Incident Source: სიძულვილის ენის მონიტორინგის სამმართველო

შინაგან საქმეთა სამინისტროს სიძულვილის ენის წინააღმდეგ ბრძოლის სამმართველო გიორგი მელითაურს Facebook-ზე დატოვებული კომენტარის გამო ადმინისტრაციულ სამართალდარღვევას ედავება. უწყების შეფასებით, კომენტარით მელითაურმა ფოტოგრაფ ლევან ზაზაძეს სიტყვიერი შეურაცხყოფა მიაყენა.

საქმე თბილისის საქალაქო სასამართლოში მოსამართლე ნინო ენუქიძემ უნდა განიხილოს. სხდომა 22 ივნისს იყო ჩანიშნული, თუმცა ოქმის შემდგენი ორგანოს წარმომადგენლის გამოუცხადებლობის გამო განხილვა 30 ივნისამდე გადაიდო.

შეურაცხყოფის ფაქტს უარყოფს როგორც გიორგი მელითაური, ისე ლევან ზაზაძე. მელითაურის თქმით, ზაზაძე მისი მეგობარია და ისინი ერთ წელზე მეტია საპროტესტო აქციებში ერთად მონაწილეობენ. ზაზაძე საქმეს აბსურდულად აფასებს და აცხადებს, რომ მის ნაცვლად სახელმწიფოს მიერ „ღირსების დაცვის“ მცდელობა მისთვის მიუღებელია.

საქმე უკავშირდება „მთავარი არხის“ Facebook-პოსტის ქვეშ დატოვებულ კომენტარს, რომელიც 6 ივნისს „შაბათის მარშამდე“ ლევან ზაზაძესა და სამოქალაქო აქტივისტ თამუნა გიორგაძეზე თავდასხმის შესახებ გავრცელებულ ინფორმაციას მოჰყვა. ზაზაძის განცხადებით, თავდასხმის ფაქტზე გამოძიების ფარგლებში ის და თამუნა გიორგაძე ამ დრომდე არ გამოუკითხავთ, მაშინ როცა კომენტარის გამო ადმინისტრაციული წარმოება სწრაფად დაიწყო.

სიძულვილის ენის წინააღმდეგ ბრძოლის სამმართველო შსს-ში ივნისის დასაწყისიდან ფუნქციონირებს. შსს-ს მონაცემებით, მუშაობის დაწყებიდან ორ კვირაში სამმართველომ სასამართლოს დაახლოებით 60 საქმე წარუდგინა.

შინაგან საქმეთა სამინისტროს (შსს) სიძულვილის ენის წინააღმდეგ ბრძოლის სამმართველო გიორგი გოგიას Facebook-ზე გამოქვეყნებული პოსტის გამო ადმინისტრაციულ სამართალდარღვევას ედავება. უწყების მტკიცებით, გოგიამ ბერა ივანიშვილის შესახებ პოსტის გაზიარებით მას სიტყვიერი შეურაცხყოფა მიაყენა და საზოგადოებრივი წესრიგი დაარღვია.

საქმე თბილისის საქალაქო სასამართლოში მოსამართლე თორნიკე ქოჩქიანმა განიხილა. 19 ივნისს გამართული სხდომა საათზე მეტხანს გაგრძელდა, ხოლო ახსნა-განმარტების ეტაპი 26 ივნისისთვის გადაიდო.

გოგიას ადვოკატი მიხეილ ზაქარეიშვილი მიუთითებს, რომ საქმეში არ არის სათანადოდ დასაბუთებული, როგორ დაადგინა შსს-მ პოსტის ავტორის ვინაობა, ასევე რა მასშტაბის აუდიტორიას მიაღწია პოსტმა. მისი თქმით, სოციალურ ქსელში გამოქვეყნებულ პოსტს მხოლოდ 35 რეაქცია და ერთი კომენტარი აქვს.

შსს-ს იურისტის განცხადებით, ბერა ივანიშვილის სასამართლოში გამოკითხვა საჭირო არ არის, რადგან სავარაუდო შეურაცხყოფა და წვრილმანი ხულიგნობა „შესაბამისმა თანამშრომელმა“ უკვე დააიდენტიფიცირა.

სიძულვილის ენის წინააღმდეგ ბრძოლის სამმართველო შსს-ში 1 ივნისიდან მუშაობს. საჯარო ინფორმაციით, 15 ივნისის მდგომარეობით, სამმართველომ სასამართლოებში დაახლოებით 60 საქმე გადააგზავნა.

17 ივნისს, სამოქალაქო აქტივისტ თამუნა გიორგაძეს  დაუკავშირდნენ და აცნობეს, რომ მის მიმართ საჯარო კომუნიკაციის მონიტორინგის სამმართველოს საქმეზე საჩივარია შესული და სასამართლო სხდომა ორ საათში გაიმართებოდა. საქმე, არსებული ინფორმაციით, სოციალურ ქსელში გამოქვეყნებულ პოსტს უკავშირდება.

მოგვიანებით, ცნობილი გახდა, რომ სამოქალაქო აქტივისტ თამუნა გიორგაძის მიმართ ადმინისტრაციული წარმოება დაიწყო Facebook-ზე ბიძინა ივანიშვილის მისამართით დაწერილი პოსტის გამო. 15 ივნისით დათარიღებულ სამართალდარღვევის ოქმს ხელს აწერს საჯარო კომუნიკაციის მონიტორინგის სამმართველოს განსაკუთრებულ მნიშვნელოვან საქმეთა ინსპექტორი სანდრო კეპაშვილი. ოქმის მიხედვით, პოსტის შინაარსი ადმინისტრაციულ სამართალდარღვევათა კოდექსის 166-ე მუხლის პირველი ნაწილით გათვალისწინებული სავარაუდო სამართალდარღვევის ნიშნებს შეიცავს. აღნიშნული მუხლი 500-დან 3,000 ლარამდე ჯარიმას ან 20 დღემდე ადმინისტრაციულ პატიმრობას ითვალისწინებს.

29 ივნისს ცნობილი გახდა, რომ სამოქალაქო აქტივისტი თამუნა გიორგაძე სასამართლომ 3,000 ლარით დააჯარიმა Facebook-ზე ბიძინა ივანიშვილის მისამართით გამოქვეყნებული პოსტის გამო. გადაწყვეტილება მოსამართლე თორნიკე ქოჩქიანმა მიიღო. თავად აქტივისტი სასამართლო პროცესს არ დასწრებია.

ახალი სამმართველო შინაგან საქმეთა სამინისტროში 1 ივნისიდან ამოქმედდა. შსს-ს განცხადებით, მისი მთავარი ამოცანაა საჯარო სივრცეში გავრცელებული ადამიანის ღირსების შემლახველი ან შეურაცხმყოფელი განცხადებების გამოვლენა, რომლებიც შესაძლოა ადმინისტრაციული სამართალდარღვევის ნიშნებს შეიცავდეს.

საჯაროდ გავრცელებული ინფორმაციით, ეს ახალი სამმართველოს მიერ წარმოებული მესამე საქმეა. 11 ივნისს ცნობილი გახდა, რომ ადმინისტრაციული წარმოება დაიწყო მუსიკოს მაია დარსმელიძის წინააღმდეგ, „ქართულ ოცნებასთან“ დაახლოებული პირის, ნინო ჯღარკავას შესახებ დაწერილი პოსტის გამო. ხოლო, 15 ივნისს, თბილისის საქალაქო სასამართლომ ადვოკატი შოთა თუთბერიძე, “ქართული ოცნების” დეპუტატის, ნინო წილოსანის შეურაცხყოფის საბაბით, 4000 ლარით დააჯარიმა. 

თამუნა გიორგაძე მანამდე უკვე იყო ადმინისტრაციული პასუხისმგებლობის ადრესატი. 6 მაისს თბილისის საქალაქო სასამართლომ მას 2-დღიანი ადმინისტრაციული პატიმრობა შეუფარდა. ამასთან, 6 ივნისს, „შაბათის მარშზე“, გიორგაძეს უცნობი პირი ფიზიკურად გაუსწორდა. „ბათუმელებთან“ ინტერვიუში გიორგაძე ჰყვებოდა, რომ მარშის დაწყებამდე იმავე პირმა აქციის მონაწილეებს სკუტერით ჩაუარა და სიტყვიერი შეურაცხყოფა მიაყენა. აქტივისტების ინფორმაციით, ამ საქმეზე ეფექტიანი რეაგირება ამ დრომდე არ მომხდარა.