თბილისის საქალაქო სასამართლომ, გიორგი სავანელს ტროტუარზე დგომის გამო 1-დღიანი ადმინისტრაციული პატიმრობა შეუფარდა. გადაწყვეტილება მოსამართლე თორნიკე კაპანაძემ მიიღო.
8 მაისს, სასამართლო სხდომის დასრულების შემდეგ, სავანელის ადვოკატი აიჰან ჰასანლი წერდა, რომ შინაგან საქმეთა სამინისტროს საქმეში ერთადერთი „მტკიცებულება“ უკანონოდ აქვს მოპოვებული. ადვოკატის შეფასებით, საქმე ადმინისტრაციულ სამართალდარღვევას არ ეხება და კონსტიტუციით დაცულ შეკრებისა და მანიფესტაციის თავისუფლებას უკავშირდება. მისი თქმით, სასამართლო სხდომაზე მსჯელობა ძირითადად ერთგვერდიან „დათვალიერების ოქმსა“ და „პატაკს“ შეეხებოდა. ადვოკატის განცხადებით, როდესაც მოქალაქეს ტროტუარზე დგომის, შეკრებაში მონაწილეობისა და საკუთარი აზრის საჯაროდ გამოხატვის გამო ასამართლებენ, საქმე მხოლოდ ადმინისტრაციულ ოქმს აღარ ეხება და თავისუფლების საკითხს უკავშირდება.იმავე დღეს მოსამართლე თორნიკე კაპანაძემ პარტია „დროას“ წევრს, თათა ფერაძესაც ტროტუარზე გამვლელთა შეფერხებისა და გზის სავალი ნაწილის ხელოვნურად გადაკეტვის საქმეზე 2-დღიანი ადმინისტრაციული პატიმრობა შეუფარდა. თათა ფერაძე სასამართლო სხდომას არ ესწრებოდა. ის გადაწყვეტილების აღსრულებას პარტიის ოფისში ელოდებოდა, საიდანაც მოგვიანებით დააკავეს.
თბილისის საქალაქო სასამართლოს მოსამართლე კობა ჩაგუნავამ გიგა მაქარაშვილს 5-დღიანი ადმინისტრაციული პატიმრობა შეუფარდა. საქმე ეხება სოციალურ ქსელში გამოქვეყნებულ პოსტს, რომელიც, შინაგან საქმეთა სამინისტროს შეფასებით, საქართველოს პარლამენტის თავმჯდომარის, შალვა პაპუაშვილის, სიტყვიერ შეურაცხყოფას შეიცავდა.
საქმის მასალებში წარმოდგენილია მართლწესრიგის უფროსი ოფიცრის, კორნელი კირცხალიას მიერ შედგენილი ადმინისტრაციული სამართალდარღვევის ოქმი. ოქმის მიხედვით, „2026 წლის 3 აპრილს მოქ. გიორგი მაქარაშვილმა სოციალურ ქსელ ფეისბუკის საშუალებით სიტყვიერი შეურაცხყოფა მიაყენა საქართველოს პარლამენტის თავმჯდომარეს, შალვა პაპუაშვილს“.
სასამართლომ მაქარაშვილი ადმინისტრაციულ სამართალდამრღვევად ცნო და მის მიმართ სანქციის სახით 5-დღიანი ადმინისტრაციული პატიმრობა გამოიყენა.
თბილისის საქალაქო სასამართლომ უწყვეტი საპროტესტო აქციების მონაწილე ბაჩანა აფხაზავას 4-დღიანი ადმინისტრაციული პატიმრობა შეუფარდა. გადაწყვეტილება მოსამართლე თორნიკე კაპანაძემ მიიღო. შინაგან საქმეთა სამინისტრო აფხაზავას პარლამენტის წინ ტროტუარზე ქვეითთა გადაადგილებისთვის დაბრკოლების შექმნას ედავებოდა.
მუხლი, რომლის მიხედვითაც ადმინისტრაციული სამართალდარღვევის ოქმები შედგა, სანქციის სახით 15 დღემდე ადმინისტრაციულ პატიმრობას ითვალისწინებს, ორგანიზატორის შემთხვევაში − 20 დღემდე ვადით. ამ მუხლით სახდელდადებული პირის მიერ სამართალდარღვევის განმეორებით ჩადენა უკვე სისხლის სამართლის დანაშაულია და ერთ წლამდე თავისუფლების აღკვეთით ისჯება.
თბილისის საქალაქო სასამართლომ საპროტესტო აქციების მონაწილეთა ადმინისტრაციული სამართალდარღვევის საქმეებზე რამდენიმე გადაწყვეტილება მიიღო. საქმეები ტროტუარის ან გზის სავალი ნაწილის სავარაუდო გადაკეტვას უკავშირდება.
მოსამართლე ზვიად ცეკვავამ განიხილა ანი ფრიდონაშვილის საქმე. შინაგან საქმეთა სამინისტრო მას 17 დეკემბერს ტროტუარის გადაკეტვას ედავებოდა. სასამართლომ ფრიდონაშვილს 2-დღიანი ადმინისტრაციული პატიმრობა შეუფარდა.
პარტია „ახალის“ წევრს, ნოდარ ჩაჩანიძეს, 3-დღიანი ადმინისტრაციული პატიმრობა შეეფარდა. გადაწყვეტილება მოსამართლე თორნიკე კაპანაძემ მიიღო. შინაგან საქმეთა სამინისტრო ჩაჩანიძეს 18 დეკემბერს ტროტუარის გადაკეტვას ედავებოდა.2-დღიანი ადმინისტრაციული პატიმრობა შეეფარდა უწყვეტი პროტესტის მონაწილეს, თამუნა გიორგაძეს. გადაწყვეტილება მოსამართლე ზვიად ცეკვავამ მიიღო. შინაგან საქმეთა სამინისტრო გიორგაძეს 17 დეკემბრის აქციაზე ტროტუარზე დგომას, ხოლო 7 თებერვლის შაბათის მარშის დროს საავტომობილო გზის გადაკეტვას ედავებოდა. ორივე საქმე ერთობლივად იქნა განხილული.
მოსამართლე თორნიკე კაპანაძემ ორი დემონსტრანტის, ნესტან მამაცაშვილისა და ნათია გოფოძის, საქმეზე გადაწყვეტილება გამოაცხადა. საქმე ეხებოდა 31 იანვარს, შაბათის მარშის დღეს, გზის სავალი ნაწილის სავარაუდო „ხელოვნურად გადაკეტვას“.
მამაცაშვილისა და გოფოძის საქმეები ერთ წარმოებად გაერთიანდა. სასამართლომ ორივე დემონსტრანტი ადმინისტრაციულ სამართალდამრღვევად ცნო. ნესტან მამაცაშვილს, როგორც მცირეწლოვანი შვილების დედას, ადმინისტრაციული პატიმრობა არ შეეფარდა და მის მიმართ სანქციის სახით 5,000-ლარიანი ჯარიმა განისაზღვრა. ნათია გოფოძეს კი სასამართლომ 2-დღიანი ადმინისტრაციული პატიმრობა შეუფარდა.
თბილისში საპროტესტო შეკრებების მონაწილეთა ადმინისტრაციული დაკავებებისა და პატიმრობის შეფარდების ახალი შემთხვევები ფიქსირდება. 5 მაისს, თბილისის საქალაქო სასამართლომ რამდენიმე სამოქალაქო აქტივისტს ადმინისტრაციული პატიმრობა შეუფარდა იმ საქმეებზე, რომლებიც, გზის სავალ ნაწილზე ან ტროტუართან დგომას/გადაადგილების შესაძლო შეფერხებას უკავშირდება.
თბილისის საქალაქო სასამართლოს მოსამართლე კობა ჩაგუნავამ აქტივისტი დათა ქაშიაშვილი ადმინისტრაციულ სამართალდამრღვევად ცნო და 4-დღიანი ადმინისტრაციული პატიმრობა შეუფარდა. სასამართლო სხდომის დასრულების შემდეგ ქაშიაშვილი სასამართლოს დარბაზიდან პირდაპირ დროებითი მოთავსების იზოლატორში გადაიყვანეს. გავრცელებული ინფორმაციით, საქმეში არ ფიგურირებს არცერთი დაზარალებული პირი, რომელიც დაადასტურებდა, რომ ქაშიაშვილის ქმედებამ გადაადგილებაში ხელი შეუშალა. ასევე არ არის წარმოდგენილი ვიდეომტკიცებულება, რომელიც ადმინისტრაციული სამართალდარღვევის ფაქტს დაადასტურებდა. მიუხედავად ამისა, სასამართლომ პატიმრობის გამოყენების გადაწყვეტილება მიიღო.
2-დღიანი ადმინისტრაციული პატიმრობა შეეფარდა სამოქალაქო აქტივისტ ნინო პეტრიაშვილს, რომელიც 13 წლის შვილის დედაა. შინაგან საქმეთა სამინისტრო მას გზის სავალი ნაწილის გადაკეტვას ედავებოდა. უწყების პოზიციით, 7 თებერვალს, შაბათის მარშის ერთ-ერთ დღეს, მარშის დასრულების შემდეგ პეტრიაშვილი არ გადავიდა პარლამენტის წინ ტროტუარზე და 21:00 საათის შემდეგ რამდენიმე წუთის განმავლობაში გზის სავალ ნაწილზე იდგა.
სასამართლო სხდომაზე ნინო პეტრიაშვილმა განმარტა, რომ ის თითქმის ყველა მარშს ესწრება და პოლიციის მოწოდების შემთხვევაში, როგორც წესი, ტროტუარზე გადადის. მისი თქმით, 7 თებერვალს პოლიციის მხრიდან მკაფიო მოწოდება არ ყოფილა, რის გამოც მონაწილეებმა ჩათვალეს, რომ ადგილზე დარჩენის შესაძლებლობა ჰქონდათ. პეტრიაშვილის შეფასებით, სწორედ ამ გარემოებას უკავშირდება 7 თებერვლის ეპიზოდზე არაერთი ადამიანის პასუხისგებაში მიცემა.
ადმინისტრაციული პატიმრობა შეეფარდა ასევე მოძრაობა „ერას“ წევრს, მსახიობ თამარ თევზაძეს. თევზაძე სასამართლო პროცესს პროტესტის ნიშნად არ დაესწრო. გადაწყვეტილების გამოცხადების შემდეგ პოლიციამ იგი ქუჩაში დააკავა და ხელბორკილები დაადო. არსებული ინფორმაციით, მას 2-დღიანი ადმინისტრაციული პატიმრობა შეეფარდა საქმეზე, რომელიც ასევე ტროტუარზე/გზის სავალ ნაწილთან დგომას უკავშირდება.
თბილისის საქალაქო სასამართლოს ადმინისტრაციულ საქმეთა კოლეგიის მოსამართლე ზვიად ცეკვავამ ბექა ლოხიშვილს პოლიციელების შესახებ სოციალურ ქსელში გამოქვეყნებული პოსტების გამო 15-დღიანი ადმინისტრაციული პატიმრობა შეუფარდა.
არსებული ინფორმაციით, ბექა ლოხიშვილი სოციალურ ქსელში გამოქვეყნებულ პოსტში საპატრულო პოლიციის ქცევას აკრიტიკებდა მოტოციკლეტებთან დაკავშირებულ საკითხზე და პოლიციელებს უცენზურო და შეურაცხმყოფელი სიტყვებით მოიხსენიებდა.
პოლიციელის სიტყვიერი შეურაცხყოფა ადმინისტრაციულ სამართალდარღვევათა კოდექსის 173-ე მუხლის მე-2 ნაწილით გათვალისწინებული სამართალდარღვევაა, რომელიც სანქციის სახით ითვალისწინებს როგორც ჯარიმას, ისე 60 დღემდე ადმინისტრაციულ პატიმრობას. იმავე ქმედების განმეორებით ჩადენა შესაძლოა სისხლისსამართლებრივი პასუხისმგებლობის საფუძველი გახდეს.
თბილისის საქალაქო სასამართლოს მოსამართლე თორნიკე კაპანაძემ საპროტესტო აქციების აქტიურ მონაწილეებს, ია მღებრიშვილსა და ინგა ბუაძეს, 2-2 დღით ადმინისტრაციული პატიმრობა შეუფარდა.
ინგა ბუაძემ „TV პირველს“ განუცხადა, რომ შინაგან საქმეთა სამინისტრო მას 7 თებერვალს საავტომობილო გზის გადაკეტვას ედავებოდა. „მარშის მერე დავრჩი გზაზე, პროტესტი გამიჩნდა, რადგან კანონში შეიტანეს ცვლილება და ტროტუარზე დგომისთვის ჩემს მეგობრებს აჯარიმებდნენ და აკავებდნენ“, – განაცხადა მან.
რაც შეეხება ია მღებრიშვილს, შინაგან საქმეთა სამინისტრო მას 18 დეკემბერს ტროტუარზე გამვლელთათვის დაბრკოლების შექმნას ედავებოდა. მისმა ადვოკატმა მედიასთან განაცხადა, რომ პროცესი რეპლიკების ეტაპზე იყო გადადებული და საქმის არსებითი განხილვა დასრულებული არ ყოფილა, თუმცა მოსამართლემ გადაწყვეტილება ისე გამოაცხადა, რომ ადვოკატმა სასამართლო დარბაზში შესვლაც ვერ მოასწრო.
იმავე დღეს, 9 აპრილის პროტესტთან დაკავშირებით, თბილისის საქალაქო სასამართლოს მოსამართლე ზვიად ცეკვავამ გიო ჩაჩანიძეს 3-დღიანი ადმინისტრაციული პატიმრობა შეუფარდა. საქმე პარლამენტის წინ, ტროტუარზე დგომით ფეხით მოსიარულეთათვის დაბრკოლების შექმნას უკავშირდება.
პროტესტის აქტიურ მონაწილეს, აქტივისტ ანი ჩრდილელს, მოსამართლე ზვიად ცეკვავამ 2-დღიანი ადმინისტრაციული პატიმრობა შეუფარდა. შინაგან საქმეთა სამინისტრო ჩრდილელს 7 მარტს, პარლამენტის მიმდებარედ საავტომობილო გზის ხელოვნურად გადაკეტვას ედავებოდა.
2025 წლის 16 ოქტომბერს „ქართულმა ოცნებამ” მიიღო საკანონმდებლო ცვლილებები სისხლის სამართლისა და ადმინისტრაციულ სამართალდარღვევათა კოდექსებში, რომლებიც მნიშვნელოვნად ზღუდავს დემონსტრანტების მიერ მშვიდობიანი პროტესტის გამოხატვის ფორმებს. ცვლილებების მიხედვით, ადმინისტრაციულ სამართალდარღვევათა კოდექსის 174¹ მუხლს დაემატა მე-10 ნაწილი, რომლის მიხედვითაც შეკრებისა და მანიფესტაციის მონაწილე რიგი ქმედებების ჩადენის შემთხვევაში უალტერნატივოდ ადმინისტრაციული პატიმრობით დაისჯება. ასეთ ქმედებებს შორისაა, მათ შორის, სახის ნიღბით ან სხვა საშუალებით დაფარვა, ცრემლმდენი ან სხვა მსგავსი ნივთიერებების ქონა, ტრანსპორტის ან ქვეითთა გადაადგილებისთვის განზრახ დაბრკოლების შექმნა, დროებითი კონსტრუქციის მოწყობა ან ტრანსპორტის სავალი ნაწილის ნაწილობრივ ან სრულად გადაკეტვა.
აღნიშნული მუხლის დარღვევა ითვალისწინებს ადმინისტრაციულ პატიმრობას 15 დღემდე ვადით, ხოლო თუ სამართალდამრღვევი ორგანიზატორია – 20 დღემდე ვადით. ამავე ცვლილებებით სისხლის სამართლის კოდექსშიც შევიდა ცვლილებები, რომლის თანახმადაც ზემოთ აღწერილი ქმედებების განმეორებით, ერთი წლის განმავლობაში ხელმეორედ დარღვევის შემთხვევაში ქმედება სისხლის სამართლის წესით დაისჯება.
თბილისის საქალაქო სასამართლომ რამდენიმე აქტივისტი სამართალდამრღვევად ცნო გზის გადაკეტვის ბრალდებით. გადაწყვეტილებები მოსამართლე კობა ჩაგუნავამ მიიღო.
საპროტესტო აქციების მონაწილეს, რეზი დუმბაძეს, 4-დღიანი ადმინისტრაციული პატიმრობა შეუფარდეს. შინაგან საქმეთა სამინისტრო მას 31 იანვარს საავტომობილო გზის “ხელოვნურად გადაკეტვას” ედავებოდა.
ამავე მოსამართლემ 3-დღიანი ადმინისტრაციული პატიმრობა შეუფარდა ზვიად მარიამიძეს. ანა მებურიშვილსა და ნათია წიწილაშვილს სასამართლომ სიტყვიერი შენიშვნა გამოუცხადა.
2025 წლის 16 ოქტომბერს „ქართულმა ოცნებამ” მიიღო საკანონმდებლო ცვლილებები სისხლის სამართლისა და ადმინისტრაციულ სამართალდარღვევათა კოდექსებში, რომლებიც მნიშვნელოვნად ზღუდავს დემონსტრანტების მიერ მშვიდობიანი პროტესტის გამოხატვის ფორმებს. ცვლილებების მიხედვით, ადმინისტრაციულ სამართალდარღვევათა კოდექსის 174¹ მუხლს დაემატა მე-10 ნაწილი, რომლის მიხედვითაც შეკრებისა და მანიფესტაციის მონაწილე რიგი ქმედებების ჩადენის შემთხვევაში უალტერნატივოდ ადმინისტრაციული პატიმრობით დაისჯება. ასეთ ქმედებებს შორისაა, მათ შორის, სახის ნიღბით ან სხვა საშუალებით დაფარვა, ცრემლმდენი ან სხვა მსგავსი ნივთიერებების ქონა, ტრანსპორტის ან ქვეითთა გადაადგილებისთვის განზრახ დაბრკოლების შექმნა, დროებითი კონსტრუქციის მოწყობა ან ტრანსპორტის სავალი ნაწილის ნაწილობრივ ან სრულად გადაკეტვა.
აღნიშნული მუხლის დარღვევა ითვალისწინებს ადმინისტრაციულ პატიმრობას 15 დღემდე ვადით, ხოლო თუ სამართალდამრღვევი ორგანიზატორია – 20 დღემდე ვადით. ამავე ცვლილებებით სისხლის სამართლის კოდექსშიც შევიდა ცვლილებები, რომლის თანახმადაც ზემოთ აღწერილი ქმედებების განმეორებით, ერთი წლის განმავლობაში ხელმეორედ დარღვევის შემთხვევაში ქმედება სისხლის სამართლის წესით დაისჯება.
