თბილისი

ვასილ ივანოვ-ჩიქოვანს საზოგადოებრივი მაუწყებლის საინფორმაციო გამოშვების წაყვანის უფლება დროებით შეუჩერდა

ვასილ ივანოვ-ჩიქოვანი საზმაუდან გაუშვეს

2025 წლის 4 თებერვალს, საზოგადოებრივმა მაუწყებელმა, 18 საათიანი მოამბის წამყვანს, ჟურნალისტ ვასილ ივანოვ-ჩიქოვანს, დროებით შეუჩერა გადაცემის წაყვანის უფლება.

აღნიშნული ფაქტის შესახებ ინფორმაცია სოციალურ ქსელ ფეისბუკში გამოაქვეყნა თავად ჟურნალისტმა. წამყვანობის შეჩერების მიზეზი „მოამბის” პროდიუსერების მიერ ვასილ ივანოვ-ჩიქოვანთან თანამშრომლობაზე უარის თქმაა.

“მე აღარ მიმყავს მოამბე 18:00 საათზე. ოფიციალური პოზიცია – როგორც თქვენთვის ცნობილია, დღეს გამართულ სამეურვეო საბჭოს სხდომაზე “მოამბის” პროდიუსერებმა, თქვენს მიერ საჯაროდ (მათ შორის ეთერში) გაკეთებულ განცხადებებთან დაკავშირებით, დააფიქსირეს საკუთარი პოზიცია და თქვენთან, როგორც “მოამბე”-ს წამყვანთან, მუშაობის გაგრძელებაზე განაცხადეს უარი” – დაწერა ჟურნალისტმა.

ფაქტს გამოეხმაურა “მედიის ადვოკატირების კოალიცია” და სოლიდარობა გამოუცხადა ვასილ ივანოვ-ჩიქოვანს და ყველა მის კოლეგას, რომლებიც იბრძვიან მაუწყებლის სარედაქციო დამოუკიდებლობისა და პასუხისმგებლობიანი ჟურნალისტიკისათვის.

“მედიის ადვოკატირების კოალიცია გმობს საზოგადოებრივი მაუწყებლის ხელმძღვანელობის მხრიდან ვასილ ივანოვ-ჩიქოვანისთვის საინფორმაციო გამოშვების წამყვანობის დროებით შეჩერებას. აღნიშნული გადაწყვეტილება ემსახურება ობიექტური, მიუკერძოებელი და ქვეყნის ევროპული გზის აქტიური მხარდამჭერი ჟურნალისტისა და მისი კოლეგების გაჩუმებას” – წერია განცხადებაში.

Update: 2025 წლის 26 თებერვალს საზოგადოებრივი მაუწყებლის “პირველი არხის” 18:00 საათიანი საინფორმაციო გამოშვება “მოამბე” ვასილ-ივანოვ ჩიქოვანის ნაცვლად, ახალმა დიქტორმა ლაშა ბერძენიშვილმა წაიყვანა.

ვასილ ივანოვ-ჩიქოვანი საზმაუდან გაუშვეს

“მთის ამბების” კუთვნილი ავტომობილი განზრახ დააზიანეს

2025 წლის 4 თებერვალს, გამოცემა “მთის ამბების” დამფუძნებელმა და რედაქტორმა გელა მთივლიშვილმა გამოაქვეყნა ფეისბუკ პოსტი, საიდანაც ირკვევა, რომ რედაქციის კუთვნილი ავტომობილი განზრახ დააზიანეს.

გელა მთივლიშვილის თქმით, მოგვიანებით, იგივე პირი, ვინც მანქანა დააზიანა, ჟურნალისტს საცხოვრებელი სახლის კარზე უკაკუნებდა. აღნიშნული ფაქტის დამადასტურებელი ფოტო გელა მთივლიშვილმა საკუთარ სოციალურ ქსელში გამოაქვეყნა.

“დილით სამსახურის კუთვნილი ავტომობილი დაგვიზიანეს. ვიდეოსამეთვალყურეო სისტემის ჩანაწერებში ჩანს, როგორ ესვრის ადამიანი ქვას განზრახ, სამჯერ, რომ საქარე შუშა ჩაამტვრიოს. 112-ს უკვე შევატყობინეთ. საქმე იმაშია, რომ ეს ადამიანი ამავე კორპუსში ცხოვრობს და წვდომა აქვს როგორც უსაფრთხოების სისტემაზე, ასევე, სადარბაზოში შემოსასვლელ კოდებზე. მისთვის კარგის მეტი არაფერი გამიკეთებია და ამიტომაც არის მოტივი გასაგები, რომ დაავალეს ამის გაკეთება!” – დაწერა ჟურნალისტმა.

გელა მთივლიშვილი არაერთხელ გამხდარა “ქართული ოცნებისა” და პოლიციის მხრიდან სიტყვიერი თუ ფიზიკური თავდასხმის მსხვერპლი.

ჟურნალისტებს პარლამენტში მუშაობა შეეზღუდათ

2025 წლის 4 თებერვალს პარლამენტში უსაფრთხოების “ყვითელი დონე” ამოქმედდა და ჟურნალისტებს მუშაობა კვლავ დაუსაბუთებლად შეეზღუდათ. აღნიშნული ზომა „ქართული ოცნების“ მიერ დანიშნული პრეზიდენტის, მიხეილ ყაველაშვილის, პარლამენტში მოხსენებით გამოსვლას უკავშირდება.

“შენობაში დაიშვებიან ტელემაუწყებლების/ტელემედია საშუალებების აკრედიტებული არაუმეტეს ორი ჯგუფი თითო მაუწყებლიდან, საპარლამენტო ღონისძიებების დასრულებამდე” – ნათქვამია განცხადებაში.

უსაფრთხოების “ყვითელი დონე” ნიშნავს, რომ შენობაში, დაიშვებიან „მხოლოდ შესაბამისი სტრუქტურული ერთეულების მიერ მიწვეული პირები” და მხოლოდ ტელემედიის ჟურნალისტები.

მსგავსი შეზღუდვები ჟურნალისტებს საქართველოს პარლამენტში 2024 წელს არაერთხელ დაუწესეს.

პარლამენტის თავმჯდომარის მუქარა დამოუკიდებელ ონლაინ გამოცემა “პუბლიკას”

2025 წლის 1 თებერვალს, პარტია “ქართული ოცნების” ლიდერმა, პარლამენტის თავმჯდომარე შალვა პაპუაშვილმა, ონლაინ გამოცემა “პუბლიკა” სისხლის სამართლის დანაშაულის ჩადენის მოწოდების რეკლამირებაში დაადანაშაულა.

აღნიშნული განცხადება პაპუაშვილმა ონლაინ გამოცემა “პუბლიკის” მიერ გამოქვეყნებულ ფეისბუკ პოსტს მიუძღვნა, რომელიც 2 თებერვალს “თბილისი მოლთან” დაგეგმილ აქციას ეხებოდა. აღნიშნული საპროტესტო აქცია იმართება “რეჟიმის ტყვეების დაუყოვნებლივ გათავისუფლებისა” და “ახალი არჩევნების” მოთხოვნით.

“ქართული ოცნების” ლიდერის მიერ, მედიის დამნაშავედ გამოცხადებას გამოეხმაურა საქართველოს ჟურნალისტური ეთიკის ქარტია – „ქართული ოცნების“ რეპრესიული პოლიტიკა დამოუკიდებელი მედიის მიმართ 1 თებერვალს ახალ საფეხურზე გადავიდა, როდესაც შალვა პაპუაშვილმა მედიის მიერ საკუთარი პროფესიული მოვალეობის შესრულება მანიპულაციურად დააკავშირა 31 იანვარს სახელდახელოდ მიღებულ, შეკრების უფლების შემზღუდავ შესწორებასთან მთავრობის #361 დადგენილებაში და სისხლის სამართლებრივ პასუხისმგებლობაზე ალაპარაკდა” – ვკითხულობთ გაცხადებაში.

“პუბლიკას” მხარდაჭერა გამოუცხადა მედიის ადვოკატირების კოალიციამაც:

“ქართული ოცნება განსაკუთრებით თავს ესხმის დამოუკიდებელ გამოცემებს, რომლებიც მაღალი პროფესიული სტანდარტების დაცვითა გამოირჩევიან ქართულ მედიასივრცეში. ჩვენი მხარდაჭერა პუბლიკას!” – წერია განცხადებაში.

2 თებერვლის აქციაზე მედიის 13 წარმომადგენელს შეუშალეს ხელი პროფესიული მოვალეობის შესრულებაში

2025 წლის 2 თებერვალს „თბილისი მოლთან“ გამართულ მშვიდობიან საპროტესტო აქციაზე სამართალდამცავებმა მედიის 11 წარმომადგენელს პროფესიული მოვალეობის შესრულებაში უკანონოდ შეუშალეს ხელი.

ჟურნალისტების ნაწილი ფიზიკურად დაშავდა.

აქციაზე დაშავდა TV პირველის ოპერატორი ნიკო კოკაია. ის პოლიციის მიერ აქციის ერთ-ერთი მონაწილის დაკავების კადრებს იღებდა, როდესაც ფიზიკურად დაზიანდა. შედეგად, მას კლინიკაში გადაყვანა დასჭირდა. კვლევებით დადგინდა, რომ ნიკო კოკაიამ აქციაზე მიღებული დაზიანების შედეგად ტვინის შერყევა მიიღო.
მედია „აპრილის“ მიერ გავრცელებულ ვიდეოში ჩანს, რომ პოლიციელმა ხელი ჰკრა და პროფესიული საქმიანობის განხორციელებაში ხელი შეუშალა მათ თანამშრომელს, ნატა ურიდიას. ვიდეოში ისმის ჟურნალისტის ხმა, რომელიც ნიღბიან პოლიციელს ეუბნება, რომ ჟურნალისტია.
აქციის მონაწილეების დაკავების დროს პოლიციამ პროფესიული მოვალეობის შესრულებაში ხელი შეუშალა მედია „აპრილის“ კიდევ ერთ წარმომადგენელს, ვახო ქარელს. მას და ნატა ურიდიას პოლიციელებმა ტერიტორიის დატოვება მოსთხოვეს. ამ ეპიზოდშიც პოლიციელმა ნატა ურიდიას ხელი ჰკრა.
პოლიციელი „რადიო თავისუფლების“ ჟურნალისტ გელა ბოჩიკაშვილს დაემუქრა. მედიამ გამოაქვეყნა ვიდეო, სადაც ისმის, როგორ ეუბნება ნიღბიანი პოლიციელი ჟურნალისტს: „გაწიე ახლა ეგ კამერა, თორემ გაგიტეხავ თავს.“
„მთავარი არხის“ ჟურნალისტმა, დეა მამისეიშვილმა, გამოაქვეყნა ვიდეო, სადაც ჩანს, როგორ აყენებს პოლიციელი მას სიტყვიერ და ფიზიკურ შეურაცხყოფას.
„რადიო მარნეულის“ ჟურნალისტი ვლადიმერ ჩხიტუნიძე ოპოზიციონერი პოლიტიკოსის დაკავებას იღებდა, როცა ის გდდ-ის თანამშრომლებმა შეაჩერეს და ძალის გამოყენებით ტროტუარზე გადაიყვანეს.
პოლიციელებმა შეურაცხყოფა მიაყენეს და ფიზიკურად დაუპირისპირდნენ TV პირველის გადამღებ ჯგუფს. ტელეკომპანიის გავრცელებული ინფორმაციით, მათ სამაუწყებლო ტექნიკაც დაუზიანეს.
TV პირველის ინფორმაციით, მათ ჟურნალისტს, ხატია სამხარაძეს, თავს დაესხა განსაკუთრებულ დავალებათა დეპარტამენტის (გდდ) უფროსის მოადგილე, მირზა კეზევაძე. მედიის ცნობით, მირზა კეზევაძემ ჟურნალისტს ტელეფონი წაართვა და დაუზიანა.
TV პირველის ცნობით, გდდ-ის წევრები ცდილობდნენ „ფორმულას“ ჟურნალისტ გიორგი კვიჟინაძისთვის მიკროფონის წართმევას და პროფესიულ მოვალეობაში ხელის შეშლას.
TV პირველის ინფორმაციით, პოლიციელებმა სიტყვიერი შეურაცხყოფა მიაყენეს და მუშაობაში ხელი შეუშალეს “TV პირველის” ჟურნალისტს დიანა ჩირგაძესა და მის ოპერატორს.
ნიღბიანმა პოლიციელმა პროფესიული მოვალეობის შესრულებაში ხელი შეუშალა „გურია ნიუსის“ წარმომადგენელს აკაკი სიხარულიძეს. გავრცელებულ ვიდეოში ჩანს, როგორ ჰკრავს ნიღბიანი პოლიციელი კამერას ხელს.
პოლიცია გადაღებაში ხელს უშლიდა “მედიაჩეკერის” ჟურნალისტ ნინია კაკაბაძესაც. მას პოლიციელებმა ხელიც ჰკრეს.

“თბილისი მოლის” მიმდებარედ მშვიდობიანი საპროტესტო აქციის გაშუქების დროს, მედიის წარმომადგენლების დაშავებას გამოეხმაურა მედიის ადვოკატირების კოალიცია.

საზოგადოებრივი მაუწყებელი – საზოგადოების დაკვეთისა და კანონს მიღმა

საქართველოში მიმდინარე ორთვიანი უწყვეტი პროდასავლური დემონსტარაციის პარალელურად საზოგადოებრივი მაუწყებელი მოვლენათა ეპიცენტრში არაერთხელ მოხვდა.

საზოგადოებრივი მაუწყებელი, “მაუწყებლობის შესახებ” საქართველოს კანონით მისთვის განსაზღვრულ ვალდებულებებს რომ ვერ პასუხობს, ამის შესახებ საჯაროდ არხის სამეურვეო საბჭოს სამმა წევრმა, ლაშა ტუღუშმა, ლია შავგულიძემ და ზაზა აბაშიძემ 29 იანვარს გავრცელებულ ერთობლივ განცხადებაში აღნიშნეს.

საზოგადოებრივი მაუწყებლის შენობასთან საპროტესტო აქციები ორი თვის განმავლობაში მიმდინარეობს, რაც არხის საქმიანობას მნიშვნელოვანწილად უკავშირდება. სამეურვეო საბჭოს წევრები ამ ხნის მანძილზე ითხოვდნენ სხდომის ჩატარებას აქტუალურ საკითხებზე სამსჯელოდ, რასაც, მათი განმარტებით, საბჭოს თავმჯდომარე უგულებელყოფდა როგორც მათ მოთხოვნას, ასევე მრავალრიცხოვანი მომიტინგეების მოთხოვნასთან ერთად. წერილის ავტორები იზიარებენ პროტესტის მონაწილეების პოზიციას იმასთან დაკავშირებით, რომ “ბათუმელების” დირექტორის, მზია ამაღლობელის მიმართ, რომელიც საპოლიციო ძალებმა მიმდინარე წლის 11 იანვარს დააკავა, საზოგადოებრივ ტელევიზიას არ გააჩნია პოზიცია.

ისინი ასევე ხაზს უსვამენ იმ ფაქტს, რომ მიუხედავად მრავალმხრივი მცდელობისა მათ პასუხები არ აქვთ ისეთ კითხვებზე, როგორებიცაა – “რა ფინანსდება მაუწყებლის ბიუჯეტიდან პროგრამული პრიორიტეტების შესასრულებლად? როგორი იქნება ტელევიზიის წლიური ბადე? რა გადაცემებია მასში გათვალისწინებული? რატომ არ იხსნება შუადღის ეთერები? როგორია ტელევიზიის სახელფასო პოლიტიკა? როგორ წყდება ინტერესთა კონფლიქტები ტელევიზიის შიგნით?”. დემონსტანტებს მხარაჭერა ჯერ კიდევ დეკემბერში გამოუცხადა საზოგადოებრივი მაუწყებლის თანამშრომელთა ნაწილმა.

2025 წლის 30 იანვარს, საზოგადოებრივი მაუწყებლის სამეურვეო საბჭოს სხდომა თითქმის ორთვიანი პაუზის შემდეგ, “პირველი არხის” ახალ შენობაში გაიმართა. სხდომაზე დასასწრებად მისულ ამავე არხის ჟურნალისტებს, ვასილ ივანოვ-ჩიქოვანს და ნინო ზაუტაშვილს, დაცვის თანამშრომლები შენობაში არ უშვებდნენ, მიუხედავად იმისა, რომ ორივეს, როგორც საზოგადოებრივი მაუწყებლის თანამშრომლებს, სპეციალური საშვები ჰქონდათ. აღსანიშნია, ორივე ჟურნალისტი ღიად აკრიტიკებს არხის სარედაქციო პოლიტიკას და მონაწილეობს პროევროპულ აქციებსა და გამოსვლებში. გავრცელებულ კადრებში ჩანს, რომ ჟურნალისტების დაჟინებული მოთხოვნისა და პროტესტის შედეგად მოხერხდა მათი სამეთვალყურეო საბჭოს სხდომაზე შეშვება. “მოამბის” წამყვანმა, ვასილ ივანოვ-ჩიქოვანმა მნიშვნელოვანი, განცხადებები გააკეთა სხდომაზე. მისი თქმით, რუსთაველის გამზირზე მიმდინარე საპროტესტო აქციის დარბევისას, როდესაც არაიდენტიფიცირებული პირები მოქალაქეებს ფიზიკურად უსწორდებოდნენ, ვასილ მაღლაფერიძე საინფორმაციო გამოშვების საეთეროში იმყოფებოდა და იღებდა გადაწყვეტილებას რომელი კადრი მოხვდებოდა ეთერში. “მედიის ადვოკატირების კოალიციამ” შეშფოთება გამოხატა საზოგადოებრივი მაუწყებლის მიერ კონსტიტუციური და საკანონმდებლო ვალდებულებების სისტემატური დარღვევის გამო. “მაუწყებლის მიერ, რომელიც „ქართული ოცნების” გავლენის ქვეშ იმყოფება, ვერ ხდება ქვეყანაში მიმდინარე მოვლენების ობიექტურ და სრულფასოვანი გაშუქება” – ნათქვამია კოალიციის განცხადებაში, სადაც თავმოყრილია ასევე საზოგადოებრივი მაუწყებლის შესახებ ადგილობრივი თუ საერთაშორისო ავტორიტეტული ორგანიზაციების კრიტიკული შეფასებები.

“მთავარი არხის” განცხადებით ტელეკომპანიის ფუნქციონირება საფრთხის ქვეშაა

2025 წლის 27 იანვარს “მათავრმა არხმა” გაავრცელა განცხადება, რომელშიც მაუწყებლში არსებულ რთულ ვითარებაზე საუბრობს. განცხადების თანახმად, “მთავარი არხის” ერთ-ერთი დამფუძნებლის, ზაზა ოქუაშვილის გადაწყვეტილებები საფრთხეს უქმნის არხის ფუნქციონირებას.

ტელეკომპანიის ცნობით, არხის მაუწყებლობა უკვე აღარ არის ხელმისაწვდომი ღია საეთერო სატელიტური მაუწყებლობით, პირველი თებერვლიდან კი მაუწყებლობის გავრცელება შეწყდება მაუწყებლობის ტრანზიტის (საკაბელო ოპერატპრები) საშუალებითაც.

არხის რედაქცია დასძენს, რომ დეკემბრის თვიდან ვეღარ იღებენ სარეკლამო შემოსავლებს და დაკარგეს სპონსორები, რადგან მიმდინარე სარეკლამო ხელშეკრულებებს ვადა ამოეწურა, ახალი ხელშეკრულებები კი არ დაიდო.

“მთავარი არხის” რედაქცია მიიჩნევს, რომ ზაზა ოქუაშვილი ამ ქმედებებით “ქართული ოცნების” პოლიტიკას ატარებს და კრიტიკული მაუწყებელის დახურვა სურს.

აღნიშნულ საკითხს “მედიის ადვოკატირების კოალიცია” ეხმიანება და პროცესებს აფასებს, როგორც “სერიოზულ საფრთხეს თავისუფალი მედიის ფუნქციონირებისათვის”.

Update: 2025 წლის 30 იანვარს ზაზა ოქუაშვილის პოზიცია გავრცელდა.

“მთის ამბების” რედაქტორს საპროტესტო აქციის გაშუქებისას, პოლიცია გზის გადაკეტვის საფუძვლით დაჯარიმებით დაემუქრა

2025 წლის 18 იანვარს, გვიან საღამოს, “მთის ამბების” რედაქტორი, გელა მთივლიშვილი, რომელიც თბილისში რუსთაველის გამზირზე საპროტესტო აქციის გასაშუქებლად იმყოფებოდა, პოლიციამ საპროტესტო აქციის სხვა მონაწილეებს შორის გამოყო და აცნობა, რომ გზის გადაკეტვის საფუძვლით 5000 ლარით ჯარიმდება.

როგორც გელა მთივლიშვილი აღწერს, მაშინ როდესაც ის და მისი კოლეგები რუსთაველის გამზირზე მივიდნენ, რუსთაველი გადაკეტილი იყო. აქციის მონაწილეები გზაზე მას შემდეგ გადავიდნენ, რაც ტერიტორია პოლიციამ დატოვა: “სწორედ ამ დროს მომადგა საპატრულო პოლიციის რამდენიმე თანამშრომელი. ხელმძღვანელმა თითის გამოშვერით გამომარჩია და მივხვდი, მე მეუბნება: იდენტიფიცირებული ხარ. არ არის ხალხის საკმარისი რაოდენობა, გზა რომ გადაგეკეტათ. ჯარიმა 5000 ლარი”.

5000-ლარიან ჯარიმას გზის გადაკეტვისთვის, თუ ამისთვის საჭირო ხალხის რაოდენობა არ არის, ითვალისწინებს ცვლილებები „შეკრებებისა და მანიფესტაციების შესახებ“ საქართველოს კანონში. აღნიშნული ცვლილებები, რომელიც საქართველოს არალეგიტიმურმა პარლამენტმა 2024 წლის 13 დეკემბერს მიიღო, ძალაში შევიდა 29 დეკემბრიდან. უფლებადამცველებმა ცვლილებები შეაფასეს როგორც დემონსტრანტების წინააღმდეგ მიმართული რეპრესიული მექანიზმი.

“TV პირველის” ჟურნალისტს ნანუკა ქაჯაიას სიტყვიერი და ფიზიკური შეურაცხყოფა მიაყენეს

2024 წლის 24 დეკემბერს, “TV პირველის” ჟურნალისტს ნანუკა ქაჯაიას თბილისის მერიის ორგანიზებულ საშობაო სოფელში, გადაღების დროს, ჟურნალისტურ საქმიანობაში ხელი შეუშალეს, სიტყვიერი და ფიზიკური შეურაცხყოფა მიაყენეს. ჟურნალისტის მიმართ აგრესიულად განწყობილი პირი “ქართულ ოცნებასთან” დაკავშირებული ნიკოლოზ მელიქიშვილი აღმოჩნდა.

ნანუკა ქაჯაიასთვის ჟურნალისტურ საქმიანობაში ხელის შეშლა, ფიზიკურად, იმავე ღონისძიებაზე მყოფმა სხვა დაუდგენელმა პირებმაც სცადეს.

ფოტორეპორტიორს გიორგი მოსიაშვილს თავს დაესხნენ

2024 წლის 24 დეკემბერს ფოტორეპორტიორს გიორგი მოსიაშვილს, უცნობი პირი ქუჩაში დახვდა და ფიზიკური შეურაცხყოფის მიყენება სცადა.

გიორგი მოსიაშვილი სოციალურ ქსელში წერს, რომ მას უცნობი ნიღბიანი დახვდა და მას შემდეგ რაც მისი ვინაობა გადაამოწმა, დაემუქრა და შეეცადა თავს დასხმოდა.