ირიბი ზეწოლა („chilling effect")

სუს-მა უფლებადამცველი უჩა ნანუაშვილი გამოკითხვაზე დაიბარა

უფლებადამცველი უჩა ნანუაშვილი სოციალურ ქსელში წერს, რომ სახელმწიფო უსაფრთხოების სამსახურში გამოკითხვაზე დაიბარეს. მისი თქმით, დაბარება ეუთოს “მოსკოვის მექანიზმის” ფარგლებში მოქმედ ექსპერტთან კომუნიკაციას უკავშირდება.

ნანუაშვილის განცხადებით, სუს-ის გამომძიებელი მას ტელეეთერში გაკეთებული განცხადების შემდეგ დაუკავშირდა. აღნიშნულ კონტექსტში „POSTV ანალიტიკამ“ სოციალურ ქსელში გაავრცელა ვიდეო, რომელშიც საუბარია, რომ მოსკოვის მექანიზმის ფარგლებში მომზადებულ ანგარიშზე კოორდინაციას თითქოს უჩა ნანუაშვილი უწევდა. თავად ნანუაშვილი აღნიშნავს, რომ სწორედ ეს გარემოება გახდა მისი გამოკითხვაზე დაბარების საფუძველი.

აღნიშნულ საკითხზე ყურადღება გამახვილდა 16 მარტს გამართულ ირაკლი კობახიძის ბრიფინგზეც, სადაც „POSTV“-ის მიერ გავრცელებული ვიდეოს კონტექსტში პრო-სამთავრობო არხის, „რუსთავი 2“-ის ჟურნალისტმა ირაკლი კობახიძეს კითხვა დაუსვა უჩა ნანუაშვილის შესაძლო როლზე და დაინტერესდა, რამდენად საყურადღებოდ მიიჩნევდა ამ ინფორმაციას. კობახიძემ პასუხად განაცხადა, რომ „აგენტურა რომ იქნებოდა კოორდინაციაში, ეს არ არის გასაკვირი და ეს ჩანს იმ ტექსტიდანაც, რომელიც გამოქვეყნდა, რა თქმა უნდა, იქნებოდა სრული კოორდინაცია ადგილობრივ აგენტურასთან“. აღნიშნული მოვლენების ფონზე, მომდევნო დღეს უჩა ნანუაშვილი სუს-ში გამოკითხვაზე დაიბარეს.

უჩა ნანუაშვილი 18 მარტს მაგისტრატი მოსამართლის წინაშე დაიკითხა. ნანუაშვილის განცხადებით, მან ეუთოს ექსპერტს მიაწოდა ინფორმაცია ქვეყანაში არსებული ვითარებისა და უფლებადაცვითი ანგარიშების შესახებ, რაც, მისი შეფასებით, წარმოადგენს სამოქალაქო საზოგადოების დაშინების მცდელობას, რათა მომავალში შეზღუდოს საერთაშორისო ორგანიზაციებთან კომუნიკაცია.

მისი თქმით, სახელმწიფოს თავად ჰქონდა ვალდებულება ეთანამშრომლა ექსპერტთან, ხოლო “მოსკოვის მექანიზმის” მე-6 პუნქტის მიხედვით, მონაწილე სახელმწიფოები უნდა იკავებდნენ თავს ნებისმიერი ქმედებისგან იმ პირების მიმართ, რომლებიც ექსპერტთან თანამშრომლობენ – მოთხოვნა, რომელიც, ნანუაშვილის შეფასებით, დარღვეულია.საქმე უკავშირდება ეუთოს მოსკოვის მექანიზმის ფარგლებში მომზადებულ ანგარიშს, რომელიც 12 მარტს გამოქვეყნდა. ანგარიში დეტალურად აღწერს საქართველოში 2024 წლიდან არსებულ ვითარებას, მათ შორის დემოკრატიულ უკუსვლას, ადამიანის უფლებების გაუარესებას, საპროტესტო აქციების მონაწილეთა და ოპოზიციის მიმართ განხორციელებულ დევნასა და რეპრესიებს. “მოსკოვის მექანიზმი” ეუთოს წევრმა 24-მა ქვეყანამ 29 იანვარს აამოქმედა, რის საფუძველზეც შეიქმნა დამოუკიდებელი ფაქტების დამდგენი მისია, რომელმაც ანგარიში შეზღუდულ ვადაში მოამზადა.

პარლამენტთან აქციის მონაწილეების ჩხრეკა და შემოწმება გრძელდება

უკვე მეორე დღეა, პარლამენტის მიმდებარე ტერიტორიაზე პოლიცია მოქალაქეებს ჩხრეკს და ამოწმებს. სამართალდამცავების განმარტებით, აღნიშნული მოქმედებები უსაფრთხოების უზრუნველყოფისა და შეკრებისა და “მანიფესტაციების შესახებ” კანონის საფუძველზე ხორციელდება. მათი თქმით, იმ შემთხვევაში, თუ მოქალაქე ზედაპირულ დათვალიერებაზე უარს განაცხადებს, მას პარლამენტის მიმდებარე ტერიტორიაზე, საპროტესტო აქციაზე მისვლის უფლებას არ მისცემენ.

მოქალაქეების ინფორმაციით, შემოწმება ოქმის შედგენის გარეშე, ზეპირად ტარდება. ერთ-ერთმა მოქალაქემ მოითხოვა შესაბამისი ოქმის შედგენა, თუმცა სამართალდამცავებმა განუმარტეს, რომ ასეთ შემთხვევაში მას აქციის ტერიტორიაზე შესვლის შესაძლებლობა არ ექნებოდა.

პარლამენტთან საპროტესტო აქციის მონაწილეებს ჩხრეკენ

12 მარტს, რუსთაველის გამზირზე, პარლამენტის მიმდებარე ტერიტორიაზე საპოლიციო ძალების განსაკუთრებული მობილიზებაა და სამართალდამცავები საპროტესტო აქციის მონაწილეებს ამოწმებენ.

ფოტოგრაფი გიორგი მოსიაშვილი სოციალურ ქსელში წერს, რომ პოლიცია ჩხრეკს ყველა იმ პირს, ვისაც ჩანთა აქვს. პროტესტის მონაწილეები აღნიშნავენ, რომ სამართალდამცავები მათ ყოველგვარი კონკრეტული საფუძვლისა და განმარტების გარეშე ამოწმებენ და ჩანთებში კარვებს ეძებენ, რათა აქციის მონაწილეებმა პარლამენტის მიმდებარე ტერიტორიაზე მათი შეტანა ვერ შეძლონ.

ირანის გავლენებზე გაკეთებული საჯარო განცხადებებისა და გამოქვეყნებული კვლევების შემდეგ სუს-მა რამდენიმე პირი გამოკითხვაზე დაიბარა

საქართველოში ირანის შესაძლო გავლენებზე გაკეთებული საჯარო განცხადებებისა და ორი კრიტიკული კვლევის გამოქვეყნების შემდეგ, სახელმწიფო უსაფრთხოების სამსახურმა (სუსი) სისხლის სამართლის კოდექსის 319-ე მუხლით დაწყებული გამოძიების ფარგლებში რამდენიმე პირი გამოკითხვაზე დაიბარა. საქმე ეხება უცხო ქვეყნის, უცხოეთის ორგანიზაციის ან უცხოეთის კონტროლს დაქვემდებარებული ორგანიზაციისთვის მტრულ საქმიანობაში დახმარების შესაძლო ნიშნებს.

გამოძიების ფარგლებში 7 მარტს მაგისტრატი მოსამართლის წინაშე გამოიკითხა ოპოზიციონერი პოლიტიკოსი და ისტორიკოსი გუბაზ სანიკიძე. 8 მარტს თბილისის საქალაქო სასამართლოში გამოიკითხნენ თავდაცვის ყოფილი მინისტრი და „სამოქალაქო იდეის“ ხელმძღვანელი თინა ხიდაშელი, ასევე „ჰადსონის ინსტიტუტის“ კვლევის თანაავტორი და საბჭოთა წარსულის კვლევის ლაბორატორიის პროექტების მენეჯერი გიორგი კანდელაკი. ამავე პერიოდში გამოკითხვაზე დაიბარეს გენერალური შტაბის ყოფილი უფროსი, გენერალ-მაიორი ვახტანგ კაპანაძე, რომელიც სუსში მოწმის სტატუსით გამოიკითხა. გამოძიების ფარგლებში დაბარებულია ასევე ყოფილი პარლამენტარი გივი თარგამაძე, რომელმაც განაცხადა, რომ საქართველოში არ იმყოფება და კითხვებს წერილობით ან დაბრუნების შემდეგ უპასუხებს.

გამოკითხვები უკავშირდებოდა ირანთან დაკავშირებულ ტელევიზიებში გაკეთებულ საჯარო განცხადებებსა და კვლევებს. 3 მარტს „ჰადსონის ინსტიტუტმა“ გამოაქვეყნა კვლევა, რომლის თანახმადაც, ირანის ისლამური რესპუბლიკა საქართველოში „გეგმაზომიერად და ორგანიზებულად“ აფართოებს გავლენას. კვლევის ავტორები ყურადღებას ამახვილებენ სხვადასხვა მიმართულებაზე, მათ შორის ქვემო ქართლში არსებულ პროცესებზე და გარდაბანში მოქმედ სასწავლო დაწესებულებაზე, რომელსაც ავტორიზაცია არ აქვს. ირანული გავლენების საკითხს ეხება „სამოქალაქო იდეის“ კვლევაც, სადაც საუბარია საქართველოში ირანული ნავთობისა და ნავთობპროდუქტების იმპორტსა და ამ საქმიანობაში ჩართული კომპანიების შესაძლო კავშირებზე.

კვლევებისა და საჯარო განცხადებების შემდეგ, 5 და 6 მარტს თბილისის მერმა და „ქართული ოცნების“ გენერალურმა მდივანმა კახა კალაძემ თინა ხიდაშელი და გიორგი კანდელაკი მკვეთრად გააკრიტიკა. მან მათი განცხადებები და კვლევები „ქვეყნის წინააღმდეგ მტრულ საქმიანობად“ შეაფასა და თქვა, რომ „შესაბამისი უწყებები უნდა დაინტერესდნენ“. კალაძის თქმით, მსგავსი განცხადებები აზიანებს საქართველოსა და აშშ-ის ურთიერთობებს.

საზოგადოებრივმა მაუწყებელმა კახა მელიქიძე სამსახურიდან გაათავისუფლა

2025 წლის 26 დეკემბერს, საზოგადოებრივმა მაუწყებელმა სამსახურიდან გაათავისუფლა რეჟისორი კახა მელიქიძე. კახა მელიქიძე საზოგადოებრივი მაუწყებლის პირველ არხზე 1998 წლიდან მუშაობდა.

“საზოგადოებრივი მაუწყებლის მცველების” ინფორმაციით, კახა მელიქიძის საზოგადოებრივი მაუწყებლის ხელმძღვანელობის მიერ შევიწროებამას შემდეგ დაიწყო, რაც რეჟისორმა საჯაროდ ამხილა მაუწყებლის ხელმძღვანელობა, რომაიძულებდნენ ფეხბურთი ეროვნული ნაკრების თამაშების დროს ხშირად ეჩვენებინა “ქართული ოცნების” თანამდებობის პირები, მათ შორის ირაკლი კობახიძე.

2025 წელს საზოგადოებრივმა მაუწყებელმა კრიტიკული პოზიციის გამო, სამსახურიდან გაათავისუფლა “რეალური სივრცის” წამყვანი, ჟურნალისტი ნინო ზაუტაშვილი და გადაცემის სხვა თანამშრომლები. აგრეთვე, საინფორმაციო გამოშვების “მოამბის” წამყვანი ვასილ ივანოვ-ჩიქოვანი. 30 ივლისს, ასევე დახურეს რუბრიკა “ადამიანები ისტორიიდან” და გადაცემა “ამ შაბათ-კვირას”. საქართველოს საზოგადოებრივი მაუწყებლის პირველმა არხმა შრომითი კონტრაქტი არ გაუგრძელა რადიო გადაცემების – „შუადღის პიკისა“ და „საღამოს პიკის“ პროდიუსერის ასისტენტს, ანა მეტრეველს, – თანამშრომელს, რომელიც არხის სარედაქციო პოლიტიკას აკრიტიკებდა.

საზოგადოებრივმა მაუწყებელმა გაათავისუფლა “რეალური სივრცის” კიდევ ერთი თანამშრომელი

”საზოგადოებრივი მაუწყებლის მცველების” (GPB Guardians) ინფორმაციით, საზოგადოებრივი მაუწყებლის “პირველმა არხმა” სამსახურიდან გაათავისუფლა “რეალური სივრცის” კიდევ ერთი თანამშრომელი მერი შიხაშვილი. GPB Guardians-ი წერს, რომ შიხიაშვილი დეკრეტული შვებულებიდან დაბრუნებისთანავე გაათავისუფლეს.

“საზოგადოებრივი მაუწყებლი” პრო-ევროპული აქციების მიმდინარეობის პარალელურად, მენეჯმენტის მიმართ კრიტიკულად განწყობილ თანამშრომლებს სამსახურიდან ათავისუფლებს მათ ნაწილს სხვადასხვა სახის დისციპლინური სანქციაც დაეკისრა.

2025 წელს, “საზოგადოებრივმა მაუწყებელმა”, კრიტიკული პოზიციის გამოხატვის გამო, არაერთ თანამშრომელს დააკისრა დისციპლინური სანქცია ან გაანთავისუფლა სამსახურიდან. მათ შორის არიან გადაცემა “რეალური სივრცის” წამყვანი და ავტორი, ნინო ზაუტაშვილი და გადაცემა “მოამბის” წამყვანი ვასილ ივანოვ-ჩიქოვანი.

ორი პროექტის შემდეგ, საზოგადოებრივმა მაუწყებელმა ერთი რუბრიკაც დახურა

2025 წლის 30 ივლისს ცნობილი გახდა, რომ შემოდგომის სეზონიდან საზოგადოებრივი მაუწყებლის პირველ არხზე აღარ გავა აღარც რუბრიკა “ადამიანები ისტორიიდან”. რუბრიკის წამყვანმა, დიმიტრი სილაქაძემ, უარი თქვა შეთავაზებაზე გადასულიყო სხვა გადაცემაში და არხის დატოვება გადაწყვიტა. დიმიტრი სილაქაძე ქვეყანაში მიმდინარე პროევროპული პროტესტის მონაწილე და მხარდამჭერია და მათ შორისაა, ვინც აკრიტიკებს საზოგადოებრივი მაუწყებლის სარედაქციო პოლიტიკას.

„ეს ჩემი ბოლო გადაცემა იყო საზოგადოებრივ მაუწყებელზე… ვუსურვო ჩვენს მსმენელს წარმატებები. ასევე, ჩვენს ქვეყანას გამთლიანება, გაძლიერება, სამართლიანი ქვეყნის ჩამოყალიბება და ყველაფერი კარგი, რაც შეიძლება ადამიანმა საკუთარ ქვეყანას უსურვო“, – ამ სიტყვებით დაემშვიდობა წამყვანი მაყურებელს სეზონის ბოლო, 29 ივლისის გადაცემაში.

მისი რუბრიკა „ადამიანები ისტორიიდან“ ჯერ გადაცემა „ამ შაბათ-კვირას“ ეთერით გადაიცემოდა, 2024 წლიდან კი საზოგადოებრივი მაუწყებლის რადიოში, გადაცემა „შუადღის პიკის საათში“ გადაინაცვლა.

ბოლო ერთ კვირაში ეს უკვე მესამე შემთხვევაა, როდესაც მენეჯმენტი აჩერებს მიმდინარე პროექტსა თუ რუბრიკას: 1-ლი აგვისტოდან ეთერში აღარ გავა გადაცემა “ამ შაბათ-კვირას” და შეწყდება ჟურნალისტ ია ანთაძის საავტორო პროექტიც – სტატისების სერია სახელწოდებით – “საინტერესო ადამიანები”. “ამ შაბათ-კვირის” ყველა სხვა წევრმაც (7-მა ჟურნალისტმა) და ია ანთაძემაც არხი დატოვეს. გადაცემის გუნდმა ასევე უარი თქვა შეთავაზებაზე გადანაწილებულიყვნენ ტელევიზიისა და რადიოს სხვადასხვა გადაცემებში.უფრო ადრე, მაისში საზოგადოებრივმა მაუწყებელმა დახურა ყველაზე ცნობადი, სოციალური გადაცემა “რეალური სივრცე” და მის წამყვანთან ნინო ზაუტაშვილთან შეწყვიტა შრომითი ხელშეკრულება.

არხის სარედაქციო პოლიტიკის მიმართ კრიტიკულად განწყობილი თანამშრომლების სამსახურიდან გათავისუფლება ან მათთვის დისციპინური სანქციების დაკისრება საზოგადოებრივ მაუწყებელზე პროევროპული პროტესტის პარალელურად დაიწყო. ამ დრომდე საზოგადოებრივი მაუწყებლიდან დისციპლინარული წარმოების საშუალებით სამსახურიდან დაითხოვეს ან დისციპლინარული სანქცია დააკისრეს 20-ზე მეტ თანამშრომელს.

საზოგადოებრივი მაუწყებლის ხელმძღვანელობამ კიდევ ორი პროექტი დახურა და სამსახურიდან გაათავისუფლა შვიდი ჟურნალისტი

2025 წლის 25 ივლისს, ცნობილი გახდა, რომ საზოგადოებრივი მაუწყებლის პირველი არხი ხურავს გადაცემას “ამ შაბათ-კვირას“. არხის მენეჯმენტმა გადაცემის გუნდს – პროდუსერებს, ჟურნალისტებსა და გადაცემის წამყვანებს სხვა გადაცემებში გადასვლა შესთავაზა. წინააღმდეგ შემთხვევაში კი, აცნობა, რომ მათთან თანამშრომლობა შეწყდებოდა.

ეს თანამშრომლები არიან: გადაცემის აღმასრულებელი პროდიუსერები -თამარ ჭინჭარაული და მარიამ ფირცხალავა , პროდუსერი ნია ბარაბაძე, ჟურნალისტი ანა აბაკელია და გადაცემის წამყვანები – ლიკა ევგენიძე და გიორგი შარვაშიძე.

მაუწყებლის დირექტორის, თინა ბერძენიშვილის მიერ გადაცემის გუნდის წევრებისთვის გაგზავნილ წერილში ნათქვამია, რომ გადაცემას საპროექტო ვადა 1 აგვისტოს ეწურება და მისი გაგრძელება აღარ იგეგმება, რადგან მაუწყებელს აღარ აქვს ამ გადაცემის საჭიროება: „ახალი სატელევიზიო სეზონიდან, განახლებული საეთერო ბადის შუადღის ზოლი დაეთმობა ახალ პროექტს, რომელიც კვირის ყველა დღეს მოიცავს. შესაბამისად ცალკე და დამატებით მხოლოდ შაბათ-კვირისთვის გადაცემის საჭიროება აღარ იკვეთება“.

სხვა გადაცემებში გადასვლაზე ექვსივე თანამშრომელმა უარი თქვა. შესაბამისად, 1 აგვისტოდან ისინი სამსახურიდან გათავისუფლდნენ. ექვსივე ჟურნალისტი „საზოგადოებრივი მაუწყბლის მცველებში“ არიან და უკვე რვა თვეა მაუწყებლის მიკერძოებულ სარედაქციო პოლიტიკას აკრიტიკებენ.

ამავე დღეს ცნობილი გახდა, რომ პირველმა არხმა დახურა ჟურნალისტ ია ანთაძის პროექტიც „საინტერესო ადამიანები“. „რა თქმა უნდა, ეს გადაწყვეტილება მოულოდნელი არ ყოფილა, რადგან მას ჩემი არჩევანის, ჩემი პასუხისმგებლობის ბუნებრივ შედეგად აღვიქვამ“, – დაწერა ია ანთაძემ სოციალურ ქსელში.

არხის სარედაქციო პოლიტიკის მიმართ კრიტიკულად განწყობილი თანამშრომლების სამსახურიდან გათავისუფლება ან მათთვის დისციპინური სანქციების დაკისრება საზოგადოებრივ მაუწყებელზე პროევროპული პროტესტის პარალელურად დაიწყო. ამ დრომდე საზოგადოებრივი მაუწყებლიდან დისციპლინარული წარმოების საშუალებით სამსახურიდან დაითხოვეს, ან დისციპლინარული სანქცია დააკისრეს 13 თანამშრომელს.

საზოგადოებრივი მაუწყებლიდან კრიტიკული ჟურნალისტები – ვასილ ივანოვ-ჩიქოვანი და ნინო ზაუტაშვილი გაათავისუფლეს

2025 წლის 11 აპრილს, საქართველოს საზოგადოებრივი მაუწყებლის პირველი არხიდან გაათავისუფლეს წამყვანი სახეები, ჟურნალისტები: ვასილ ივანოვ-ჩიქოვანი და ნინო ზაუტაშვილი. გათავისუფლების საფუძვლად ჟურნალისტებს დისციპლინური მოკვლევა დაუსახელეს.

“მოკვლევის დოკუმენტის მიხედვით, დღეს დირექტორთა საბჭომ იმსჯელა და მიღო გადაწყვეტილება, რომ მე გავეთავისუფლებინე სამასახურიდან”, – ამბობს ივანოვ-ჩიქოვანი.

“დისციპლინური მოკვლევა ახსენეს, რის საფუძველზეც გამიშვეს სამსახურიდან, ოღონდ დისციპლინური მოკვლევის შედეგები ჩემთვის არავის არ გაუცნია”, – ამბობს ნინო ზაუტაშვილი.

ორივე ჟურნალისტი ბოლო რამდენიმე თვეა აკრიტიკებს არხის “ქართული ოცნების” მიმართ მიკერძოებულ სარედაქციო პოლიტიკას. ასევე, ორივე მათგანი ჩართულია მოძრაობაში “საზოგადოებრივი მაუწყებლის მცველები”, რომელიც აკრიტიკებს მაუწყებლის მენეჯმენტის გადაწყვეტილებებსა და სარედაქციო პოლიტიკას და საუბრობს პოლიტიკურ გავლენებზე მაუწყებელში.

გათავისუფლებული ჟურნალისტები აკრიტიკებდნენ არხის სამეურვეო საბჭოსაც, რომლის ერთ-ერთ ბოლო სხდომაზე თავმჯდომარემ თქვა, რომ პროკურატურა მათი საქმიანობით უნდა დაინტერესდეს. პარალელურად “ქართული ოცნების” მიმართ ლოიალურმა მედიებმა ჟურნალისტების მადისკრედიტირებელი ინფორმაცია გაავრცელეს, თითქოს ისინი “უკანონო შემოსავლების” მიღებაში არიან შემჩნეული.

ვასილ ივანოვ-ჩიქოვანი საინფორმაციო გამოშვება “მოამბის” წამყვანი იყო. ნინო ზაუტაშვილს კი ჰქონდა საავტორო გადაცემა “რეალური სივრცე”. 2025 წლის 4 თებერვლიდან, ვასილ ივანოვ-ჩიქოვანს 18:00 საათიანი “მოამბე” აღარ მიჰყავდა. ამ გადაწყვეტილების მიზეზად მას უთხრეს, რომ პროდუსერს აღარ სურდა მასთან მუშაობა. რაც შეეხება ნინო ზაუტაშვილის გადაცემას “რეალური სივრცე”, რომელიც ფოკუსირებული იყო სოციალურ თემებზე და გამოირჩეოდა “ქართული ოცნების” მიმართ კრიტიკული პოზიციით, ბოლო პერიოდში ის მხოლოდ რადიოეთერით გადიოდა, მიზეზად ჟურნალისტს ტელევიზიის ახალ შენობაში გადასვლის სამუშაოებსა და შესაბამისი სტუდიის არარსებობას უსახელებდნენ.

საზოგადოებრივმა მაუწყებელმა სამსახურიდან გაათავისუფლა თანამშრომელი, რომელიც არხის პოლიტიკას აკრიტიკებდა

საქართველოს საზოგადოებრივი მაუწყებლის პირველმა არხმა შრომითი კონტრაქტი არ გაუგრძელა რადიო გადაცემების – „შუადღის პიკისა“ და „საღამოს პიკის“ პროდიუსერის ასისტენტს, ანა მეტრეველს, – თანამშრომელს, რომელიც არხის სარედაქციო პოლიტიკას აკრიტიკებდა.

ანა მეტრეველი „პუბლიკასთან“ საუბარში ამბობს, რომ მენეჯმენტმა გადაწყვეტილება მთავარ პროდიუსერთან შეთანხმების გარეშე მიიღო. ის ამ გადაწყვეტილებას მის ბოლოდროინდელ აქტიურობას უკავშირებს. ანა მეტრეველი არის ორგანიზაცია “საქართველოს საზოგადოებრივი მაუწყებლის მცველების” წევრი. ეს არის საზოგადოებრივი მაუწყებლის თანამშრომელთა გაერთიანება, რომელიც საზოგადოებრივი მაუწყებლის პრინციპების დასაცავად იბრძვის.

ხელშეკრულების არგაგრძელების ოფიციალურ მიზეზად ანა მეტრეველს ხარჯთა ოპტიმიზაცია დაუსახელეს. ანამ გაასაჯაროა მისი ხელფასი, რომელიც ხელზე 490 ლარს შეადგენდა.

ბოლო პერიოდში, ეს საზოგადოებრივ მაუწყებელში მომხდარი უკვე მეორე მსგავსი შემთხვევაა. შეგახსენებთ, 2025 წლის 4 თებერვალს, საზოგადოებრივმა მაუწყებელმა, 18 საათიანი მოამბის წამყვანს, ჟურნალისტს ვასილ ივანოვ-ჩიქოვანს, დროებით შეუჩერა გადაცემის წაყვანის უფლება. ჟურნალისტი ასევე აკრიტიკებდა არხის სარედაქციო პოლიტიკას.