სამართლებრივი ინციდენტები

პოლიტიკოსების მიმართ სოციალურ ქსელში გამოთქმული კრიტიკული მოსაზრებების გამო ჟურნალისტები სასამართლოში დაიბარეს

2025 წლის 12 ივნისს, სოციალურ ქსელში, “პოლიტიკოსების “ქართული ოცნების” დეპუტატების მიმართ გამოთქმული კრიტიკული მოსაზრებებისთვის, ექვსი ჟურნალისტი: ეკა მიშველაძე (TV პირველი), ვიკა ბუკია (TV პირველი), მიშა მშვილდაძე (TV ფორმულა), დეა მამისეიშვილი (მთავარი არხი), ვახო სანაია (TV ფორმულა) და ნანუკა ჟორჟოლიანი (დამოუკიდებელი ჟურნალისტი) თბილისის საქალაქო სასამართლოში დაიბარეს. მათ აცნობეს, რომ ედავებიან “ქართული ოცნების’ პოლიტიკოსებისთვის ფეისბუქზე შეურაცხყოფის მიყენებას.

ექვსიდან სამი – ეკა მიშველაძე, მიშა მშვილდაძე და დეა მამისეიშვილი, სასამართლომ სამართალდამრღვევად ცნო და ჯარიმები დააკისრა. მიშა მშვილდაძეს და ეკა მიშველაძეს 4-4 ათასი ლარი, დეა მამისეიშვილს კი 3 ათასი ლარი.

მიშა მშვილდაძე დააჯარიმეს “ქართული ოცნების” პარლამენტის თავმჯდომარის, შალვა პაპუაშვილის შესახებ 8 თებერვალს დაწერილი პოსტის გამო. დეა მამისეიშვილს ჯარიმა დაეკისრა 2025 წლის 25 თებერვლის პოსტის გამო, რომელშიც ის “ქართული ოცნების” აღმასრულებელ მდივანს, მამუკა მდინარაძეს ახსენებს. ეკა მიშველაძის დაჯარიმება კი გამოიწვია 31 მაისს დეპუტატ მარიამ ლაშხის შესახებ დაწერილმა სტატუსმა.

ნანუკა ჟორჟოლიანს “ქართული ოცნების” წარმომადგენლების, დეპუტატების თეა წულუკიანისა და მარიამ ლაშხის “შეურაცხყოფას” ედავებიან. მის საქმეზე გადაწყვეტილება 17 ივნისს გამოცხადდება. ასევემ მარიამ ლაშხის შეურაცხყოფისთვის უჩივლეს ვიკა ბუკიას. მისი საქმე 18 ივნისამდე გადაიდო. ასევე 18 ივნისამდე გადაიდო ვახო სანაიას საქმე, რომელსაც ედავებიან “ქართული ოცნების” პარლამენტის თავმჯდომარის შალვა პაპუაშვილის და დეპუტეტების: თეა წულუკიანისა და ირაკლი ზარქუას შეურაცხყოფას.

ექვსივე ჟურნალისტის შემთხვევაში, საჩივრების სამართლებრივი საფუძველი გახდა ადმინისტრაციულ სამართალდარღვევათა კოდექსის ახლად ამოქმედებული 173^16_ე მუხლი, რომელიც პასუხისმგებლობას ითვალისწინებს ისეთი ქმედებებისთვის როგორიცაა:სახელმწიფო-პოლიტიკური თანამდებობის პირის, პოლიტიკური თანამდებობის პირის, სახელმწიფო მოსამსახურის/ მასთან გათანაბრებული პირის ან/და საჯარო მოსამსახურის სიტყვიერი შეურაცხყოფა, ლანძღვა-გინება, შეურაცხმყოფელი გადაკიდება ან/და სხვაგვარი შეურაცხმყოფელი ქმედების განხორციელება სამსახურებრივი მოვალეობის შესრულების დროს ან სამსახურებრივი მოვალეობის შესრულებასთან/საქმიანობასთან დაკავშირებით. ამ ქმედებისთვის განსაზღვრულია 1 500-დან 4 000-მდე ლარი ჯარიმა ან 45 დღემდე პატიმრობა

საქართველოს ახალგაზრდა იურისტთა ასოციაციის შეფასებით, სოციალურ ქსელში გამოქვეყნებული პოსტები, თუ ისინი არ შეიცავენ რეალური რისკის შემცველ მუქარას, და მიმართულია პოლიტიკოსების მიმართ, რომელთაც აქვთ თმენის მაღალი ვალდებულება, დაცულია გამოხატვის თავისუფლებით. “ამ სტანდარტის საწინააღმდეგოდ გაკეთებული ნებისმიერი სასამართლო განმარტება იქნება მასობრივი ცენზურის პრეცედენტი, – ნათქვამია ორგანიზაციის განცხადებაში.

საკანონმდებლო ცვლილებები ზღუდავს მედიის გამოხატვის თავისუფლებას

12 ივნისს, პარლამენტმა მესამე მოსმენით, 84 ხმით მიიღო „გრანტების შესახებ“ კანონში ცვლილებები. კერძოდ, ცვლილებით გრანტად ჩაითვლება ტექნიკური და საექსპერტო დახმარება, ცოდნის გაზიარება და სხვა მსგავსი ტიპის კონტრიბუციაც.

აღნიშნული ცვლილება მოსდევს კანონში უკვე შეტანილ, აპრილის ჩანაწერს, რომლის მიხედვითაც, უცხოური გრანტების მისაღებად საჭირო გახდა მთავრობის ან მისი უფლებამოსილი პირის თანხმობა. “ქართული ოცნება” ამას სახელმწიფოს სუვერენიტეტის დაცვის მექანიზმად აფასებს, მაშინ როცა სამოქალაქო სექტორის შეფასებით ცვლილებები სამოქალაქო საზოგადოების განადგურებას ისახავს მიზნად. არასამთავრობო ორგანიზაციებისთვის და მედიისთვის საერთაშორისო გრანტები დამოუკიდებლად მუშაობის ძირითადი წყაროა. აღნიშნული ცვლილებები განიხილება იმ საკანონმდებლო პაკეტის ნაწილად, რომელიც სამოქალაქო საზოგადოებისა და მედიის წინააღმდეგაა მიმართული.

მანამდე, 2025 წლის 16 აპრილს, “ქართულმა ოცნებამ” “გრანტების შესახებ” კანონში მიიღო სხვა ცვლილებები:

გრანტის გამცემმა (დონორმა) გრანტის გაცემაზე თანხმობის მისაღებად უნდა მიმართოს საქართველოს მთავრობას;
გრანტის მიმღები, თანხმობის გარეშე გრანტის მიღების შემთხვევაში დაჯარიმდება გრანტის ორმაგი ოდენობით;
ანტიკორუფციულ ბიუროს ენიჭება დამატებითი უფლებამოსილება, როგორიცაა – პირისგან ფინანსური ანგარიშის მოთხოვნა, ასევე ფიზიკური პირის გამოკითხვის უფლება;
ანტიკორუფციული ბიურო საჯარო დაწესებულებისგან, ფიზიკური პირისგან, იურიდიული პირისგან შეძლებს გამოითხოვოს “განსაკუთრებული კატეგორიის პერსონალური მონაცემი”.

“გრანტების შესახებ” კანონში ცვლილებას არასამთავრობო ორგანიზაციები ერთობლივი განცხადებით გამოეხმაურნენ.

“აღნიშნული კანონი თავისი არსით და მოსალოდნელი შედეგით არის ხალხის დევნის აქტი და მიზნად ისახავს მოქალაქეების მმართველი პარტიის სადამსჯელო სისტემის პირისპირ დატოვებას და საერთაშორისო საზოგადოებისთვის მათი თანადგომის აკრძალვას“, – ნათქვამია არასამთავრობო ორგანიზაციების განცხადებაში.

ონლაინ გამოცემა “ტაბულას”, “გრანტების კანონის” საფუძველზე, კუთვნილი გრანტის მიღება შეეზღუდა

2025 წლის 11 ივნისს ცნობილი გახდა, რომ ონლაინ გამოცემა “ტაბულა” ვეღარ მიიღებს გაერთიანებული სამეფოს მთავრობის გრანტს, 50 ათასი ფუნტის ოდენობით, რომელიც მოგებული ჰქონდა კონკურსის წესით. როგორც გამოცემა წერს, ეს თანხა უნდა მოხმარებოდა თვითმმართველობის არჩევნების მიმდინარეობის შესახებ ქართული საზოგადოების ინფორმირებას.

გამოცემის განცხადებიდან ასევე ირკვევა, რომ ბრიტანეთის მთავრობამ, გრანტის მიმღებთა დაცვის მიზნით, ახლახან მიღებული “გრანტების შესახებ კანონის” მოთხოვნების შესაბამისად, “ქართული ოცნების” მთავრობას ნებართვისთვის მიმართა. მთავრობისგან კი მიიღო პასუხი, რაც ვადების გაჭიანურებაზე მიუთითებდა, რის შემდეგაც ბრიტანეთის მთავრობამ პროექტი გააუქმა.

განცხადება ამის შესახებ დღეს ბრიტანეთის მთავრობამაც გაავრცელა. მასში ნათქვამია, რომ გაერთიანებული სამეფო კეთილსინდისიერად ცდილობდა მოეპოვებინა გრანტის დამტკიცების შესახებ თანხმობა რიგ პროექტებზე, რომლებიც მიზნად ისახავდა სამოქალაქო საზოგადოების მხრიდან ამომრჩეველთა განათლებასა და მოქალაქეთა მხრიდან არჩევნების მონიტორინგს, “თუმცა, საქართველოს ხელისუფლებასთან განხილვის შემდეგ, გვაცნობეს, რომ მთავრობის დადგენილება ‘გრანტების დამტკიცების პროცედურის შესახებ’ ჯერ არ არის დასრულებული. შესაბამისად, ამ დრომდე არ არსებობს ‘გრანტების დამტკიცების პროცედურის შესახებ’ გადაწყვეტილებების მიღების მექანიზმები ან ვადები. სამწუხაროდ, ამ გაურკვევლობის გამო, გვიწევს გავაუქმოთ დაგეგმილი საგრანტო წინადადებები, რომლებიც მიზნად ისახავდა დაგეგმილი მუნიციპალური არჩევნების გამჭვირვალობისა და კონკურენტუნარიანობის მხარდაჭერას”, – ნათქვამია განცხადებაში.

“გრანტების შესახებ” კანონში ცვლილება “ქართულმა ოცნებამ” 2025 წლის 16 აპრილს მიიღო. ცვლილებების თანახმად გრანტის გამცემმა (დონორმა) გრანტის გაცემაზე თანხმობის მისაღებად უნდა მიმართოს საქართველოს მთავრობას; გრანტის მიმღები, თანხმობის გარეშე გრანტის მიღების შემთხვევაში დაჯარიმდება გრანტის ორმაგი ოდენობით.

საკანონმდებლო ცვლილებები ზრდის მარეგულირებლის კონტროლის მექანიზმებს მაუწყებლებზე

2025 წლის 12 ივნისს, ერთპარტიულმა პარლამენტმა მესამე მოსმენით მიიღო საკანონმდებლო პაკეტი, რომლითაც ცვლილებები შევიდა, მათ შორის მაუწყებელთა შესახებ კანონში და კომუნიკაციების კომისიას მიენიჭა უფლებამოსილება მაუწყებლების შესახებ კონფიდენციალური ინფორმაცია ბანკებისგან სასამართლოს გზით გამოითხოვოს. აღნიშნულის შესახებ, ახალი თავი დაემატა „ადმინისტრაციულ საპროცესო კოდექსს“.

მედიის ადვოკატირების კოალიციის განცხადებით, “მარეგულირებლისთვის მსგავსი უფლებამოსილების მინიჭების აუცილებლობა საერთოდ არ არსებობს. მეტიც, დამატებითი უფლებები სცილდება ზოგადად უწყების მანდატს. კომისიისთვის საბანკო კონფიდენციალურობის დარღვევის შესაძლებლობის მინიჭება მედიაზე ფინანსური ზეწოლისა და შანტაჟის ახალი იარაღია”.

თავდაპირველად, კანონში “მაუწყებლობის შესახებ” ცვლილებები “ქართული ოცნების” პარლამენტმა 2025 წლის 1 აპრილს მიიღო.

ცვლილების თანახმად სრულად აიკრძალა მაუწყებლების უცხოური დაფინანსება, მნიშვნელოვნად გაიზარდა მარეგულირებელი ორგანოს კომუნიკაციების ეროვნული კომისიის უფლებამოილება, კერძოდ ჟურნალისტების პროფესიული საქმიანობა რეგულირების სფეროში მოექცა.

კანონში შესული ცვლილებების თანახმად იკრძალება ე.წ. “უცხოური ძალისგან” მაუწყებლის მიერ პირდაპირი ან არაპირდაპირი დაფინანსების მიღება და უცხოური ძალის მიერ მაუწყებლის მომსახურების შესყიდვა, გარდა რეკლამისა ან პროდუქტის განთავსებისა.
ცვლილების თანახმად მაუწყებლებს ეკრძალებათ სოციალური რეკლამის განთავსების სანაცვლოდ პირდაპირი ან არაპირდაპირი დაფინანსების მიღება.

კანონის თანახმად, უცხოურ ძალად განიხილება: ა) უცხო სახელმწიფოს ხელისუფლების სისტემის შემადგენელი სუბიექტი; ბ) ფიზიკური პირი, რომელიც არ არის საქართველოს მოქალაქე; გ) იურიდიული პირი, რომელიც საქართველოს კანონმდებლობის საფუძველზე არ არის დაფუძნებული; დ) ისეთი ორგანიზაციული ერთეული ან პირთა სხვა სახის ისეთი გაერთიანება, რომელიც უცხო სახელმწიფოს სამართლის ან/და საერთაშორისო სამართლის საფუძველზეა დაფუძნებული.

ცვლილებით შემოდის ასევე დეტალური რეგულაციები, ტელე და რადიო მაუწყებლობის სტანდარტებთან დაკავშირებით, ფაქტის ჯეროვანი სიზუსტის და პასუხის უფლების შესახებ. აგრეთვე ემატება რეგულაციები ფაქტის სამართლიანობის და მიუკერძოებლობის, პირადი ცხოვრების ხელშეუხებლობის, ფარული მეთოდის გამოყენებით ინფორმაციის მოპოვების და გადაცემის, შეიარაღებული დაპირისპირების, უბედური შემთხვევის და სხვა საგანგებო ვითარების გაშუქების და არასრულწლოვან პირთა დაცვის ცალკეული საკითხების შესახებ.

“საერთაშორისო გამჭვირვალობა საქართველოს” აცხადებს, რომ აღნიშნული კანონები საფრთხეს უქმნის კრიტიკულად განწყობილი დამოუკიდებელი მედიის არსებობას.

ამ კანონებთან ერთად საქართველოში 2024 წლიდან მოქმედებს კანონი “უცხოური გავლენის გამჭვირვალობის შესახებ”, იგივე “რუსული კანონი”, რომელიც გასულ წელს “ქართულმა ოცნებამ” ფართო საზოგადოებრივი წინააღმდეგობის და საერთაშორისო კრიტიკის მიუხედავად მიიღო და რომელიც მიზნად ისახავს იმ არასამთავრობო და მედიაორგანიზაციების “უცხოური ძალის” ინტერესების გამტარებელ ორგანიზაციებად რეგისტრაციას, რომელთა შემოსავლების 20% უცხოური ორგანიზაციებიდან არის მიღებული.

ბათუმის საქალაქო სასამართლოში მზია ამაღლობელის წინააღმდეგ სტიკერის გაკვრის ფაქტზე ახალი სამართალდარღვევის საქმე განიხილება

9 ივნისს, ბათუმის საქალაქო სასამართლო, მზია ამაღლობელის წინააღმდეგ კიდევ ერთ სამართალდარღვევის საქმეს განიხილავს. როგორც 7 მაისს მზია ამაღლობელის წარმომადგენლისა და ახალგაზრდა იურისტთა ასოციაციის ხელმძღვანელის ნონა ქურდოვანიძის მიერ გავრცელებული ინფორმაციით გახდა ცნობილი, ჟურნალისტს შსს კიდევ ერთ სამართალდარღვევას ედავება. ამჯერად, მას შენობის იერსახის დამახინჯებას ედავებიან – 11 იანვრის აქციაზე, იმ საპროტესტო პლაკატის გაკვრისთვის, რომელიც გაკვრისთანავე ააძვრეს.

შეგახსენებთ, რომ ამ ქმედების გამო მზია ამაღლობელი მაშინვე დააკავეს ადმინისტრაციული წესით. თუმცა, როგორც მოგვიანებით გაირკვა, პლაკატის გაკვრა არ წარმოადგენს დაკავების სამართლებრივ საფუძველს, რის გამოც იგი დაახლოებით ერთ საათში გაათავისუფლეს. მოგვიანებით კი შსს-მ დაკავების გასამართლებლად სამართალდარღვევათა ოქმში პოლიციის მოთხოვნისადმი დაუმორჩილებლობა მიუთითა. ამ საქმეზე ორი ინსტანციის სასამართლომ მზია ამაღლობელი უკვე ცნო სამართალდამრღვევად და 2000 ლარით დააჯარიმა.

მიუხედავად იმისა, რომ ფაქტობრივად იგივე ქმედებაზე უკვე დადგენილია სამართალდარღვევა, ბათუმის საქალაქო სასამართლო ახლა განიხილავს იმავე საქმის ახალ სამართლებრივ კვალიფიკაციას. საქმეს მოსამართლე მარიანა ფომაევა განიხილავს, რომელიც თანამდებობაზე გამოსაცდელი ვადით 2024 წლის დეკემბერში დაინიშნა.

შსს-მ “პუბლიკის” ჟურნალისტის საჩივარი არ დააკმაყოფილა და ჯარიმა ძალაში დატოვა

2025 წლის 6 ივნისს შსს-მ არ დააკმაყოფილა “პუბლიკის” ჟურნალისტის საჩივარი, რომელიც ჟურნალისტის 5,000 ლარით დაჯარიმებას უკავშირდებოდა — დაჯარიმების საფუძველი რუსთაველის გამზირის გადაკეტვა იყო.

ბასტი მგალობლიშვილი შინაგან საქმეთა სამინისტრომ 2025 წლის თებერვალში დააჯარიმა. ჟურნალისტმა უწყებას წარუდგინა მტკიცებულებები, რომლებიც ადასტურებდა, რომ ის პროფესიულ მოვალეობას ასრულებდა და აშუქებდა პროევროპულ საპროტესტო აქციას, რომელიც ქვეყნის მთავარ გამზირზე 2024 წლის ნოემბერში დაიწყო და დღემდე უწყვეტად გრძელდება. მგალობლიშვილის მიერ ჯარიმის გამოწერის დღეს გადაღებული ვიდეო-მასალა ადასტურებს, რომ ის ასრულებდა პროფესიულ მოვალეობას. გარდა ამისა, გავრცელებულ კადრებში ჩანს, რომ ჟურნალისტს ეკეთა პრესის ნიშანი. თუმცა, ეს გარემოება შსს-სთვის იმის დასადასტურებლად, რომ ჟურნალისტი პროფესიულ საქმიანობას ასრულებდა, საკმარისი არ აღმოჩნდა. ამის საპირისპიროდ, სხვა საქმეზე, შსს-ს წარმომადგენელი განმარტავს, რომ ჟურნალისტ მარიამ ქვაშბაიას, გზის გადაკეტვის საფუძვლით დაჯარიმების საფუძველი ის გახდა, რომ იგი არ ატარებდა შესაბამის პრესის ნიშანს, რაც დაადასტურებდა მის მიერ პროფესიული საქმიანობის შესრულების ფაქტს.

“შსს კიდევ ერთხელ ადასტურებს, რომ ქუჩაში ჟურნალისტის პროფესიული საქმიანობა გახდა დასჯადი. მედიისთვის გამოცხადებული საკანონმდებლო თუ ფიზიკური ომის ფონზე, ეს არის ძალიან საშიში პრაქტიკა – შსს მისაზღვრავდეს სად ვიმუშაო და როგორ, რას მიიჩნევს ჟურნალისტიკად და რას – არა. შსს-ს თანამშრომლებიც ადრე თუ გვიან საკუთარ ტყავზე იგრძნობენ, რატომ არის საშიში მედიისთვის ძირის გამოთხრა” – დაწერა ბასტი მგალობლიშვილმა.

2024 წლის 28 ნოემბრიდან დღემდე, საჯაროდ გავრცელებული ინფორმაციის თანახმად, მედიის დაახლოებით 36 წარმომადგენელია პროფესიული მოვალეობის შესრულების დროს დაჯარიმებული. საქმეების უმრავლესობა ამ ეტაპზე განხილვის პროცესშია. ამ დროისთვის, სასამართლომ ორი ჟურნალისტი სამართალდამრღვევად ცნო და მათ ადმინისტრაციული ჯარიმა დააკისრა.

კომუნიკაციების კომისიამ „ქართული ოცნების“ საჩივრები „TV პირველის“, „ფორმულასა“ და „მთავარი არხის“ წინააღმდეგ განსახილველად მიიღო

2025 წლის 5 ივნისს, კომუნიკაციების კომისიამ „TV პირველის“, „ფორმულასა“ და „მთავარი არხის“ წინააღმდეგ „ქართული ოცნების“ საჩივრები განსახილველად დაუშვა და მათ არსებითად 19 ივნისს განიხილავს.

2 ივნისს, ტელეკომპანიებმა „ფორმულა“ და „TV პირველი“ განცხადება გაავრცელეს, რომლის მიხედვითაც ირკვევა, რომ „ქართულმა ოცნებამ“ მათ კომუნიკაციების ეროვნულ კომისიაში უჩივლა.

ტელეკომპანია „ფორმულას“ „ქართული ოცნების“ წარმომადგენელი მაუწყებლობის შესახებ კანონის იმ ნორმების დარღვევას ედავება, რომელიც მმართველმა პარტიამ 1 აპრილს მიიღო. ოცნებამ კომისიას 1 ივნისს მიმართა, როდესაც კომისიას მაუწყებლის დასანქცირების უფლებამოსილება მიენიჭა.

“საჩივრის მიხედვით, ცენზურას უნდა დაექვემდებაროს ტერმინები, რომლებიც ხაზს უსვამს ქართული ოცნების პარლამენტის, თანამდებობის პირებისა თუ ინსტიტუტების არალეგიტიმურობასა და პოლიტიკურ მიკერძოებას” – ნათქვამია ტელეკომპანია “ფორმულას” მიერ გავრცელებულ განცხადებაში.

„ქართული ოცნება“ ტელეკომპანია „ფორმულას“ უჩივის ისეთი ტერმინების გამოყენების გამო, როგორებიცაა: „რეჟიმის პატიმრები“, „რეჟიმის სასამართლო“, „არალეგიტიმური პარლამენტი“, „ე.წ. პარლამენტი“ და სხვა.

„TV პირველის“ ინფორმაციით, მათ წინააღმდეგ კომუნიკაციების ეროვნულ კომისიაში 14-გვერდიანი საჩივარია შეტანილი, სადაც ჩამოთვლილია სიტყვები და ტერმინები, რომლებიც მედიის მიერ სხვადასხვა საინფორმაციო გამოშვებაში იყო გამოყენებული.

“მაუწყებლობის შესახებ” კანონში ცვლილებები “ქართულმა ოცნებამ” 2025 წლის 1 აპრილს მიიღო. ცვლილების თანახმად, მნიშვნელოვნად გაიზარდა მარეგულირებელი ორგანოს, კომუნიკაციების ეროვნული კომისიის, უფლებამოილება, ასევე სრულად აიკრძალა მაუწყებლების უცხოური დაფინანსება

მედიაში არსებულ მდგომარეობას განცხადებით გამოეხმაურა მედიის ადვოკატირების კოალიცია – „ქართული ოცნების“ მიერ ბოლო პერიოდში ინიცირებული და მიღებული რეპრესიული კანონმდებლობა მიზანმიმართულად ზღუდავს გამოხატვის თავისუფლებას და საზოგადოების წვდომას ალტერნატიულ აზრსა და ინფორმაციაზე” – ნათქვამია განცხადებაში

შსს-მ „ნეტგაზეთის“ ჟურნალისტი, ნინო ბაიდაური, 5,000 ლარით დააჯარიმა

2025 წლის 4 ივნისს, ონლაინ გამოცემა „ნეტგაზეთის“ ჟურნალისტინინო ბაიდაური შინაგან საქმეთა სამინისტრომ 5,000 ლარით დააჯარიმა. მას 21 მარტს რუსთაველის გამზირის გადაკეტვას ედავებიან.

ჟურნალისტმა აღნიშნულის შესახებ სოციალურ ქსელ „ფეისბუქში“ დაწერა და თან დაურთო შსს-სგან გამოგზავნილი მოკლე ტექსტური შეტყობინება:

„თქვენ დაჯარიმდით 174-ე პრიმა მუხლის მეხუთე ნაწილით. თარიღი: 21/03/2025. ადგილი: თბილისი, რუსთაველის გამზირი, პარლამენტის შენობის მიმდებარედ.“

საჯაროდ გავრცელებულ წყაროებზე დაყრდნობით, მედიის, ინფორმაციისა და სოციალური კვლევების ცენტრი (CMIS) 2024 წლის 28 ნოემბრიდან აღრიცხავს პროევროპული პროტესტის გაშუქებისას გზის გადაკეტვის საფუძველზე ჟურნალისტების დაჯარიმების შემთხვევებს, რომელთა შესახებაც საჯაროდ მოიპოვება ინფორმაცია.

შსს-მ მედია 64-ის წარმომადგენელი 5 000 ლარით დააჯარიმა

2025 წლის 2 ივნისს, შინაგან საქმეთა სამინისტრომ არ დააკმაყოფილა საჩივარი და 64-ის გრაფიკული დიზაინერი, ბექა ბერიძე, 5 000 ლარით დააჯარიმა.

მედიის ცნობით, ბექა ბერიძეს შსს გზის გადაკეტვას ედავება – 2025 წლის 11 თებერვალს. ბერიძემ უწყების მიერ დაკისრებული ჯარიმა გაასაჩივრა, თუმცა შსს-მ საჩივარი არ დააკმაყოფილა. 64-ის წარმომადგენელი აღნიშნულ გადაწყვეტილებას სასამართლოში გაასაჩივრა.

მედია აპრილის მთავარი რედაქტორი, ხატია ღოღობერიძე “გზის გადაკეტვის” გამო 5 000 ლარით დააჯარიმეს

2025 წლის 31 მაისს საინფორმაციო სააგენტო “აპრილის” მთავარმა რედაქტორმა ხატია ღოღობერიძემ სოციალურ ქსელ “ფეისბუქზე” პოსტი გამოაქვეყნა, რომ პროფესიული მოვალეობის შესრულების დროს, “გზის ხელოვნურად გადაკეტვის” გამო 5 000 ლარით დაჯარიმდა.

ჟურნალისტის ცნობით, მას შინაგან საქმეთა სამინსტროდან 4 აპრილს დაუკავშირდნენ და აცნობეს ჯარიმის დაკისრების თაობაზე. მას შემდეგ, რაც ხატია ღოღობერიძემ განუმარტა პოლიციას, რომ ჟურნალისტურ საქმიანობას ეწეოდა მარშის მსვლელობისას და მეტიც, აღნიშნული მსვლელოვის თაობაზე, მის მიერ მომზადებული მასალაც გაუგზავნა, პოლიციამ საკითხის შესწავლის მიზნით დრო ითხოვა. მიუხედავად, განმარტებებისა და წარდგენილი მტკიცებულებებისა, ჟურნალისტს ჩაბარდა ჯარიმის გამოწერის შესახებ დადგენილება.

ხატია ღოღობერიძე შინაგან საქმეთა სამინისტროსთან სამართლებრივ დავას გეგმავს.