2025 წლის 4 ოქტომბერს, ადგილობრივი თვითმმართველობის არჩევნების დღეს (რომელსაც პროდასავლური ოპოზიციის დიდმა ნაწილმა ბოიკოტი გამოუცხადა), საარჩევნო უბანზე მყოფმა თბილისის მერობის კანდიდატმა კახა კალაძემ ჟურნალისტებს უზრდელები უწოდა.
შემთხვევა თბილისში, 64-ე საარჩევნო უბანზე მოხდა. კახა კალაძე, ხმის მიცემის შემდეგ, ქვეყანაში სიტყვისა და გამოხატვის თავისუფლების დაცულობაზე საუბრობდა. “ფორმულას” ჟურნალისტმა მას ჰკითხა, რაში გამოიხატებოდა ეს, რაზეც მან უპასუხა – “ რაღაც ზრდილობა ხომ არსებობს, ეთიკა ხომ არსებობს, მესმის, რომ არც ერთი გაგაჩნიათ, არც მეორე”
location: თბილისი
4 ოქტომბრის საპროტესტო აქციის გაშუქებისას ფოტოგრაფი მარიამ გიუნაშვილი დაშავდა
ჟურნალისტური ეთიკის ქარტიის ინფორმაციით, 2025 წლის 4 ოქტომბრის საპროტესტო აქციის გაშუქებისას, დოკუმენტალისტმა ფოტოგრაფმა, მარიამ გიუნაშვილმა წიწაკის სპრეისგან დამწვრობა მიიღო. „სამი სხვადასხვა მხრიდან შემესხა [წიწაკის სპრეი], წინიდან ეგრევე სახეში და გვერდებიდან მთელ სხეულზე. ხელებზე და მკლავებზე მივიღე განსაკუთრებულად დამწვრობა”, – თქვა გიუნაშვილმა “მედიაჩეკერთან” საუბრისას.
“პუბლიკის” ჟურნალისტს თბილისის საქალაქო სასამართლოს მანდატური პოლიციის გამოძახებით დაემუქრა და ფიზიკური ანგარიშსწორება სცადა
2025 წლის 1-ელ ოქტომბერს, ონლაინ გამოცემა “პუბლიკის” ჟურნალიტს, მინდია გაბაძეს, თბილისის საქალაქო სასამართლოს მანდატური პოლიციის გამოძახებით დაემუქრა და მასზე ფიზიკური ანგარიშსწორება სცადა. მინდია გაბაძე სასამართლოში აქტივისტ გელა ხასაიას სასამართლო პროცესს აშუქებდა.
როგორც მინდა გაბაძე აღწერს: პროცესის დაწყებამდე მანდატურების სამსახურის უფროსი, დავით მატიაშვილი, მას დაემუქრა, რომ გადაღების შემთხვევაში, „პოლიციას გამოიძახებდა და გვერდით ოთახში შეიყვანდა“.
გაბაძე ამბობს, რომ სასამართლოს შენობაში მას არაფერი გადაუღია. მას შემდეგ, რაც მანდატურებმა პროცესის დასრულებისთანავე ძალის გამოყენებით დაიწყეს დამსწრეების და ჟურნალისტების გაყვანა შენობიდან, სასამართლოს წყნარად და მშვიდად ტოვებდა. მიუხედავად ამისა, მისი თქმით, დავით მატიაშვილს სამჯერ ჰქონდა მცდელობა (ორჯერ შენობაში და ერთხელ ეზოში), რომ ფიზიკურად გასწორებოდა – “წიხლის ამორტყმით და ხელის ჩაბღაუჭებით”.
“კიდევ ორი შემთხვევა იყო, სხვა, ახალბედა მანდატურმა პირდაპირ კისერში ჩამავლო ხელი. ყოველ ჯერზე შოკისგან უმოძრაოდ ვიყავი და ჩემი რედაქტორი გლეჯდა ჩემს თავს მანდატურებს. მეხმარებოდნენ აქტივისტებიც”, – წერს ჟურნალისტი.
საქართველოს ჟურნალისტური ეთიკის ქარტია ხაზს უსვამს, რომ საერთო სასამართლოების შესახებ საქართველოს ორგანულ კანონში შეტანილი ცვლილებების შედეგად, მედიას უკიდურესად შეეზღუდა სასამართლო პროცესების გაშუქების შესაძლებლობა. ორგანიზაციის შეფასებით, სასამართლოებში მედიას არ აქვს მინიმალური სამუშაო პირობებიც კი, ხოლო გარემო უკიდურესად მტრული და საფრთხის შემცველია.
“ყოველ ჯერზე, როცა ჟურნალისტები სასამართლოში პროფესიულ მოვალეობას ასრულებენ, სერიოზული საფრთხე ექმნება მათ ჯანმრთელობასა და სიცოცხლეს. სასამართლოში მუშაობისას ჟურნალისტები რისკავენ თავისუფლებასაც, მაშინაც კი, როცა ისინი ძალადობისგან საკუთარი თავის ან კოლეგის დაცვას ცდილობენ. ჟურნალისტების მიმართ ამგვარი დამოკიდებულება მიზანმიმართული დევნის ყველა ნიშანს ატარებს”, – ნათქვამია ორგანზიაციის განცხადებაში.
“ქართული ოცნების” სასამართლო – უსამართლობის და ძალადობის ადგილი გახდა. ჟურნალისტების მიმართ ძალადობა და სასტიკი ინციდენტები პროფესიული საქმიანობის თანმდევი გამოცდილებაა”, – წერს “მედიის ადვოკატირების კოალიცია”.
ტელეკომპანია “ფორმულას” ჟურნალისტს თბილისის საქალაქო სასამართლოს მანდატურმა ტელეფონი დაუზიანა
2025 წლის 1 ოქტომბერს, ტელეკომპანია „ფორმულას“ ჟურნალისტს, ნატალი ჯახუტაშვილს, თბილისის საქალაქო სასამართლოს მანდატურის თანამშრომელმა ტელეფონი წაართვა და უკან გატეხილი დაუბრუნა.
შემთხვევა მაშინ მოხდა, როდესაც საქალაქო სასამართლოში ოპოზიციონერი აქტივისტის, გელა ხასაიას, სასამართლო პროცესი დასრულდა. გელა ხასაიასთვის აღკვეთის ღონისძიების სახით პატიმრობის შეფარდებას სასამართლოში დაპირსპირება მოჰყვა. სასამართლოს მანდატურებმა დაკავებულის მეგობრებზე ფიზიკურად იძალადეს. ჟურნალისტი სწორედ ამ პროცესების გაშუქებას ცდილობდა.
მისი მონათხრობით, მას შემდეგ, რაც მანდატურმა მას ტელეფონი წაართვა, იგი 15 წუთის განმავლობაში ცდილობდა ტელეფონის დაბრუნებას. საბოლოოდ კი მანდატურმა გატეხილი ტელეფონი გადასცა.
ეს არ არის პირველი შემთხვევა, როდესაც სასამართლოში მედიის წარმომადგენლები ძალადობის სამიზნეები ხდებიან. საერთო სასამართლოების შესახებ კანონში შესული ცვლილებებით, 30 ივნისიდან სასამართლო დარბაზებში, დერეფნებსა თუ ეზოში ფოტო/ვიდეოგადაღება და აუდიოჩაწერა აკრაძალულია. ახალი წესის ამოქმედების შემდეგ, მედიასაშუალებებმა გადაღების უფლებისთვის განცხადებით მიმართეს იუსტიციის საბჭოს – კანონით დადგენილ უწყებას, თუმცა ჯერჯერობით პასუხი არცერთს არ მიუღია.
რეპრესიული კანონმდებლობის მიღებამდე, დამოუკიდებელი მედიის წარმომადგენლებს უკანონოდ ხელი ეშლებოდათ სასამართლოს შენობაში პროფესიული მოვალეობის შესრულებისას. ცვლილების შემდეგ კი მანდატურის სამსახური არაპროპორციულად, დაუსაბუთებლად ძალას იყენებს მათ შორის მედიის წინააღმდეგ რეპრესიული კანონმდებლობის აღსასრულებლად
რეპრესიული კანონების აღსრულების მიზნით, ანტიკორუფციული ბიურო მედიებისგან ინფორმაციას ითხოვს
2025 წლის მაისიდან, მას შემდეგ, რაც რეპრესიული კანონები ამოქმედდა, ანტიკორუფციულმა ბიურომ 60-ზე მეტ არასამთავრობო ორგანიზაციას დიდი რაოდენობით ინფორმაციის გაგზავნა მოსთხოვა, მათ შორის რამდენიმე მედიასაშუალებასაც. აღნიშნული მოთხოვნის საფუძველი გრანტების შესახებ კანონია. გრანტების შესახებ” კანონში ცვლილება “ქართულმა ოცნებამ” 2025 წლის 16 აპრილს მიიღო. ცვლილებების თანახმად გრანტის გამცემმა (დონორმა) გრანტის გაცემაზე თანხმობის მისაღებად უნდა მიმართოს საქართველოს მთავრობას; გრანტის მიმღები, თანხმობის გარეშე გრანტის მიღების შემთხვევაში დაჯარიმდება გრანტის ორმაგი ოდენობით.
29 სექტემბერს, რაჟდენ კუპრაშვილის ბიურომ დამოუკიდებელი გამომძიებელი ჟურნალსიტების გაერთიანებას iFact-ს და GMC-ის მიმართა და გრანტების, დონორების, ფინანსური ოპერაციებისა და ხელშეკრულებების შესახებ ინფორმაცია მოითხოვა.
მანამდე, 26 სექტემბერს, კუპრაშვილის ბიურომ წერილი გაუგზავნა გამოცემა “მთის ამბებსაც”.
“ძალიან გეჩქარებათ ჩვენი მოგუდვა. აგერაა პასუხი! გავაგრძელებთ მუშაობას! საგამოძიებო ფილმების შექმნას ხელისუფლების კანონდარღვევებზე, კორუფციაზე, გარემოს განადგურებაზე, ადამიანის ფუნდამენტური უფლებების დარღვევებზე” – დაწერა “მთის ამბების” დამფუძნებელმა და მთავარმა რედაქტორმა გელა მთივლიშვილმა.
28 სექტემბერს ანტიკორუფციული ბიუროსგან წერილი მიიღო იმავე მოთხოვნებით “მთის თემმა”. ამის შესახებ, ფეისბუკზე დაწერა ორგანიზაციის დირექტორმა ნუგზარ სუარიძემ.
ანტიკორუფციული ბიუროსგან წერილი აგრეთვე მიიღო პროექტმა 64. “ჩვენ ამ დონის კრიზისის წინაშე არასდროს აღმოვჩენილვართ და ეს არ არის მხოლოდ ფინანსური კრიზისი” – განაცხადა გიორგი გოგუამ პროექტ 64-ის რედაქტორმა.
ანტიკორუფციულმა ბიურომ წერილით მიმართა საქართველოს ჟურნალისტური ეთიკის ქარტიასაც.
“ანტიკორუფციული ბიუროს მიერ დაწყებული წარმოება პირველი პრაქტიკული ნაბიჯია ახალი კანონმდებლობის გამოყენებით ძალიან ბევრი კარგი ჟურნალისტის დიდი ძალისხმევით შექმნილი მაღალი რეპუტაციის მქონე ორგანიზაციის გასანადგურებლად” – წერია ჟურნალისტური ეთიკის ქარტიის განცხადებაში.
საქართველოში შემოსვლაზე პრობლემები შეუქმნეს სამ უცხოელ რეპორტიორს, მათგან ორი უკან გააბრუნეს
2025 წლის სექტემბრის ბოლო კვირაში, საქართველოში შემოსვლაზე უარი უთხრეს სამ უცხოელ ფოტოგრაფს. მათგან ორს ქვეყანაში დაგეგმილი თვითმმართველობის არჩევნები უნდა გაეშუქებინა. სამივე ფოტორეპორტიორი საქართველოში მანამდეც იყო ნამყოფი, ისინი პროევროპულ საპროტესტო აქციებს იღებდნენ.
კერძოდ, 2025 წლის 28 სექტემბერს საქართველოში არ შემოუშვეს შვეიცარიელი ფოტოჟურნალისტი გრეგორ ზომერი. საზღვარზე მას განუცხადეს, რომ მის სახელზე “გზის ხელოვნურად გადაკეტვის საფუძვლით” გამოწერილი ორი ჯარიმა ფიქსირდებოდა 10 000 ლარის (დაახლ. 3 700 $) ოდენობით და ქვეყანაში არ შეუშვებდნენ, ვიდრე ამ თანხას არ გადაიხდიდა. ფოტოჟურნალისტმა ჯარიმის გადახდაზე უარი განაცხადა და ის ქვეყნიდან უკან გააბრუნეს. OC Media-სთან ფოტოჟურნალისტი ჰყვება, რომ უარის შემდეგ ის “რაღაც ოთახში” გაიყვანეს და იქ რვა საათის განმავლობაში დააყოვნეს: „მომიწია უკან დასაბრუნებელი ფრენის დაჯავშნა. ამის შემდეგ, მათ ტელეფონი წამართვეს. ვცადე ტელეფონის დაბრუნება, მაგრამ არ დამიბრუნეს. ვცადე დარეკვა მეთხოვა, მაგრამ მითხრეს, რომ ეს შეუძლებელი იყო და ტელეფონი წამართვეს“.
29 სექტემბერს საქართველოში შემოსვლაზე უარი უთხრეს იტალიელ ჟურნალისტს ჯაკომო ფერარას. ის საქართველოში სომხეთიდან შემოდიოდა. საზღვარზე პოლიციამ უთხრა, რომ მას 5000 ლარიანი (დაახლ. (1 900$) ჯარიმა ეკისრება და ქვეყანაში გადახდის გარეშე არ შემოუშვებენ. ფერარას თქმით, მისთვის ეს ინფორმაცია მოულოდნელი იყო. მისი მონათხრობით, იგი 31 მარტს თბილისში საპროტესტო აქციაზე ყოფნის გამო დააჯარიმეს, არგუმენტმა, რომ დემონსტრაციაში არ მონაწილეობდა და მხოლოდ აშუქებდა, არ გაჭრა. ჟურნალისტმა ჯარიმის გადახდაზე უარი თქვა და პასპორტი მოითხოვა, რომელიც 2 საათის შემდეგ დაუბრუნეს. ჟურნალისტი ამბობს, რომ მომხდარის შესახებ შეატყობინა იტალიის საელჩოს საქართველოში და ჟურნალისტების საერთაშორისო ფედერაციას.
OC Media-ს დამფუძნებლის, მარი ნიკურაძის ცნობით, 1-ელ ოქტომბერს საქართველოში საზღვარზე 6 საათით შეაყოვნეს გერმანელი ჟურნალისტიც. მასაც მიზეზად მის სახელზე არსებული ჯარიმა დაუსახელეს – 5 000 ლარი (1 900$), “გზის ხელოვნურად გადაკეტვისთვის”. გერმანელმა ჟურნალისტმა ქვეყანაში შემოსვლა მხოლოდ მას შემდეგ შეძლო, რაც თანხა გადაიხადა.
ეს არ არის პირველი შემთხვევა, როდესაც უცხოელ რეპორტიორებს საქართველოში შემოსვლაზე პრობლემებს უქმნიან. საჯაროდ გავრცელებულ წყაროებზე დაყრდნობით, “მედიის, ინფორმაციისა და სოციალური კვლევების ცენტრმა”, ბოლო ორ წელიწადში, ასეთი 10-ზე მეტი შემთხვევა აღრიცხა.
“ქართული ოცნების” პარლამენტის სპიკერი, შალვა პაპუაშვილი, დამოუკიდებელ ონლაინგამოცემა “ნეტგაზეთზე” თავდასხმას აგრძელებს
2025 წლის 22 სექტემბერს, “ქართული ოცნების” პარლამენტის თავმჯდომარემ, შალვა პაპუაშვილმა, დამოუკიდებელი ონლაინ გამოცემა “ნეტგაზეთი” პროპაგანდისტულ მედიად მოიხსენია.
შალვა პაპუაშვილმა “ნეტგაზეთის” საწინააღმდეგო განცხადება საკუთარ სოციალურ ქსელში გააზიარა. პოსტს პაპუაშვილმა დაურთო სქრინი “ნეტზაგეთის” სტატიიდან, სადაც მიხეილ ყაველაშვილი “ქართული ოცნების პრეზიდენტად არის მოხსენიებული”.
“ არ არსებობს ტესტი, რომელიც აჩვენებს, რომ ახალი ამბის ამგვარად გამშუქებელი პროპაგანდისტული მედია არ არის. არ არსებობს ტესტი, რომელიც აჩვენებს, რომ ის, ვინც ამათ ფულს უხდის პროპაგანდის დამფინანსებელი არ არის…” დაწერა პაპუაშვილმა.
ბოლო პერიოდში, შალვა პაპუაშვილი მსგავსი პოსტებით ხშირად ესხსმის თავს “ნეტგაზეთს”. მან მსგავსი განცხადება “ნეტგაზეთის” წინაამდეგ, 9 სექტემბერსაც გაავრცელა. “მედიის, ინფორმაციისა და სოციალური კვლევების ცენტრის” არქივში იძებნება მისი სიტყვიერი თავდასხმები გამოცემებზე: “პუბლიკა”, On.ge, “ტაბულა”. ასევე, გამოცემა “მთის ამბების” რედაქტორზე “გელა მთივლიშვილზე”. პაპუაშვილმა სცადა “ნეტგაზეთი”/”ბათუმელების” პატიმრობაში მყოფი მენეჯერის, მზია ამაღლობელის დისკრედიტაციაც და ისიც მოიხსენია როგორც “ძალადობის წამქეზებელი”.
“ქართული ოცნების” თბილისის მერობის კანდიდატმა, კახა კალაძემ, ჟურნალისტებს მოძალადეები უწოდა და სიტყვიერი შეურაცხყოფა მიაყენა
2025 წლის 21 სექტემბერს, კახა კალაძემ, თბილისის მოქმედმა მერმა და მერობის კანდიდატმა “ქართული ოცნებიდან” ჟურნალისტებს მოძალადეები უწოდა.
“თქვენ ხართ პირველი მოძალადეები, თქვენ ხართ, ვინც ძალადობთ და ვინც ცდილობთ… მერე გიკვირთ, ხან მიკროფონს გირტყამენ თავში… მერე გიკვირთ რატომ”…
ჟურნალისტმა ამ კომენტარის შემდეგ, კალაძეს ჰკითხა, იყო თუ არა მისი ეს განცხადება ძალადობის წახალისება. რაზეც “ქართული ოცნების” მერობის კანდიდატმა უპასუხა, რომ ძალადობის წახალისება არ უცდია და კვლავ განაგრძო ჟურნალისტებისთის სიტყვიერი შეუყრაცხყოფის მიყენება.
“ამ ზრდილობას, ზოგადად, ოჯახში ასწავლიან… ცხადი და ნათელია, რას წარმოადგენთ, ვინ ხართ, რა ხართ და იმიტომ ხართ ასეთი დაბეჩავებულები, გაუბედურებულები და გაფარჩაკებულები”…
პროსამთავრობო მედია “TV პირველის“ დისკრედიტაციას ცდილობს
2025 წლის 17 სექტემბერს “ქართული ოცნების” მხარდამჭერმა ტელევიზიამ, „POSTV“-მ, Facebook-ზე გამოაქვეყნა ვიზუალური მასალა, რომელშიც ნათქვამია, რომ „TV პირველმა“ არ გააშუქა ხელისუფლების მიერ დევნილი ოჯახებისათვის ბინების გადაცემის ფაქტი. პოსტში „ტვ პირველი“ ასევე დაადანაშაულეს „მხოლოდ ფეიკ ნიუსების“ გაშუქებაში. მასზე ასევე, დატანილია მოწოდება “გამორთე TV პირველი”.
მსგავსი მასალის გამოქვეყნება ნათლად აჩვენებს, როგორ იყენებს პროსამთავრობო მედია ოპოზიციური მედიის დისკრედიტაციის სტრატეგიას, კრიტიკულად განწყობილი მედიისადმი უნდობლობის გასაღრმავებლად და მის მიმართ ბოიკოტის გამოსაცხადებლად.
დამოუკიდებელი ტელეკომპანია “TV პირველი” არაერთგზის გამხდარა “ქართული ოცნების” წარმომადგენლების, მხარდაჭერებისა თუ სახელმწიფო უწყებების თავდასხმის ობიექტი.
“ქართული ოცნების” პარლამენტის თავმჯდომარე, შალვა პაპუაშვილი, აგრძელებს გამოცემა “ნეტგაზეთზე” თავდასხმას
2025 წლის 9 სექტემბერს, “ქართული ოცნების” პარლამენტის თავმჯდომარემ, შალვა პაპუაშვილმა, დამოუკიდებელი ონლაინ გამოცემა “ნეტგაზეთი” “ძალადობის წამქეზებელ, პროპაგანდისტული პლატფორმად, მოძალადე მედიად” მოიხსენია.
შალვა პაპუაშვილის ეს განცხადება მოჰყვა “ნეტგაზეთის” მიერ 9 სექტემბერს, “ქართული ოცნების” თბილისის მერობის კანდიდატის, კახა კალაძის შტაბთან დაანონსებული საპროტესტო აქციის შესახებ ინფორმაციის გავრცელებას. ამავე პოსტში შალვა პაპუაშვილი იყენებს ანტიდასავლურ რიტორიკას და თავს ესხმის დონორ ორგანიზაციებს.
“ბრიუსელის მიერ დაფინანსებული “ნეტგაზეთი”, არა მარტო ძალადობის პროპაგანდას უზრუნველყოფს, არამედ თავადვე აორგანიზებს ძალადობრივ თავდასხმას “ქართული ოცნების” საარჩევნო შტაბზე. მიკერძოებული, პარტიული, ყვითელი, ყველანაირი მედია გვინახავს, მაგრამ “მოძალადე მედია” ის ახალი ფენომენია, რომელიც, რუანდის “ათასი ბორცვის რადიოს” მაგალითზე, უცხოელი დონორების შექმნილი პროდუქტია”, – წერს “ქართული ოცნების” პარლამენტის თავმჯდომარე.
ეს არ არის პირველი შემთხვევა, როდესაც შალვა პაპუაშვილი თავს ესხმის და პროპაგანადისტულ მედიად მოიხსენიებს დამოუკიდებელ ონლაინ მედიას. “მედიის, ინფორმაციისა და სოციალური კვლევების ცენტრის” არქივში იძებნება მისი სიტყვიერი თავდასხმები გამოცემებზე: “პუბლიკა”, On.ge, “ტაბულა”. ასევე, გამოცემა “მთის ამბების” რედაქტორზე “გელა მთივლიშვილზე”. პაპუაშვილმა სცადა “ნეტგაზეთი”/”ბათუმელების” პატიმრობაში მყოფი მენეჯერის, მზია ამაღლობელის დისკრედიტაციაც და ისიც მოიხსენია როგორც “ძალადობის წამქეზებელი”