საქართველოს პარლამენტის თავმჯდომარე

შალვა პაპუაშვილი „სინათლე მედიის“ დისკრედიტაციას და დაშინებას ცდილობს

„ქართული ოცნების“ პარლამენტის თავმჯდომარე, შალვა პაპუაშვილი გამოეხმაურა პროსამთავრობო ტელევიზია „იმედის“ ეთერში გასულ სიუჟეტს დამოუკიდებელი ონლაინმედიების ერთობის, „სინათლე მედიას“ წინააღმდეგ და მათი დისკრედიტაცია და დაშინება ცადა.

შალვა პაპუაშვილმა თქვა, რომ ონლაინმედიები გვერდს უვლიან კანონს და ისინი „სისხლის სამართლის“ დანაშაულის ჩადენაში დაადანაშაულა.

„[ონლაინმედიები] იგონებენ სქემებს, როგორ აუარონ კანონმდებლობას და ამ სქემის ნაწილი არის შეზღუდვების დარღვევა, როცა ფული არადეკლარირებულად მოძრაობს საქართველოს ტერიტორიაზე. ამიტომ, რა თქმა უნდა, ყურადღება არის მისაქცევი ამ ყველაფერზე. ვისი კომპეტენციაც არის, ის აკვირდება ამ პროცესებს. სადაც ნახავს დანაშაულის ნიშნებს, იქ შესაბამისი რეაგირება იქნება“, – განაცხადა შალვა პაპუაშვილმა.

23 ნოემბერს პროსახელისუფლებო ტელევიზიის, „იმედის“ ეთერში „სინათლე მედიის“ წინააღმდეგ პროპაგანდისტული სიუჟეტი გავიდა.

„სინათლე მედია“ 22 დამოუკიდებელი ონლაინმედიის ერთობაა, რომელიც მას შემდეგ შეიქმნა, რაც „ქართული ოცნების“ პარლამენტის მიერ მიღებულმა კანონებმა და საკანონმდებლო ცვლილებებმა ონლაინმედიები უმძიმეს მდგომარეობაში ჩააყენა. „იმედის“ ეთერში გასული სიუჟეტი, რომლის მიზანი აღნიშნული მედიების დისკრედიტაცია იყო, ამტკიცებდა, თითქოს მედიები “უცხოური სპეცსამსახურების” დაკვეთით მუშაობდნენ და “ანტისახელმწიფოებრივ” საქმიანობაში იყვნენ ჩართულები.

პარლამენტში უსაფრთხოების ყვითელი დონეა – ონლაინ მედიას შენობაში არ უშვებენ

26 ნოემბერს, საქართველოს პარლამენტის შენობაში უსაფრთხოების „ყვითელი დონე“ ამოქმედდა, რომელიც ონლაინმედიას პარლამენტში მუშაობას სრულად უზღუდავს. შეზღუდვა „ქართული ოცნების“ პრემიერ-მინისტრის, ირაკლი კობახიძის სიტყვით გამოსვლას უკავშირდება.

პარლამენტში „ყვითელი დონის“ მოქმედების დროს შენობაში მხოლოდ ტელემაუწყებლების ჟურნალისტები (თითოეული მაუწყებლიდან არაუმეტეს სამი ჯგუფისა) და მოწვეული სტუმრები დაიშვებიან.

მედიის სადაო შემზღუდავი წესები საქართველოს პარლამენტმა 2023 წლის 4 სექტემბრის N1/259/23 ბრძანებით დაამტკიცა

“ნეტგაზეთის” დისკრედიტაციის მორიგი მცდელობა პარლამენტის თავმჯდომარის მიერ

25 ოქტომბერს, პარლამენტის თავმჯდომარემ შალვა პაპუაშვილმა კვლავ სცადა “ნეტგაზეთის” დისკრედიტაცია. შალვა პაპუაშვილმა საკუთარ სოციალურ ქსელში გამოქვეყნებულ პოსტში “ნეტგაზეთი” “ტერორისტების მხარდამჭერ პროპაგანდისტული მედიად” მოიხსენია.

პაპუაშვილმა პოსტს დაურთო “ნეტგაზეთის” სტატიის ფოტო, სადაც მედია პრო-ევროპული აქციის დროს დაკავებულ ზვიად კვარაცხელიას “სინდისის პატიმრად” მოიხსენიებს. სწორედ ამ ტერმინმა გააღიზიანა “ქართული ოცნები” პარლამენტის თავმჯდომარე. კრიტიკული მედიები და მათ შორის “ნეტგაზეთი” პრო-ევროპული აქციების დროს დაკავებულების გასაშუქებლად ტერმინს “სინდისის პატიმარი” ხშირად იყენებენ.

შალვა პაპუაშვილი საკუთარ სოციალური ქსელის მეშვეობით კრიტიკული მედიების და მათ შორის ონლაინ მედია “ნეტგაზეთის” დისკრედიტაციას ხშირად ცდილობს.

“ქართული ოცნების” პარლამენტის თავმჯდომარე, შალვა პაპუაშვილი, “TV პირველს” “ხაზარაძის ტელევიზიად” მოიხსენიებს

2025 წლის 4 ოქტომბერს, ადგილობრივი თვითმმართველობის არჩევნების დღეს (რომელსაც პროდასავლური ოპოზიციის დიდმა ნაწილმა და საზოგადოებამ ბოიკოტი გამოუცხადა), “ქართული ოცნების” პარლამენტის თავმჯდომარემ, შალვა პაპუაშვილმა, სასაცილო და კურიოზული უწოდა “TV პირველის” მიერ საარჩევნო უბნებიდან გავრცელებულ რამდენიმე ინფორმაციას და ტელეკომპანია “ხაზარაძის ტელევიზიად” მოიხსენია.

“დღეს მთელი დღეა, ხაზარაძის ტელევიზია “TV პირველი” ცდილობს, რომ სკანდალები ააგოროს, თუმცა მე მგონი საკუთარ თავს დასაცინად იქმნიან”, – ამბობს შალვა პაპუაშვილი სპეციალურ ბრიფინგზე და შემდეგ ჩამოთვლის “TV პირველის” რამდენიმე სიუჟეტს საარჩევნო უბნიდან, რომლებიც, მისი აზრით, მხოლოდ სასაცილოა ამ მასალებს შორის არის სუფრა საარჩევნო უბანზე და სავარაუდო მოსყიდვის ფაქტი. “არ ვიცი ახლა თუ ხაზარაძე აშიმშილებს თავის ჟურნალისტებს”, – ამბობს პაპუაშვილი და ამატებს, რომ არაფერია იმაში უცნაური, ვინმე თუ ზრუნავს საარჩევნო ადმინისტრაციის კვებაზე. და, შემდეგი სიუჟეტის (სავარაუდო მოსყიდვის ფაქტის) განხილვის შემდეგ ისევ ამბობს: “აი, ასეთ დონზე დაეცა ხაზარაძე, რომ არათუ ჟრნალისტურ ეთიკას გადააბიჯებინა მისი ტელევიზიის ყველა წევრს, არამედ, საერთოდ უკვე სასაცილო კურიოზები არის” (ტაიმკოდი 5:52 – 8:16).

შეგახსენებთ, 4 ოქომბერს არაერთი დამოუკიდებელი მედია გახდა შალვა პაპუაშვილის თავდასხმის სამიზნე, საარჩევნო დარღვევებთან დაკავშირებული ინფორმაციის გავრცელების გამო. მათ შორის, TOK2regions, “პუბლიკა”. და ზოგადად, ბოლო პერიოდში, შალვა პაპუაშვილის მხრიდან მედიებზე თავდასხმა და მათი დისკრედიტაცია მანკიერ ტენდენციად იქცა.

“ქართული ოცნების” პარლამენტის თავმჯდომარე, შალვა პაპუაშვილი, ისევ ესხმის თავს დამოუკიდებელ გამოცემა “პუბლიკას”

2025 წლის 4 ოქტომბერს, ადგილობრივი თვითმმართველობის არჩევნების დღეს (რომელსაც პროდასავლური ოპოზიციის დიდმა ნაწილმა და საზოგადოებამ ბოიკოტი გამოუცხადა), “ქართული ოცნების” პარლამენტის თავმჯდომარემ, შალვა პაპუაშვილმა, დამოუკიდებელი გამოცემა “პუბლიკა” “უცხოეთიდან დაფინანსებულ, პროპაგანდისტულ” მედიად მოიხსენია და დეზინფორმაციის გავრცელების კოორდინირებულ ქმედებაში დაადანაშაულა.

შალვა პაპუაშვილი “პუბლიკას” ერთ-ერთ ოპოზიციონერ აქტივისტზე მომხდარი თავდასხმის შესახებ გავრცელებული მასალის გამო დაესხა თავს. (არჩევნებამდე ერთი დღით ადრე, თბილისში, “ერთიანი ნაციონალური მოძრაობის” ახალგაზრდა წევრს, იგორ ნარმანიას, რამდენიმე ადამიანი დაესხა თავს და ფიზიკური დაზიანებები მიაყენა). “პუბლიკა”, უცხოეთიდან დაფინანსებული პროპაგანდისტული მედია, რომელიც ავრცელებს ყალბ ინფორმაციას იგორ ნარმანიასთან დაკავშირებით”(ტაიმკოდი: 3:55 – 4:37) – ამ ტექსტით, შალვა პაპუაშვილი “პუბლიკას” ჩამოთვლის იმ აქტორებს შორის, რომლებიც “კოორდინირებულად მოქმედებენ და დეზინფორმაციას ავრცელებენ, რითაც ერევიან ქართულ არჩევნებში”.

გამოცემა “პუბლიკამ” შალვა პაპუაშვილის მორიგი თავდასხმა მათ მიმართ სიძულვილისა და ძალადობის წახალისებად შეაფასა. “ერთხელ უკვე გამოვეხმაურეთ შალვა პაპუაშვილის თავდასხმას და კვლავ ვახსენებთ: ,,პუბლიკა” ჟურნალისტური საქმიანობის ფარგლებში აშუქებს ქვეყანაში მიმდინარე მოვლენებს, მათ შორის საპროტესტო აქციებს, ანონსებს და ა.შ შალვა პაპუაშვილი ცდილობს ზეწოლას ჩვენს სარედაქციო დამოუკიდებლობაზე, ახალისებს ჩვენ მიმართ სიძულვილს და ძალადობას. ჩვენი გამოცემის, რომელიმე ჟურნალისტს რამე თუ მოუვა, პასუხისმგებელი იქნება პაპუაშვილი”, – ამ პოსტით უპასუხა შალვა პაპუაშვილს გამოცემის რედაქტორმა ლიკა ზაკაშვილმა.

ბოლო პერიოდში “პუბლიკა” არაერთხელ გახდა შალვა პაპუაშვილის თავდასხმის სამიზნე. მაგალითად, 2025 წლის 19 მაისს, პაპუაშვილი “პუბლიკას” თავს დაესხა დეპუტატ მარიამ ლაშხზე გავრცელებული ინფორმაციის გამო. უფრო ადრე, 1-ელ თებერვალს კი სისხლის სამართლის დანაშაულის ჩადენის მოწოდებაში დაადანაშაულა აქციის შესახებ ინფორმაციის გავრცელებისთვის.

“ქართული ოცნების” პარლამენტის თავმჯდომარემ, შალვა პაპუაშვილმა, TOK2Region-ს “დეზინფორმაციის გამავრცელებელი პარტიული მედია” უწოდა

2025 წლის 4 ოქტომბერს, ადგილობრივი თვითმმართველობის არჩევნების დღეს (რომელსაც პროდასავლური ოპოზიციის დიდმა ნაწილმა და საზოგადოებამ ბოიკოტი გამოუცხადა), “ქართული ოცნების” პარლამენტის თავმჯდომარემ, შალვა პაპუაშვილმა, დამოუკიდებელი სტუდია TOK2region დეზინფორმაციის გავრცელებაში დაადანაშაულა და “პარტიულ მედიად” მოიხსენია. პაპუაშვილის განცხადება მოჰყვა TOK2region-ის მიერ ახალციხის მე-4 საარჩევნო უბნიდან გავრცელებულ ვიდეომასალას, რომელშიც ჩანს ორი ამომრჩეველი ერთ საარჩევნო კაბინაში.

“ქართული ოცნების” პარლამენტის თავმჯდომარემ განაცხადა, რომ სინამდვილეში ერთ-ერთ ამომრჩეველს მხედველობის პრობლემების გამო მეორის დახმარება სჭირდებოდა. “ახალციხე, მე-4 უბანი, სადაც ასევე პარტიული მედიის მიერ გავრცელდა დეზინფორმაცია თითქოს ადგილი ჰქონდა ხმის მიცემის კონტროლს. სინამდვილეში საქმე ეხებოდა ამომრჩეველს, რომელსაც აქვს დაქვეითებული მხედველობა, მან ითხოვა დახმარება და გაუწიეს დახმარება ბიულეტენის შევსებისას” , – ამბობს შალვა პაპუაშვილი, ფონად ეკრანზე ჩანს TOK2region-ის კადრი, რომელსაც დიდი ასოებით აწერია FAKE [ტაიმკოდი: 1:11 -1:41].

პაპუაშვილის განცხადების შემდეგ, TOK2region-მა გამოაქვეყნა სრული ვიდეომასალა, რომელშიც ჩანს, რომ ამომრჩეველს დახმარება არ უთხოვია, პირიქით, მას შემდეგ, რაც უბნის კომიიის თავმჯდომარემ შენიშნა, რომ მედია ამ ფაქტს იღებდა, მან ამომრჩევლებს შენიშვნა მისცა. “დეზინფორმაციაა, ის ბრალდება რასაც ჩვენი მედიის შესახებ თავად შალვა პაპუაშვილი ავრცელებს, როცა დამოუკიდებელ რედაქციას ,,პარტიულ მედიას“ უწოდებს და ბრალს სდებს იმ ტექსტის გავრცელებაში, რაც TOK2region-ს არსად გაუვრცელებია, რასაც ჩვენი რედაქცია განიხილავს მორიგ თავდასხმად”, – ნათქვამია TOK2region-ის განცხადებაში.

შალვა პაპუაშვილის მხრიდან დამოუკიდებელ მედიაზე თავდასხმა და მათი დისკრედიტაცია, უკვე დიდი ხანია მანკიერ ტენდენციად იქცა. CMIS ინციდენტების არქივში “ქართული ოცნების” პარლამენტის თავმჯდომარის მხრიდან მედიაზე თავდასხმის 10-მდე მეტი შემთხვევა იძებნება. დამოუკიდებელი და კრიტიკული მედია, შალვა პაპუაშვილის მხრიდან, 4 ოქტომბერსაც განსაკუთრებული სამიზნე იყო.

“ქართული ოცნების” პარლამენტის სპიკერი, შალვა პაპუაშვილი, დამოუკიდებელ ონლაინგამოცემა “ნეტგაზეთზე” თავდასხმას აგრძელებს

2025 წლის 22 სექტემბერს, “ქართული ოცნების” პარლამენტის თავმჯდომარემ, შალვა პაპუაშვილმა, დამოუკიდებელი ონლაინ გამოცემა “ნეტგაზეთი” პროპაგანდისტულ მედიად მოიხსენია.

შალვა პაპუაშვილმა “ნეტგაზეთის” საწინააღმდეგო განცხადება საკუთარ სოციალურ ქსელში გააზიარა. პოსტს პაპუაშვილმა დაურთო სქრინი “ნეტზაგეთის” სტატიიდან, სადაც მიხეილ ყაველაშვილი “ქართული ოცნების პრეზიდენტად არის მოხსენიებული”.

“ არ არსებობს ტესტი, რომელიც აჩვენებს, რომ ახალი ამბის ამგვარად გამშუქებელი პროპაგანდისტული მედია არ არის. არ არსებობს ტესტი, რომელიც აჩვენებს, რომ ის, ვინც ამათ ფულს უხდის პროპაგანდის დამფინანსებელი არ არის…” დაწერა პაპუაშვილმა.
ბოლო პერიოდში, შალვა პაპუაშვილი მსგავსი პოსტებით ხშირად ესხსმის თავს “ნეტგაზეთს”. მან მსგავსი განცხადება “ნეტგაზეთის” წინაამდეგ, 9 სექტემბერსაც გაავრცელა. “მედიის, ინფორმაციისა და სოციალური კვლევების ცენტრის” არქივში იძებნება მისი სიტყვიერი თავდასხმები გამოცემებზე: “პუბლიკა”, On.ge, “ტაბულა”. ასევე, გამოცემა “მთის ამბების” რედაქტორზე “გელა მთივლიშვილზე”. პაპუაშვილმა სცადა “ნეტგაზეთი”/”ბათუმელების” პატიმრობაში მყოფი მენეჯერის, მზია ამაღლობელის დისკრედიტაციაც და ისიც მოიხსენია როგორც “ძალადობის წამქეზებელი”.

“ქართული ოცნების” პარლამენტის თავმჯდომარე, შალვა პაპუაშვილი, აგრძელებს გამოცემა “ნეტგაზეთზე” თავდასხმას

2025 წლის 9 სექტემბერს, “ქართული ოცნების” პარლამენტის თავმჯდომარემ, შალვა პაპუაშვილმა, დამოუკიდებელი ონლაინ გამოცემა “ნეტგაზეთი” “ძალადობის წამქეზებელ, პროპაგანდისტული პლატფორმად, მოძალადე მედიად” მოიხსენია.

შალვა პაპუაშვილის ეს განცხადება მოჰყვა “ნეტგაზეთის” მიერ 9 სექტემბერს, “ქართული ოცნების” თბილისის მერობის კანდიდატის, კახა კალაძის შტაბთან დაანონსებული საპროტესტო აქციის შესახებ ინფორმაციის გავრცელებას. ამავე პოსტში შალვა პაპუაშვილი იყენებს ანტიდასავლურ რიტორიკას და თავს ესხმის დონორ ორგანიზაციებს.

“ბრიუსელის მიერ დაფინანსებული “ნეტგაზეთი”, არა მარტო ძალადობის პროპაგანდას უზრუნველყოფს, არამედ თავადვე აორგანიზებს ძალადობრივ თავდასხმას “ქართული ოცნების” საარჩევნო შტაბზე. მიკერძოებული, პარტიული, ყვითელი, ყველანაირი მედია გვინახავს, მაგრამ “მოძალადე მედია” ის ახალი ფენომენია, რომელიც, რუანდის “ათასი ბორცვის რადიოს” მაგალითზე, უცხოელი დონორების შექმნილი პროდუქტია”, – წერს “ქართული ოცნების” პარლამენტის თავმჯდომარე.

ეს არ არის პირველი შემთხვევა, როდესაც შალვა პაპუაშვილი თავს ესხმის და პროპაგანადისტულ მედიად მოიხსენიებს დამოუკიდებელ ონლაინ მედიას. “მედიის, ინფორმაციისა და სოციალური კვლევების ცენტრის” არქივში იძებნება მისი სიტყვიერი თავდასხმები გამოცემებზე: “პუბლიკა”, On.ge, “ტაბულა”. ასევე, გამოცემა “მთის ამბების” რედაქტორზე “გელა მთივლიშვილზე”. პაპუაშვილმა სცადა “ნეტგაზეთი”/”ბათუმელების” პატიმრობაში მყოფი მენეჯერის, მზია ამაღლობელის დისკრედიტაციაც და ისიც მოიხსენია როგორც “ძალადობის წამქეზებელი”

“ქართული ოცნების” პარლამენტის თავმჯდომარე გამოცემების ”ნეტგაზეთის” და “ბათუმელების” წინასწარ პატიმრობაში მყოფი მენეჯერის დისკრედიტაციას ცდილობს

2025 წლის 20 ივნისსს, “ქართული ოცნების” პარლამენტის თავმჯდომარე შალვა პაპუაშვილი, ონლაინ გამოცემების “ნეტგაზეთი” და “ბათუმელების” წინასწარ პატიმრობაში მყოფი მენეჯერის, მზია ამაღლობელის, დისკრედიტაციას შეეცადა სოციალურ მედიაში გავრცელებული პოსტით: “ძალადობის მიმართ სოლიდარობა, შემდგომი ძალადობის წაქეზებაა.”

პაპუაშვილის ეს განცხადება მოჰყვა ევროკავშირის დელეგაციის მიერ გავრელებულ პოსტს, რომელშიც დელეგაცია სოლიდარობას უცხადებს გამოცემა “ბათუმელებს” და მზია ამაღლობელს და მოუწოდებს “ქართულ ოცნებას” “შეწყდეს დემოკრატიულ ინსტიტუტებსა და ფუნდამენტურ უფლებებზე სისტემური თავდასხმა.” ევროკავშირის დელეგაციის პოსტს თან ახლავს ფოტო, რომელზეც ევორკავშირის ელჩი და “ბათუმელების” რედაქტორი არიან გადაღებული.

“ქართული ოცნების” პარლამენტის თავმჯდომარე ამჯერად გამოცემა “ტაბულას” დისკრედიტაციას ცდილობს

2025 წლის 11 ივნისსს, “ქართული ოცნების” პარლამენტის თავმჯდომარე შალვა პაპუაშვილი, ონლაინ გამოცემა “ტაბულას” “ექსტრემისტულ გამოცემას” და “პარტიულ კედლის გაზეთს” უწოდებს. პაპუაშვილის ეს განცხადებები მოჰყვა ბრიტანეთის საელჩოს განცხადებას, რომლის თანახმადაც, საელჩომ, “ქართული ოცნების” მიერ გრანტებთან დაკავშირებული პროცედურების გაჭიანურების გამო, საარჩევნო მონიტორინგისთვის განკუთვნილი გრანტები გააუქმა. ამ საგრანტო კონკურსის ერთ-ერთი გამარჯვებული იყო “ტაბულა”, რომელსაც უნდა მიეღო 50 000 ფუნტი ამომრჩეველთა ინფორმირებისათვის.

“ბრიტანეთის საელჩომ საკუთარი თავი ამხილა ექსტრემიზმის დაფინანსებაში… თქვენ ნახეთ, მათ შორის თავის თავი დაასახელა “ტაბულამ”, რო მას უნდა მიეღო დაახლოებით 200 000 ლარი საარჩევნო საკითხებისთვის და ასევე, გასაჯაროვდა ის ორგანიზაციები, ვის დაფინანსებასაც აპირებდა. დიდი ხანი სულ ვფიქრობდი, სხვათა შორის, ვინ აფინანსებს “ტაბულას”. ტაბულა ეს არის ჩვეულებრივი პარტიული, პროპაგანდისტული კედლის გაზეთი, ეს არის ერთი კონკრეტული პარტიის პროპაგანდისტული კედლის გაზეთი, თავისი შინაარსით, ამას დიდი მონიტორინგი და დაკვირვებაც არ სჭირდება, უბრალოდ რომ გადაავლოთ თვალი, ნახავთ, რომელი პარტიის პროპაგანდას ეწევა ეს მედია პლატფორმა. ანუ, ბრიტანეთის საელჩო აღიარებს, რომ ის აპირებდა პროპაგანდა დაეფინანსებინა წინასაარჩევნოდ”, – განაცხადა პაპუაშვილმა “რუსთავი 2-ის” ეთერში.

პაპუაშვილი მეორე დღესაც გამოეხმაურა ამ საკითხს სოციალურ ქსელში. მან გამოცემა “ექსტრემიზმის პროპაგანდაში” დაადანაშაულა და ბრიტანეთის საელჩოს მხრიდან “ტაბულას” დაფინანსების გამოცდილებით დაინტერესდა.

შალვა პაპუაშვილს გამოცემის რედაქტორმა სარედაქციო წერილით უპასუხა. წერილში ხაზგასმულია გამოცემის მიუკერძოებელი სარედაქციო პოლიტიკა და ნათქვამია, რომ “რეჟიმის თავდასხმებს” “ტაბულა” მიზანმიმართული დისკრედიტაციის მცდელობად განიხილავს.

ეს არ არის პირველი შემთხვევა, როდესაც შალვა პაპუაშვილი დამოუკიდებელ მედიას თავს ესხმის დისკრედიტაციისა და დაშინების მიზნით. 2025 წლის 19 მაისს, “ქართული ოცნების” პარლამენტის თავმჯდომარემ, შალვა პაპუაშვილმა, გამოცემები “პუბლიკა” და “On.ge” პროპაგანდისტულ მედიებად მოიხსენია და კოორდინირებულ ქმედებასა და ფაქტის მიჩქმალვაში დაადანაშაულა.

განახლება: 2025 წლის 25 ივლისს შალვა პაპუაშვილმა “ტაბულა” კიდევ ერთხელ ახსენა:

“მასპინძელი ხელისუფლების პარტიად მოხსენიებას და ქართველი ხალხის მიმართ მსგავს შეუფერებელ ლაზღანდარობას, უმჯობესი იქნებოდა, თუ ბრიტანეთის ელჩი საკუთარ ქცევაზე გასცემდა ქართველი ხალხის ლეგიტიმურ კითხვას პასუხს: რატომ აპირებდა ექსტრემისტული დღის წესრიგის მქონე ევრონაცების “ტაბულას” და ნაცების “გია ჯაფარიძის” დაფინანსებას, რომელთა გაცხადებული მიზანი თვითმმართველობის არჩევნების ჩაშლაა, ანუ მისივე სიტყვებით რომ ვთქვათ, რომელთა მიზანია “საქართველოს სუვერენიტეტის შესუსტება, შუღლის დათესვა და ქართველი ხალხის ყოველდღიური ცხოვრების შეფერხება”, –დაწერა პაპუაშვილმა სოციალურ ქსელში