“ქართულ ოცნებასთან” დაახლოებული პირი, გიორგი გამსახურდია,“ნეტგაზეთისა” და”ბათუმელების” დამფუძნებლების მისამართით ჰომოფობიურ დეზინფორმაციას ავრცელებს

“ქართულ ოცნებასთან” დაახლოებული პირი, გიორგი გამსახურდია, რომელიც, პოლონეთში პოლიციის ატაშეა, გამოცემების “ბათუმელებისა” და “ნეტგაზეთის” დამფუძნებლების, ეთერ თურაძისა და მზია ამაღლობელის მისამართით, ჰომოფობიური შინაარსის დეზინფორმაციულ განცხადებას ავრცელებს და ამით, გამოცემის დისკრედიტაციას ცდილობს. 

მისი დეზინფორმაციული განცხადება მოჰყვა ”ბათუმელების” სტატიას, რომელშიც გამოცემა სვამს კითხვას, იმ ფონზე, როდესაც, “ქართული ოცნების” მიერ შექმნილი, სიძულვილის ენის მონიტორინგის სააგენტო აჯარიმებს და ასამარღთლებს ასობით აქტივისტს, რატომ არ რეაგირებს ის გიორგი გამსახურდიას შემთხვევაში. გიორგი გამსახურდია სოციალურ ქსელში გამოირჩევა უხამსი ლექსიკის გამოყენებით. ის გამუდმებით აგინებს და ლანძღავს ოპონენტებს. 

ამ დეზინფორმაციული პოსტის შემდეგაც, გიორგი გამსახურდიას, არაერთი შერაცხმყოფელი სტატუსი აქვს გამოქვეყნებული Facebook-ის პირად გვერდზე, სადაც გამუდმებით ნიშნავს გამოცემა “ნეტგაზეთს”.

“ქართულ ოცნებასთან” აფილირებული პირი, გია აბაშიძე, “ნეტაზეთის” დისკრედიტაციას ეწევა

“ქართულ ოცნებასთან” აფილირებული პირი, გია აბაშიძე, რომელიც პოზიციონირებს, როგორც ექსპერტი,  ონლაინ გამოცემა “ნეტაზეთს” მოიხსენიებს როგორც – “ევროდაფინანსებულ” კედლის გაზეთს” და ნაციონალური მოძრაობის პროპაგანდისტს – “ნაცბაბლის” და “ნაცსექტის” მედიას.

ექსპერტად წოდებული პირი გამოცემას თავს ესმის მასალის გამო, რომელშიც, ევროკავშირში გაწევრების შესახებ ისლანდიის რეფერენდუმის შედეგებია გაანალიზებული. “ვის უფრო დავუჯეროთ ისლანდიელთა გადაწყვეტილების მიზეზებზე – კრიმინალი მზია ამაღლობელის ევროდაფინანსებულ კედლის გაზეთს, „ნეტგაზეთს“, რომლის „უძვირფასესი“ რესპონდენტები ექსპერტული პაროდიის წარმომადგენლები არიან, თუ ირის ერლინგსდოტირს – გამოცდილ ისლანდიელ ჟურნალისტსა და რედაქტორს?”- წერს აბაშიძე და შემდეგ ავითარებს მმართველი პარტიის ანტიდასავლურ მესიჯბოქსს, რომ ისლანდიამ “ევროკავშირს სუვერენიტეტი არჩია” – “ყველაზე სასაცილო სწორედ ეს არის: ისლანდიელებმა საკუთარი ქვეყნის მომავალზე გადაწყვეტილება თავად მიიღეს, ხოლო „ნაცქაჯებმა” მათ მაგივრად მისი ახსნაც ითავეს”. 

ეს არ არის პირველი შემთხვევა, როდესაც “ნეტგაზეთი” ქართული ოცნების” წევრებისა თუ მათთან დაკავშირებული პირების დისკრედიტაციის სამიზნე გახდა. ამგვარი თავდასხმები, გამოცემის მიმართ, განსაკუთრებით გახშირდა მას შემდეგ, რაც უკანონოდ დააპატიმრეს გამოცემების დამფუძნებელი მზია ამაღობელი.

შეწყალებული დენის კულანინი მიგრაციის დროებითი განთავსების ცენტრში გადაიყვანეს

რუსეთის მოქალაქე დენის კულანინი, რომელიც მიხეილ ყაველაშვილის მიერ შეწყალებულთა სიაში მოხვდა, მიგრაციის დროებითი განთავსების ცენტრშია მოთავსებული. 

კულანინის ადვოკატი დიმიტრი ნოზაძე აცხადებს, რომ დაცვის მხარეს მისი მდგომარეობისა და ადგილსამყოფლის შესახებ ოფიციალური ინფორმაცია არ მიუღია. ნოზაძის განცხადებით, არსებობს რისკი, რომ კულანინი ქვეყნიდან გააძევონ. ადვოკატი მიუთითებს, რომ რუსეთში დაბრუნების შემთხვევაში მას შესაძლოა სერიოზული საფრთხე დაემუქროს, რადგან კულანინი ციხიდან გაგზავნილ წერილებში ღიად უჭერდა მხარს უკრაინას და გმობდა რუსეთის ქმედებებს.

დენის კულანინი 2025 წლის 28 მარტს რუსთაველის გამზირზე შსს-ს ავტომობილის დაზიანების ბრალდებით დააკავეს. მას 2 წლით თავისუფლების აღკვეთა ჰქონდა მისჯილი. კულანინი ბრალს აღიარებდა და წინასასამართლო სხდომაზე ბრალად წარდგენილი ქმედებისთვის ბოდიში მოიხადა.

27 აგვისტოს მიხეილ ყაველაშვილმა მარიამობის დღესასწაულთან დაკავშირებით 226 პირი შეიწყალა.

30 აგვისტოს თბილისის საქალაქო სასამართლომ მიიღო გადაწყვეტილება, რომლის მიხედვითაც კულანინი საქართველოს 1 სექტემბერს, დღის 13:00 საათზე დატოვებს და მესამე ქვეყანაში გაემგზავრება. მანამდე ის კიდევ 48 საათს მიგრაციის დროებითი განთავსების ცენტრში გაატარებს.

აქტივისტი მიხეილ ზაქარეიშვილი Facebook-პოსტების გამო სასამართლოში დაიბარეს

აქტივისტი მიხეილ ზაქარეიშვილი სოციალურ ქსელში წერს, რომ შინაგან საქმეთა სამინისტროში ახლად შექმნილი „სიძულვილის ენის წინააღმდეგ ბრძოლის სამმართველოს“ მიერ შედგენილი მასალების საფუძველზე, 3 სექტემბერს სასამართლოში დაიბარეს. ზაქარეიშვილის განცხადებით, საქმე მის მიერ Facebook-ზე გამოქვეყნებულ სამ პოსტს ეხება. მისივე პოსტიდან ირკვევა, რომ სამართალდარღვევად შეფასებულია სხვადასხვა საჯარო პირისა და პოლიტიკურად აქტიური პირების მიმართ გაკეთებული შეურაცხმყოფელი ან კრიტიკული ფორმულირებები.

ზაქარეიშვილმა ირონიული ფორმით ჩამოთვალა, რა ტიპის გამონათქვამები შეიძლება გახდეს ადმინისტრაციული წარმოების საფუძველი. მათ შორის, მან ახსენა კომენტარები თენგიზ ჭანტურიძის, ვატო შაქარაშვილის, ლევან მახაშვილის, ირაკლი კობახიძისა და სხვა პირების მისამართით.

საჯარო სივრცეში გამოთქმული მოსაზრებების გამო მოქალაქეების წინააღმდეგ ადმინისტრაციული დავები, შსს-ში ახლად შექმნილი “სიძულვილის ენის წინააღმდეგ ბრძოლის სამმართველოს” ოქმების საფუძველზე იწყება. ახალი სამმართველო შსს-ში 1 ივნისიდან ფუნქციონირებს. სამმართველოს ამოცანაა საჯარო სივრცეში გავრცელებული ადამიანის ღირსების შემლახველი, შეურაცხმყოფელი ან სიძულვილის ენის შემცველი განცხადებების მონიტორინგი და პროაქტიული გამოვლენა, თუ ისინი ადმინისტრაციული სამართალდარღვევის ნიშნებს შეიცავს. 

„ქართული ოცნების“ დეპუტატმა ოპოზიციური პარტიებისა და NGO-ების წინააღმდეგ დისკრედიტაციული განცხადება გაავრცელა

„ქართული ოცნების“ დეპუტატმა ლევან მაჭავარიანმა სოციალურ ქსელში ოპოზიციური პარტიების, არასამთავრობო ორგანიზაციებისა და აქტივისტების წინააღმდეგ დისკრედიტაციული განცხადება გაავრცელა. მაჭავარიანი მათ „აგენტურულ ოპოზიციურ პარტიებად“, „მდიდარ NGO-ებად“ და „ულტრამემარცხენე, ფსევდოლიბერალ აქტივისტებად“ მოიხსენიებს. მისი თქმით, ისინი „უცხოელ პატრონებს“ და „ქვეყნის შიგნით რამდენიმე ელჩს“ ემსახურებიან, მათი დღის წესრიგი კი „საქართველოს მუდმივი რყევა“, „საბოტაჟი“, „დესტაბილიზაცია“ და „მავნებლობაა“.

განცხადებაში დეპუტატი ოპოზიციურ პარტიებს, არასამთავრობო ორგანიზაციებსა და აქტივისტებს ბოლო წლებში „რევოლუციის მოწყობის“ მცდელობაში, ქვეყნის წინააღმდეგ მოქმედებაში, ეკლესიისა და სამღვდელოების დისკრედიტაციაში, ასევე „LGBT პროპაგანდის“ მხარდაჭერაში ადანაშაულებს. მაჭავარიანი მათ „უსამშობლოებსაც“ უწოდებს და აცხადებს, რომ საზოგადოებისთვის „ბოდიში აქვთ მოსახდელი“.

„ქართული ოცნების“ წარმომადგენლის მხრიდან მსგავსი რიტორიკა სამოქალაქო საზოგადოების, ოპოზიციური პარტიებისა და კრიტიკული აქტივისტების წინააღმდეგ მიმდინარე დისკრედიტაციული კამპანიის გაგრძელებად შეიძლება შეფასდეს. „აგენტურის“, „უცხოელი პატრონების“, „უსამშობლოებისა“ და „მავნებლობის“ შესახებ ფორმულირებები მიზნად ისახავს კრიტიკული ჯგუფების ლეგიტიმაციის დაკნინებას, მათი საქმიანობის ანტისახელმწიფოებრივად წარმოჩენას და მათ მიმართ მტრული გარემოს გაძლიერებას.

მაისურზე წარწერის გამო დაკავებულ შოთა ოდიშვილს 15-დღიანი ადმინისტრაციული პატიმრობა შეეფარდა

მაისურზე არსებული წარწერის გამო დაკავებულ შოთა ოდიშვილს მოსამართლე ნინო ენუქიძემ 15-დღიანი ადმინისტრაციული პატიმრობა შეუფარდა. ადვოკატ გიორგი ტაბატაძის ინფორმაციით, ოდიშვილი გურჯაანის დროებითი მოთავსების იზოლატორშია გადაყვანილი. შოთა ოდიშვილი საპროტესტო აქციების აქტიური მონაწილეა. ის 23 აგვისტოს თბილისში, რუსთაველის გამზირზე გამართული აქციის შემდეგ, მთავრობის ადმინისტრაციასთან დააკავეს.

ადვოკატის განცხადებით, ოდიშვილი მთავრობის ადმინისტრაციის წინ, შემაღლებულ ადგილზე იჯდა და ტელეფონში სუდოკუს თამაშობდა. ტაბატაძის თქმით, ოდიშვილი პოლიციელებთან კომუნიკაციაში არ შესულა, თუმცა მოგვიანებით სამართალდამცველებმა მას პოლიციელების შეურაცხყოფაში დასდეს ბრალი.

ადვოკატის განმარტებით, ოდიშვილს ადმინისტრაციულ სამართალდარღვევათა კოდექსის 166-ე მუხლით – წვრილმანი ხულიგნობა – მაისურზე არსებული წარწერის გამო, ხოლო 173-ე მუხლით  პოლიციის კანონიერი მოთხოვნისადმი დაუმორჩილებლობა – პოლიციელების სავარაუდო შეურაცხყოფის საფუძველზე შეუდგინეს სამართალდარღვევის ოქმი. ტაბატაძის თქმით, საქმეში არ არსებობს მტკიცებულება, რომელიც დაადასტურებდა, რომ ოდიშვილმა პოლიციელებს სიტყვიერი შეურაცხყოფა მიაყენა.

პოლიციამ უკრაინის საელჩოსთან აქციის მონაწილეებს დროშებით მხარდაჭერის გამოხატვა შეუზღუდა

უკრაინის დამოუკიდებლობის დღესთან დაკავშირებით, უკრაინის საელჩოსთან სოლიდარობის აქცია გაიმართა. აქციის მონაწილეებს საქართველოსა და უკრაინის დროშების გაშლა სურდათ, თუმცა დროშების ზომიდან გამომდინარე, მათი სრულად გაშლისთვის გზის სავალ ნაწილზე გადასვლა იყო საჭირო. პოლიციამ მოქალაქეებს დროშებით გზაზე გადასვლისა და სიმბოლური აქტის განხორციელების საშუალება არ მისცა. ამის შემდეგ, აქციის მონაწილეებმა მსვლელობა ტროტუარის გამოყენებით დაიწყეს.

სოლიდარობის მსვლელობა ტარას შევჩენკოს ძეგლთან დასრულდა. გავრცელებული ინფორმაციით, ადგილზე პოლიციამ აქციის მონაწილეებს ძალის გამოყენებით დააკეცინა უკრაინის დიდი დროშა, რომლის დაკეცვასაც ისინი რამდენიმე წუთში ისედაც აპირებდნენ. ამასთან, პოლიციამ აქციის მონაწილეები ძალის გამოყენებით გადაიყვანა ტროტუარზე.

პენიტენციურმა სამსახურმა პატიმრისთვის ლაშა ბუღაძის რომანის გადაცემა „გაურკვეველი შინაარსის ლიტერატურის“ მოტივით შეზღუდა

სპეციალურმა პენიტენციურმა სამსახურმა თავისუფლებააღკვეთილ ნანა სანდერს ლაშა ბუღაძის რომანი „დამკვირვებელი“ არ გადასცა. უწყებამ უარი წიგნის სათაურის „ბუნდოვანებითა“ და მისი შინაარსის „გაურკვევლობით“ ახსნა.

ორგანიზაცია „საფარისთვის“ გაგზავნილ წერილში პენიტენციური სამსახური მიუთითებს, რომ რომანის სათაური „არ იძლევა ერთმნიშვნელოვანი ინტერპრეტაციის შესაძლებლობას, განსაკუთრებით პენიტენციურ დაწესებულებასთან მიმართებით“. უწყების განმარტებით, „გაურკვეველი შინაარსის ლიტერატურა“, რომელიც შესაძლოა საფრთხეს უქმნიდეს პატიმრის უსაფრთხოებას ან დაწესებულების ნორმალურ ფუნქციონირებას, ციხეში ვერ იქნება შეგზავნილი. „საფარის“ ხელმძღვანელი ბაია პატარაია აცხადებს, რომ ნანა სანდერს ინფორმაციის მიღების უფლება შეეზღუდა. ლაშა ბუღაძე კი პენიტენციური სამსახურის განმარტებას დისკრიმინაციულად და ცენზურის მცდელობად აფასებს.

“საქართველოს ახალგაზრდა იურისტთა ასოციაციის” (საია) შეფასებით, წიგნის პენიტენციურ დაწესებულებაში შეტანაზე უარი უხეშად არღვევს თავისუფლებააღკვეთილი პირების უფლებებს და ცენზურის შემაშფოთებელ მაგალითს წარმოადგენს. საია მიუთითებს, რომ წიგნის სათაურზე აბსტრაქტული მითითება ვერ ამართლებს ინფორმაციის მიღების უფლების შეზღუდვას.

აღსანიშნავია, რომ „დამკვირვებელი“ დისტოპიური რომანია, რომელიც საქართველოში დესპოტის თითქმის ნახევარსაუკუნოვან მმართველობას შეეხება. აგვისტოში წიგნი, სხვა გამოცემებთან ერთად, „ბიბლუსის“ ერთ-ერთ ფილიალში ვანდალიზმის სამიზნეც გახდა.

„ქართულ ოცნებასთან“ აფილირებულ Facebook-გვერდზე არასამთავრობო ორგანიზაციების წინააღმდეგ მორიგი დისკრედიტაციული ქარდი გავრცელდა

„ქართულ ოცნებასთან“ აფილირებულ Facebook-გვერდზე გავრცელდა ქარდი, რომელშიც არასამთავრობო ორგანიზაციები კვლავ „უცხოეთიდან დაფინანსებულ NGO-ებად“ არიან მოხსენიებული. ქარდში გამოყენებულია ამირან სალუქვაძის განცხადება, სადაც ის ორგანიზაციების წარმომადგენლებს „დაქირავებულ პატრიოტებად“ მოიხსენიებს და მოქალაქეებს მის Telegram-არხზე შეერთებისკენ მოუწოდებს.

გავრცელებული ქარდი იმეორებს პროსამთავრობო ნარატივს, რომელიც სამოქალაქო საზოგადოების ორგანიზაციებს არა დამოუკიდებელ საზოგადოებრივ აქტორებად, არამედ „უცხოეთიდან დაფინანსებულ“ და “პოლიტიკური ინტერესებით” მოქმედ ჯგუფებად წარმოაჩენს. მსგავსი ფორმულირებები არასამთავრობო ორგანიზაციების წინააღმდეგ მიმდინარე დისკრედიტაციული კამპანიის გაგრძელებად შეიძლება შეფასდეს.

რეჟისორ უტა ბერიას განცხადებით, კინოცენტრი ფილმის „ცრემლსადენი გაზი“ ჩვენების შეზღუდვას ცდილობს

რეჟისორ უტა ბერიას განცხადებით, საქართველოს ეროვნულმა კინოცენტრმა ფილმ „ცრემლსადენი გაზის“ მსოფლიო პრემიერამდე საპროდიუსერო კომპანიას გაფრთხილების წერილი გაუგზავნა, რომლის მიხედვითაც, ფილმის საჯაროდ ჩვენების შემთხვევაში კომპანიას ფულადი ჯარიმა დაეკისრებოდა. ბერიას თქმით, კინოცენტრმა მსგავსი შინაარსის წერილი ლოკარნოს საერთაშორისო კინოფესტივალსაც გაუგზავნა.

რეჟისორი აცხადებს, რომ პრობლემები ჯერ კიდევ ფილმის წარმოების ეტაპზე დაიწყო. მისი თქმით, 2022 წელს კონკურსში გამარჯვებით მოპოვებული დაფინანსების ნაწილი – 500,000 ლარის თითქმის ნახევარი – ეროვნულმა კინოცენტრმა გაურკვეველი მიზეზით არ ჩარიცხა. ბერიას შეფასებით, კინოცენტრი ჯერ ფილმის დასრულების შეფერხებას ცდილობდა, ახლა კი ცდილობს, ფილმი მაყურებლამდე არ მივიდეს.

ფილმი „ცრემლსადენი გაზი“ ნაწილობრივ თბილისში მიმდინარე საპროტესტო აქციების დროს არის გადაღებული. ლოკარნოს საერთაშორისო კინოფესტივალზე მიღებული ჯილდო ბერიამ 2024 წლის პროევროპული აქციების დროს დაკავებულ მათე დევიძეს მიუძღვნა, რომელსაც მან „საქართველოში ყველაზე ახალგაზრდა პოლიტიკური პატიმარი“ უწოდა.

კინოცენტრის განცხადებით, ფილმის წარმოებისთვის საპროდიუსერო კომპანიას ბიუჯეტიდან 279,625 ლარი აქვს მიღებული. უწყების განმარტებით, ვინაიდან საპროდიუსერო კომპანიამ ფილმის დასრულებული ვერსია ეროვნულ კინოცენტრს არ წარუდგინა „დადგენილი პროცედურების შესაბამისად“, ფილმის საჯარო ჩვენებაზე თანხმობის გაცემა შეუძლებელი გახდა. კინოცენტრის ცნობით, აღნიშნული გარემოებები ლოკარნოს კინოფესტივალსაც აცნობეს.

მიუხედავად ამისა, ლოკარნოს საერთაშორისო კინოფესტივალმა ფილმი კონკურსში დატოვა და მაყურებელს მისი ნახვის შესაძლებლობა მიეცა. ფილმმა ფესტივალზე დამოუკიდებელი ჟიურის პრიზი მიიღო.

რეჟისორი ბესო სოლომონაშვილი კინოცენტრის მოქმედებას ცენზურად აფასებს. მისი თქმით, ეს არის „ავტორიტარული რეჟიმის ცენზურა“ ფილმზე, რომელიც ხელისუფლებას არ აწყობს. სოლომონაშვილის შეფასებით, ხელისუფლება ცდილობს, გააჩუმოს რეჟისორები, მწერლები და ხელოვანები, რადგან „ღირსეული ხელოვნება არის სიმართლე, დიქტატორულ რეჟიმს კი სიმართლე არ სჭირდება“.