დისკრედიტაცია

„ქართული ოცნების“ მხარდამჭერი რეჟისორი გოგა ხაინდარავა სამართალდამცავებს მიმართავს დაინტერესდნენ ტელეკომპანია “ფორმულას” ეთერში მის შესახებ გასული სიუჟეტით

„ქართული ოცნების“ მხარდამჭერი რეჟისორი გოგა ხაინდარავა საქართველოს პროკურატურას, სახელმწიფო უსაფრთხოების სამსახურსა და საქართველოს შინაგან საქმეთა სამინისტროს მიმართავს, დაინტერესდნენ ტელეკომპანია „ფორმულას“ ეთერში მის შესახებ გასული სიუჟეტით.

საუბარია მასალაზე, რომელიც „ფორმულას“ ეთერში 2026 წლის 17 იანვარს გავიდა. მასში ნათქვამია, რომ 2016-2017 წლებში გოგა ხაინდრავას, სახელმწიფო უსაფრთხოების სამსახურთან შეთანხმებით, გარკვეული თანხის სანაცვლოდ, საქართველოში ინდოეთისა და პაკისტანის მოქალაქეები შემოჰყავდა.

„სიუჟეტში გაჟღერებული იყო, რომ მე, სუს-თან შეთანხმებით, წინასწარი განზრახვით ჩავიდინე უმძიმესი დანაშაული. ეს ჩემთვის სახელმწიფოს ღალატის ტოლფასი დანაშაულია. ქვეყნის ღალატია, როცა ქრთამის სანაცვლოდ ქვეყნის ტერიტორიაზე არალეგალურად შემოგყავს პოტენციური დამნაშავეები. ამიტომ, გარდა იმისა, რომ სარჩელი შევიტანე სასამართლოში, მივმართავ პროკურატურას და ვთხოვ, ჩაატაროს გამოძიება საკითხზე, რათა დადგენილი იყოს, ვინ არის დამნაშავე, მე, სუს-ი, საზღვრის დაცვის პოლიცია თუ შპს „სიცრუის ფორმულა“,- განაცხადა ხაინდრავამ პრესკონფერენციაზე.

მიმდინარე წლის იანვარში, ამ სიუჟეტის გასვლის შემდეგ, გოგა ხაინდრავამ დაანონსა, რომ ის „ფორმულას“ სასამართლოს მიმართავდა. .აღსანიშნავია, რომ სიუჟეტის ეთერში გასვლის შემდეგ, გადაცემის წამყვანმა დავით ქაშიაშვილმა მუქარის შემცველი შეტყობინება მიიღო მისთვის უცნობი პირისგან. მუქარის ავტორი ჟურნალისტს სწერდა: “პატარა ქალაქია თბილისი…. თავს გაუფრთხილდი ჯიგარო”. დავით ქაშიაშვილმა აღნიშნულის შესახებ თავად განაცხადა გადაცემის პირდაპირ ეთერში და ამ გზით საქმის კურსში ჩააყენა საქართველოს შინაგან საქმეთა სამინისტრო.

პროსამთავრობო ტელევიზია „რუსთავი 2“ საგამოძიებო სტუდია „აი ფაქტის“ დისკრედიტაციას ახდენს

პროსამთავრობო ტელევიზია „რუსთავი 2“-მა, საგამოძიებო სტუდია „აი ფაქტის“ შესახებ დეზინფორმაციული სიუჟეტი მოამზადა, რომელშიც მედიასაშუალება უცხოური ქვეყნების სპეცსამსახურებთან თანამშრომლობასა და საქართველოს ინტერესების საწინააღმდეგოდ მოქმედებაში დაადანაშაულა.

“რუსთავი 2-ის” სიუჟეტი სახელწოდებით “საინფორმაციო იერიში ქვეყნის წინააღმდეგ”, ბრიტანეთის მთავრობის მიერ პროსამთავრობო ტელევიზიების დასანქცირებას ეხებოდა. სიუჟეტის მთავარი ნარატივი იყო, რომ „უცხო ძალებისთვის საქართველოში მთავარი იარაღი ადგილობრივი არასამთავრობო ორგანიზაციები და მედიები არიან, რომლებიც ქვეყნის ინტერესების წინააღმდეგ უცხო ქვეყნის სპეცსამსახურებთან წინასწარ შემუშავებული სქემით მოქმედებენ“. ამის მაგალითად „რუსთავი 2-ს“ მოჰყავს „აი ფაქტის“ საგამოძიებო მასალა ყულევის ტერმინალში რუსული ნავთობით დატვირთლი ტანკერების შემოსვლაზე.

„ერთ-ერთი იარაღი უცხო ძალების ხელში მედიაპლატფორმა „აი ფაქტიც“ გახდა, რომელმაც წინასწარ დაწერა, რომ ლონდონი ყულევის ტერმინალში შემავალ ტანკერებს დაასანქცირებდა. ინფორმაცია ჯერ „აი ფაქტმა“ გამოაქვეყნა, შემდეგ კი გაერთიანებულმა სამეფომ ორი გემი სანქცირებულთა სიაში შეიყვანა“, – ამბობს წამყვანი და შემდეგ აზუსტებს, რომ ეს არის სქემის ნაწილი. „უცხოური სპეცსამსახურები კარგად იყენებენ აპრობირებულ მეთოდებს და ანალიტიკურ ორგანიზაციებში ქართველების აქტოვობებსაც სწორედ სხვა ქვეყნის დაზვერვა განსაზღვრავს“, – ამბობს ერთ-ერთი წამყვანი სიუჟეტის წარდგენისას. [სიუჟეტის ტაიმკოდი: 20:28 – 26:40]„აი ფაქტის“ დამფუძნებლის, ნინო ბაქრაძის განმარტებით, ამგვარი დეზინფორმაციული სიუჟეტი მხოლოდ იმის დასტურია, რამდენად აღელვებს „ქართულ ოცნებას“ ამ სტუდიის მიერ საქართველოს პორტებში რუსული ტანკერების შესახებ მომზადებული გამოძიებები.

“ქართული ოცნების” პროპაგანდისტი, პროსამთავრობო “POSTV”-ის დირექტორი შალვა რამიშვილი ჟურნალისტ ქეთი თუთბერიძის დისკრედიტაციას ცდილობს

“ქართული ოცნების” პროპაგანდისტი, პროსამთავრობო არხის, ბრიტანეთის მიერ დასანქცირებული “POSTV”-ის დირექტორი შალვა რამიშვილი, ტელეკომპანია “ფორმულას” ჟურნალისტს, ქეთი თუთბერიძეს სექსისტური ეპითეტით მიმართავს და მის დამცირებას ცდილობს.

შემთხვევა მაშინ მოხდა, როდესაც ჟურნალისტი მასთან ბრიტანეთის სანქციების შესახებ კითხვების დასასმელად მივიდა. თუთბერიძის რეპლიკაზე, რომ მას არ აკმაყოფილებს შალვა რამიშვილის მიერ კონკრეტულ შეკითხვაზე გაცემული პასუხი, პროპაგანდისტი შალვა რამიშვილი მას დამცინავად მიმართავს და არაერთგზის უწოდებს “დაუკმაყოფილებელს”, მიუხედავად იმისა, რომ ჟურნალისტი ეთიკურად მიანიშნებს ამ სიტყვის უხამს შინაარსზე.

2026 წლის 24 თებერვალს, უკრაინაში რუსეთის სრულმასშტაბიანი შეჭრიდან ოთხი წლის შემდეგ, პრო-სამთავრობო ტელეკომპანიებს – “იმედსა” და “POSTV-ის”, დიდმა ბრიტანეთმა სანქციები დაუწესა უკრაინის წინააღმდეგ დეზინფორმაციის გავრცელების გამო. სანქციების შესახებ იმ ფართო პაკეტიდან გახდა ცნობილი, რომელიც გაერთიანებული სამეფოს საგარეო უწყებამ გაავრცელა.

პროსამთავრობო არხები “იმედი”, “რუსთავი 2” და “POSTV” დამოუკიდებელი ონლაინ მედიის დისკრედიტაციას და სტიგმატიზებას ახდენენ

პროსამთავრობო ტელევიზიები – “იმედი”, “რუსთავი 2” და “POSTV” დამოუკიდებელ ონლაინ გამოცემებს – “ნეტგაზეთს”, “პუბლიკასა” და “On.ge”-ს ანტიქართულ მედიებად მოიხსენიებენ და მათ დისკრედიტაციასა და სტიგმატიზებას ახდენენ იმის გამო, რომ აღნიშნული მედიები მაღალჩინოსნებს “ქართული ოცნების” პრემიერად და მინისტრად იხსენიებენ.

სამივე არხს სოციალურ ქსელში გამოქვეყნებული აქვს თითქმის იდენტური ტექსტი, რომელსაც თან ერთვის ონლაინ მედიების მიერ საქართველოში სომხეთის პრემიერ – მინისტრის, ნიკოლ ფაშინიანის ვიზიტის შესახებ მომზადებული ტექსტიდან მოკლე სქრინშოთი.

“უცხო ქვეყნებიდან დაფინანსებული ეგრეთწოდებული ონლაინ მედიები ნიკოლ ფაშინიანს პრემიერ მინისტრად, ხოლო ირაკლი კობახიძეს და მაკა ბოჭორიშვილს “ქართული ოცნების” პრემიერად და მინისტრად მოიხსენიებენ”, – ამ ტექსტით “რუსთავი 2” ონლაინ მედიებს “ეგრეთ წოდებულ” მედიებს უწოდებს. ონლაინ მედიებს ბრჭყალებში სვამს POSTV-იც – “უცხოეთიდან დაფინანსებული “ონლაინ მედიის” ანტიქართული პოლიტიკა: გამოცემები ნიკოლ ფაშინიანს სომხეთის პრემიერ-მინისტრად მოიხსენიებენ, ხოლო საქართველოს პრემიერ-მინისტრს და საგარეო საქმეთა მინისტრს, “ქართული ოცნების” პრემიერად და მინისტრად”. “იმედი” კი, კიდევ უფრო შორს მიდის და აღნიშნულ გამოცემებს ჰიბრიდული ომის ინსტრუმენტებს უწოდებს: “საქართველოში არსებული ანტიქართული ონლაინ “მედიების” მორიგი ანტიქართული ქმედება – ჰიბრიდული ომის სამივე ინსტრუმენტი ნიკოლ ფაშინიანს სომხეთის პრემიერად, ხოლო ირაკლი კობახიძეს და მაკა ბოჭორიშვილს “ქართული ოცნების” პრემიერად და მინისტრად მოიხსენიებენ”.

აღსანიშნავია, რომ ეს ვიზუალური მასალა, სამივე არხმა, თითქმის ერთდროულად გამოაქვეყნა იმ დღეს, როდესაც “ქართულმა ოცნებამ” მესამე, საბოლოო მოსმენით მიიღო კანონი, რომლითაც – “ქართული ოცნების” სისტემური არაღიარება” სისხლის სამართლის დანაშაული გახდა.

პროსამთავრობო “POSTV” გამომძიებელ ჟურნალისტთა გაერთიანება “აი, ფაქტის” დისკრედიტაციას ცდილობს

24 თებერვალს, პრო-სამთავრობო “POSTV-იმ” გამომძიებელ ჟურნალისტთა გაერთიანება “აი, ფაქტის” წინააღმდეგ სიუჟეტი მოამზადა.

“პოსტივის” სიუჟეტი ეძღვნებოდა “აი, ფაქტის” მიერ მომზადებული ვიდეობის სერიის ერთ-ერთ ეპიზოდს შინაგან საქმეთა მინისტრის გელა გელაძის ქონების შესახებ.

“აი,ფაქტის” ვიდეო გელა გელაძის დეკლარირებული ქონების ჩამონათვალს მოიცავდა.

“გეკა გელაძის გახმოვანებული ქონებრივი დეკლარაცია, ოპოზიციური მედიის ისტერიისთვის და ხელისუფლების მორიგი დისკრედიტაციისთვის კარგი საფუძველი აღმოჩნდა” – ნათქვამია “პოსტივის” მიერ მომზადებულ სიუჟეტში.

ამავე სიუჟეტის ავტორი ამბობს, რომ “აი,ფაქტის” სიუჟეტს “არასწორი აღქმები, მანიპულაციები და საზოგადოების შეცდომაში შეყვანა მოჰყვა”. თავად “აი,ფაქტს” კი, “დეზინფორმაციაში” და “სპეკულაციაში” ადანაშულებს.

“პოსტივი” ხშრად ავრცელებს კრიტიკული მედიის წინააღმდეგ მასალებს, რასაც CMIS მუდმივად აღწერს.

შალვა პაპუაშვილმა კრიტიკული მედიის “ფორმულას” ჟურნალისტს გურამ როგავას პროპაგანდისტი უწოდა

ტელეკომპანია “ფორმულას” ტელეწამყვანი ჟურნალისტი გურამ როგავა 19 თებერვალს პირდაპირი ეთერის საშუალებით მაყურებელს დაემშვიდობა.

„ეს იქნება ჩემი ბოლო ეთერი „ფორმულაზე“ და დღევანდელი გადაცემით, სამწუხაროდ, უნდა დაგემშვიდობოთ“, – თქვა გურამ როგავამ საავტორო გადაცემაში “ხალხთან ერთად”.

გურამ როგავას მიერ “ფორმულადან” წასვლას საკუთარ სოციალურ ქსელში გამოეხმაურა შალვა პაპუაშვილი.

“იშვიათია ამგვარი აღიარების მოსმენა, რომ ადამიანი ჟურნალისტიკას კი არა პროპაგანდას ემსახურებოდა დასაფასებელია” – დაწერა პაპუაშვილმა.

მოგვიანებით, პაპუაშვილის ეს პოსტი გააზიარა ტელეკომპანია “რუსთავი 2-მა”.

2024 წლის 29 ნოემბერს, პრო-ევროპული აქციების გაშუქების დროს, პროფესიული მოვალეობის შესრულებისას სპეცრაზმელმა გურამ როგავაზე იძალადა და კეფაში ძლიერად ჩაარტყა.

შალვა პაპუაშვილმა მზია ამაღლობელის შესახებ მანიპულაციური ინფორმაცია გაავრცელა

2026 წლის 21 თებერვალს, პროსამთავრობო ტელეკომპანია „იმედის“ ეთერში მიმდინარე დებატებისა შალვა პაპუაშვილმა მზია ამაღლობელის სასჯელის შესახებ მანიპულაციური განცხადება გაავრცელა. მან ჟურნალისტის განაჩენი საფრანგეთის პრეზიდენტის ემანულ მაკრონისთვის სილის გაწვნისთვის მსჯავრდებულის სასჯელს შეადარა.

“საფრანგეთში მაკრონს ადამიანი თავს დაესხა და რამდენი მიუსაჯეს იცით? 18 თვე” – განაცხადა შალვა პაპუაშვილმა.

“ნეტგაზეთის” მიერ გავრცელებული ინფორმაციით კი, რეალურად ფრანგმა მამაკაცმა, რომელმაც პრეზიდენტს სილა გააწნა, მხოლოდ 4 თვე გაატარა საპატიმროში და დარჩენილი ნაწილი პირობითი ჰქონდა, მაშინ როცა მზია ამაღლობელს ორი წლის ვადით თავისუფლების აღკვეთა მიუსაჯეს. ჟურნალისტი უკვე 1 წელზე მეტია ციხეში იმყოფება.

ჟურნალისტ ნანუკა ჟორჟოლიანის დისკრედიტაციის მცდელობა

12 თებერვალს, POST TV ანალიტიკამ სოციალური ქსელის მეშვეობით გაავრცელა ვიზუალური მასალა ჟურნალისტ ნანუკა ჟორჟოლიანის შესახებ, რომელიც მიზნად ისახავს მისი პროფესიული რეპუტაციის შელახვასა და დისკრედიტაციას. მასალის შინაარსი და ფორმატი შეიცავს დამაკნინებელ გზავნილებს, რაც სცდება საზოგადოებრივი ინტერესის ფარგლებში დასაშვები გამოხატვის სტანდარტებს და მიუთითებს ჟურნალისტის მიმართ დისკრედიტაციის მცდელობაზე.

ერთი კვირის წინ ნანუკა ჟორჟოლიანის დისკრედიტაციის მცდელობა “ქართული ოცნების” დეპუტატმა, თეა წულუკიანმაც სცადა, როდესაც შეურაცხმყოფელი ლექსიკით შედგენილ ტექსტთან ერთად გაავრცელა ხელოვნური ინტელექტის მიერ გენერირებული ფოტო, თითქოსდა ამერიკელ ფინანსისტთან, პედოფილიაში მსჯავრდებულ ეპსტეინთან ერთადაა გადაღებული.

“ქართული ოცნება” და მისი მხარდამჭერი მედიები დამოუკიდებელი გამოცემა “პუბლიკის” დისკრედიტაციას ახდენენ

“ქართული ოცნების” პრემიერ-მინისტრი, ირაკლი კობახიძე, და თბილისის მერი, კახი კალაძე, გამოცემა “პუბლიკისთვის” ევროკავშირის პრიზის მინიჭების ფაქტისა და გამოცემის დისკრედიტაციას ცდილობენ. მათ ნარატივს იმეორებენ “ქართული ოცნების” მხარდამჭერი მედიები, მათ შორის ტელეკომპანია “იმედი”, “რუსთავი 2” და POSTV”.

ჟურნალისტური კონკურსის – “ევროკავშირის პრიზი ჟურნალისტიკაში” გამარჯვებულები, ევროკავშირის წარმომადგენლობამ საქართველოში, 2026 წლის 6 თებერვალს გამოავლინა. ექვსი საკონკურსო ნომინაციიდან, სამ კატეგორიაში (საუკეთესო ფოტო, საუკეთესო ბლოგი და საუკეთესო სიუჟეტი) ონლაინ გამოცემა “პუბლიკის” ჟურნალისტებმა გაიმარჯვეს. მათი მასალები პროევროპული პროტესტის პერიოდში მომხდარ სხვადასხვა უფლებადარღვევას აღწერდა.

დაჯილდოების ცერემონიისა და ინფორმაციის გავრცელების შემდეგ, პროპაგანდისტულმა POSTV-იმ “ქართული ოცნების” პრემიერ-მინისტრს, ირაკლი კობახიძესა და თბილისის მერს, კახა კალაძეს ჰკითხეს – რა გზავნილი იყო ევროკავშირის მხრიდან “პუბლიკის” დაჯილდოება პროტესტის შესახებ მომზადებული მასალებისთვის. “პუბლიკისთვის“ ჯილდოს გადაცემა არის იმის გაგრძელება, რაც ვიხილეთ ამაღლობელის შემთხვევაში, როდესაც ადამიანი დაჯილდოვდა პოლიციელის შეურაცხყოფისთვის – ეს არის ის დაბალი სტანდარტი, რომლითაც მოქმედებს ევროპული ბიუროკრატია“, – განაცხადა ირაკლი კობახიძემ შეკითხვის პასუხად. კახა კალაძემ კი კიდევ ერთხელ გაიმეორა “ქართული ოცნების” ანტიდასავლური გზავნილი, რომ “ქვეყანაში ძალადობრივ ჯგუფებს გარედან ახალისებენ”.

“ევროკავშირის პრიზი ჟურნალისტიკაში – მედიის ჯილდო თუ ძალადობის წახალისება?!” – იმავე დღეს ამ სათაურით გამოაქვეყნა ახალი ამბავი პროსამთავრობო, პროპაგანდისტულმა “იმედმა”. რეალურად, რას აჯილდოვებს ევროკავშირი საქართველოში – ჟურნალისტიკას თუ სახელმწიფოსა და მის ინსტიტუტებზე განხორციელებულ ძალადობას?- ამ კითხვას სვამს მასალაში “იმედი”.

“ქართული ოცნების” დეპუტატი თეა წულუკიანი ჟურნალისტ ნანუკა ჟორჟოლიანს შეურაცხმყოფელად მოიხსენიებს და მის დისკრედიტაციას ახდენს

საქართველოს კულტურისა და იუსტიციის ყოფილი მინისტრი, “ქართული ოცნების” მოქმედი დეპუტატი, თეა წულუკიანი, ტელეწამყვან ნანუკა ჟორჟოლიანს შეურაცხმყოფელად მოიხსენიებს და ფოტოფაბრიკაციით მის დისკრედიტაციას ახდენს.

ჟურნალისტის შესახებ ვრცელი, შეურაცხმყოფელი პოსტი და ხელოვნური ინტელექტით გენერირებული ფოტოფაბრიკაცია, სადაც ჟორჟოლიანი თითქოსდა ამერიკელ ფინანსისტთან, პედოფილიაში მსჯავრდებულ ეპსტეინთან ერთადაა, თეა წულუკიანმა სოციალურ ქსელში გამოაქვეყნა. ამ პოსტით წულუკიანი გამოეხმაურა სასამართლო დავის დასრულებას, რომელიც მას ნანუკა ჟორჟოლიანთან ჰქონდა.

თეა წულუკიანმა ნანუკა ჟორჟოლიანს მამის, ყოფილი მოსამართლის, ავთანდილ წულუკიანის შესახებ სოციალურ ქსელში გამოქვეყნებული პოსტის გამო უჩივლა. “წულუკიანის მამამ დახვრიტა შემდეგი ადამიანები”- წერს ნანუკა ჟორჟოლიანი 2025 წლის 12 აპრილს გამოქვეყნებულ პოსტში და ჩამოთვლილი აქვს 20 ადამიანის სია. იქვე ამბობს, რომ – “ეს იყო გარდამავალი დრო, როცა სიკვდილით დასჯა უქმდებოდა და მოსამართლე წულუკიანს შეეძლო სხვა უმაღლესი სასჯელის გამოყენება”.

წულუკიანმა ჟორჟოლიანს 2025 წლის ივლისში უჩივლა. მას ორი სასარჩელო მოთხოვნა ჰქონდა, ცილისწამებად მიჩნეულიყო ფრაზები: „წულუკიანის მამამ დახვრიტა შემდეგი ადამიანები” და ასევე, “ეს იყო გარდამავალი დრო, როცა სიკვდილით დასჯა უქმდებოდა და მოსამართლე წულუკიანს შეეძლო სხვა უმაღლესი სასჯელის გამოყენება”. 2026 წლის 6 თებერვალს, მოსამართლე ქეთევან კურცხალიამ, წულუკიანს ორივე სასარჩელო მოთხოვნა დაუკმაყოფილა.

“ნანული იმდენად ჩიტისტვინაა, რომ ერთი “დახვრეტილის” არც თუ ისე ძველი საგაზეთო ინტერვიუ მოიტანა მტკიცებულებად”, – წერს ვრცელ პოსტში თეა წულუკიანი, სასამართლოს დასრულების შემდეგ. მისი პოსტი უცვლელად გამოაქვეყნა ვებგვერდზე პროსამთავრობო ტელეკომპანია “რუსთავი 2”-მა, რომლის კომენტარებში, “ქართული ოცნების” მხარდამჭერები, ასევე, სავარაუდოდ, ტროლები და ბოტები, აგრძელებენ ნანუკა ჟორჟოლიანის შეურაცხმყოფელად მოხსენიებასა და ლანძღვას.