურნალისტური საქმიანობის პროცესში ხელი შეუშალა.

ვახო ქარელმა უკვე მიმართა სპეციალურ საგამოძიებო დეპარტამენტს საქმის გამოძიების მოთხოვნით.

IFJGlobal-ის ჟურნალისტი სტეფან გოსი საქართველოში არ შემოუშვეს

2024 წლის 26 ოქტომბერს IFJGlobal-ის ჟურნალისტი სტეფან გოსი საქართველოში არ შემოუშვეს. შვეიცარელი ჟურნალისტი საქართველოში საპარლამენტო არჩევნების გასაშუქებლად მოემგზავრებოდა. გოსმა აღნიშნულის შესახებ პოსტი სოციალურ ქსელ X-ზე გამოაქვეყნა, სადაც ქვეყანაში არ შემოშვების ოფიციალურ მიზეზის შესახებ ვკითხულობთ შემდეგს: „არ აკმაყოფილებს საქართველოს კანონმდებლობით განსაზღვრულ სხვა მოთხოვნებს“.

OC Media ინფორმაციით, გოსი 2022 წლის აპრილიდან უკრაინაში მიმდინარე ომს აშუქებს.

ქართულ-სომხური გამოცემის რედაქტორს საქართველოში შესვლის უფლება არ მისცეს

2024 წლის 17 სექტემბერს, საქართველოში შესვლის უფლება არ მისცეს და აეროპორტიდან სტამბულში გააბრუნეს ქართულ-სომხური გამოცემის, Aliq Media-ს დამფუძნებელი და მთავარი რედაქტორი არსენ ხარატიანი. ხარატიანი თბილისში ლუქსემბურგიდან ბრუნდებოდა და მომდევნო დღეს სომხეთში უნდა წასულიყო. უარის მიზეზი ხარატიანისთვის არ აუხსნიათ.

„ალიქ მედია“ არის საქართველოში მოქმედი სომხურენოვანი მედია პლატფორმა, რომელიც 2015 წლიდან ქვეყანაში განვითარებულ პოლიტიკურ, ეკონომიკურ, სოციალურ და საზოგადოებრივ მოვლენებს სომხურ ენაზე აშუქებს. გამოცემა გამოირჩევა საქართველოს ხელისუფლებისადმი კრიტიკული სტატიებით.

არსენ ხარატიანი საქართველოში რამდენიმე წლის განმავლობაში ცხოვრობდა. იგი ფიქრობს, რომ მიზეზი, რის გამოც ის ქვეყანაში არ შეუშვეს, პოლიტიკურია.

„ეჭვი არ მეპარება, რომ ეს უარი, ანუ დეპორტაცია, პოლიტიკურია, რაც საბოლოო ჯამში ნიშნავს იმას, რომ საქართველოს ამჟამინდელ ხელისუფლებას ან ეშინია ჩემნაირი ადამიანების, ან ჰყავთ პატრონები მოსკოვიდან ან ბაქოდან, რომლებიც ეუბნებიან, რომ „გაწმინდონ სივრცე“ არჩევნებამდე“, – დაწერა ხარატიანმა ფეისბუქის გვერდზე.

არსენ ხარატიანი თბილისის საერთაშორისო აეროპორტში ამ შემთხვევამდე რამდენიმე დღით ადრე, 11 სექტემბერსაც შეაყოვნეს. მაშინ უარის თქმის საფუძველში მითითებული იყო, რომ “არ აკმაყოფილებს საქართველოს კანონმდებლობით განსაზღვრულ სხვა მოთხოვნებს”.

“მედიის ადვოკატირების კოალიციაში” საგანგაშოდ მიიჩნევენ ჟურნალისტების ქვეყანაში არ შეშვებას:

“ეს შემაშფოთებელი ტენდენცია, რომელიც მხოლოდ ამ კვირაში ორჯერ დაფიქსირდა, ხაზს უსვამს მედიის თავისუფლების შეზღუდვისა და დამოუკიდებელი ჟურნალისტიკის საქმიანობის შეფერხების შემაშფოთებელ მდგომარეობას ქვეყანაში”, – ნათქვამია ორგანიზაციის განცხადებაში.

შეგახსენებთ, წინა დღეს, 16 სექტემბერს, საქართველოში შესვლის უფლება არ მისცეს ბელარუს ჟურნალისტსა და აქტივისტს, ანდრეი მიალეშკას.

ბელარუსი ჟურნალისტი და აქტივისტი საქართველოში არ შეუშვეს

2024 წლის 16 სექტემბერს, ბელარუს ჟურნალისტსა და აქტივისტს, ანდრეი მიალეშკას, საქართველოში შესვლის უფლება არ მისცეს. ანდრეი მიალეშკა საქართველოში, კერძოდ, ბათუმში სამი წელია, ოჯახთან ერთად ცხოვრობს. იგი ქვეყანაში ქალიშვილთან ერთად ვარშავიდან ბრუნდებოდა და უკანვე, ვარშავაში გააბრუნეს.

“რადიო თავისუფლების” ბელარუსულ სამსახურთან ჟურნალისტი ჰყვება, რომ მას აეროპორტში პასპორტი ჩამოართვეს, ნახევარსაათიანი ლოდინის შემდეგ ცალკე ოთახში გაიყვანეს, შემდეგ კი მისცეს “რაღაც ფურცელი”, რომელზეც ეწერა, რომ მას ქვეყანაში შესვლაზე უარი ეთქვა.

მიზეზი, თუ რატომ არ შემოუშვეს ბელარუსი ჟურნალისტი საქართველოს ტერიტორიაზე, უცნობია. დოკუმენტში, რომელიც მიალეშკას აეროპორტში გადასცეს, დაკონკრეტების გარეშე, “სხვა მიზეზებია” მითითებული.

იმავე დღეს, ვარშავის “რეისის” ლოდინში, ბელარუს ჟურნალისტს ქუთაისის აეროპორტში, მცირეწლოვან ქალიშვილთან ერთად, რამდენიმე საათი შეუსაბამო პირობებში მოუხდა ლოდინი. ჟურნალისტმა ამის თაობაზე საქართველოს სახალხო დამცველს მიმართა.

როგორც “რადიო თავისუფლების” ბელარუსული სამსახური წერს, ანდრეი მიალეშკა საქართველოში 2021 წელს, მის ქვეყანაში დაწყებულ პოლიტიკურ დევნას გამოექცა. მისი მეუღლე ბათუმში “საერთაშორისო განათლების ცენტრშია” დასაქმებული, ხოლო შვილები ბელარუსულ-უკრაინულ სკოლაში ონლაინ-რეჟიმში სწავლობენ.

მედიის ადვოკატირების კოალიცია გმობს უცხოელი ჟურნალისტებისთვის საქართველოში შემოსვლის უკანონო და გაუმართლებელი აკრძალვის შემთხვევებს.

“მმართველი პარტიის მუდმივი მცდელობა, ხელი შეუშალოს ჟურნალისტების ქვეყანაში შესვლას, ეწინააღმდეგება დემოკრატიულ ფასეულობებს და მნიშვნელოვანი შემაფერხებელია ანგარიშვალდებულებისთვის, რომელიც აუცილებელია ჯანსაღი საზოგადოებისთვის”, – ვკითხულობთ კოალიციის განცხადებაში.