თორნიკე თოშხუა საკრებულოსთან ბანერის გამო კვლავ დააკავეს. მას პატიმრობა შეეფარდა

31 ივლისს, თბილისის საკრებულოს შენობასთან სამოქალაქო აქტივისტი თორნიკე თოშხუა დააკავეს. მას ხელში ეჭირა ფურცელი წარწერით: „ბიძინა ყ არაა/არის?“.

გავრცელებული ვიდეოკადრების მიხედვით, დაკავების დროს თოშხუა პოლიციელებს დაკავების საფუძვლის განმარტებას სთხოვდა. კადრებში ისმის, რომ პოლიცია დაკავების საფუძვლად „ხულიგნობას“ ასახელებს. მოგვიანებით, შინაგან საქმეთა სამინისტრომ „რადიო თავისუფლებას“ დაუდასტურა, რომ თორნიკე თოშხუა ადმინისტრაციული წესით, „შეურაცხმყოფელი ბანერისთვის“, ადმინისტრაციულ სამართალდარღვევათა კოდექსის 166-ე მუხლის – წვრილმანი ხულიგნობის – საფუძველზე დააკავეს.

თორნიკე თოშხუა პოლიციამ 26 ივლისსაც დააკავა თბილისის საკრებულოს შენობასთან, ასევე „შეურაცხმყოფელი ბანერისთვის“. მაშინ მას ხელში ეჭირა ფურცელი წარწერით: „ბიძინა ყ***? კი თუ არა“. მისი დაკავების შემდეგ, სოლიდარობის ნიშნად, საკრებულოსთან კიდევ 9 მოქალაქე დააკავეს. 26 ივლისს დაკავებულთა საქმეებზე სასამართლომ ნაწილს ადმინისტრაციული პატიმრობა შეუფარდა, ნაწილს კი ადმინისტრაციული ჯარიმა დააკისრა. თავად თოშხუა მოსამართლე ზვიად ცეკვავამ 3,000 ლარით დააჯარიმა.

თოშხუა მანამდე სისხლის სამართლის წესითაც იყო დაკავებული და საპატიმრო რამდენიმე კვირის წინ დატოვა.

2 აგვისტოს, მოსამართლე თორნიკე კაპანაძემ თორნიკე თოშხუას 5-დღიანი პატიმრობა შეუფარდა.

საკრებულოსთან დაკავებული აქტივისტი ნოდარ წიწარიშვილი გორის დროებითი მოთავსების იზოლატორში გადაიყვანეს

თბილისის საკრებულოსთან დაკავებული სამოქალაქო აქტივისტი ნოდარ წიწარიშვილი გორის დროებითი მოთავსების იზოლატორში გადაიყვანეს. წიწარიშვილი 28 ივლისს თავისუფლების მოედანზე გამართულ აქციაზე დააკავეს, სადაც მოქალაქეები 26 ივლისს საკრებულოსთან დაკავებულ აქტივისტებს უცხადებდნენ სოლიდარობას, აქციის მონაწილეებს ბანერებზე ეჭირათ პასუხი თორნიკე თოშხუას ბანერზე დასმულ კითხვაზე, რომლის გამოც 26 ივლისს პოლიციამ 10 მოქალაქე დააკავა.

იურისტი მარიკა არევაძე აცხადებს, რომ ბოლო დღეებში მოქალაქეების დაკავებები დაუსაბუთებელია და რეალურად არა ადმინისტრაციულ სამართალდარღვევას, არამედ თავისუფალი აზრის გამოხატვის დევნას წარმოადგენს.

„ბოლო ორი დღის განმავლობაში ჩვენ აქტიურად ვხედავთ უსაფუძვლო დაკავებებს და რეალურად ეს არის არა ადმინისტრაციული სამართალდარღვევა, არამედ თავისუფალი აზრის გამოხატვის დევნა“, – განაცხადა არევაძემ. მისივე თქმით, პრაქტიკად იქცა დემონსტრაციების ფარგლებში დაკავებული აქტივისტებისა და მოქალაქეების დროებითი მოთავსების იზოლატორში 48 საათით მოთავსება. არევაძის განმარტებით, თუ 48-საათიანი ვადის ამოწურვამდე საქმე სასამართლოში არ შევა და დაკავებულები სასამართლოს წინაშე არ წარდგებიან, ისინი დაუყოვნებლივ უნდა გათავისუფლდნენ.

26 ივლისს დაკავებულთა მხარდამჭერებს სასამართლოს შენობა ძალის გამოყენებით დაატოვებინეს 

უფლებადამცველი მარიკა არევაძე აცხადებს, რომ თბილისის საქალაქო სასამართლოში მასზე მანდატურის სამსახურის თანამშრომელმა იძალადა. მისი თქმით, მანდატურმა ხელი ჰკრა და ძალის გამოყენებით დაატოვებინა სასამართლოს შენობა.

„ამ კადრებში არ ჩანს, ხელს როგორ მკრავს და ძალადობს ეს არაადამიანი!! თუმცა ჩანს სიტუაცია“, – წერს არევაძე სოციალურ ქსელში. არევაძის განცხადებით, ადგილზე საპატრულო პოლიცია გამოიძახა.

გავრცელებული ინფორმაციით, მანდატურის სამსახურის თანამშრომლებმა სასამართლოს ტერიტორია ძალის გამოყენებით დაატოვებინეს მოქალაქეებს, რომლებიც 26 ივლისს თბილისის საკრებულოსთან დაკავებული აქციის მონაწილეების მხარდასაჭერად იყვნენ მისული და ადმინისტრაციული პროცესების დასრულებას ელოდებოდნენ.

დაზარალებულთა თქმით, ბოლო საქმის განხილვისას მანდატურის სამსახურის თანამშრომლებმა ასევე იძალადეს აქტივისტ რუსკა მჭედლიძეზე. მჭედლიძის განცხადებით, მანდატურები მას ხელს არ უშვებდნენ და უფრო უჭერდნენ, მიუხედავად იმისა, რომ ძლიერი ტკივილის გამო გათავისუფლებას სთხოვდა. მისი თქმით, ტკივილი იმდენად ძლიერი იყო, რომ გონების დაკარგვის ზღვარზე იყო. დღის განმავლობაში სასამართლოში მოქალაქეებსა და მანდატურებს შორის დაპირისპირების შესახებ ინფორმაცია რამდენჯერმე გავრცელდა. სოციალურ ქსელებში ვრცელდებოდა ვიდეოკადრებიც, სადაც ჩანს, როგორ ატოვებინებენ მანდატურები მოქალაქეებს სასამართლოს შენობას ძალის გამოყენებით.

26 ივლისს საკრებულოსთან დაკავებულთა საქმეებზე 4 პირი პატიმრობაში დატოვეს, 5 კი დააჯარიმეს 

26 ივლისს თბილისის საკრებულოსთან დაკავებული 10 პირის საქმეების განხილვა სასამართლომ 28 ივლისს, გვიან ღამით დაასრულა. საქმეები მოსამართლეებმა ზვიად ცეკვავამ და თორნიკე კაპანაძემ განიხილეს.

სასამართლოს გადაწყვეტილებით, ოთხ პირს ადმინისტრაციული პატიმრობა შეეფარდა. ია მელითაურსა და ნატო ბოლქვაძეს 5-დღიანი ადმინისტრაციული პატიმრობა შეეფარდათ, შაკო ბაღდოშვილსა და ლაშა დგებუაძეს კი – 10-დღიანი ადმინისტრაციული პატიმრობა.

დანარჩენი დაკავებულები სასამართლომ დააჯარიმა: თორნიკე თოშხუა – 3,000 ლარით, ვასო ბერიძე – 5,000 ლარით, მარიამ მეყანწიშვილი – 6,000 ლარით, მარინე ნანავა – 5,000 ლარით, სანდრო სეხნიაშვილი – 5,000 ლარით. თორნიკე თიკარაძის საქმის განხილვა 31 ივლისისთვის გადაიდო და ის დაკავებიდან გათავისუფლდა.

ია მელითაურის საქმეში მოსამართლემ 173-ე მუხლის დარღვევა არ დაადგინა და ის სამართალდამრღვევად მხოლოდ წვრილმან ხულიგნობაში ცნო. პროცესზე დამსწრეთა ინფორმაციით, მელითაურმა პოლიციაში არასათანადო მოპყრობაზე ისაუბრა და მოსამართლეს დაკავებისას მიღებული დაზიანებები აჩვენა.

სხდომების პარალელურად გავრცელდა ინფორმაცია მოქალაქეებსა და მანდატურის სამსახურის თანამშრომლებს შორის დაპირისპირების შესახებ. გავრცელებულ კადრებში ჩანდა, როგორ ატოვებინებდნენ მანდატურები მოქალაქეებს სასამართლოს შენობას ძალის გამოყენებით.

საქმე 26 ივლისს თბილისის საკრებულოსთან განვითარებულ მოვლენებს უკავშირდება. პოლიციამ თავდაპირველად თორნიკე თოშხუა დააკავა, რომელიც საკრებულოსთან ბანერით იდგა წარწერით: „ბიძინა ყ*ეა? კი — არა“. მისი დაკავების შემდეგ, სოლიდარობის ნიშნად, მოქალაქეებმა იმავე შინაარსის ბანერები გაშალეს, რის შემდეგაც პოლიციამ დამატებით 9 პირი დააკავა. შსს დაკავებულებს საჯარო სივრცეში ლანძღვა-გინებასა და პოლიციის კანონიერი მოთხოვნისადმი დაუმორჩილებლობას ედავებოდა.

MMA-ის მებრძოლი „ქართული ღირებულებების, ფასეულობების და ტრადიციების დაცვის მიზნით“ მოძრაობას აფუძნებს

MMA-ის მებრძოლმა გიორგი ქართველიშვილმა თანამოაზრეებთან ერთად „სიწმინდეების დასაცავად“ ახალი მოძრაობა დააფუძნა. მისი განცხადებით, მოძრაობას „მყისიერი რეაგირება“ ექნება „სიწმინდეების, წინაპრების, რელიგიისა და ისტორიის შეურაცხყოფაზე“.

„საჭიროების შემთხვევაში ციხეშიც კი წავალთ“, – განაცხადა ქართველიშვილმა მოძრაობის პრეზენტაციისას.ქართველიშვილის თქმით, ქართული იდენტობა, ტრადიციები, ღირებულებები, რელიგია და კულტურა „კოორდინირებული თავდასხმის“ სამიზნე ხდება, რომლის ავტორებადაც მან „ქვეყნის გარედან დაფინანსებული ჯგუფები“, პოლიტიკოსები, აქტივისტები, მედიის წარმომადგენლები და მათთან აფილირებული პირები დაასახელა. მისი განცხადებით, მოძრაობა იწყებს ბრძოლას „უცხოეთიდან დაფინანსებული გარე ინტერესების მონურ მორჩილებაში მყოფი“ ადამიანებისა და ჯგუფების წინააღმდეგ.

გიორგი ქართველიშვილი ბოლო დღეებში პროსამთავრობო მედიაში ონისე ოქრიაშვილზე თავდასხმაში ბრალდებულის მხარდამჭერ კონტექსტში ჩნდებოდა. პროსამთავრობო არხები მას თავდასხმაში ბრალდებული პირის მეგობრად მოიხსენიებდნენ და მისი პოზიციები ბრალდებულის დასაცავად გამოიყენებოდა. აქტივისტები ქართველიშვილს ასევე ე.წ. ტიტუშკების მობილიზებაში ადანაშაულებენ. ის სოციალურ ქსელში ხშირად აქვეყნებს „ქართული ოცნების“ ლიდერებთან ერთად გადაღებულ ფოტოებს.

„ქართული ოცნების“ წევრი არჩილ გორდულაძე ინიციატივას მიესალმა და განაცხადა: „კარგია, როდესაც ადამიანებს აქვთ სურვილი, დაიცვან, ხმა აიმაღლონ ქვეყნის კულტურის, რწმენის, ადამიანების უფლებების, ისტორიის წინააღმდეგ მიმართულ მიზანმიმართულ ქმედებებზე“. მისი თქმით, „რა თქმა უნდა, ეს ყველაფერი უნდა მოხდეს კანონის დაცვით და სრულ ჩარჩოებში“.

მოძრაობის დაფუძნებას „ქართული ოცნების“ წევრი ნინო წილოსანიც გამოეხმაურა და მას საზოგადოების ნაწილის „ბუნებრივი რეაქცია“ უწოდა. წილოსანმა მოქალაქეებს მოუწოდა, თავი გააკონტროლონ და ადამიანის ღირსებას არ შეეხონ, რადგან მოძრაობას „მყისიერი რეაგირება“ აქვს დაანონსებული.

მოძრაობის დაფუძნება მოხდა იმ ფონზე, როდესაც პროსამთავრობო მედიამ ონისე ოქრიაშვილის წინააღმდეგ რამდენიმე დღის განმავლობაში დისკრედიტაციული კამპანია აწარმოა, რის შემდეგაც, მას სახლთან თავს დაესხნენ. თავდასხმის შემდეგაც იგივე მედიასაშუალებები აგრძელებდნენ ოქრიაშვილის ვიდეოების კონტექსტიდან ამოგლეჯილად გავრცელებას და პარალელურად თავდასხმაში ბრალდებული პირის მხარდამჭერი შინაარსის მასალებს ავრცელებდნენ.

ამ კონტექსტში, „სიწმინდეების დაცვის“ სახელით შექმნილი მოძრაობა და მის გარშემო გაჟღერებული გზავნილები აძლიერებს შთაბეჭდილებას, რომ ხელისუფლებასთან დაკავშირებული პოლიტიკური და მედიაგარემო კრიტიკული ხმების წინააღმდეგ საზოგადოებრივი აგრესიის მობილიზებასა და ძალადობის გამამართლებელი ნარატივების გავრცელებას უწყობს ხელს.

თბილისის საკრებულოსთან ბანერის გამო 10 მოქალაქე დააკავეს

26 ივლისს, თბილისის საკრებულოს შენობასთან პოლიციამ აქტივისტი თორნიკე თოშხუა დააკავა. დაკავების მიზეზი გახდა მის მიერ გაშლილი საპროტესტო ბანერი წარწერით: „ბიძინა ყ***? კი — არა“. თოშხუას დაკავების კადრებში ჩანს, როგორ უახლოვდება საკრებულოსთან მდგომ თორნიკე თოშხუას რამდენიმე პოლიციელი, რის შემდეგაც მას პოლიციის ავტომობილში სვამენ და ადგილიდან მიჰყავთ.

თოშხუას დაკავების შემდეგ, მის მხარდასაჭერად მოქალაქეები მალევე შეიკრიბნენ საკრებულოს შენობასთან და იმავე შინაარსის ბანერები გაშალეს. პოლიციამ მათი დაკავებაც დაიწყო. გავრცელებული ინფორმაციით, დამატებით დააკავეს 9 მოქალაქე, მათ შორის: ია მელითაური, ლაშა დგებუაძე, მარიამ მეყანწიშვილი, ვასო ბერიძე, სანდრო სეხნიაშვილი, მარინე ნანავა, შაკო ბაღდოშვილი, თორნიკე ტიკარიძე და ნატო ბოლქვაძე.

სოციალურ ქსელებში გავრცელებულ ვიდეოში ჩანს, როგორ ურტყამს დაკავების დროს ილიას სახელმწიფო უნივერსიტეტის სტუდენტ სანდრო სეხნიაშვილს სახეში ხელს პოლიციის მაღალჩინოსანი დავით მამაგეიშვილი.

შინაგან საქმეთა სამინისტრომ მოგვიანებით ოფიციალური განცხადება გაავრცელა. შსს-ს ცნობით, თბილისის საკრებულოს მიმდებარე ტერიტორიაზე ჯამში 10 პირი დააკავეს. უწყების განცხადებით, მათ „საჯარო სივრცეში შეურაცხმყოფელი ბანერები“ ეჭირათ, შეურაცხმყოფელ ფრაზებს გამოთქვამდნენ, საზოგადოებრივ წესრიგს არღვევდნენ და სამართალდამცველებს წინააღმდეგობას უწევდნენ. ისინი ადმინისტრაციულ სამართალდარღვევათა კოდექსის 166-ე და 173-ე მუხლების საფუძველზე არიან დაკავებული, რაც წვრილმან ხულიგნობასა და სამართალდამცავი ორგანოს თანამშრომლის კანონიერი მოთხოვნისადმი დაუმორჩილებლობას გულისხმობს.

“საქართველოს ახალგაზრდა იურისტთა ასოციაციამ” განცხადება გაავრცელა და შსს-ს დაკავებულების დაუყოვნებლივ გათავისუფლებისკენ მოუწოდა. ორგანიზაციის შეფასებით, თორნიკე თოშხუა და მის მხარდასაჭერად მისული მოქალაქეები მშვიდობიანი შეკრებისა და პოლიტიკური გამოხატვის უფლებით სარგებლობისას დააკავეს. საია მიუთითებს, რომ გავრცელებულ კადრებში დემონსტრანტების მხრიდან ძალადობა ან საზოგადოებრივი წესრიგის ისეთი დარღვევა არ ჩანს, რაც მათ დაკავებას ან პოლიციის მხრიდან ძალის გამოყენებას გაამართლებდა. ორგანიზაციის განცხადებით, პოლიციის მაღალჩინოსნის მიერ დემონსტრანტისთვის სახეში ხელის გარტყმა არაადამიანური ან დამამცირებელი მოპყრობის ზღვარს აღწევს და შესაძლოა სისხლის სამართლის კოდექსის 161-ე მუხლით გათვალისწინებული დანაშაულის ნიშნებს შეიცავდეს.

თორნიკე თოშხუა მანამდე, მინდია შერვაშიძესთან ერთად, 2025 წლის 16 აგვისტოს დააკავეს. მათ „ქართული ოცნების“ მხარდამჭერ ბექა გოცირიძეზე ჯგუფურად ძალადობას ედავებოდნენ. სასამართლომ ორივე მათგანს ერთი წლით თავისუფლების აღკვეთა მიუსაჯა. თოშხუამ პატიმრობაში დაახლოებით ერთი წელი გაატარა.

გიორგი ახობაძეს საჯარო განცხადების გამო 25-დღიანი ადმინისტრაციული პატიმრობა შეეფარდა

უწყვეტი საპროტესტო აქციების მონაწილეს, ექიმ გიორგი ახობაძეს, სასამართლომ 25-დღიანი ადმინისტრაციული პატიმრობა შეუფარდა. გადაწყვეტილება მოსამართლე მანუჩარ ცაცუამ მიიღო. გავრცელებული ინფორმაციით, სასამართლომ ახობაძის მიმართ ორი ადმინისტრაციული საქმე განიხილა და გააერთიანა. 

საქმეები შეეხებოდა როგორც სოციალურ ქსელში გამოქვეყნებულ პოსტებს, მათ შორის გრიგოლ კაჭკაჭიშვილთან, ირაკლი კობახიძესა და ლევან მახაშვილთან დაკავშირებით, ისე ცენტრალური კრიმინალური პოლიციის დეპარტამენტისა და კანცელარიის მოქმედი და ყოფილი თანამშრომლების მიმართ სატელეფონო საუბრისას გაკეთებულ შეურაცხმყოფელ განცხადებებს. სამთავრობო ტელეკომპანია „იმედის“ ცნობით, პატიმრობის გამოყენების საფუძველი შეურაცხმყოფელი ქმედებების განმეორებითი ხასიათი გახდა. არხის ინფორმაციით, ახობაძე მის წინააღმდეგ მიმდინარე სისხლის სამართლის საქმის ფარგლებში ამოღებული მობილური ტელეფონის დაბრუნებას ითხოვდა, რის შემდეგაც პოლიციის თანამშრომლებს სიტყვიერი შეურაცხყოფა მიაყენა.

სასამართლოს გადაწყვეტილების შემდეგ გიორგი ახობაძემ განაცხადა, რომ იგი „ჩამდები პოლიციელების გინებისთვის“ ცნეს სამართალდამრღვევად. „დამნაშავედ ჩამთვალეს ჩამდები პოლიციელების გინებაში. – განაცხადა ახობაძემ “TV პირველთან“.

მანამდე, 2026 წლის 8 ივლისს, სინდისის ყოფილი პატიმარი გიორგი ახობაძე 3,000 ლარით დააჯარიმეს. მაშინ, სასამართლოში მას შსს-ში ახლად შექმნილი „სიძულვილის ენის წინააღმდეგ ბრძოლის სამმართველო“ ვატო შაქარაშვილის Facebook-გვერდზე გაკეთებული შეურაცხმყოფელი კომენტარის გამო ედავებოდა.

გიორგი ახობაძე 2024 წლის დეკემბერში თბილისში დააკავეს, როდესაც რუსთაველის გამზირზე მიმდინარე საპროტესტო აქციიდან სახლში ბრუნდებოდა. პროკურატურის განცხადებით, მას ნარკოტიკული საშუალება აღმოაჩნდა, თუმცა ახობაძე აცხადებდა, რომ ნარკოტიკი ჩაუდეს. მისთვის წაყენებული ბრალდება – განსაკუთრებით დიდი ოდენობით ნარკოტიკული საშუალების უკანონო შეძენა-შენახვა – 8-დან 20 წლამდე ან უვადო თავისუფლების აღკვეთას ითვალისწინებდა.

2025 წლის 6 აგვისტოს თბილისის საქალაქო სასამართლოს მოსამართლე რომეო ტყეშელაშვილმა გიორგი ახობაძე უდანაშაულოდ ცნო და სასამართლო დარბაზიდან გაათავისუფლა. მოსამართლემ გადაწყვეტილება მტკიცებულებათა არასაკმარისობის გამო მიიღო.

საჯარო სივრცეში გამოთქმული მოსაზრებების გამო მოქალაქეების წინააღმდეგ ადმინისტრაციული დავები, შსს-ში ახლად შექმნილი “სიძულვილის ენის წინააღმდეგ ბრძოლის სამმართველოს” ოქმების საფუძველზე იწყება. ახალი სამმართველო შსს-ში 1 ივნისიდან ფუნქციონირებს. სამმართველოს ამოცანაა საჯარო სივრცეში გავრცელებული ადამიანის ღირსების შემლახველი, შეურაცხმყოფელი ან სიძულვილის ენის შემცველი განცხადებების მონიტორინგი და პროაქტიული გამოვლენა, თუ ისინი ადმინისტრაციული სამართალდარღვევის ნიშნებს შეიცავს.

ირაკლი კობახიძე საგამოძიებო მედია “მონიტორის” დისკრედიტაციას ცდილობს

დეზინფორმაციისთვის სანქცირებულმა “Postv”-იმ ფეისბუკზე გაავრცელა, პრემიერ-მინისტრ ირაკლი კობახიძის კომენტარი, რომელიც საგამოძიებო მედია “მონიტორის” დისკრედიტაციას ემსახურება. გავრცელებული ვიდეოს აღწერაში “Postv” წერს: “პრემიერ-მინისტრი სტუდია მონიტოირს მიერ გავრცელებულ დეზინფორმაციაზე”.

პრემიერ მინისტრ კობახიძის განცხადებამდე, ერთი დღით ადრე,“მონიტორმა” გამოაქვეყნა ახალი ჟურნალისტური გამოძიება, რომელიც ეხებოდა ბიძინა ივანიშვილის ოჯახის ბანკის – “ქართუ ბანკის”  მიერ თბილისის ცენტრში, ყოფილი სასტუმრო “საქართველოს” შენობის გასხვისებას.

ირაკლი კობახიძემ “მონიტორის” გამოძიებას “მორიგი მანიპულაცია” უწოდა. 

მანამდე, ამავე ჟურნალისტური გამოძიების გამო, “მონიტორის” დისკრედიტაცია თბილისის მერმა კახი კალაძემ სცადა.

კოორდინირებული კიბერშეტევის მორიგი მცდელობის შედეგად “მონიტორის” YouTube არხი გაითიშა

25 ივლისს, საგამოძიებო მედია “მონიტორის” YouTube არხი გაითიშა.  გავრცელებულ განცხადებაში  მედიასაშუალება აღნიშნავს, რომ მათ წინააღმდეგ კოორდინირებული კიბერშეტევა განხორციელდა:

“YouTube-ზე გაასაჩივრეს (ე.წ. დაარეპორტეს) ჩვენი 3 მასალა: პირველი ეხება თბილისის მერის, კახა კალაძის მეუღლის, ანა არეშიძის Hermès-ის კოლექციას; მეორე მასალა შეეხება სანქცირებულ მოსამართლეებს; მესამე კი არის ჩვენი ვრცელი ჟურნალისტური გამოძიების ნაწილი, რომელიც ეხება სიგარეტზე აქციზის ფასის ცვლილებას – ის ხელისუფლებასთან დაახლოებული ბიზნესმენის, ვანო ჩხარტიშვილის ბიზნესინტერესებს აკმაყოფილებდა” წერია განცხადებაში.

„მონიტორი“ ამ ტიპის შეტევებს დამოუკიდებელი მედიის გაჩუმებისა და საზოგადოებისთვის ობიექტური ინფორმაციის მიწოდების შეზღუდვის მორიგ მცდელობად განიხილავს. “თუმცა, მსგავსი მეთოდებით ჩვენს საქმიანობას ხელს ვერ შეუშლიან“ – აღნიშნულია განცხადებაში.

აღსანიშნავია, რომ “მონიტორის” სოციალურ ქსელებზე კოორდიბირებული შეტევა, მანამდე ივლისის დასაწყისში დაფიქსირდა, როცა Meta-მ “მონიტორის” რამდენიმე მასალა ე.წ რეპორტების შემდეგ წაშალა. როგორც “მონიტორის” განცხადებაშია აღნიშნული, Meta-მ საჩივრის შემდეგ, აღადგინა მასალები.

ამჯერად, “„მონიტორის“ გუნდი აქტიურად მუშაობს კოორდინირებული შეტევით გამოწვეული პრობლემის მოსაგვარებლად და არხის (იგულისხმება Youtube)დროულად აღსადგენად” წერია განცხადებაში.

დისკრედიტაციული კამპანიის შემდეგ იუმორისტ ონისე ოქრიაშვილს სახლთან რამდენიმე პირი თავს დაესხა

22 ივლისს, სამოქალაქო აქტივისტსა და იუმორისტ ონისე ოქრიაშვილს სახლთან რამდენიმე პირი დახვდა და თავს დაესხა. გავრცელებულ ვიდეოკადრებში ჩანს, რომ ოქრიაშვილს სახლთან რამდენიმე პირი ფიზიკურად უსწორდება. თავდასხმის შემდეგ ოქრიაშვილი კლინიკაში გადაიყვანეს.

ოქრიაშვილის მეუღლის, მარიამ სამუშიას განცხადებით, მას გამოკვლევები უტარდება, რათა დადგინდეს, აქვს თუ არა დაზიანებები. „ყვირილი გავიგე სახლთან, დავურეკე ონისეს და აღმოჩნდა, რომ მას დაესხნენ თავს. ონისეს ახლა უტარებენ გამოკვლევებს, რომ გაარკვიონ, აქვს თუ არა დაზიანებები. დღეს ვსაუბრობდით, რომ ვაპირებდით ჩივილს იმ ცილისწამების გამო, რაც გაავრცელა პროპაგანდისტულმა მედიამ და დღეს სცემეს ონისე. ეს არის ხელოვნურად გაღვივებული ზიზღი“, – განაცხადა მარიამ სამუშიამ.

თავდასხმას წინ უძღოდა პროსამთავრობო მედიასაშუალებების მიერ ოქრიაშვილის წინააღმდეგ წარმოებული დისკრედიტაციული კამპანია. რამდენიმე დღის განმავლობაში პროსამთავრობო არხები მას აკრიტიკებდნენ კომედიური YouTube-შოუს, „პანჩლაინ თერაპიის“, ერთ-ერთ ეპიზოდში ნოდარ დუმბაძის ხსენების გამო. ოქრიაშვილის განმარტებით, სადავო ფრაზა არა მწერლის შეურაცხყოფას, არამედ ჰიპოთეტურ კონტექსტში ნათქვამ კომედიურ შედარებას წარმოადგენდა. ონისე ოქრიაშვილი კომიკოსია და ბოლო პერიოდში აქტიურად არის ჩართული საპროტესტო მოძრაობაში. ის მონაწილეობს სხვადასხვა სოლიდარობის აქციაში, მათ შორის, თავისუფალი სიტყვის შეზღუდვისა და უკანონო პატიმრობების წინააღმდეგ გამართულ პროტესტებში.

შინაგან საქმეთა სამინისტროს ცნობით, ონისე ოქრიაშვილზე ძალადობის ბრალდებით ერთი პირი დააკავეს. შსს-მ განაცხადა, რომ ონისე ოქრიაშვილზე თავდამსხმელი ვაკე-საბურთალოს პოლიციის სამმართველოში  თავად გამოცხადდა. 

მიუხედავად თავდასხმისა, ონისე ოქრიაშვილის წინააღმდეგ დისკრედიტაციული კამპანია არ შეწყვეტილა. პროსამთავრობო მედიასაშუალებები კვლავ ავრცელებენ მის ვიდეოებსა და ფრაგმენტებს სტენდაფებიდან და პოდკასტებიდან, კონტექსტიდან ამოგლეჯილი ფორმით. ამავე დროს, იმავე არხებზე ვრცელდება თავდასხმაში ბრალდებული პირის მხარდამჭერი შინაარსის მასალები, სადაც ის წარმოჩენილია არა როგორც ძალადობაში ბრალდებული პირი, არამედ როგორც ადამიანი, რომელმაც თითქოს „ქართული ღირსება“, მართლმადიდებლობა, ტრადიციები და ნოდარ დუმბაძის სახელი დაიცვა. აღნიშნული გზავნილები კოორდინირებულად ვრცელდება როგორც ტელეკომპანია „იმედის“, ისე „რუსთავი 2-ის“ პლატფორმებზე. 

ამ ფონზე, პროკურატურა ბრალდებულის მიმართ აღკვეთის ღონისძიების სახით მხოლოდ 5000 ლარის გირაოს გამოყენებას ითხოვს. საკითხს გამოეხმაურა „ქართული ოცნების“ დეპუტატი დიმიტრი სამხარაძეც, რომელმაც განაცხადა, რომ მზად არის, დეპუტატის მანდატი გამოიყენოს და, ნიკო ხურცილავას სურვილის შემთხვევაში, თავდებში დაუდგეს, რათა ის გირაოს სანაცვლოდ გათავისუფლდეს.